XƏBƏRLƏR

"İndiki Ermənistan dövlətinin ərazisində yerləşən Azərbaycan mədəni irsinə aid abidələrin tədqiqatına başlanılıb".

"Report"un Gürcüstan bürosu xəbər verir ki, bunu Azərbaycanın mədəniyyət naziri Anar Kərimov deyib.

Onun sözlərinə görə, bunun üçün arxiv sənədlərlə tanışlıq tələb olunur:

"Bu istiqamətdə Türkiyə, Gürcüstan və Rusiya arxivlərində işlərin aparılması planlaşdırılır".

Nazir qeyd edib ki, araşdırma nəticəsində Ermənistandakı Azərbaycana məxsus irs nümunələrinin hazırkı vəziyyəti üzə çıxacaq:

"Tədqiqatın yekunları beynəlxalq ictimaiyyətə də təqdim olunacaq. Araşdırma ilə bağlı Gürcüstan tərəfi ilə əməkdaşlığa hazırıq".

Azərbaycan Turizm Bürosu “Avrasiya Turizm Sənayesi Mütəxəssisləri Birliyi” tərəfindən keçirilən “PROBrend” turizm üzrə 3-cü beynəlxalq marketinq müsabiqəsində qalib seçilib.

Dövlət Turizm Agentliyindən AZƏRTAC-a bildirilib ki, Naftalan şəhərinin brendinqi və azerbaijan.travel veb-saytı ilə müsabiqəyə qatılan Azərbaycan Turizm Bürosu “İlin kəşfi” adlı nominasiya üzrə mükafata layiq görülüb. Onlayn formatda keçirilən mükafatlandırma mərasimində qaliblərə xüsusi diplomlar təqdim olunub.

Qeyd edək ki, müsabiqəyə 4 ölkədən 10 nominasiya üzrə 318 müraciət qəbul olunub.

2018-ci ildə yaradılmış “Avrasiya Turizm Sənayesi Mütəxəssisləri Birliyi” üzvlər arasında təcrübə mübadiləsi üçün kommunikasiya platforması kimi Avrasiya məkanında beynəlxalq turizmin inkişafında maraqlı tərəflərin qarşılıqlı əməkdaşlığının təmin olunması istiqamətində fəaliyyət göstərir.

İyulun 8-də Tbilisidəki M.F.Axundzadə adına Azərbaycan Mədəniyyəti Muzeyindəki rəsm qalereyasında dahi Azərbaycan şairi Nizami Gəncəvinin anadan olmasının 880 illiyinə həsr olunmuş rəsm sərgisi açılıb.

Sərgidə N.Gəncəviyə həsr olunmuş miniatür və rəsm əsərləri nümayiş etdirilib.

Azərbaycanlı və gürcü rəssamlar öz əsərlərini təqdim ediblər.

Eyni zamanda, Gürcüstanın Kançeli adına simli kvarteti maraqlı konsert proqramı ilə çıxış edib. Ansambl Üzeyir Hacıbəylinin və digər bəstəkarların N.Gəncəvinin şeirlərinə bəstələdikləri əsərləri ifa ediblər.

Azərbaycanın mədəniyyət naziri Anar Kərimov, Gürcüstanın mədəniyyət nazirinin müavini Kaxa Sixarelidze, Azərbaycan səfirliyinin əməkdaşları, ictimaiyyət nümayəndələri sərgini izləyiblər.

Nazir A.Kərimov tədbirdə çıxış edərək Azərbaycan Prezidentinin 2021-ci ili “Nizami Gəncəvi İli” elan etməsinin əhəmiyyətindən danışıb. Bu cür qərarların Azərbaycan elminin, mədəniyyətinin, incəsənətinin inkişafında xidmətləri olan şəxslərə dövlət qayğısının bariz nümunəsi olduğunu qeyd edib.

O, qonşu Gürcüstanda bu cür sərgilərin açılmasının mədəni əlaqələrimizin inkişafına xidmət etdiyini bildirib.

Gürcüstan mədəniyyət nazirinin müavini Kaxa Sixarelidze dahi söz ustadı, fəlsəfi şair N.Gəncəviyə həsr olunmuş sərginin açılışını yüksək qiymətləndirib.

Bildirib ki, N.Gəncəvinin əsərlərinə Gürcüstanda da böyük maraq var. Onun gözəl şeirləri, fəlsəfi fikirləri bu gündə sevilir və gələcək nəsillər üçün elm mənbəyi olacaq.

Sərgidə, həmçinin Azərbaycanın Gürcüstandakı səfirliyinin Nizami Gəncəvinin 880 illik yubileyi ilə əlaqədar elan etdiyi rəsm müsabiqəsinin qaliblərinə və fərqlənən gənc rəssamlara diplom və hədiyyələr təqdim olunub.

Tbilisidə səfərdə olan mədəniyyət naziri Anar Kərimov iyulun 7-də Gürcüstan Parlamentinin sədri Kaxa Kuçava ilə görüşüb.  Görüşdə iki ölkə arasında parlamentlərarası əlaqələr, mədəniyyət, turizm və humanitar sahələrdə əməkdaşlıq məsələləri diqqət mərkəzində olub. Kaxa Kuçava Azərbaycanın mədəniyyət nazirinin Gürcüstana səfərini, xüsusilə də, keçirilən görüşləri və müzakirə olunan məsələləri yüksək qiymətləndirib. Bildirib ki, bu cür səfərlər iki dost və qardaş ölkə olan Azərbaycan ilə Gürcüstan arasında strateji tərəfdaşlıq münasibətlərinin daha möhkəmlənməsinə xidmət edir. Nazir Anar Kərimov Azərbaycanın Gürcüstan ilə münasibətlərin bütün sahələrdə inkişafına böyük önəm verdiyini qeyd edib. Görüşdə ölkələrimiz arasında əlaqələrin bütün sahələrdə inkişafının vacibliyi qeyd olunub, qarşılıqlı maraq doğuran digər məsələlər ətrafında fikir mübadiləsi aparılıb. Görüşdə Azərbaycanın Gürcüstandakı səfiri Faiq Quliyev və digər rəsmi şəxslər iştirak edib.  

Tbilisidə səfərdə olan mədəniyyət naziri Anar Kərimov iyulun 7-də Gürcüstan Parlamentinin sədri Kaxa Kuçava ilə görüşüb.  Görüşdə iki ölkə arasında parlamentlərarası əlaqələr, mədəniyyət, turizm və humanitar sahələrdə əməkdaşlıq məsələləri diqqət mərkəzində olub. Kaxa Kuçava Azərbaycanın mədəniyyət nazirinin Gürcüstana səfərini, xüsusilə də, keçirilən görüşləri və müzakirə olunan məsələləri yüksək qiymətləndirib. Bildirib ki, bu cür səfərlər iki dost və qardaş ölkə olan Azərbaycan ilə Gürcüstan arasında strateji tərəfdaşlıq münasibətlərinin daha möhkəmlənməsinə xidmət edir. Nazir Anar Kərimov Azərbaycanla Gürcüstan arasında mədəniyyət sahələrinin inkişafına böyük önəm verdiyini qeyd edib. Görüşdə ölkələrimiz arasında mədəni əlaqələrin möhkəmlənməsinin vacibliyi qeyd olunub, qarşılıqlı maraq doğuran digər məsələlər ətrafında fikir mübadiləsi aparılıb. Görüşdə Azərbaycanın Gürcüstandakı səfiri Faiq Quliyev və digər rəsmi şəxslər iştirak edib.  

Xəbər  verdiyimiz kimi Azərbaycanın mədəniyyət naziri Anar Kərimov  Gürcüstanda səfərdədir. Nazir səfər çərçivəsində Tbilisidə görkəmli azərbaycanlı ədib Cəlil Məmmədquluzadənin ev muzeyini ziyarət edib, muzeyin hazırkı vəziyyəti ilə tanış olub.  Gürcüstanın Azərbaycanlı Ağsaqqallar Şurasının sədri İsak Novruzov nazirə məlumat verərək deyib ki, muzey 1998-ci ildən fəaliyyət göstərir. Muzeyin yerləşdiyi ikimərtəbəli binada 10  ailə yaşayır.  Muzey binasının möhkəmləndirilməsi, bərpası, təmiri və bədii tərtibatı ilə bağlı müzakirələr aparılıb. Anar Kərimov muzeyin bərpası, eksponatların yenilənməsi məsələsinin diqqət mərkəzində saxlanılacağını bildirib. Sonra nazir Anar Kərimov görkəmli dövlət xadimi, ədib və həkim Nəriman Nərimanovun Tbilisidəki ev-muzeyində olub.  Nazirə muzeyin fəaliyyəti barədə ətraflı məlumat verilib. Anar Kərimov Azərbaycan dramaturgiyasının banisi Mirzə Fətəli Axundzadə adına Azərbaycan Mədəniyyəti Muzeyini də ziyarət edib. Mədəniyyət nazirinin rəhbərlik etdiyi nümayəndə heyəti Tbilisidəki Botanika bağında Görkəmli Azərbaycanlıların Panteonunu da ziyarət ediblər, məzarlar üzərinə gül dəstələri qoyublar. *** Səfər çərçivəsində mədəniyyət naziri Anar Kərimov iyulun 7-də Tbilsinin mərkəzindəki Gürcüstan Dövlət Muzeyində olub.  Muzeyin baş direktoru David Lordkipanidze muzeyin tarixi, burada saxlanılan eksponatlar barədə  Azərbaycanın mədəniyyət nazirinə ətraflı məlumat verib. Bildirilib ki, ilk dəfə 1853-ci ildə “Qafqaz Muzeyi“ kimi fəaliyyət göstərən muzeydə xeyli sayda eksponat saxlanılır.  1905-ci ildə tikintisinə başlanılan müasir muzey kompleksinin tikintisi xeyli müddət müxtəlif səbəblərdən dayandırılıb. 1926-cı ildə tikintisi başa çatan Gürcüstan Milli Muzeyinin nəzdində  14 muzey və kompleks fəaliyyət göstərir. Bu gün Akademik Simon Canaşiya adına Gürcüstan Dövlət Muzeyində Azərbaycan mədəniyyətini, incəsənətini, qədim tarixini əks etdirən eksponatlar nümayiş etdirilir. Nazir Anar Kərimov muzeylə tanış olub, Azərbaycan və Gürcüstanın dövlət və milli muzeyləri arasında əməkdaşlıq əlaqələrinin genişlənməsinin vacibliyini qeyd edib. Bildirib ki, birgə əməkdaşlıq sayəsində qədim Qafqaz xalqlarının mədəniyyətini, incəsənətini dünyaya çatdırmaq olar. Görüşlərdə Azərbaycanın Gürücstandakı səfiri Faiq Quliyev və digər rəsmi şəxslər iştirak edib. *** Gürcüstanda səfərdə olan mədəniyyət naziri Anar Kərimov Heydər Əliyev adına Tbilisi Dövlət Peşəkar Azərbaycan Dram Teatrına baş çəkib. Nazir mədəniyyət ocağının yerləşdiyi binanın vəziyyəti və fəaliyyəti ilə tanış olub. Bədii rəhbər kollektivin il ərzində 3-4 tamaşanı səhnələşdirdiyini, beynəlxalq teatr festivallarına qatıldıqlarını, mədəniyyət ocağına teatr sənətinə həvəsi olan azərbaycanlı gənclərin cəlb olunduğunu qeyd edib. Anar Kərimov teatrın səhnələrinə, rekvizitlərin saxlanıldığı otaqlara baxış keçirib, truppa üzvləri ilə görüşüb. Qonaqlara teatrın kiçik səhnəsində Əziz Nesinin “Öldür məni, sevgilim” əsəri əsasında hazırlanmaqda olan tamaşadan bir hissə təqdim olunub. Nümayəndə heyəti daha sonra teatr üçün Azərbaycanın Gürcüstandakı səfirliyinin binası yaxınlığında, Qorgosali küçəsində Azərbaycan teatrı üçün yeni binanın inşa olunacağı əraziyə baş çəkib. Nazir “Socar Energy Georgia” şirkətinin dəstəyi ilə hazırlanan yeni tikilinin layihəsi ilə tanış olub. Məlumat verilib ki, inşaat işləri zamanı ərazidə yerləşən köhnə hamam binası da tarixi görkəminə uyğun bərpa olunacaq və məkanda sərgi zalları yaradılacaq. Daha sonra nazir Anar Kərimov və səfir Faiq Quliyev dahi bəstəkar və müğənni, Xalq artisti Bülbülün büstünü ziyarət edib, gül dəstələri düzüblər. A.Kərimovu Gürcüstanın mədəniyyət, gənclər və idman nazirinin birinci müavini Kaxa Sixarulidze, Azərbaycanın Gürcüstandakı səfiri Faiq Quliyev və “Socar Energy Georgia” şirkətinin Baş direktoru Mahir Məmmədov müşayiət ediblər.  

Amerikalı aktrisa Codi Foster Kann festivalının ən yüksək mükafatı hesab olunan “Qızıl palma budağı”nın laureatı seçilib.

TASS agentliyinə istinadla xəbər verir ki, aktrisaya bu mükafatı ispaniyalı rejissor Pedro Almodovar təqdim edib. Təşkilatçılar bildirib ki, Codi Fosterin bu mükafatı Kann festivalında qazandığı sayca doqquzuncu mükafatıdır.

Aktrisa yarım əsrlik karyerasında festivalda müxtəlif mükafatlar qazanıb. Belə ki, Foster hələ 3 yaşında ikən səhnədə debüt edib. Erkən yaşlarından televiziya reklamlarında və uşaqlar üçün filmlərdə çəkilməyə başlayıb. “Festival bütün həyatımı dəyişib, mən ona çox borcluyam. Burada aktyorlara bəslənilən hörmət mənim üçün çox əzizdir”, - deyə Codi Foster bildirib.

Gürcüstan ilə Azərbaycan arasında münasibətlər strateji tərəfdaşlıq səviyyəsindədir. Ölkələrimiz birlikdə bir sıra önəmli iqtisadi layihələr həyata keçirib. Bu gün mədəniyyət sahəsi də daxil olmaqla, bir çox sahələrdə sıx əməkdaşlıq edirik.

Bunu Gürcüstanın Baş nazirinin müavini, xarici işlər naziri David Zalkaliani Azərbaycanın mədəniyyət naziri Anar Kərimovla görüşdən sonra jurnalistlərə açıqlamasında söyləyib.

Onun sözlərinə görə, Azərbaycanın mədəniyyət nazirinin Gürcüstana səfəri qarşılıqlı əlaqələrin yüksək səviyyədə olduğunu göstərir.

“Ölkələrimiz arasında münasibətlər bu gün də uğurla inkişaf edir və bu tempi saxlamaq bizim üçün çox vacibdir”, – deyə Zalkaliani vurğulayıb.

Nazir Gürcüstan-Azərbaycan strateji tərəfdaşlığının yeni səviyyəyə yüksələcəyinə ümidvar olduğunu bildirib.

Gürcüstan ilə beynəlxalq səviyyədə əməkdaşlıq Azərbaycan üçün vacib məsələlərdən biridir. Biz beynəlxalq təşkilatlar, o cümlədən UNESCO çərçivəsində əlaqələrimizi bundan sonra daha da gücləndirəcəyik.

Bu sözləri Azərbaycanın mədəniyyət naziri Anar Kərimov Gürcüstan Baş nazirinin müavini, xarici işlər naziri David Zalkaliani ilə görüşdən sonra mətbuata açıqlamasında deyib.

Bildirib ki, görüşdə Azərbaycanın təşəbbüskarı olduğu “Mədəniyyət naminə sülh” qlobal kampaniya layihəsi Gürcüstan tərəfinə təqdim edilib. Bu təşəbbüsün regionda sülh, barışıq və qarşılıqlı anlaşmanı təşviq edən layihə olduğu diqqətə çatdırılıb.

Nazir bildirib ki, Azərbaycan Gürcüstan ilə mədəni əlaqələri inkişaf etdirəcək. Bu, hər iki xalqın daha da yaxınlaşmasına xidmət göstərəcək. Azərbaycan ilə Gürcüstan arasındakı tarixi əlaqələr qarşılıqlı əməkdaşlığımızın digər sahələrinə də sirayət edir. Mədəniyyət bizim dövlətlərimizi və xalqlarımızı bir-birinə daha da yaxınlaşdırır. Bu sahədə əməkdaşlığın gücləndirilməsi qərara alınıb.

“IWS Globe” Beynəlxalq Suluboya Cəmiyyətinin Azərbaycandakı nümayəndəliyi olan “IWS Azerbaijan”ın və Xətai Sənət Mərkəzinin nəzdində açılmış “IWS Baku Khatai Art Gallery”in təşkilatçılığı, Mədəniyyət Nazirliyi, Azərbaycan Rəssamlar İttifaqının və Azərbaycan Dövlət Rəsm Qalereyasının dəstəyi ilə açılacaq “Su və rəng ahəngi-2021” akvarel sərgisində iştirak edəcək rəssamlar müəyyənləşib.

Xətai Sənət Mərkəzindən bildirilib ki, sərgidə iştirak etmək üçün 100-dən çox müraciət qeydə alınıb. Onların arasından “IWS Azerbaijan” akvarel cəmiyyətinin bədii şurası tərəfindən 51 iştirakçı müəyyən edilib. Seçilmiş rəssamlar iyulun 10-dək əsərlərini çərçivələnmiş vəziyyətdə Xətai Sənət Mərkəzinə təqdim etməlidirlər.

Xatırladaq ki, sərgi iyulun 15-də Xətai Sənət Mərkəzində təşkil olunacaq.