XƏBƏRLƏR

Kino sahəsində əməkdaşlıq məqsədilə ölkəmizdə səfərdə olan Türkiyənin mədəniyyət və turizm nazirinin müavini Ahmet Misbah Demircanın rəhbərlik etdiyi nümayəndə heyəti, eləcə də digər ölkələrdən gəlmiş kino sahəsi üzrə mütəxəssislər Qobustan Milli Tarix-Bədii Qoruğunu ziyarət ediblər.

Qonaqları Azərbaycan Respublikası mədəniyyət nazirinin müşaviri Elnur Əliyev, Mədəniyyət Nazirliyi Kinematoqrafiya şöbəsinin müdiri Rüfət Həsənov və nazirliyin digər məsul şəxsləri müşayiət ediblər.

Qonaqlar Azərbaycan tarixi-mədəni irsinin daş yaddaşı olan Qobustan abidələri, buradakı qayaüstü rəsmlər, qoruq ərazisindəki muzey kompleksi ilə maraqla tanış olublar. Onlara qoruq ərazisində qazıntılar nəticəsində aşkar olunmuş artefaktlar haqqında da məlumat verilib.

Azərbaycan Milli Xalça Muzeyi yeni eksponatlarla, qürbətdən vətənə qaytarılan, əcdadlarımızın əl işi olan nəfis xalçalarla tanışlıq məqsədilə yeni aksiyaya start verib.

Muzeydən bildirilib ki, ziyarətçilər iyul ayı ərzində həftənin IV günləri saat 18.30-da muzeyin yenilikləri ilə tanış ola bilərlər. Muzeyə giriş və bələdçi xidməti ödənişsizdir. Bələdçilər ziyarətçilərə yeni eksponatlar haqqında maraqlı məlumatlar verəcəklər.

Karantin qaydalarına əsasən ekskursiya yalnız 10 nəfərlik qruplarla təşkil olunacaq.

İyunun 28-də Beynəlxalq Muğam Mərkəzində Mədəniyyət Nazirliyi tərəfindən təsis edilən Azərbaycan Film Komissiyasının (“Filming Azerbaijan”) təqdimat mərasimi keçirildi. Mərasimdən öncə Azərbaycan Respublikasının mədəniyyət naziri Anar Kərimov “Lenfilm” kinostudiyasının baş direktoru Fyodor Şerbakovun rəhbərlik etdiyi Rusiya nümayəndə heyəti ilə görüş keçirdi.  Görüşdə Rusiya ilə mədəniyyət sahəsində ikitərəfli münasibətlərin inkişafı, kino sahəsində təcrübə mübadiləsi, mövcud əlaqələrin genişləndirilməsi, birgə layihələrin icrası ilə bağlı fikir mübadiləsi aparıldı, sahənin gələcək inkişaf perspektivləri müzakirə olundu. Azərbaycan Film Komissiyasının təqdimat mərasimində dövlət qurumları və Bakıdakı diplomatik missiyaların nümayəndələri, ölkəmizdən, eləcə də Türkiyə, Ukrayna, Avstriya, Serbiya və Rusiyadan kino mütəxəssisləri iştirak edib. Mərasimdə çıxış edən mədəniyyət naziri Anar Kərimov hər kəsi salamladı, xarici ölkələrdən təşrif buyuran qonaqlara təşəkkürünü bildirdi. Nazir qeyd etdi ki, Azərbaycan Film Komissiyası beynəlxalq və yerli peşəkar icmalara ölkəmizi çəkiliş məkanı kimi kəşf etməyə imkan verəcək. Məqsədimiz ölkənin bu sahədə potensialını ortaya qoymaqdır. Vurğulandı ki, bu gün Azərbaycan azad etdiyi torpaqlarda quruculuq işləri aparır. Prezident İlham Əliyevin tapşırığına əsasən, Mədəniyyət Nazirliyi də bu bərpa və quruculuq prosesində iştirak edir. Artıq mədəniyyətin bu torpaqlara qaytarılması prosesinə başlanılıb. Nazirlikdə həyata keçirilən islahatlara toxunan nazir dedi: “Cənab Prezidentin tapşırığına əsasən, nazirlikdə islahatlara başlanılıb. Dövlət başçısının mədəniyyət haqqında tövsiyələrini rəhbər tutaraq islahatlara start vermişik. Bu gün mədəniyyət sahəsi müstəqilliyimizin təzahürü və eyni zamanda iqtisadiyyata töhfə verən bir sahə kimi formalaşmalıdır. İslahatlar prosesində kino sahəsi də prioritet təşkil edir. Ölkəmizdə kino işinin təkmilləşməsi, dünya bazarında Azərbaycanın rəqabətini artırmaq üçün Kino Agentliyinin yaradılması nəzərdə tutulur. Azərbaycan Film Komissiyası haqqında məlumat verən Anar Kərimov bildirdi ki, bu layihənin gerçəkləşməsi üçün ölkəmizdə hər cür şərait var: mədəni irs, müasir infrastruktur, habelə təbii şərait, tarixi məkanlar və s. Nazir daha sonra tədbirdə iştirak edən xarici ölkə səfirliklərinin nümayəndələrini yeni komissiyanın işində yaxından iştiraka səslədi. Dedi ki, bu layihə nəinki kino sahəsi, eləcə də ölkə iqtisadiyyatı üçün əhəmiyyəti rol oynayacaq. Diqqətə çatdırıldı ki, il ərzində beynəlxalq istehsalçıların Azərbaycana cəlb olunması həyata keçirilib, eyni zamanda “Netflix” platforması ilə yeni irimiqyaslı layihələr gözlənilir. Daha sonra çıxış edən Azərbaycan Film Komissiyasının direktoru İlkin Məmmədli bildirdi ki, komissiyanın yaradılması ölkəmizin müxtəlif sahələrdə geniş potensialının göstəricisidir: “Əsas məqsədimiz bu potensialı reallaşdırmaq və Azərbaycanı beynəlxalq kino istehsalçıları üçün geniş imkanları olan çəkiliş məkanı kimi təqdim etmək, beynəlxalq kino istehsalçıları ilə müştərək layihələr həyata keçirmək və ölkəmizə xaricdən maliyyə vəsaitinin cəlb edilməsini təmin etməkdir. Ümid edirik ki, həyata keçirdiyimiz layihələr və ümumi fəaliyyətimiz Azərbaycanın kino sahəsində, habelə digər sahələrdə dünyada tanıdılmasına və nüfuzunun artırılmasına töhfə verəcək”. Daha sonra İlkin Məmmədli “Filming Azerbaijan” tərəfindən Bakı Media Mərkəzinin dəstəyi ilə çəkilmiş “Azərbaycan” adlı qısa tanıtım çarxını təqdim etdi. Sonra Azərbaycan Film Komissiyasının veb-səhifəsi tanıdıldı. Direktor sonda “Filming Azerbaijan” komandası tərəfindən Azərbaycanın şanlı Qələbəsi ilə yekunlaşan 44 günlük müharibə zamanı işğaldan azad edilən Qarabağa həsr olunmuş və 30 il ərzində dağıdılmış tarixi-mədəni irsimizi əks etdirən videoçarxı təqdim etdi. Türkiyə Respublikası mədəniyyət və turizm nazirinin müavini Ahmet Misbah Demircan çıxış edərək Türkiyə nümayəndə heyətlərinin ötən gün işğaldan azad olunmuş Ağdama səfəri haqda məlumat verdi. O, işğaldan qurtarılmış ərazilərimizin yenidən dirçələcəyinə, buraya həyatın yenidən qayıdacağına əminliyini ifadə etdi. Nazir müavini Türkiyə Film Komissiyasının 2019-cu ildə yaradıldığını vurğulayaraq qardaş ölkə kimi bütün təcrübə və bacarıqlarını Azərbaycanla bölüşəcəklərini diqqətə çatdırdı. “Lenfilm” kinostudiyasının (Rusiya) baş direktoru Fyodor Şerbakov layihənin təqdimatı münasibətilə azərbaycanlı həmkarlarını təbrik edərək gələcəkdə bu sahədə qarşılıqlı əməkdaşlığın perspektivlərindən söz açdı. O, rusiyalı kinematoqrafçılara bu layihə haqqında məlumat verəcəyini, yaxın zamanlarda qarşılıqlı müzakirələrin keçirilməsi üçün şərait yaranacağına inandığını dedi. Mədəniyyət Nazirliyi Kinematoqrafiya şöbəsinin müdiri Rüfət Həsənov diqqətə çatdırdı ki, əslində, Film Komissiyası təşəbbüsü ölkəmiz üçün yenilik deyil. Çünki 2000-ci illərin əvvəlində Professional Kinorejissorlar Gildiyası tərəfindən bu istiqamətdə əhəmiyyətli addımlar atılmışdı: “Təəssüf ki, növbəti illərdə Azərbaycan kinosunda müşahidə edilən durğunluq Film Komissiyasına dair fəaliyyətin inkişafını ləngitdi və biz Mədəniyyət Nazirliyinin yeni komandası kimi bu təşəbbüsün əhəmiyyətini dərk edərək onu dirçəltməyə qərar verdik”. Qeyd olundu ki, son bir il ərzində Azərbaycan kinosunda mövcud vəziyyətin ciddi təhlili aparılıb, beynəlxalq təcrübə öyrənilib və nəticədə plan iqtisadiyyatından bazar iqtisadiyyatına keçidin zəruriliyi müəyyən edilib: “Bu keçidin reallaşdırılması məqsədilə üç əsas istiqamət üzrə işlərin həyata keçirilməsinə başlanılmışdı. İlk növbədə kino sahəsində hüquqi-normativ bazanın beynəlxalq təcrübəyə əsasən təkmilləşdirilməsinə böyük ehtiyac duyulur. Bununla bağlı müvafiq dövlət strukturları ilə əməkdaşlıq aparılır və biz ümid edirik ki, yaxın zamanlarda bu istiqamətdə əhəmiyyətli nəticələrin şahidi olacağıq. İkinci prioritet istiqamət insan kapitalının artırılmasıdır. Bu məqsədlə Mədəniyyət Nazirliyi tərəfindən bir sıra təlim-tədris proqramları həyata keçirilir və gələcəkdə də kinonun bütün sahələrində təcrübə mübadiləsinin aparılması, ümumi bilik və bacarıq səviyyəsinin artırılması istiqamətində layihələr planlaşdırılır. Üçüncü sahə isə yeni dövrün tələb və çağırışlarına uyğun dayanıqlı infrastrukturun qurulması və inkişaf etdirilməsidir. Mən çox şadam ki, biz bu gün bunun bariz nümunəsi olan Azərbaycan Film Komissiyasını təqdim edirik”. Türkiyə Mədəniyyət və Turizm Nazirliyi Kino idarəsinin rəhbəri Erkin Yılmaz Türkiyə Film Komissiyasının fəaliyyəti haqqında məlumat verdi. Bildirdi ki, layihə üzrə Türkiyədə 507 film ərsəyə gətirilib. O, bu sahədə Azərbaycanın da uğur qazanacağına şübhə etmədiklərini diqqət çatdırdı. Tədbirin rəsmi hissəsindən sonra konsert proqramı təqdim edildi. Caz musiqisindən ibarət konsertdə Nicat Aslanovun rəhbərliyi ilə Diana Hacıyevanın ifaları maraqla qarşılandı.

Ordu-xalq birliyinin ekran təcəssümü. İyunun 26-da – Azərbaycan Silahlı Qüvvələri Günündə Heydər Əliyev Sarayında “Biz” tarixi-sənədli filminin təqdimat mərasimi keçirildi. Mədəniyyət Nazirliyinin dəstəyi ilə Bakı Media Mərkəzinin C.Cabbarlı adına “Azərbaycanfilm” Kinostudiyası ilə birgə istehsal etdiyi ekran əsəri Azərbaycan Ordusunun Vətən müharibəsində şanlı Zəfərinə həsr olunub. Filmin premyerasında Azərbaycanın mədəniyyət naziri Anar Kərimov, Türkiyənin mədəniyyət və turizm nazirinin müavini Ahmet Misbah Demircanın başçılıq etdiyi nümayəndə heyəti, Müdafiə Nazirliyinin müxtəlif qoşun növlərini təmsil edən hərbçilər, o cümlədən Türkiyə, Rusiya və Avropanın aparıcı kino mütəxəssisləri iştirak edirdilər. İlk olaraq torpaqlarımızın azadlığı uğrunda canlarını fəda edən Vətən övladlarının əziz xatirəsi bir dəqiqəlik sükutla yad edildi. Tədbiri giriş sözü ilə açan mədəniyyət naziri Anar Kərimov Silahlı Qüvvələr Günü münasibətilə əsgər və zabitlərimizi təbrik etdi. Bildirdi ki, ölkəmiz tarixinin ən gözəl günlərini yaşayır: “Buna görə də Ali Baş Komandan İlham Əliyev başda olmaqla qüdrətli Ordumuza təşəkkür edirəm. Vətən müharibəsində Ordumuzun göstərdiyi qəhrəmanlıqları gələcək nəsillərə çatdırmaq bizim borcumuzdur. Bu gün Şuşamızda bayram keçiririk, işğaldan azad olunmuş şəhərlərimizdə quruculuq işləri aparılır. 44 günlük Vətən müharibəsində qardaş Türkiyə daim bizlərin yanında oldu, həm mənəvi, həm siyasi, həm də informasiya dəstəyi göstərdi. Bir daha bu dəstəyə görə qardaş Türkiyə Respublikasına təşəkkürümü bildirirəm. Bundan sonra bu qardaşlıq daha da möhkəmlənəcək. Hamı bilməlidir ki, artıq iki qardaş dövlətin əməkdaşlığı Şuşa Bəyannaməsi ilə ən yüksək səviyyəyə – müttəfiqliyə çatıb”. Anar Kərimov qeyd etdi ki, döyüş meydanın savaşımız bitsə də, diplomatik səviyyədə və mədəniyyət sahəsində mübarizəmiz hələ davam edir: “Biz bu savaşda da qalib gəlməliyik. Mədəniyyət sahəsində də gücümüzü, qardaşlığımızı bütün dünyaya elan etməliyik”. Nazir çıxışının sonunda filmin ərsəyə gəlməsində göstərdiyi dəstəyə görə Bakı Media Mərkəzinə minnətdarlığını bildirdi. Türkiyənin mədəniyyət və turizm nazirinin müavini Ahmet Misbah Demircan ilk olaraq Silahlı Qüvvələr Günü münasibətilə Türkiyənin Prezidenti Rəcəb Tayyib Ərdoğan və mədəniyyət və turizm naziri Mehmet Nuri Ərsoyun təbriklərini çatdırdı. Bildirdi ki, Türkiyə həmişə olduğu kimi, bu gün də qardaş Azərbaycanın yanındadır: “Türkiyənin tanınmış şairi Namiq Kamal “Vətən mahnısı” şeirində belə deyirdi: “Əcdadımızın heybəti mərufi-cahandır, Fitrət dəyişir sanma, bu qan yenə o qandır!”. Biz bundan sonra Qarabağ Zəfəri şeirini yazacağıq ki, oxunsun, musiqisini ifa edəcəyik ki, dinlənilsin, filmini çəkəcəyik ki, izlənilsin. Bu sadaladıqlarım ən az Zəfər qədər önəmlidir. Belə ki, Qələbəni ordular qazanır, ancaq bütün zəfərləri mədəniyyət, sənət, şeir və şüur yaşadır. Yaşasın əsgərlərimiz, şeirlərimiz, birliyimiz. Şanlı Vətən, Şanlı Vətən, Azərbaycan, Azərbaycan, Azərbaycan!”. Qardaş Azərbaycana əmin-amanlıq və firavanlıq arzulayıram”. Daha sonra “Biz” filminin yaradıcı heyəti səhnəyə dəvət olundu. Filmin ideya müəllifi və rejissoru, Bakı Media Mərkəzinin icraçı direktoru Orman Əliyev ekran əsəri haqqında məlumat verdi. Qeyd etdi ki, filmdə Vətən müharibəsi dövründə müzəffər Ali Baş Komandanın rəhbərliyi ilə qəhrəmancasına ön cəbhədə döyüşən Azərbaycan əsgəri ilə yanaşı, arxa cəbhədə onu dəstəkləyən vətənpərvər sadə vətəndaşların da ümumi Qələbədə oynadığı rol göstərilir: “Həm əsgərlərimiz, həm də sadə vətəndaşların müharibə dövründə keçirdiyi mənəvi-psixoloji ruh yüksəkliyi, ortaya çıxan yeni müsbət cizgilər və ən əsası hər bir azərbaycanlının Qələbəyə sona qədər inam bəsləməsi filmdə öz əksini tapıb. Filmdə eyni zamanda müharibə dövründə fenomenə çevrilən, videosu və fotosu ən çox paylaşılan, ən çox müzakirə olunan sadə insanların müsahibələrinə də yer verilib. Müharibədə baş verən taleyüklü hadisələri məhz onlar və həmin anın şahidləri danışırlar”. Filmin adına da diqqət çəkən Orman Əliyev söylədi ki, Azərbaycan Ordusu Vətən müharibəsində qalib gəlməklə öz gücünü və imkanlarını bütün dünyaya nümayiş etdirdi. Bu həm də Azərbaycan insanının – yəni bizlərin gücü idi. Hər bir azərbaycanlı mən yox, məhz “biz” deyərək ümumi Qələbədə öz tarixi rolunu oynadı. Sonda “Biz” tarixi-sənədli filmi nümayiş olundu. Qeyd edək ki, filmin prodüseri C.Cabbarlı adına “Azərbaycanfilm” Kinostudiyasının direktoru Fariz Əhmədov, operatorları Əli Əliyev, Ziya Babayev, səs rejissoru Azad Vəliyev, redaktorları Ayaz Mirzəyev və İlham Bərxudar, montajçısı isə Əsgər Rəhimovdur.

Ordu-xalq birliyinin ekran təcəssümü. İyunun 26-da – Azərbaycan Silahlı Qüvvələri Günündə Heydər Əliyev Sarayında “Biz” tarixi-sənədli filminin təqdimat mərasimi keçirildi. Mədəniyyət Nazirliyinin dəstəyi ilə Bakı Media Mərkəzinin C.Cabbarlı adına “Azərbaycanfilm” Kinostudiyası ilə birgə istehsal etdiyi ekran əsəri Azərbaycan Ordusunun Vətən müharibəsində şanlı Zəfərinə həsr olunub. Filmin premyerasında Azərbaycanın mədəniyyət naziri Anar Kərimov, Türkiyənin mədəniyyət və turizm nazirinin müavini Ahmet Misbah Demircanın başçılıq etdiyi nümayəndə heyəti, Müdafiə Nazirliyinin müxtəlif qoşun növlərini təmsil edən hərbçilər, o cümlədən Türkiyə, Rusiya və Avropanın aparıcı kino mütəxəssisləri iştirak edirdilər. İlk olaraq torpaqlarımızın azadlığı uğrunda canlarını fəda edən Vətən övladlarının əziz xatirəsi bir dəqiqəlik sükutla yad edildi. Tədbiri giriş sözü ilə açan mədəniyyət naziri Anar Kərimov Silahlı Qüvvələr Günü münasibətilə əsgər və zabitlərimizi təbrik etdi. Bildirdi ki, ölkəmiz tarixinin ən gözəl günlərini yaşayır: “Buna görə də Ali Baş Komandan İlham Əliyev başda olmaqla qüdrətli Ordumuza təşəkkür edirəm. Vətən müharibəsində Ordumuzun göstərdiyi qəhrəmanlıqları gələcək nəsillərə çatdırmaq bizim borcumuzdur. Bu gün Şuşamızda bayram keçiririk, işğaldan azad olunmuş şəhərlərimizdə quruculuq işləri aparılır. 44 günlük Vətən müharibəsində qardaş Türkiyə daim bizlərin yanında oldu, həm mənəvi, həm siyasi, həm də informasiya dəstəyi göstərdi. Bir daha bu dəstəyə görə qardaş Türkiyə Respublikasına təşəkkürümü bildirirəm. Bundan sonra bu qardaşlıq daha da möhkəmlənəcək. Hamı bilməlidir ki, artıq iki qardaş dövlətin əməkdaşlığı Şuşa Bəyannaməsi ilə ən yüksək səviyyəyə – müttəfiqliyə çatıb”. Anar Kərimov qeyd etdi ki, döyüş meydanın savaşımız bitsə də, diplomatik səviyyədə və mədəniyyət sahəsində mübarizəmiz hələ davam edir: “Biz bu savaşda da qalib gəlməliyik. Mədəniyyət sahəsində də gücümüzü, qardaşlığımızı bütün dünyaya elan etməliyik”. Nazir çıxışının sonunda filmin ərsəyə gəlməsində göstərdiyi dəstəyə görə Bakı Media Mərkəzinə minnətdarlığını bildirdi. Türkiyənin mədəniyyət və turizm nazirinin müavini Ahmet Misbah Demircan ilk olaraq Silahlı Qüvvələr Günü münasibətilə Türkiyənin Prezidenti Rəcəb Tayyib Ərdoğan və mədəniyyət və turizm naziri Mehmet Nuri Ərsoyun təbriklərini çatdırdı. Bildirdi ki, Türkiyə həmişə olduğu kimi, bu gün də qardaş Azərbaycanın yanındadır: “Türkiyənin tanınmış şairi Namiq Kamal “Vətən mahnısı” şeirində belə deyirdi: “Əcdadımızın heybəti mərufi-cahandır, Fitrət dəyişir sanma, bu qan yenə o qandır!”. Biz bundan sonra Qarabağ Zəfəri şeirini yazacağıq ki, oxunsun, musiqisini ifa edəcəyik ki, dinlənilsin, filmini çəkəcəyik ki, izlənilsin. Bu sadaladıqlarım ən az Zəfər qədər önəmlidir. Belə ki, Qələbəni ordular qazanır, ancaq bütün zəfərləri mədəniyyət, sənət, şeir və şüur yaşadır. Yaşasın əsgərlərimiz, şeirlərimiz, birliyimiz. Şanlı Vətən, Şanlı Vətən, Azərbaycan, Azərbaycan, Azərbaycan!”. Qardaş Azərbaycana əmin-amanlıq və firavanlıq arzulayıram”. Daha sonra “Biz” filminin yaradıcı heyəti səhnəyə dəvət olundu. Filmin ideya müəllifi və rejissoru, Bakı Media Mərkəzinin icraçı direktoru Orman Əliyev ekran əsəri haqqında məlumat verdi. Qeyd etdi ki, filmdə Vətən müharibəsi dövründə müzəffər Ali Baş Komandanın rəhbərliyi ilə qəhrəmancasına ön cəbhədə döyüşən Azərbaycan əsgəri ilə yanaşı, arxa cəbhədə onu dəstəkləyən vətənpərvər sadə vətəndaşların da ümumi Qələbədə oynadığı rol göstərilir: “Həm əsgərlərimiz, həm də sadə vətəndaşların müharibə dövründə keçirdiyi mənəvi-psixoloji ruh yüksəkliyi, ortaya çıxan yeni müsbət cizgilər və ən əsası hər bir azərbaycanlının Qələbəyə sona qədər inam bəsləməsi filmdə öz əksini tapıb. Filmdə eyni zamanda müharibə dövründə fenomenə çevrilən, videosu və fotosu ən çox paylaşılan, ən çox müzakirə olunan sadə insanların müsahibələrinə də yer verilib. Müharibədə baş verən taleyüklü hadisələri məhz onlar və həmin anın şahidləri danışırlar”. Filmin adına da diqqət çəkən Orman Əliyev söylədi ki, Azərbaycan Ordusu Vətən müharibəsində qalib gəlməklə öz gücünü və imkanlarını bütün dünyaya nümayiş etdirdi. Bu həm də Azərbaycan insanının – yəni bizlərin gücü idi. Hər bir azərbaycanlı mən yox, məhz “biz” deyərək ümumi Qələbədə öz tarixi rolunu oynadı. Sonda “Biz” tarixi-sənədli filmi nümayiş olundu. Qeyd edək ki, filmin prodüseri C.Cabbarlı adına “Azərbaycanfilm” Kinostudiyasının direktoru Fariz Əhmədov, operatorları Əli Əliyev, Ziya Babayev, səs rejissoru Azad Vəliyev, redaktorları Ayaz Mirzəyev və İlham Bərxudar, montajçısı isə Əsgər Rəhimovdur.

Azərbaycan Bəstəkarlar İttifaqının Nizami Gəncəvinin anadan olmasının 880 illiyi münasibətilə peşəkar bəstəkarlar arasında qəzəl-romans janrında elan etdiyi müsabiqənin qalibləri iyunun 29-da mükafatlandırılıb.

Azərbaycan Bəstəkarlar İttifaqının sədri, Xalq artisti Firəngiz Əlizadə keçirilən müsabiqə haqqında məlumat verib.

Münsiflər heyətinin təqdim olunmuş əsərlərə ciddi yanaşdığını bildirən F.Əlizadə deyib ki, bəstəkarların yeni əsərlər haqqında düşünməsinin artıq zamanıdır.

Müsabiqənin özəlliyindən danışan Bəstəkarlar İttifaqının sədri bildirib ki, bu yarışmada yaş məhdudiyyəti olmayıb, qocaman və gənc bəstəkarlar birlikdə iştirak edib: “Sevindirici haldır ki, regionlarda yaşayan bəstəkarlar da müsabiqəyə qatılıb. İnanıram ki, onların yaratdığı əsərlər gələcək müsabiqələrdə birincilik qazanacaq”.

Bu günlərdə müxtəlif müsabiqələrin keçirildiyini söyləyən ittifaqın sədri deyib ki, bu müsabiqələr həm bəstəkarların tanınmasına, həm də onlar arasında rəqabət mühitinin yaranmasına təkan verir.

Bütün əsərləri diqqətlə dinlədiklərini bildirən Bəstəkarlar İttifaqının katibi, Əməkdar incəsənət xadimi, münsiflər heyətinin üzvü Zemfira Qafarova deyib: “Seçim çətin olsa da obyektiv olmağa çalışdıq. Nizami Gəncəvi dahidir və ona maraq heç zaman azalmayacaq”.

Sonra qaliblər mükafatlandırılıb. Birinci dərəcəli mükafata Dadaş Dadaşov, ikinci dərəcəli mükafata Lalə Cəfərova, üçüncü dərəcəli mükafata isə Azər Dadaşov layiq görülüblər. Bəstəkarlardan Tahir İbişov, Fərid Fətullayev və Kəmalə Əlizadə fəxri diplomla təltif olunublar.

Müsabiqənin təşkilində zəhməti olanlara təşəkkürünü bildirən Dadaş Dadaşov bildirib ki, Nizaminin şeirini anlamadan ona musiqi bəstələmək olduqca çətindir.

Türkiyənin İstanbul şəhərində iyunun 28-də başlayan “ACE of MICE” turizm sərgisində Azərbaycan milli stendlə təmsil olunur.

Dövlət Turizm Agentliyindən bildirilib ki, sərginin keçirildiyi İstanbul Konqres Mərkəzində xüsusi bannerlər vasitəsilə Azərbaycanın turizm imkanları ziyarətçilərə nümayiş etdirilir. Buradakı salon, zal və dəhlizlərdə Azərbaycanın turizm potensialını əks etdirən görüntülər əks olunur.

Azərbaycanın təmsil olunduğu stenddə yeni turizm destinasiyası olaraq təqdim olunan Qarabağa xüsusi maraq müşahidə olunub. Milli stendi ziyarət edən İstanbul Ticarət Palatasının rəhbəri Şekib Avdagiç işğaldan azad edilmiş Şuşa şəhərinə Türkiyədə böyük diqqətin olduğunu bildirərək yaxın zamanda buraya səfər edəcəklərini qeyd edib.

Tədbir çərçivəsində təşkil olunmuş ikitərəfli görüşlər zamanı Dövlət Turizm Agentliyinin Aparat rəhbəri Kənan Qasımov Azərbaycan və Türkiyə arasında turizm əlaqələrinin gələcək perspektivlərindən danışıb. Aparat rəhbəri Azərbaycan və Türkiyə əlaqələrinin turizm sahəsi üzrə daha da genişlənəcəyini diqqətə çatdırıb.

Azərbaycan Turizm Bürosunun Baş icraçı direktoru Florian Zenqstşmid “Pandemiyadan sonra turizm və işgüzar tədbirlər sənayesinin gələcəyi” mövzusunda təşkil olunan panel görüşündə iştirak edib.

Florian Zenqstşmid turizmin pandemiyadan ən çox zərər görən sənaye sahəsi olduğunu qeyd edərək postpandemiya dövründə rəqəbətədavamlı və daha dayanıqlı turizmin inkişaf etdirilməsinin mühümlüyünü vurğulayıb.

Tədbirdə, həmçinin Azərbaycan Konqreslər Bürosunun direktoru Sevda Əliyeva “Limitsiz turizm: turizm potensialının inkişaf etdirilməsində Azərbaycan ilə Türkiyə arasında əməkdaşlığın müsbət nəticələri” mövzusunda təşkil olunmuş panel görüşündə təmsil olunub. O, iki qardaş ölkə arasında qarşılıqlı məlumat və təcrübə mübadiləsinin, eləcə də birgə layihələrin həyata keçirilməsinin vacibliyindən danışıb.

Qeyd edək ki, “ACE of MICE” turizm sərgisi 30 iyunadək davam edəcək.

Dünyanın üçüncü ən böyük konqres, toplantı və tədbir sərgisi olan “ACE of MICE” turizm sərgisi 2014-cü ildən etibarən “Türk Hava Yolları” (Turkish Airlines) şirkəti tərəfindən təşkil olunur.

Sayca 8-ci dəfə keçirilən sərginin məqsədi iştirakçı ölkələrə yeni bazarlar və müştərilər qazandırmaqdır. 200 stendin təmsil olunduğu sərgiyə 3 gün ərzində 15 min ziyarətçinin qatılacağı gözlənilir. Sərgidə 11 əsas mövzu üzrə 69 spiker pandemiyadan sonra işgüzar turizm sənayesinin gələcəyinə dair çıxışlar edəcək.

İyunun 30-da Bakı Fotoqrafiya Evində İordaniya dövlətinin yaradılmasının 100 illiyi münasibətilə “Amman, 100 illik yürüş” adlı fotosərgi açılacaq.

"İçərişəhər" Dövlət Tarix-Memarlıq Qoruğu İdarəsindən bildirilib ki, sərgi İordaniya Haşimilər Krallığının ölkəmizdəki səfirliyi, Amman Şəhər İcra Hakimiyyəti və “İçərişəhər” İncəsənət Muzeyinin birgə təşkilatçılığı ilə reallaşacaq.

İyulun 4-dək davam edəcək sərgidə siyasi, tarixi və mədəni əhəmiyyətə sahib olan Amman şəhərinin yüz ildən bəri tarixi inkişafını tərənnüm edən 40 ədəd A3 formatında 5 mm-lik foreks üzərində çap edilmiş fotoşəkillər nümayiş olunacaq. Sərgidə, həmçinin paytaxt şəhərin və onun sakinlərinin mədəniyyətini əks etdirən bir çox fərqli memarlıq və tarixi abidələrin əks olunduğu fotolar da təqdim ediləcək.

Qeyd edək ki, sərgi mövcud karantin rejimi qaydalarına uyğun formada keçiriləcək.

İyulun 8-dən Rusiyanın Tatarıstan Respublikasında "Kazan Kremli" Muzey-Qoruğunda “Xalça sənəti - mənaların təkamülü” adlı sərgi açılacaq.

Respublikanın paytaxtında ilk dəfə olaraq Azərbaycan xalçaçılığına, onun ənənələrinə və müasir təcəssümünə həsr olunmuş genişmiqyaslı ekspozisiya təqdim olunacaq. Kazan tamaşaçısı xalçaları tarixi bir perspektivdə görmək, ornament və gizli mənalar dünyasına qərq olmaq üçün misilsiz bir fürsət əldə edəcək.

Azərbaycan xalçalarının ən dolğun kolleksiyasına malik, dünyanın ilk xalça muzeyi olan Azərbaycan Milli Xalça Muzeyi XIX əsrin sonu – XX əsrin əvvəllərində toxunmuş ecazkar klassik xalça nümunələrini nümayiş etdirəcək. Onların hər biri ornament, rəng tərtibatı və texniki xüsusiyyətlərinə görə müxtəlif regional ənənələri əks etdirən nümunələrdir.

2010-cu ildə UNESCO-nun Bəşəriyyətin Qeyri-Maddi İrsi üzrə Reprezentativ Siyahısına daxil edilmiş Azərbaycan xalçaçılıq sənəti günümüzdə davamlı olaraq yeni yanaşmalarla zənginləşsə də, qədim ənənələrini itirmədən inkişaf edir. Müasir rəssamlar qədim sənətkarlığı yeni yollarla inkişaf etdirərək əsərlər yaradırlar. Bu sərgidə təqdim olunan ənənəvi Azərbaycan xalçalarını və CHINGIZ yaradıcı təxəllüsü ilə işləyən Çingiz Babayevin müəllif əsərlərini birləşdirən məhz bu amildir.

Müasir rəssam xalqının ənənələrinin və mədəniyyət normalarının daşıyıcısı olaraq, eskizləri və onların əsasında toxunmuş xalçalarda öz ornament dilini və xalçanın yeni dramaturgiyasını yaratmış olur. Azərbaycan xalçaçılıq ənənələrini təhrif etmədən, müasir sənət nümunələri yaradaraq interpretasiya edir. Beləliklə, klassik əsərlər yeni müəllif xalçaları ilə qarşı-qarşıya qoyulur, bununla da məsafələri və zamanı qət edərək onlarla dialoqa girir. Sərgidə təqdim olunan "Saf tarix" installyasiyası sənətkar yaradıcılığının açarı ola bilər. Ornamentsiz, birrəngli, təbii yun çalarlı, “tabula rasa”nın klassik nümünəsi olan xalça müxtəlif dövrlərin bir çox simvollarını əsrlər ötdükcə itirsə də əbədidir.

Sərgini müşayiət edən sənədli filmdə Çingiz Babayev tamaşaçılarla yaradıcılıq prosesinin sirlərini bölüşəcək, ənənəvi xalçanın fəlsəfəsindən və müasir yozumundan bəhs edəcək.

Sərginin açılışında layihənin kuratoru, Azərbaycan Milli Xalça Muzeyinin direktoru Şirin Məlikova, eləcə də müasir xalçaların müəllifi Çingiz Babayevin iştirakı planlaşdırılır.

Bu günlərdə şair Faiq Hüseynbəylinin “Arzuların şəhidi” adlı yeni kitabı işıq üzü görüb.

Kitab Cəlilabad rayonunun Alar kəndində anadan olmuş Vətən müharibəsi şəhidi Əkbər Azər oğlu Hüseynli haqqındadır.

Ailənin yeganə oğul övladı olan Əkbər Hüseynli təhsilini yarımçıq qoyaraq hərbi xidmətə getmiş, Murov ətrafındakı döyüşlərdə iştirak etmiş və şəhid olmuşdur.

Oxuculara Faiq Hüseynbəylinin poeması ilə birlikdə şəhid Əkbər haqqında Vəfa Mürsəlqızı, Arzu Göytürk, Gülnarə İsrafil, Şakir Xanhüseynli, Əlirza Həsrət, İltimas Səmimi, Elşad Barat, Tamara Nadirova, İlham Cəsur, İqbal Nəhmət, Xalid Mahmud, Bilal Alarlı, Ənvər Məsud, Allahşükür Ağa, Bəhruz Xəlil və digər şairlərin yazdığı şeirlər, həmçinin müxtəlif müəlliflərin kimlik yazıları təqdim olunur.

Kitabın “Ön söz”ünün müəllifi və redaktoru filologiya üzrə fəlsəfə doktoru Bilal Alarlıdır.