XƏBƏRLƏR

Bakı Şəhər Mədəniyyət Baş İdarəsinin təşəbbüsü ilə Silahlı Qüvvələr Günü münasibətilə tanınmış bəstəkar, Əməkdar incəsənət xadimi Cavanşir Quliyevin “Əsgər marşı” əsəri yeni aranjimanda təqdim olunub.

İdarədən bildirilib ki, şanlı qələbəmizdən ruhlanaraq vətənpərvərlik mövzusunda lentə alınan “Əsgər marşı” mahnısı Əvəz Muradov tərəfindən aranjiman edilib və Azərbaycan Dövlət Akademik Xor Kapellasının ifasında səslənir.

İyunun 26-da Azərbaycan Respublikasının mədəniyyət naziri Anar Kərimov Türkiyə Respublikası mədəniyyət və turizm nazirinin müavini Ahmet Misbah Demircanın rəhbərlik etdiyi nümayəndə heyətini qəbul edib. Görüşdə Türkiyə Respublikasının Azərbaycandakı fövqəladə və səlahiyyətli səfiri Cahit Bağcı, Türkiyənin Mədəniyyət və Turizm Nazirliyi Kino İdarəsinin baş direktoru Erkin Yılmaz, Azərbaycan Respublikası mədəniyyət nazirinin müşaviri Elnur Əliyev, Mədəniyyət Nazirliyinin Kinematoqrafiya şöbəsinin müdiri Rüfət Həsənov, həmçinin hər iki ölkənin nazirliklərinin məsul şəxsləri iştirak edib. Qonaqları səmimi salamlayan nazir Anar Kərimov Azərbaycan Respublikasının Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın Azərbaycanın və bütövlükdə Türk dünyasının qədim mədəniyyət beşiyi olan Şuşa şəhərində baş tutan görüşündən söz açıb. Ölkələrimiz arasında strateji səviyyədə inkişaf edən münasibətlərin vəziyyətindən yüksək məmnunluğunu ifadə edən nazir iyunun 15-də dövlət başçıları tərəfindən imzalanan “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”ni xüsusilə qeyd edib. Azərbaycan və Türkiyə arasındakı dostluq və qardaşlıq münasibətlərinin keyfiyyətcə yeni, müttəfiqlik səviyyəsinə qaldırılmasının iki ölkə və onların xalqlarının maraq və mənafelərinə xidmət etdiyini vurğulayıb. Türkiyə ilə mədəniyyət sahəsində əməkdaşlığın daha da gücləndirilməsi və müxtəlif istiqamətlər üzrə təcrübə mübadiləsinin aparılmasının vacibliyini diqqətə çatdıran nazir 44 günlük Vətən müharibəsində Azərbaycanın qazandığı tarixi Qələbənin həm türk dünyasında, həm də beynəlxalq platformada ən yüksək səviyyədə, eləcə də kino vasitəsilə təbliğində Türkiyə ilə işbirliyinin böyük önəm daşıdığını bildirib.  Səmimi qəbula görə nazirə təşəkkürünü bildirən Türkiyə nümayəndə heyətinin rəhbəri Ahmet Misbah Demircan mədəniyyət sahəsində əməkdaşlığın daha da dərinləşdirilməsinə bu kimi qarşılıqlı səfərlərin əhəmiyyətli töhfə verdiyini deyib. Kino sənayesinin Azərbaycan-Türkiyə mədəni əməkdaşlığının mühüm istiqamətlərindən biri olduğunu vurğulayan nazir müavini bu çərçivədə lazımi dəstəyin göstəriləcəyini qeyd edib. Kino vasitəsilə beynəlxalq arenaya çıxmaq üçün ölkələrimizin yüksək potensiallı hekayə və mövzularının olduğunu, bədii və sənədli filmlərlə yanaşı, animasiya filmlərinin önəmini diqqətə çatdırıb. Görüş zamanı kino sahəsində Türkiyə ilə qarşılıqlı əməkdaşlıq çərçivəsində tarixi zəfərə və Qarabağa həsr olunan müştərək filmlərin, serialların istehsalı, birgə film festivallarının keçirilməsi, hər iki ölkənin dövlət və özəl kino qurumları və kinematoqrafçıları arasında təcrübə mübadiləsinin aparılması məsələləri müzakirə olunub. Həmçinin, Türkiyə - Azərbaycan müştərək layihəsi olan “Fulya” filmindən söz açılıb və filmin çəkilişlərinə artıq başlanıldığı bildirilib.

Azərbaycan Respublikasının mədəniyyət naziri Anar Kərimov iyunun 25-də Kuba Respublikasının ölkəmizdəki fövqəladə və səlahiyyətli səfiri Alfredo Nieves Portuondo ilə görüş keçirib. Qonağı salamlayan nazir Anar Kərimov Azərbaycan və Kuba arasında ikitərəfli münasibətlərin müxtəlif sahələr üzrə inkişafından məmnunluğunu ifadə edib. Ölkələrimiz arasında mədəniyyət sahəsində əlaqələrin genişləndirilməsinin əhəmiyyətindən danışan nazir bunun üçün əlverişli imkanların olduğunu qeyd edib.  Görüş zamanı iki ölkə arasında  mədəniyyətin müxtəlif sahələrində təcrübə mübadiləsinin, tədbirlərin təşkilinin əhəmiyyəti qeyd edilib, ikitərəfli münasibətlərin gələcək inkişaf perspektivləri və əməkdaşlıq imkanları barədə fikir mübadiləsi aparılıb. Qəbula görə nazirə təşəkkürünü bildirən səfir Alfredo Nieves Portuondo Azərbaycan və Kuba arasında mədəniyyət sahəsində birgə fəaliyyətin səmərəli təşkili məqsədilə bu kimi görüşlərin əhəmiyyətini qeyd edib. Mövcud əməkdaşlığın daha da möhkəmləndirilməsinin vacibliyini diqqətə çatdıran diplomat ölkəsinin bu sahədə əməkdaşlığa hazır olduğunu diqqətə çatdırıb.  Görüş tərəflər arasında qarşılıqlı maraq doğuran məsələlərin müzakirəsi ilə davam edib.

Kanadada yaşayan soydaşımız, tanınmış silah ustası Emin Məmmədov iki qiymətli əl işini Azərbaycan Milli Xalça Muzeyinə bağışlayıb. İyunun 24-də muzeydə məşhur silahsazın hədiyyə etdiyi xəncərlərin təqdimatı keçirildi. Mərasim 26 İyun – Silahlı Qüvvələr Gününə həsr olunmuşdu. Tədbiri giriş sözü ilə açan Milli Xalça Muzeyinin direktoru, Əməkdar mədəniyyət işçisi Şirin Məlikova təqdim olunan nümunələrlə bağlı məlumat verdi. Bildirdi ki, Azərbaycanın ənənəvi bədii silah işi ustası Emin Məmmədovun muzeyə hədiyyə etdiyi xəncərlərdən biri Şamaxı silahsazlıq ənənələri əsasında hazırlanıb. Xəncərin qını böyük maraq doğurur. Onun yuxarısında ibadət edən zadəgan kişi, aşağı hissəsində isə milli geyimli bəy və gəlin, həmçinin zəngin nəbati naxışlar həkk olunub. Xəncərin tiyəsinin hər iki üzündə bir ədəd oxluq var. Burada kətəbələrin içərisində ərəb əlifbası ilə xəncər ustasının adı – “Emin Məmmədov” və “Azərbaycan” sözləri həkk olunub. İkinci xəncərin bədii quruluşu isə Qacar dövrünün silahları üçün xarakterikdir. Onun qını və dəstəyi gümüşlə inkrustasiya olunub, zərif buta və digər nəbati naxışlarla bəzədilib. Xəncərin tiyəsinin hər iki üzündə üç ədəd oxluq var. Burada zərvərəqlə ərəb əlifbası ilə “Allah türkləri qorusun” kəlməsi, kətəbələrin içərisində xəncər ustasının adı və “Azərbaycan” yazısı həkk olunub. Muzeyin direktoru vurğuladı ki, hər iki xəncərin hazırlanmasında Dəməşq (Suriya) poladı, qızıl inkrustasiya, buynuz sümüyü və s. materiallardan istifadə edilib. Müasir dövrdə qədim sənət ənənələrimizin yaşadığını sübut edən bu dəyərli əsərlər muzeyin “Bədii metal” kolleksiyasına daxil edilib və daimi ekspozisiyada öz yerini tutur. Müdafiə Nazirliyinin əməkdaşı, Əməkdar incəsənət xadimi, polkovnik Abdulla Qurbani Silahlı Qüvvələr Günü münasibətilə tədbir iştirakçılarını təbrik etdi. Bildirdi ki, bu il Silahlı Qüvvələr Günü daha yüksək əhval-ruhiyyədə qeyd olunur: “Çünki Prezident İlham Əliyevin rəhbərliyi ilə Ordumuz 44 gün davam edən Vətən müharibəsində doğma Qarabağımızı düşməndən təmizlədi və düşməni kapitulyasiya aktını imzalamağa məcbur etdi”. Sonra müğənni, Əməkdar artist Cahangir Qurbanov “Qələbəyə gedən yollar” mahnısını ifa etdi. AMEA-nın Memarlıq və İncəsənət İnstitutunun aparıcı elmi işçisi, Azərbaycan Dövlət Rəssamlıq Akademiyasının professoru Telman İbrahimov çıxışında silahsazlığın qədim sənət növü olduğunu bildirdi. Söylədi ki, vaxtilə döyüşlərdə 50-60 minlik ordu vuruşurdu. Bu savaşlarda döyüşçüləri silahlarla məhz silahsaz ustalar təchiz edirdi. Qafqaz Tarixi Mərkəzinin direktoru Rizvan Hüseynov xəncərlərin Azərbaycan Milli Xalça Muzeyində sərgilənməsini yüksək qiymətləndirdi. Qeyd etdi ki, bizlər bu cür silah növlərini qoruyub gələcək nəsillərə çatdırmalıyıq. Daha sonra Emin Məmmədovun qızı Aysel Məmmədova çıxış edərək göstərilən diqqətə görə tədbir iştirakçılarına təşəkkürünü bildirdi. Sonda muzeyə təqdim olunan xəncərlərə baxış keçirildi. Mərasimdə Pakistan və Mərakeşin ölkəmizdəki səfirləri Bilal Haye və Məhəmməd Adil Embarş, İranın Azərbaycandakı Səfirliyinin Mədəniyyət Mərkəzinin sədri Əli Purmərcan, “Rossotrudniçestvo” agentliyinin Azərbaycandakı nümayəndəliyinin – Bakıdakı Rusiya İnformasiya-Mədəniyyət Mərkəzinin (RİMM) rəhbəri İrek Zinnurov, mədəniyyət və incəsənət xadimləri iştirak edirdi. Qeyd edək ki, silahsaz Emin Məmmədov Kanadada yaşayıb fəaliyyət göstərsə də, Azərbaycanın bu qədim sənət ənənələrini davam etdirir. O həm bu qəbildən sənətkarlıq nümunələri hazırlayır, həm də tədqiqatı və təbliğatı ilə məşğul olur. Sənətkar eyni zamanda Aleksandr Voloviklə birlikdə nəfis tərtibatı və məlumatların zənginliyi ilə maraq doğuran “The Azerbaijan Armourer’s Art” (“Azərbaycan silah sənəti”) kitabının müəllifidir. Emin Məmmədov UNESCO tərəfindən bu ilin aprel ayında Parisdə təşkil olunan “Sülh üçün mədəniyyət” (Culture for Peace) müsabiqəsində birinci yerə layiq görülüb.

“Qlobal Əməkdaşlıq və Analitik Araşdırmalar Mərkəzi” İctimai Birliyinin rəhbərliyi ilə təsis edilən “Beynəlxalq İslam Sufizmi” adlı ingilisdilli elmi-araşdırmalar jurnalının bu il üçün yeni nömrəsi dərc edilib.

İslam təsəvvüfü elmi-tədqiqatlarının nəticələrini əks etdirən jurnal ildə iki dəfə ingilis dilində dərc ediləcək. Beynəlxalq standartlara tam cavab verən jurnalın redaksiya heyəti və ikili anonim rəyçi qrupu da bu sahədə tanınmış xarici mütəxəssislərdən formalaşıb. Jurnalın fəxri redaktoru Türkiyənin tanınmış təsəvvüf–araşdırmaçısı, yazıçı Cəmalnur Sarqut və baş redaktoru Azərbaycan İlahiyyat İnstitutunun rektoru Aqil Şirinovdur.

“Beynəlxalq İslam Sufizmi” jurnalı İslam təsəvvüfü sahəsindəki elmi yeniliklərlə bağlı tədqiqatçılar, tələbələr və oxucuların müzakirə aparmaları üçün əlaqələndirici platforma rolunu oynayır. Bu jurnalın nəşr edilməsi İslam təsəvvüfü ilə bağlı yaranan aktual akademik məsələlərə cavab vermək və bu sahənin daha da inkişafına dəstək olmaq məqsədi daşıyır.

İctimai Birliyin sədri, “Beynəlxalq İslam Sufizmi” jurnalının təsisçi-redaktoru Xəyalə Məmmədova qeyd edib ki, jurnal İslam təsəvvüfü sahəsində tanınmış Azərbaycan və türk alimlərinin birgə əməyi sayəsində ərsəyə gəlir: “Əsas məqsədlərimizdən biri jurnalı dünyanın nüfuzlu jurnallar siyahısına daxil etməkdir. Ümumiyyətlə, elmi-jurnallarımızın tanınmış elmi-bazalara daxil edilməsi nəinki elmimizə böyük nüfuz gətirir, eyni zamanda, hər sahədə sürətlə inkişaf edən ölkəmizin dünyada yüksək imicini də təsdiq edir. İslam təsəvvüfü sahəsində baş verən elmi yenilikləri əks etdirərək, elmi məqalələri beynəlxalq auditoriyaya jurnalımız vasitəsilə çatdırmaqla, yerli və xarici alimlər arasında elmi ünsiyyətin genişləndirməsində böyük rol oynayacağıq”.

Qeyd edək ki, İctimai Birliyin yerli və beynəlxalq səviyyədə tanınmış “Elm və İnnovativ Texnologiyalar”, ingilisdilli “Beynəlxalq Humanitar və Sosial İnkişaf Araşdırmaları” adlı elmi jurnalları da dərc edir.

İyunun 24-də Azərbaycan Milli Xalça Muzeyində Silahlı Qüvvələr Günü münasibətilə Azərbaycan silahsazlıq sənəti ənənələrini yaşadan, bu sənətkarlıq nümunələrinin hazırlanması, tədqiqatı və təbliğatı ilə məşğul olan məşhur silah ustası Emin Məmmədovun muzeyə bağışladığı iki xəncərin təqdimatı olub.

Azərbaycan Milli Xalça Muzeyinin direktoru Şirin Məlikova əvvələr də muzeyin kolleksiyasında orta əsrlərə aid olan silah nümunələrinin saxlandığını söyləyib. Bildirib ki, Emin Məmmədovun hazırladığı xəncərlər isə muzeyin kolleksiyasında öz layiqli yerini tutacaq.

Eksponatların xüsusiyyətlərindən söz açan Şirin Məlikova deyib ki, Azərbaycanın ənənəvi bədii iş ustası E.Məmmədov muzeyə hədiyyə etdiyi xəncərlərdən biri Şamaxı silahsazlıq ənənələri əsasında hazırlanıb. Xəncərin qını böyük maraq doğurur. Onun yuxarısında ibadət edən zadəgan kişi, aşağı hissəsində isə milli geyimli bəy və gəlin, həmçinin zəngin nəbati naxışlar həkk olunub. Xəncərin tiyəsində kətəbələrin içərisində ərəb əlifbası ilə xəncər ustasının adı “Emin Məmmədov” və “Azərbaycan” sözləri həkk olunub.

Bildirib ki, ikinci xəncərin bədii quruluşu Qacarlar dövrünün silahları üçün xarakterikdir. Onun qını və dəstəsi gümüşlə inkrustasiya olunmuş zərif buta və digər nəbati naxışlarla bəzədilib. 

Azərbaycan Milli Elmlər Akademiyasının Memarlıq və İncəsənət İnstitunun elmi işçisi Azərbaycan Dövlət Rəssamlıq Akademiyasının professoru Telman İbrahimov deyib: “Vaxtilə silah daşımaq mütləq idi və kişilər bununla öyünürdülər. İndi silah gəzdirməsək də o şərəf rəmzi olaraq qalıb. Silaha belə münasibət olan yerdə silah ustalarının yetişməsinə də səbəb olub. Emin Məmmədov da belə ustalardan biridir. Azərbaycan hərb tarixinə nəzər yetirsək görərik ki, Azərbaycan 60 minlik ordu ilə üz-üzə gəlib. Əlbətdə ordumuzu silahla təmin etmək üçün çoxlu sayda silahsazlar tələb olunurdu. Silahsazlar vətənin qorunmasında önəmli yer tutur”.

Müdafiə Nazirliyinin əməkdaşı, Əməkdar incəsənət xadimi, polkovnik Abdulla Qurbani bildirib ki, Azərbaycan hər zaman geostrateji maraqların mərkəzində olub. Bu torpağın yeraltı, yerüstü sərvətləri dünya səyyahlarını, yadelliləri şirnikləşdirib. Qoşunlar yeridilib, qılınclar oynayıb, amma bu torpağın oğulları dar gündə silahlanıblar, yəhərləniblər və öz güclərini göstəriblər: “Bu gün dünyanın istənilən hansı muzeyinə getsək Azərbaycanın digər sənət nümunələrilə yanaşı silahsazlıq məktəbinin nümanələrini də görə bilərik. Emin Məmmədovun hazırladığı bu xəncərlər də ümid edirəm Xalça Muzeyində qiymətli eksponatlar sırasında olacaq”.

Sonra Qafqaz tarixi mərkəzinin direktoru Rizvan Hüseynov çıxış edib. Bildirib ki, sovetlər birliyində hərb kitablarında azərbaycanlı deyil daha çox erməni silahsazların adları çəkilirdi. Qədim qılıncların üzərində ərəb əlifbası ilə yazılan sözlər olsada onların əsl müəllifləri gizlədilirdi. Emin Məmmədov xalqımıza şərəf gətirən bir silahsazdır.

Tədbirin bədii hissəsində Cahangir Qurbanovun ifasında “Qələbəyə gedən yollar” mahnısı səsləndirilib.

Qeyd edək ki, Emin Məmmədov Aleksandr Voloviklə birlikdə nəfis tərtibatı və məlumatların zənginliyi ilə maraq doğuran “The Azerbaijan Armourers Art” ( Azərbaycan silah sənəti) kitabının müəllifidir. E.Məmmədov, həmçinin UNESCO tərəfindən bu ilin aprel ayında Parisdə təşkil olunan “Culture for Peace” (Mədəniyyət sülh naminə) müsabiqəsində birinci yer tutub.

Özbəkistanın Kokand şəhərində Türkdilli Dövlətlərin Əməkdaşlıq Şurasının (TDƏŞ) Turizm Nazirlərinin 6-cı iclası və turizm üzrə işçi qrupunun 15-ci iclası keçirilir.

Dövlət Turizm Agentliyindən bildirilib ki, tədbirdə çıxış edən agentliyin sədri Fuad Nağıyev türkdilli dövlətlərin ortaq tarix, dil, mədəniyyət və milli kimliyə malik olmasının onlar arasında iqtisadi münasibətlərin inkişaf etməsinə təkan olduğunu söyləyib.

Agentlik sədri qeyd edib ki, pandemiya səbəbindən ötən il dünya üçün, o cümlədən turizm sənayesi üçün ən çətin illərdən olsa da, Azərbaycan tarixinin ən şanlı illərindən biri olub.

Ali Baş Komandanın rəhbərliyi ilə Azərbaycan Ordusunun 30 illik işğala son qoymasının Azərbaycan və region üçün mühüm əhəmiyyət kəsb etdiyini vurğulayıb.

O, Qarabağın turizm əhəmiyyətli məkanlarının böyük bir hissəsinin işğalçılar tərəfindən dağıdıldığı, artıq həmin ərazilərdə quruculuq işlərinə başlanıldığı və işğaldan azad edilmiş ərazilərin böyük turizm potensialına malik olduğu haqqında məlumat verib. O əlavə edib ki, tezliklə Qarabağ yeni regional turizm destinasiyası kimi dünyaya təqdim olunacaq.

Tədbirdə iştirak edən üzv dövlətlərin turizm nazirləri Azərbaycanın beynəlxalq hüquqla tanınan ərazi bütövlüyünün bərpa olunması münasibətilə təbriklərini ifadə edərək Qarabağı regional turizm destinasiyası kimi inkişaf etdirmək fəaliyyəti üzrə uğurlar arzulayıblar.

Fuad Nağıyev təşkilatın “İpək Yolu Turizm Paytaxtları Təşəbbüsü” və “Müqəddəs Ziyarət” layihələrinin üzv dövlətlərin turizm əhəmiyyətli mədəni irsinin tanıdılmasında, əməkdaşlığın genişləndirilməsində, eləcə də üzv ölkələr arasında turist mübadiləsinin artmasında mühüm rol oynayacağına əminliyini ifadə edib.

Eləcə də türkdilli dövlətlərin paytaxtları və digər şəhərləri arasında birbaşa uçuşların turizmlə yanaşı, iqtisadi və ticari əlaqələrin də inkişafına töhfə verəcəyini deyib.

Fuad Nağıyev 2015-ci ildə turizm nazirlərinin 2-ci görüşünün Azərbaycanda keçirildiyini xatırladaraq Azərbaycanın bir çox beynəlxalq tədbirlərə uğurla ev sahibliyi etdiyini qeyd edib. O, Türk Şurasının turizm nazirlərinin növbəti 7-ci görüşünün Azərbaycanda keçirilməsi qərarından məmnunluq duyduğunu bildirərək iştirakçıları ölkəmizə dəvət edib.

İclas çərçivəsində Fuad Nağıyevlə digər üzv ölkələrin rəsmi nümayəndələri arasında bir sıra ikitərəfli görüşlər keçirilib.

Qeyd edək ki, tədbirdə turizmin bərpası tədbirləri, postpandemiya dövründə əməkdaşlıq, birgə layihələr və fəaliyyət istiqamətləri kimi məsələlər üzrə müzakirələr aparılır.

2009-cu ildə əsası qoyulan təşkilatın turizm nazirlərinin bu ilki görüşündə Türk Şurasının Baş katibi Bağdad Amreyev, Özbəkistanın Baş nazirinin müavini, turizm və idman naziri Aziz Abduxakimov, Qırğızıstanın Baş nazirinin müavini, iqtisadiyyat və maliyyə naziri Akılbek Japarov, Türkiyənin mədəniyyət və turizm naziri Mehmet Nuri Ersoy, Qazaxıstanın mədəniyyət və idman naziri xanım Aktotı Raimkulova, eləcə də təşkilatda müşahidəçi statusa malik Macarıstanın Özbəkistandakı səfiri Peter Szanto çıxış ediblər.

İncəsənət Akademiyası və “Eslem” film istehsalçısı, prodüser Yalçın Çoban bu günlərdə Bakıda çəkiləcək filmin hazırlıqlarına başlayıb.

Türkiyədən gələn İbrahim Bülbülün rəhbərliyi ilə çəkiləcək film üçün Azərbaycan komandaları ilə razılaşma əldə edilib. Sevgi mövzusunda çəkiləcək film “Nisan” adlanır.

“Kurtlar Vadisi” serialından yaxşı tanınan Ərhan Küçük və Canan Nazirovanın rol aldığı film artıq bütün diqqət və marağı özünə cəlb edib.

Filmin premyerasının ölkəmizdə keçirilməsi nəzərdə tutulur.

Mədəniyyət Nazirliyi, Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Naxçıvan Rəssamlar Birliyinin dəstəyi, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə “Nizami Gəncəvi İli" çərçivəsində yay tətilində rəssamlıq istedadı olan uşaq və gənclərin diqqətini çəkən mənzərə, hadisə və əşyaların öz düşüncələri ilə təsvir müstəvisində əks etdirmək bacarıqlarını inkişaf etdirmək məqsədilə “Mənim düşüncəm-2021” adlı respublika uşaq rəsm müsabiqəsi davam edir.

Xətai Sənət Mərkəzindən bildirilib ki, yaşı 21-ə qədər olan rəssamlar bu ilin oktyabr ayının 10-dək Xətai Sənət Mərkəzinin feysbuk qrupuna (https://www.facebook.com/groups/144172178999749/?ref=share) təqdim etdiyi əsərin fotosunu, əsərin adını, müəllifin adı, soyadı, təvəllüdü, təhsil aldığı məktəbi və əlaqə nömrəsini yerləşdirməklə müsabiqəyə qatıla bilərlər.

Əsərlər tək-tək yerləşdirilməli, məlumatlar dolğun olmalı, 2-dən çox əsər göndərilməməlidir.

Ən çox uşaqların öz duyğu və düşüncələri ilə işlənmiş əsərlər seçiləcək.

Seçim zamanı müəllifin yaşı nəzərə alınmaqla düzgün kompozisiya, rəng seçimi və ideya əsas götürüləcək.

Seçim zamanı kənar (müəllim, valideyn) müdaxiləsiz işlərə üstünlük veriləcək.

Müsabiqədə xarici ölkə vətəndaşları da iştirak edə bilərlər.

Seçim 3 yaş kateqoriyası üzrə aparılacaq və hər yaş kateqoriyasına ayrıca sərgi keçiriləcək: 11 yaşa qədər, 11-16 və 16-21 yaş arası

Birinci turdan keçmiş müəlliflərin əsərləri sərgidə nümayiş olunmaq üçün Xətai Sənət Mərkəzinə dəvət olunacaq.

Əgər müsabiqənin münsiflərinin seçimlərindən narazı qalanlar olarsa (müəllim, valideyn və şagird) onlar seçimlərin elan olunduğu vaxtdan 3 iş günü ərzində xsm.2016@mail.ru e-mail ünvanına müraciət edə bilər və təyin olunmuş bir vaxtda münsif üzvünün nəzarəti ilə rəsm çəkməklə özünü təsdiq edə bilər.

Əsəri sərgidə nümayiş olunan müəlliflər sertifikatla və fəal tədris mərkəzləri (dərnək, incəsənət məktəbi və s.) təşəkkürnamə ilə təltif olunacaqlar.

Müsabiqənin yekun sərgisi Xətai Sənət Mərkəzində təşkil olunacaq.

Azərbaycan Yazıçılar Birliyinin Gənclər Şurasının sədri, şair Fərid Hüseynin Moldovada rumın dilində şeirlər kitabı çap olunub.

“Yaddaşın vəfa borcu” (“İnchinare memoriei”) adlı kitab “Quadrat” nəşriyyatında çap olunub və nəşrdə gənc şairin 100-ə qədər müxtəlif mövzulu şeirləri yer alıb. Kitabı rumın dilinə tanınmış şair, tərcüməçi Nikolay Spetaru tərcümə edib.