XƏBƏRLƏR

Bu günlərdə “CinemaPlus” kinoteatrlar şəbəkəsi kinosevərlər üçün yeni layihə ərsəyə gətirib. Şamaxı şəhərində yerləşən “Abqora” restoranında “Meysəri” şərabları və “CinemaPlus”un birgə layihəsi olan “Open Air Cinema”da hər həftəsonu açıq havada, təbiətin qoynunda qonaqlar yeni filmləri izləyə biləcəklər.

Layihə regionda həyata keçirilsə də, paytaxt sakinləri tərəfindən də böyük maraqla qarşılanıb.

“CinemaPlus” kinoteatrlar şəbəkəsinin baş direktoru Zaur Darabzadə “Open Air Cinema” layihəsi barədə məlumat verərək bildirib ki, Bakıda da belə layihələr nəzərdə tutulub. Məlum məsələləri nəzərə alaraq hələlik paytaxtda gözləmə mövqeyindəyik. Xatırlayırsınızsa, biz hələ ötən il bu istiqamətdə bir layihə həyata keçirməyə çalışırdıq. “AvtoCinema” adlı layihənin anonsunu vermişdik. Bakıda məhz bu layihə gerçəkləşdikdən sonra digər layihəni təqdim edəcəyik. “AvtoCinema” layihəsi açıq havada kinoteatr giriş və çıxışı olan böyük avtopark sahəsini xatırladır. İnsanlar şəxsi avtomobillərində əyləşərək böyük ekranda filmləri izləyəcəklər. Çalışdıq ki, “Open Air Cinema” bir pilot layihə kimi regionda sınaqdan keçirilsin və daha sonra maraq və istəkləri nəzərə alaraq bu təcrübəni paytaxta köçürə bilək. Bu layihə pandemiya şəraiti ilə əlaqəli deyil, adi vaxtlarda da davam etdirilə bilər. İnanıram ki, kinosevərlərimiz yeni layihə vasitəsilə filmlər izləmək imkanı qazanacaqlar.

Qeyd edək ki, “Open Air Cinema”da filmlər və seanslar haqqında məlumatı "CinemaPlus”un sosial şəbəkə hesablarından əldə etmək mümkündür.

Operativ Qərargah bu yaxınlarda elan edib ki, vaksinləmə prosesinin daha intensiv aparıldığı ölkələrdə epidemioloji vəziyyətin yaxşılaşması nəzərə alınaraq, iyunun 21-dən başlayaraq ABŞ, Bəhreyn, Birləşmiş Ərəb Əmirlikləri, Böyük Britaniya, İsrail, Macarıstan və Qətər vətəndaşlarının Azərbaycana gəlmələrinə icazə verilir. Koronavirusla uzun aylar mübarizədən sonra israillilər onlar üçün ən populyar turizm istiqamətlərindən biri olan Azərbaycana nəhayət gələ və bu ölkədə istirahət edə biləcəklər. Bundan əvvəl Azərbaycan iyunun 10-da Türkiyə və Rusiya vətəndaşlarının ölkəyə girişinə icazə verib.

Bu barədə bir neçə gün bundan əvvəl Şmuel Dan Elmas İsrailin nüfuzlu ivritdilli “Israel HaYom” qəzetində “Odlar Yurdu israilli turistlər üçün açılır” sərlövhəli məqaləsində yazıb.

Məqalə müəllifi qeyd edir ki, İsrail və Azərbaycan arasında strateji münasibətlərin böyük uğurlarından biri məhz turizm sənayesinin - koronavirus pandemiyası başlananadək son illərdə sürətlə inkişaf edən sahənin payına düşür.

“Israel HaYom” qəzetinin müxbiri vurğulayır: “2017-ci ildə Azərbaycana gələn 15369 israilli turistdən sonra 2018-ci ildə onların sayı 40082-yə, 2019-cu ildə isə hətta 47003 nəfərə çatdı”.

2018-ci ildə yaradılan Azərbaycan Dövlət Turizm Agentliyinin sədri Fuad Nağıyev “Israel HaYom” qəzetinə eksklüziv müsahibəsində deyib: “Rəsmi Bakı hazırda İsrailin uğurlu vaksinləmə kampaniyasının aparılması üzrə təcrübəsini öyrənir. Azərbaycan peyvənd vurduran israilli turistlərə qapılarını yenidən açmağa hazırdır. Onlar “yaşıl pasport”larını, Təl-Əvivdən uçuşa 72 saat qalmış koronavirus testinin neqativ nəticəsini təqdim etməlidirlər.

Tezliklə Təl-Əvivdə Azərbaycanın turizm ofisi fəaliyyətə başlayacaq. Koronavirus pandemiyasından əvvəlki statistik rəqəmlər açıq-aydın göstərir ki, pandemiya böhranı bütün dünyada turizm sənayesinə ağır zərbə vurub.

Gələn il biz İsrail ilə Azərbaycan arasında diplomatik münasibətlər qurulmasının 30 illiyini qeyd edəcəyik. Biz həmişə sülh və dostluq şəraitində yaşamışıq, bayramları bərabər qeyd etmişik. Azərbaycanda çox fəal yəhudi icması var. Bu icma Azərbaycanın maraqlarını xaricdə inkişaf etdirir. İsraildə Arye Qut kimi ictimai xadimlər və diaspor nümayəndələri var ki, İsrail KİV-ləri onlar üçün əlçatandır və bu, strateji cəhətdən bizim üçün mühümdür. Azərbaycan qədim tarixə, çoxəsrlik ənənələrə, gözəl təbiətə və parlaq mədəniyyətə malik dövlətdir. Bu ölkədə qədim petroqlifləri, zərdüştilik məbədlərini, şərq saraylarını, müasir muzeyləri görmək, isti dənizdən, ucu-bucağı görünməyən çimərliklərdən zövq almaq, çoxsaylı festival və konsertləri izləmək mümkündür. Azərbaycan hərcəhətli ölkədir, kinofilmlərin, bədii fotosessiyaların çəkilişi üçün, sadəcə olaraq, coşqu, gözəl əhval-ruhiyyə axtarmaq üçün ideal məkandır, çünki bu ölkədə hər şey tapmaq mümkündür”.

İsrailin nüfuzlu ivritdilli “Israel HaYom” qəzeti sonda yazır ki, Azərbaycanda turizm aktiv şəkildə inkişaf edir. Odur ki, israillilərin Odlar Yurduna səyahəti maraqlı olacaq və yaddaqalan təcrübəyə çevriləcək.

İyunun 22-də Bakı Müasir İncəsənət Muzeyində Əməkdar incəsənət xadimi Sabina Şıxlinskayanın “Yaxından” adlı sərgisi açılacaq.

“Yaxından” layihəsi müasir incəsənətin multimedia sərgisidir. Layihənin mövzusu neft sənayesini və bu sahədə çalışan neftçilərin həyatlarını “qəhrəmanlıq” aspektindən təsvir edir. Layihəyə monumental rəsm əsərləri, video və səsli instalyasiyalar daxildir. Müəllif bu mövzunun nəzərəçarpacaq dərəcədə mənalı olması üçün sərginin xüsusi dizaynını hazırlayır.

Layihənin maliyyə dəstəyi İsveçrə İnkişaf və Əməkdaşlıq Agentliyinə aiddir və bu layihə Bakıdakı Höte Mərkəzi, Latviya Respublikasının səfirliyi, İsveç Krallığının səfirliyi və Platform ART təşkilatının birgə əməkdaşlığı ilə həyata keçirilir.

XIX əsrin sonlarından bəri neft müasir cəmiyyətlərin əsas tərkib hissəsinə çevrilmişdir. Quruda, suda və havada hərəkəti benzin, dizel və kerosin olmadan təsəvvür etmək ağlasığmaz olardı. Neft müasir həyatımızı xarakterizə edən geniş çeşidli materiallar və məhsulların əsasını təşkil edir. Neft yalnız maşınları bəsləmir, eyni zamanda fantaziyalar da yaradır. Elmi və texniki, eləcə də metafizik və ruhi ideyalar və ümidlər bu gözqamaşdıran maddə ilə - həyatımızın qara güzgüsü ilə əlaqələndirilir.

“Neft” maddəsinin dəyərinin müxtəlifliyini daha yaxşı başa düşmək üçün, Şıxlinskaya neft sənayesində əsas fikri “insan faktoru”na yönəltməyi qərara alıb. Neft sənayesindəki peşə təhlükəli və nüfuzlu olmaqda davam edir və onun əhatə dairəsi genişlənir. Texnologiya böyüyür, risklər 100 il bundan əvvəlki neft sənayesini indiki ilə müqayisə etdikdə daha çox idarə oluna biləndir. Lakin dənizdə çalışan neftçilərin həyatları hələ də riskli və təhlükəlidir və həyatlarını bəşəriyyət üçün bu mühüm təbii xammalın inkişafı və istehsalı üçün fədakarlıq göstərən insanlara bir nümunədir.

Bu günlərdə Azərbaycan Yazıçılar Birliyinin üzvü, şair Ramil Əhmədin “Orxan Pamukun evində” kitabı işıq üzü görüb.

Kitabda Ramil Əhmədin ədəbiyyat üzrə Nobel mükafatı laureatı, türk yazıçısı Orxan Pamukla tanışlığının, görüşünün detalları, eləcə də ədibin evində gerçəkləşən söhbətləri yer alıb. Kitabın bəzi hissələri mətbuatda işıqlandırılsa da, kitabda daha öncə yayımlanmayan yazılar, fotolar və Pamukun yaradıcılığına aydınlıq gətirən detallar var.

Orxan Pamuk ilk dəfə bu kitabda yarımçıq gənclik romanından, gələcəkdə Məsumiyyət Muzeyinin qapalı qutularında sərgilənəcək əşyalardan, romanlarında ailəsindən gələn detallardan, evdəki “zəka terrorundan” qaçıb ədəbiyyata sığınmasından bəhs edir.

Kitabda həm fiziki mənada Orxan Pamukun İstanbulda yaşadığı evindən, həm də məcazi mənada onun sözlərlə qurduğu ədəbiyyat evindən söhbət açılır.

İyunun 17-də Beynəlxalq Muğam Mərkəzində Mədəniyyət Nazirliyi tərəfindən ötən ilin oktyabrında elan edilən “Vətənpərvərlik mövzusunda ədəbiyyat müsabiqəsi” qaliblərinin mükafatlandırılması mərasimi keçirildi. Tədbirin aparıcısı, Əməkdar artist Elşən Cəbrayılov müsabiqə haqqında məlumat verdi. Bildirdi ki, müsabiqəyə 321 əsər təqdim edilib. 53 əsər müsabiqə qaydalarına cavab vermədiyi üçün qəbul olunmayıb. Müsabiqədə “Peşəkar yaradıcı şəxslər” kateqoriyası üzrə 50, “Həvəskar yaradıcı şəxslər” kateqoriyası üzrə 193, “10-15 yaş arası uşaqlar” kateqoriyası üzrə 25 əsər iştirak edib. 268 əsərin 67-si esse janrı, 75-i hekayə janrı, 126-sı poeziya (nəzm) üzrə nümunələrdən ibarət olub. Müsabiqədə obyektivliyi və şəffaflığı təmin etmək üçün təqdim olunan bütün əsərlər və onların müəllifləri xüsusi şifrə ilə qeydə alınıb. Komissiyanın 9 üzvü tərəfindən əsərlərin mövzu, bədii və peşəkar yaradıcılıq baxımından dəyərləndirilməsi aparılıb və qaliblər müəyyən edilib. Mərasimdə çıxış edən mədəniyyət naziri Anar Kərimov dedi ki, hamımız Azərbaycanın dövlətçilik tarixinin ən qürurverici hadisələrindən olan 44 günlük Vətən müharibəsinin şahidləriyik: “Vətən müharibəsi Azərbaycan dövlətinin güclü siyasi iradəsini, Azərbaycan xalqının xarakterini, milli maraqlarımız naminə dünya azərbaycanlılarının həmrəyliyini, Ordumuzun döyüş rəşadətini, canından əziz tutduğu Vətən sevgisini və Ali Baş Komandanın bu proseslərdə peşəkar liderliyini dünyaya nümayiş etdirdi”. Nazir ölkə başçısı tərəfindən Şuşa şəhərinin Azərbaycanın mədəniyyət paytaxtı elan edilməsinin əhəmiyyətini vurğuladı: “Bir çox dövlətlərin siyasi, iqtisadi paytaxtları var, amma rəsmi formada mədəniyyət paytaxtı olan ölkələrin sayı azdır. Bu, Azərbaycan Respublikası Prezidentinin mədəniyyətimizə göstərdiyi xüsusi diqqətin ən bariz nümunəsidir. Bu gün işğaldan azad olunmuş torpaqlarda intensiv formada aparılan bərpa-quruculuq işləri ilə yanaşı, mədəniyyətimizin, xalqımızın milli ruhunun həmin ərazilərə qaytarılması prosesi də həyata keçirilir. Mədəniyyət Nazirliyi tərəfindən bu istiqamətdə sistemli tədbirlər görülür. Ölkə başçısının təşəbbüsü və ideyası əsasında Şuşa şəhərində may ayında “Xarıbülbül” musiqi festivalı keçirildi. Bu festival Azərbaycanın nə qədər multikultural və tolerant ölkə olduğunu bir daha nümayiş etdirdi”.  15 İyun – Milli Qurtuluş Günündə ölkəmizin mədəniyyət paytaxtında Azərbaycan və Türkiyə dövlət başçılarının imzaladığı iki qardaş ölkənin müttəfiqliyi haqqında Şuşa Bəyannaməsini yüksək qiymətləndirən Anar Kərimov qeyd etdi ki, bu tarixi sənəd mühüm strateji mahiyyəti ilə yanaşı, işğaldan azad olunmuş ərazilərdə, ümumilikdə regionda mədəni əlaqələrin inkişafına, sabitliyin bərqərar olmasına öz töhfəsini verəcək. “Vətənpərvərlik mövzusunda ədəbiyyat müsabiqəsi” haqqında söz açan nazir qeyd etdi ki, müsabiqə xalqımızda hərbi-vətənpərvərlik ruhunun yüksəldilməsi, Vətənimizin suverenliyi uğrunda Azərbaycan əsgərinin döyüş rəşadətinin və şəhidlərimizin xatirəsinin əbədiləşdirilməsi, gələcək nəsillər üçün II Qarabağ müharibəsi mövzusunda yeni bədii əsərlərin yaradılması məqsədilə təşkil olunmuşdu. Müsabiqəyə ölkəmizlə yanaşı, Türkiyədən 2, Rusiyadan 2, İrandan 1 nəfər əsər təqdim edib: “Mən qalib olan əsərlərlə tanış oldum və diqqətimi xüsusi bir məqam çəkdi. İndiyə qədər bu mövzuda yazılan ədəbi əsərlərdə Vətən həsrəti, nisgil, kədər tərənnüm olunurdusa, bu əsərlərdə şücaət, məğrurluq, qürur və Zəfər hissi vəsf olunub. Əlbəttə ki, bu amil Vətən müharibəsində qazanılan şanlı Qələbənin yazarlarımızda yaratdığı qalib ruhla bağlıdır. Xatırlayırsınızsa, Azərbaycan Prezidenti Şuşa şəhərinin işğaldan azad olunması xəbərini xalqımıza çatdıran zaman Ordumuzun Vətən müharibəsində, məhz Şuşa şəhərinin azad olunmasında göstərdiyi qəhrəmanlığı xüsusilə qeyd etdi və bildirdi ki, gələcəkdə bu haqda hekayələr, romanlar yazılacaq. İnanıram ki, gələcəkdə bu qalib əsərlər əsasında serial və filmlər ərsəyə gələcək”. Anar Kərimov nazirliyin ənənəvi “Qızıl kəlmə” ədəbi mükafatının beynəlxalq təcrübəyə uyğun, mütərəqqi və sistemli proqrama əsaslanan yeni bir ədəbi mükafatla əvəzlənməsi üçün layihələndirmə prosesi aparıldığını diqqətə çatdırdı. Dedi ki, bu işə yazarlardan gələn çoxsaylı müraciətlər nəzərə alınmaqla start verilib: Mədəniyyət Nazirliyinin “Azərbaycan kitabının dünyada tanıdılması” layihəsi də daha ciddi tərcümə proqramı ilə əvəz olunacaq. Bu proqram yazarlarımızın xarici dilli müsabiqələrə, geniş oxucu kontingenti olan coğrafiyalara çıxışını təmin edəcək. Bir daha müsabiqədə qalib gəlmiş hər bir şəxsi təbrik edir və fəaliyyətlərində uğurlar arzulayıram”. Azərbaycan Yazıçılar Birliyinin katibi, müsabiqə komissiyasının üzvü Rəşad Məcid layihənin əhəmiyyətini yüksək qiymətləndirdi. Komissiyanın üzvü, Nizami adına Ədəbiyyat İnstitutu Uşaq ədəbiyyatı şöbəsinin müdiri Elnarə Akimova Mədəniyyət Nazirliyinə ədəbiyyata və sözə verdiyi dəyərə görə təşəkkür etdi. Çıxışlardan sonra bədii qiraət ustaları Xəzər Süleyman və Sabirə Abdullayeva qalib əsərlərdən parçalar səsləndirdilər. Daha sonra qaliblərə mükafatlar təqdim edildi. Mədəniyyət nazirinin müvafiq əmrinə əsasən, müsabiqənin “Peşəkar yaradıcı şəxslər” kateqoriyasında hər bir janr üzrə qaliblərə 1500, “Həvəskar yaradıcı şəxslər” kateqoriyasında hər bir janr üzrə qaliblərə 800 manat məbləğində pul mükafatı və nazirliyin xüsusi diplomu təqdim olundu. “10-15 yaş arası uşaqlar” kateqoriyasında hər bir janr üzrə qaliblərə fəxri fərman və nazirliyin tabeliyində olan muzeylərə birillik ödənişsiz ziyarət kartı hədiyyə edildi. Qalib müəlliflərin siyahısını təqdim edirik:   “Peşəkar yaradıcı şəxslər” kateqoriyasında Esse janrı üzrə Ramil Əhməd - “Şuşaya məktub” Mina Rəşid - “Vermərəm Qarabağı!” Cəlil Cavanşir - “Nostalgiyanın sonu: Biz qayıdırıq” Hekayə janrı üzrə Fərhad Kərimli - “Bir qucaq torpaq” Sevinc Nuruqızı - “Ölərəm dərdindən, onu bil!” Təvəkkül Boysunar - “Xoşbəxt göyərçinlər, xoşbəxt bayraqlar” Poeziya janrı üzrə Balayar Sadiq - “Şəhid məktubu” Akif Azalp - “Şəhid öygüsü” Elçin Mirzəbəyli - “Azərbaycan əsgəri!” “Həvəskar yaradıcı şəxslər” kateqoriyasında Esse janrı üzrə Müzəffər Müzəffərli - “Üzümüzü ağ edən Qarabağ” Elgiz Abbasov - “Sen gedəli...” Fidan Gözəlova - “Qarabağ Azərbaycandır!” Hekayə janrı üzrə Tural Azimzadeh - “Bozdar əfsanəsi” Gülmirə Məmmədova - “Snayper” Şəbnəm Türbəndəzadə - “Gopçu Mahir” Poeziya janrı üzrə Yusif Ərəbsoy - “Zəfər simvolu” Mülayim Hümmətova - “Atalar və oğullar” Qabil Əliyev - “Çoxdandı Qarabağa belə payız gəlmirdi” “10-15 yaş arası uşaqlar” kateqoriyasında Esse janrı üzrə Dilbər Rəfi - “Qarabağdan namə” Alpaslan Cahangir - “Qarabağdan namə” İsmayıl Qululu - “Qarabağdan əsgər naməsi” İsmayıl Miryusifzadə - “Qarabağ” Zəhra Rzayeva - “Qarabağdan namə” Hekayə janrı üzrə Abdullah Hüseynli - “Kaş ki, yuxum çin olaydı” Mömünəxatun Məmmədova - “Coşqun dəniz” Aysu Əlisoy - “Nə gözəldir ölmək bizə sevgili Vətən üçün” Ömər Məmmədzadə - “Sadəcə Elnur” Səma Quliyeva - “Ana, zəfər bizimdir” Poeziya janrı üzrə Ayan Əlyarlı - “Şəkillərdən gördüyüm Qarabağ” Nəzrin Cəlilova - “Gəlin gedək Qarabağa” Sadiq Qəzənfərli - “Azəri oğlu” Yeva Fərəcova - “Vətən” Sevindik Əliyev - “Zəfərin nişanəsi”

Azərbaycan Respublikası Mədəniyyət Nazirliyi “Səhnədən səngərə“ layihəsinin dördüncü buraxılışını təqdim edir. 28 il öncə anasının qucağında doğma Cəbrayıldan didərgin düşən Zamin illər sonra şanlı ordunun sıralarında ata evinə qayıdır. Bir neçə gün sonra isə ağır döyüşlərin birində şəhidlik zirvəsinə ucalır. Çalışdığı kollektivin ən şən üzvü olmuş Zamin haqda iş yoldaşları, valideynləri böyük məhəbbətlə söz açıblar. Bu gün qəhrəmanımızın yeganə övladı İnci atasının Qarabağdan məcburi köçkün düşdüyü yaşdadır. Atası kimi minlərlə qəhrəmanın canı, sağlamlığı bahasına azad olunmuş bütöv Azərbaycanın qucağında böyüyür.

Azərbaycan Respublikasının mədəniyyət naziri Anar Kərimov iyunun 16-da Xorvatiya Respublikasının ölkəmizdəki fövqəladə və səlahiyyətli səfiri Branko Zebiç ilə görüşüb. Səfiri səmimi salamlayan nazir Anar Kərimov Azərbaycanla Xorvatiya arasındakı dostluq münasibətlərinin bir çox sahələrdə səmərəli əməkdaşlığın qurulmasına, o cümlədən mədəniyyət sahəsində əlaqələrin genişləndirilməsinə böyük zəmin yaratdığını bildirib. Xorvatiya ilə mədəni əlaqələrin inkişafının vacibliyini bildirən nazir iki ölkə arasında imzalanmış sənədlərin əməkdaşlığın genişləndirilməsinə əhəmiyyətli töhfə verdiyini vurğulayıb. Anar Kərimov ölkələrimiz arasında mədəni əlaqələrin daha da gücləndirilməsi ilə bağlı məsələlərə toxunarkən mədəni irsin bərpasında Xorvatiyanın təcrübəsindən istifadə, kitabxana və muzey işi, gənclərlə iş, ümumilikdə mədəniyyətin müxtəlif sahələrində təcrübə mübadiləsinin əhəmiyyətini qeyd edib, birgə tədbirlərin təşkilində ölkəmizin maraqlı olduğunu vurğulayıb. Qəbula görə nazirə təşəkkürünü bildirən səfir Branko Zebiç ikitərəfli münasibətlərin inkişafından məmnunluğunu ifadə edib, ölkələr arasında mədəniyyət sahəsində birgə fəaliyyətin səmərəli təşkili məqsədilə bu kimi görüşlərin əhəmiyyətini qeyd edib, mədəni əlaqələrin daha da genişlənəcəyinə ümidvar olduğunu bildirib. Görüşdə həmçinin iki ölkə arasında mədəniyyət sahəsində qarşılıqlı fəaliyyətin gələcək perspektivləri müzakirə edilib, əməkdaşlıqla bağlı maraq doğuran məsələlər ətrafında fikir mübadiləsi aparılıb.

Beynəlxalq Muğam Mərkəzinin (BMM) “Muğam axşamları” onlayn layihəsinin konsertləri mərkəzin sosial şəbəkə hesabları vasitəsilə izləyicilərə təqdim olunmaqda davam edir.

BMM-nin yutub kanalı, feysbuk və instaqram səhifələri vasitəsilə yayımlanan konsertlərdə mərkəzin solistləri bir-birindən fərqli ifalarını muğamsevərlərə təqdim edirlər.

İndiyədək layihə çərçivəsində 30-dan artıq muğam nömrəsi nümayiş olunub. Xanəndələrin ifasında muğam və təsniflər səsləndirilib. Təqdim olunan konsertlər ictimaiyyət tərəfindən böyük maraqla qarşılanıb. Sevindirici haldır ki, bu konsert nömrələri ölkəmizin müxtəlif dövlət təşkilatlarının onlayn olaraq qoşulduğu beynəlxalq layihə və festivallarda BMM-dən rəsmi icazə alınaraq nümayiş olunub. Mədəniyyətimizi, muğam sənətimizi müxtəlif dünya xalqlarının qatıldığı tədbirlərdə təmsil edib. Pandemiya səbəbindən BMM öz tamaşaçılarına qapılarını aça bilməsə də sosial şəbəkə hesabları vasitəsilə təqdim edilən layihələrinin maraqla qarşılanması, ünvanlanan məktub və təkliflər ictimaiyyətin mərkəzin fəaliyyətinə marağının və sevgisinin nümunəsi kimi qəbul edilər.

Qeyd edək ki, BMM ölkəmizdə teatr və konsert salonlarının pandemiya səbəbindən fəaliyyətinə xitam verildiyi gündən bir çox layihələrini səhnədən virtual rejimə çevirərək izləyicilərə təqdim edir.

Yaxın günlərdə BMM solistlərinin ifasında yeni layihələrlə izləyicilərin görüşünə gələcək.

Dünya ədəbiyyatının görkəmli nümayəndəsi, dahi Azərbaycan şairi və mütəfəkkiri Nizami Gəncəvinin 880 illik yubileyi münasibətilə Prezident İlham Əliyevin Azərbaycanda 2021-ci ilin “Nizami Gəncəvi İli” elan edilməsi haqqında Sərəncamını əsas götürərək, Azərbaycan Diasporuna Dəstək Fondunun maliyyə yardımı ilə hazırlanmış “Eternıty” (Əbədilik) musiqi albomu ictimaiyyətə təqdim olunub.

Fonddan bildirilib ki, layihənin rəhbəri Türkiyədə yaşayan həmyerlimiz, Mimar Sinan Güzel Sanatlar Universitetinin doktorantı, musiqiçi Vüqar Qurbanov, musiqi redaktoru Əməkdar artist, beynəlxalq müsabiqələr laureatı İlham Nəzərov, prodüseri sənətşünaslıq üzrə fəlsəfə doktoru Vüqar Hümbətov, dizayneri isə Səbinə Rəhimzadədir.

Azərbaycan dili, tarixi və mədəniyyətinin təbliği baxımından olduqca aktual olan layihədə, Azərbaycanın dahi şəxsiyyəti və böyük şairi Nizami Gəncəvinin sözlərinə Üzeyir Hacıbəyli, Əfrasiyab Bədəlbəyli, Ağabacı Rzayeva, Tofiq Quliyev, Cahangir Cahangirov, Fikrət Əmirov, Süleyman Ələsgərov, Sevda İbrahimova, Gülnaz Abdullazadə, Ceyhun Allahverdiyev, Dilşad Əliyeva tərəfindən bəstələnmiş mahnı-romanslar yer alıb.

Albomun üz qabığında Nizami Gəncəvinin siması əks olunub, içərisində isə dahi şair, həmçinin ifalar haqqında ingilis dilində məlumat yerləşdirilib.

Musiqi albomunda tanınmış vokal ifaçılarından- Azərbaycan Respublikasının Xalq artistləri Azər Zeynalov, Samir Cəfərov, Gülnaz İsmayılova, Əməkdar artistlər Fəridə Məmmədova, Anar Şuşalı, İlham Nəzərovun ifalarında bir-birindən dəyərli musiqi nümunələri lentə alınıb. İfaçıları fortepianoda Xalq artisti Ülviyyə Hacıbəyova, həmçinin Dilşad Əliyeva, Svetlana Əhmədova, Təranə Məmmədova, Ülviyyə Kazımova və Bəbir Bəbirli müşayiət edib. XXI əsr Azərbaycan vokal məktəbinin nümayəndələrinin ifasında həmin romanslar incə zövqlə, yüksək peşəkarlıqla səsləndirilib və onların qəlbləri oxşayan ifalarında Nizami poeziyasının gözəlliyi, dərinliyi öz bütünlüyü ilə əks olunub.

Azərbaycan Respublikasının mədəniyyət naziri Anar Kərimov Xorvatiyanın ölkəmizdəki səfiri Branko Zebiç ilə görüşüb.

Nazirlikdən bildirilib ki, görüşdə nazir Anar Kərimov Azərbaycanla Xorvatiya arasındakı dostluq münasibətlərinin bir çox sahələrdə səmərəli əməkdaşlığın qurulmasına, o cümlədən mədəniyyət sahəsində əlaqələrin genişləndirilməsinə böyük zəmin yaratdığını bildirib. Xorvatiya ilə mədəni əlaqələrin inkişafının vacibliyini bildirən nazir iki ölkə arasında imzalanmış sənədlərin əməkdaşlığın genişləndirilməsinə əhəmiyyətli töhfə verdiyini vurğulayıb.

Anar Kərimov ölkələrimiz arasında mədəni əlaqələrin daha da gücləndirilməsi ilə bağlı məsələlərə toxunarkən mədəni irsin bərpasında Xorvatiyanın təcrübəsindən istifadə, kitabxana və muzey işi, gənclərlə iş, ümumilikdə mədəniyyətin müxtəlif sahələrində təcrübə mübadiləsinin əhəmiyyətini qeyd edib, birgə tədbirlərin təşkilində ölkəmizin maraqlı olduğunu vurğulayıb.

Qəbula görə nazirə təşəkkürünü bildirən səfir Branko Zebiç ikitərəfli münasibətlərin inkişafından məmnunluğunu ifadə edib, ölkələr arasında mədəniyyət sahəsində birgə fəaliyyətin səmərəli təşkili məqsədilə bu kimi görüşlərin əhəmiyyətini qeyd edib, mədəni əlaqələrin daha da genişlənəcəyinə ümidvar olduğunu bildirib.

Görüşdə həmçinin iki ölkə arasında mədəniyyət sahəsində qarşılıqlı fəaliyyətin gələcək perspektivləri müzakirə edilib, əməkdaşlıqla bağlı maraq doğuran məsələlər ətrafında fikir mübadiləsi aparılıb.