XƏBƏRLƏR

Qax Rayon Mədəniyyət Mərkəzinin nəzdində fəaliyyət göstərən İsmayıl Dağıstanlı adına Xalq Teatrında Nizami Gəncəvinin 880 illiyi münasibətilə dahi şairin “Xeyir və Şər” poeması səhnələşdirilib.

Azərbaycan Prezidenti tərəfindən elan edilən “Nizami Gəncəvi İli” çərçivəsində səhnələşdirilən tamaşa qüdrətli söz və fikir ustadının insanları daim əxlaqi kamilliyə çağıran və yüksək mənəvi keyfiyyətlər aşılayan zəngin yaradıcılığının təbliği məqsədi daşıyır.

Teatrın rejissoru Gülşad Paşayevanın quruluş verdiyi tamaşada Xeyir obrazını aktyor Şəmsəddin Quliyev, Şər obrazını isə İbrahim Paşayev canlandırıblar. Tamaşada rolları, həmçinin Nəvai Əliyev, Əli Yunusov və digər həvəskar aktyorlar ifa ediblər.

Şəki Regional Mədəniyyət İdarəsinin Qax rayonu üzrə nümayəndəliyindən verilən məlumata görə, ilin sonunadək rayonun mədəniyyət müəssisələrində Nizami poemalarından götürülmüş “Nuşirəvan və bayquşların söhbəti”, “Sultan Səncər və qarı”, “Kərpic kəsən kişinin dastanı”, “Şah və xidmətçi”, “İsgəndər və çoban” və digər mənzum hekayələrin səhnələşdirilməsi də nəzərdə tutulub.

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin Mərkəzi Kitabxanası “Yubileylər silsiləsi” layihəsini uğurla davam etdirir.

İdarədən bildirilib ki, layihə çərçivəsində növbəti videoçarx şair Məhəmmədhüseyn Şəhriyar haqqındadır. Bu il şairin 115 yaşı tamam olur. Bununla əlaqədar kitabxana tərəfindən şairin xatirəsini yad etmək məqsədilə “Məhəmmədhüseyn Şəhriyar – 115” adlı videoçarx təqdim olunub.

Qeyd edək ki, Şəhriyarın ilk şeir kitabı 1931-ci ildə Tehranda nəşr olunub. Şəhriyar şeirlərini Azərbaycan və fars dillərində yazıb.

Videoçarxda şairin həyat yolu, yaradıcılığı və əsərləri haqqında ümumi informasiya nümayiş etdirilib. Həmçinin videoçarxda şairin müxtəlif dövrlərini əks etdirən fotoları da göstərilib.

Azərbaycanın İndoneziyadakı səfiri Cəlal Mirzəyev dahi Azərbaycan şairi Nizami Gəncəvinin həyat və yaradıcılığı ilə bağlı indoneziyalı jurnalistlərə müsahibə verib.

Nüfuzlu “Kempalan News” xəbər portalının jurnalistlərinin suallarını cavablandıran səfir C.Mirzəyev böyük Azərbaycan mütəfəkkiri Nizami Gəncəvinin 880 illik yubileyi münasibətilə Azərbaycan Prezidenti İlham Əliyevin müvafiq Sərəncamı barədə məlumat verib, 2021-ci ilin ölkəmizdə “Nizami Gəncəvi İli” elan olunduğunu bildirib.

Səfir Azərbaycan dövləti tərəfindən şairin yaradıcılığına böyük önəm verildiyini və şairin xatirəsinin əbədiləşdirilməsi məqsədilə müxtəlif şəhərlərdə onun abidəsinin ucaldıldığını, bir sıra ictimai əhəmiyyətli yerlərə onun adının verildiyini qeyd edib.

Ulu öndər Heydər Əliyev tərəfindən 1979-cu və 1981-ci illərdə imzalanan müvafiq sərəncamlarla Nizami Gəncəvinin əsərlərinin tərcümə olunmasının və yaradıcılığının tədqiq edilməsinin şairin ədəbi irsinin gələcək nəsillərə ötürülməsində böyük rola malik olduğunu vurğulayıb.

Özündən sonra əvəzolunmaz ədəbi irs qoymuş Nizami Gəncəvinin tək Azərbaycan ədəbiyyatına deyil, həmçinin dünya ədəbiyyatına böyük töhfələr verdiyi, bir çox Şərq və Qərb şairlərinin onun əsərlərindən ilhamlanaraq yeni ədəbi nümunələr ərsəyə gətirdikləri qeyd olunub. Bununla yanaşı, Azərbaycanın Üzeyir Hacıbəyli və Qara Qarayev kimi böyük bəstəkarlarının öz yaradıcılıqlarında Nizami Gəncəvinin əsərlərinə dönə-dönə müraciət etdikləri bildirilib. Dahi Nizaminin “Xəmsə”si başda olmaqla, onun yaradıcılığının bu gün də Azərbaycanda geniş şəkildə təbliğ edildiyi xüsusi vurğulanıb.

Sonda səfir C.Mirzəyev Nizami Gəncəvinin Şərq ədəbiyyatında öz dəsti-xəttini yaratmış nadir şairlərdən biri olduğunu qeyd edərək, onun ədəbi irsinin İndoneziya xalqı, xüsusilə gənc şairlər arasında öyrənilməsinin faydalı olacağını bildirib.

Aprelin 14-də Azərbaycan Bəstəkarlar İttifaqında “Nizami və musiqi” mövzusunda elmi konfrans keçirilib.

Konfrans dahi Azərbaycan şairi Nizami Gəncəvinin 880 illiyinə həsr olunub.

Tədbirdə Azərbaycan Bəstəkarlar İttifaqının sədri, AMEA-nın müxbir üzvi, Xalq artisti, professor Firəngiz Əlizadə çıxış edərək konfransın əhəmiyyətindən danışıb. Vurğulayıb ki, bəşər bədii fikrinin nadir hadisəsi olan Nizami yaradıcılığı səkkiz əsrdən artıqdır ki, xalqımızın mənəviyyatının ayrılmaz hissəsinə çevrilmişdir. Nizami poeziyasının təsiri ilə bir çox bəstəkarlar şairin poemaları və qəzəlləri əsasında opera, balet, simfonik poema, oratoriya, romanslar bəstələmişlər.

Bəstəkarlar İttifaqının sədri bildirib ki, Prezident İlham Əliyevin dahi Azərbaycan şairi Nizami Gəncəvinin 880 illik yubileyi ilə əlaqədar 2021-ci ili “Nizami Gəncəvi İli” elan etməsi bəstəkar və musiqişünasları da çox sevindirib. Onlar bu əlamətdar yubileyə öz töhfələrini vermək üçün yeni əsərlər üzərində çalışırlar.

Nizami yaradıcılığında bəhrələnmiş bəstəkarlarla bağlı geniş siyahı tərtib etdiklərini söyləyən Xalq artisti bildirib ki, elə əsərlər vardır ki, hələ də sələndirilməyib və musiqişünas alimlər tərəfindən araşdırılmayıb. O, bu qəbildən olan əsərlərin sələndirilməsinin vacibliyini söyləyib.

Özünün də Nizami yaradıcılığından bəhrələnərək yeni əsər üzərində işlədiyini bildirən Xalq artisti Firəngiz Əlizadə bu qəbildən olan əsərlərin siyahısının daha da genişlənəcəyinə inamını ifadə edib.

Sonra Azərbaycan Bəstəkarlar İttifaqının məsul katibi, sənətşünaslıq üzrə elmlər doktoru, professor Cəmilə Həsənovanın “Qara Qarayev yaradıcılığında Nizami mövzusu”, Əməkdar mədəniyyət işçisi, sənətşünaslıq üzrə fəlsəfə doktoru Səadət Təhmirazqızının “Fikrət Əmirovun yaradıcılığında Nizami irsi”, Əməkdar mədəniyyət işçisi, sənətşünaslıq üzrə fəlsəfə doktoru, dosent Ülkər Talıbzadənin “Üzeyir Hacıbəylinin “Sənsiz” və “Sevgili canan” romans-qəzəllərində musiqi ilə poeziyanın qarşılıqlı əlaqəsi” və digər sənətşünas alimlərin məruzələri dinlənilib.

Tədbirdə Əfrasiyab Bədəlbəylinin “Nizami” operasından Əzranın ariozosu, Rənanın balladası səsləndirilib.

Dünya ədəbiyyatı dahi klassiklərindən olan Əlişir Nəvainin 580 illiyi qardaş Əfqanıstan İslam Respublikasında - şairin doğulduğu və yaşayıb-yaratdığı Herat torpağında el bayramı kimi keçirilib.

"Həzrət Əmir Əlişir Nəvainin düşüncələrini yenidən öyrənmək" adlı beynəlxalq elmi konfransa Əfqanıstan alimləri ilə yanaşı, Azərbaycan, Özbəkistan, Qazaxıstan, Qırğızıstan, Tacikistan, Türkmənistandan olan nəvaişünas alimlər dəvət olunub.

Konfransa ölkəmizi AMEA Nizami Gəncəvi adına Ədəbiyyat İnstitutunun şöbə müdiri, nəvaişünas alim, filologiya elmləri doktoru Almaz Ülvi Binnətova və AMEA A.Bakıxanov adına Tarix İnstitutunun aparıcı elmi işçisi, dosent, tarix üzrə fəlsəfə doktoru Mübariz Ağalarlı təmsil edib.

Konfransın ilk günü - plenar iclasda konfrans iştirakçılarının təbrik nitqləri dinlənilib, Azərbaycan alimlərinin hər ikisi təbrik nitqi söyləyərək konfransın təşkilat komitəsinə öz kitablarını hədiyyə ediblər. İkinci gün isə bölmə iclasında filologiya elmləri doktoru Almaz Ülvi Binnətovanın "Əlişir Nəvainin elmi-filoloji və dini-təsəvvüfi əsərləri", dosent Mübariz Ağalarlının isə "Əmir Əlişir Nəvai dövründə Azərbaycan dövlətləri ilə Teymurilər dövləti arasında siyasi və diplomatik münasibətlər" adlı məruzələri dinlənilib.

Konfransın üçüncü günü Heratın tarixi yerlərinə - Əlişir Nəvainin məqbərəsi, Gövhərşad Bəyim Camisi, İskəndər Qalası və s. səyahət konfrans iştirakçılarının ürəyincə olub.

Konfransın dördüncü günü Kabil şəhərində bir sıra görüşlər keçirilib. Azərbaycandan olan alimləri Əfqanıstan İslam Respublikası Elmlər Akademiya¬sının prezidenti Abdul Zahir Şakib ilə görüşərək əməkdaşlıq barədə söhbətlər ediblər.

Bütün konfrans iştirakçıları azərbaycanlı alimləri Qarabağın düşmən tapdağından azad edilməsi münasibətilə təbrik ediblər.

Konfrans iştirakçılarına Əfqanıstan istehsalı lacivərd daşından hazır¬lan¬mış Əlişir Nəvainin barelyefi, konfransın materiallarının yer aldığı kitabı və Əlişir Nəvai yaradıcılığını özündə əks etdirən stolüstü təqvim hədiyyə edilib.

1937-ci ildən ölməz sənətkarın adını daşıyan Respublika Gənclər Kitabxanası Cəfər Cabbarlının anadan olmasının 120 illik yubileyi münasibətilə onun biblioqrafiyasını yenidən işləyərək istifadəçilərə təqdim edib.

Kitabxanadan bildirilib ki, bu istiqamətdə araşdırmaları 2 ilə yaxın davam edib. Gərgin zəhmət və inadlı axtarışlar nəticəsində Respublika Gənclər Kitabxanasının ədibin yubileyi münasibətilə hazırladığı yeni biblioqrafiya onun yaradıcılığının və haqqında yazılmış materialların 1907-2020-ci illərini əhatə edir.

Dörd mindən yuxarı mənbəni əhatə edən, ümumi və 4 xüsusi hissədən ibarət olan biblioqrafiyanın layihə rəhbəri Respublika Gənclər Kitabxanasının direktoru Oruc Quliyev, elmi redaktoru və “Ön söz” müəllifi filologiya elmləri doktoru, professor İslam Qəribli, elmi məsləhətçi tarix üzrə fəlsəfə doktoru, dosent Pərviz Kazımı, tərtibçilər kitabxananın əməkdaşları Tamella Məmmədova və Yeganə Sadıqlıdır.

Biblioqrafiyanın ümumi hissəsində Azərbaycan Respublikasının Prezidenti İlham Əliyevin Cəfər Cabbarlının 120 illiyinin qeyd edilməsi haqqında Sərəncamının tam mətni, göstərici haqqında qısa məlumat, kitabın elmi redaktoru İslam Qəriblinin “Əbədiyaşar sənətkar” adlı “Ön söz”ü, Cəfər Cabbarlının həyat və yaradıcılığının əsas tarixləri, Cəfər Cabbarlının seçilmiş fikirləri və ifadələri, görkəmli şəxsiyyətlərin Cəfər Cabbarlı haqqında söylədikləri fikirlər təqdim olunur.

Biblioqrafiyanın 9 yarımbölmədən ibarət olan I hissəsi C.Cabbarlının Azərbaycan dilində çap olunmuş bütün əsərlərini əhatə edir. Burada sənətkarın kitabları, kitablarda, dərsliklərdə, məcmuələrdə və dövri mətbuatda dərc edilmiş əsərləri, dramları, hekayələri, poema və lirik şeirləri, satirik şeir və felyetonları, məqalələri, çıxışları, məktubları, müsahibələri, xatirələri və tərcümələrinin çap olunduğu mənbələr xronoloji ardıcıllıqla verilib.

Biblioqrafiyanın ikinci hissəsi “Cəfər Cabbarlının həyat və yaradıcılığı haqqında” adlanır.12 yarımbölməyə ayrılan bu hissədə C.Cabbarlı və onun irsi haqqında yazılan kitab, məqalə, monoqrafiya, dissertasiya, sözlərinə yazılmış mahnılar və s. bu kimi məsələlərə dair biblioqrafik təsvirlər qruplaşdırılaraq yığılıb.

Vəsaitin “Əlavələr” bölməsində “Elektron kitablar”, “Filmoqrafiya”, “Arxiv materialları”, “İzomateriallar”, “İnternet resursları” və “Cəfər Cabbarlının gizli imzaları” yarımbölmələri də verilib.

Biblioqrafiyanın III hissəsini sənətkarın həyatı və yaradıcılığı, əsərləri, haqqında yazılanlar və s. bu kimi məsələlər barədə rus və digər dillərdə olan materialların siyahısı təşkil edir.

Azərbaycan, rus və başqa dillərdə materialların öz əksini tapdığı biblioqrafik göstəricidə ədəbiyyat bölmələr daxilində xronoloji prinsip əsasında, əlifba sırası ilə verilib. Vəsaitdə ilk dəfə olaraq “Cəfər Cabbarlı dünya kitabxanalarında” bölməsi də yer alıb.

Göstəricidən istifadəni asanlaşdırmaq məqsədilə tərtib edilən IV hissə “Köməkçi göstəricilər” adlanır ki, bu hissənin özü də Azərbaycan və rus dilində olmaqla iki bölmədən ibarətdir.

Biblioqrafiya ədəbiyyatşünas alimlər, tədqiqatçılar, kitabxanaçı-biblioqraflar və geniş oxucu kütləsi üçün nəzərdə tutulub.

Biblioqrafiyanın tərtibçiləri vəsaiti tərtib edilərkən Cəfər Cabbarlı adına Respublika Gənclər Kitabxanasının, M.F.Axundzadə adına Milli Kitabxananın, AMEA Mərkəzi Elmi Kitabxanasının, AMEA-nın, Nizami adına Ədəbiyyat Institutunun, Nəsimi adına Dilçilik İnstitutunun, BDU-nun, ADPU-nun, ADMİU-nun kitabxanalarının fondlarından, ənənəvi və elektron kataloqlarından, internet resurslarından, C.Cabbarlının ev-muzeyi, C.Cabbarlı adına Teatr Muzeyi, M.Füzuli adına Əlyazmalar İnstitutunun, S.Mümtaz adına Dövlət Ədəbiyyat və İncəsənət Arxivinin sənədlərindən istifadə ediblər.

Azərbaycan və Türkiyə arasında mədəniyyət sahəsində əlaqələrin inkişafından danışılıb.

Mədəniyyət Nazirliyindən bildirilib ki, bu barədə aprelin 13-də mədəniyyət naziri Anar Kərimovun Türkiyənin ölkəmizdəki fövqəladə və səlahiyyətli səfiri Erkan Özoralın diplomatik fəaliyyətinin başa çatması ilə əlaqədar səfirlə görüşü zamanı qeyd edilib.

Anar Kərimov iki qardaş ölkə arasında münasibətlərin bütün sahələrdə uğurlu inkişafından söz açaraq, Erkan Özoralın diplomat kimi bu prosesdə fəaliyyətini xüsusi vurğulayıb.

Tarixi zəfərlə nəticələnən Vətən müharibəsində Türkiyənin ölkəmizlə həmrəyliyini diqqətə çatdıran nazir Azərbaycanın haqq işinə Türkiyə dövlətinin və xalqının hərtərəfli dəstəyinə görə minnətdarlığını ifadə edib.

Mədəniyyət Nazirliyinin nümayəndə heyətinin bu yaxınlarda qardaş ölkəyə səfərini xatırladan Anar Kərimov Türkiyə ilə mədəniyyət sahəsində əməkdaşlığın daha da gücləndirilməsi və müxtəlif sahələr üzrə təcrübə mübadiləsinin aparılmasının önəmini vurğulayıb. Qeyd edib ki, Vətən müharibəsində əldə edilən Qələbənin həm türk dünyasında, həm də beynəlxalq platformada ən yüksək səviyyədə təbliğində Türkiyə ilə işbirliyi böyük əhəmiyyət kəsb edir.

Səmimi qəbula görə təşəkkürünü bildirən Erkan Özoral diplomatik fəaliyyəti müddətində ölkələrimiz arasında əlaqələrin bütün istiqamətlər üzrə, o cümlədən mədəniyyət sahəsində uğurlu inkişafından məmnunluğunu ifadə edərək, Azərbaycan üçün çox önəmli bir dövrdə burada səfir qismində çalışdığını, ölkəmizin tarixi Zəfərinə şahidlik etdiyini deyib.

Azərbaycanın apardığı mübarizəyə Türkiyənin ilk günlərdən bütün qurum və təşkilatları ilə dəstək verdiyini, bütün imkanları ilə azərbaycanlı qardaşlarının yanında olduğunu bildirən diplomat bunu ölkələrimiz arasındakı sarsılmaz münasibətlərin təzahürü kimi qiymətləndirib.

Erkan Özoral bundan sonrakı fəaliyyətində də qardaş xalqlarımız arasında əlaqələrin inkişafında fəal iştirak edəcəyini qeyd edib.

Sonda nazir Azərbaycanda səfir kimi səlahiyyət müddəti başa çatan Erkan Özorala gələcək fəaliyyətində uğurlar arzulayıb.

Ölkəmizə səfəri çərçivəsində İtaliya Senatının Xarici işlər və emiqrasiya daimi komissiyasının sədri, senator Vito Petroçelli, Matera şəhərinin meri Domeniko Bennardi və Matera Şəhər Şurasının sədri Antonio Materdomini aprelin 13-də “İçərişəhər” Dövlət Tarix-Memarlıq Qoruğu İdarəsi (DTMQİ) İdarə Heyətinin sədri Əsgər Ələkbərovla görüşüblər.

Görüşdə iki ölkə arasında mədəniyyət və incəsənət, mədəni irsin qorunması və idarə olunması sahələrində əməkdaşlıq münasibətlərinin inkişafından məmnunluq ifadə olunub, növbəti beş il ərzində əməkdaşlığın perspektivləri müzakirə edilib.

Görüşdə UNESCO-nun Ümumdünya İrs Siyahısına daxil edilən İçərişəhər və Matera şəhəri arasında əməkdaşlığın yaradılması məqsədilə “İçərişəhər” Dövlət Tarix-Memarlıq Qoruğu İdarəsi ilə Matera Şəhər Bələdiyyəsi arasında “Dostluq və Əməkdaşlıq haqqında Protokol” imzalanıb.

Protokolun imzalanmasında əsas məqsəd İçərişəhər və Matera şəhəri arasında dostluq münasibətlərini genişləndirmək, iqtisadi, sosial və mədəni əlaqələri daha da gücləndirmək, ortaq fəaliyyət sahələrini müəyyən etməkdən ibarət olub.

Eyni zamanda, sənəddə incəsənət, mədəniyyət, turizm, elm və tarix sahələrində birgə fəaliyyət, proqram və layihələrin təşkilinə, eləcə də təcrübə və informasiya mübadiləsinə qarşılıqlı dəstəyin verilməsi, mədəni irsin qorunması, bərpası və inkişafı sahələrində əməkdaşlığı sürətləndirmək və digər məsələlər öz əksini tapıb.

Görüşdən sonra jurnalistlərə açıqlama verən “İçərişəhər” Muzey Mərkəzinin direktoru Əminə Məlikova bildirib ki, bu il ölkəmizdə “Nizami Gəncəvi İli” kimi qeyd olunur və bu protokolun qədim Şirvanşahlar Sarayında imzalanması heç də təsadüfi deyil: “Dahi Nizami Gəncəvinin “Leyli və Məcnun” poeması məhz Şirvanşah I Axsitanın sifarişi ilə yazılıb və bir neçə əsrlərdən sonra da qərbdə bu poemanın oxşarı olan dünyaca məşhur Şekspirin “Romeo və Culyeta” əsəri yazılıb. Buna görə də biz əminik k, muzey sahəsində də bizi davamlı əməkdaşlıq gözləyir”.

Görüşdən sonra qonaqlar İçərişəhərin tarixi abidələri ilə tanış olublar.

Aprelin 13-də Azərbaycan Respublikasının mədəniyyət naziri Anar Kərimov Türkiyənin ölkəmizdəki fövqəladə və səlahiyyətli səfiri Erkan Özoralı diplomatik fəaliyyətinin başa çatması ilə əlaqədar qəbul edib.  Səfiri salamlayan Anar Kərimov, iki qardaş ölkə arasında münasibətlərin bütün sahələrdə uğurlu inkişafından söz açaraq, Erkan Özoralın diplomat kimi bu prosesdə fəaliyyətini xüsusi vurğulayıb.   Tarixi zəfərlə nəticələnən Vətən müharibəsində Türkiyənin ölkəmizlə həmrəyliyini diqqətə çatdıran nazir Azərbaycanın haqq işinə Türkiyə dövlətinin və xalqının hərtərəfli dəstəyinə görə minnətdarlığını ifadə edib.  Mədəniyyət Nazirliyinin nümayəndə heyətinin bu yaxınlarda qardaş ölkəyə səfərini xatırladan Anar Kərimov Türkiyə ilə mədəniyyət sahəsində əməkdaşlığın daha da gücləndirilməsi və müxtəlif sahələr üzrə təcrübə mübadiləsinin aparılmasının önəmini vurğulayıb. Qeyd edib ki, Vətən müharibəsində əldə edilən Qələbənin həm türk dünyasında, həm də beynəlxalq platformada ən yüksək səviyyədə təbliğində Türkiyə ilə işbirliyi böyük əhəmiyyət kəsb edir.  Səmimi qəbula görə təşəkkürünü bildirən Erkan Özoral, diplomatik fəaliyyəti müddətində ölkələrimiz arasında əlaqələrin bütün istiqamətlər üzrə, o cümlədən mədəniyyət sahəsində uğurlu inkişafından məmnunluğunu ifadə edərək, Azərbaycan üçün çox önəmli bir dövrdə burada səfir qismində çalışdığını, ölkəmizin tarixi Zəfərinə şahidlik etdiyini deyib. Azərbaycanın apardığı mübarizəyə Türkiyənin ilk günlərdən bütün qurum və təşkilatları ilə dəstək verdiyini, bütün imkanları ilə azərbaycanlı qardaşlarının yanında olduğunu bildirən diplomat bunu ölkələrimiz arasındakı sarsılmaz münasibətlərin təzahürü kimi qiymətləndirib.  Erkan Özoral bundan sonrakı fəaliyyətində də qardaş xalqlarımız arasında əlaqələrin inkişafında fəal iştirak edəcəyini qeyd edib. Sonda nazir Azərbaycanda səfir kimi səlahiyyət müddəti başa çatan Erkan Özorala gələcək fəaliyyətində uğurlar arzulayıb.

Azərbaycanın Mərakeşdəki səfirliyi və Azərbaycan-Mərakeş Dostluq qrupunun təşkilatçılığı ilə İslam Dünyası Təhsil, Elm və Mədəniyyət təşkilatının (ICESCO) mənzil qərargahında “İşlah va Tənmiyə” qəzetinin redaktoru, yazıçı–jurnalist Əhməd Mutçunun müəllifi olduğu “Azərbaycan - İslam Şərqində ilk demokratik respublika” kitabının təqdimat mərasimi keçirilib.

Tədbirdə Türkiyənin Mərakeşdəki səfiri Əhməd Aydın Doğan, Ukraynanın səfiri Oksana Vasilyeva, İordaniyanın səfiri Hazem, Qambiya, Mavritaniya, Tunis və digər ölkələrin Rabatdaki səfirliklərinin nümayəndələri, Azərbaycan-Mərakeş Dostluq qrupunun üzvləri, yerli ictimai-siyasi xadimlər və universitet professorları iştirak ediblər.

Tədbiri giriş sözü ilə açan Azərbaycan-Mərakeş Dostluq cəmiyyətinin katibi M.Faqiri Azərbaycanın tarixinə və müasir dövrünə, xarici siyasətinə və iqtisadi nailiyyətlərinə, habelə iki ölkə arasındakı əlaqələrə həsr olunmuş kitabın ölkələrimiz və dost xalqlarımız arasındakı münasibətlərdə mühüm hadisə olduğunu tədbir iştirakçılarının diqqətinə çatdırıb.

Kitabın müəllifi Əhməd Mutçu çıxış edərək, Azərbaycana etdiyi səfərlərindən, xüsusilə də 2020-ci ilin fevral ayında keçirilmiş parlament seçkilərində Mərakeşi təmsil edən jurnalist kimi iştirakından sonra bu dost ölkə haqqında kitab yazmaq və onunla bağlı həqiqətləri Mərakeş ictimaiyyətinə çatdırmaq qənaətinə gəldiyini qeyd edib.

O, Azərbaycanda səfərdə olarkən burada keçirdiyi görüşlərin onda xoş təəssürat, səmimi hisslər doğurduğunu bildirib. Məhz bu çoxsaylı görüşlərdən sonra bu ecazkar ölkə, uzun illər ərzində apardığı rəşadətli mübarizədən sonra torpaqlarını azad etmiş şücaətli xalq və uzaqgörən, müdrik Prezident haqqında fikirlərini mərakeşli oxucularla bölüşmək imkanından məmnunluğunu ifadə edib.

Müəllif Azərbaycanın keçmiş və müasir tarixinə həsr olunmuş kitabında - ən qədim dövrlərdən başlayaraq, İslam Şərqində ilk demokratik dövlət–1918-ci ildə Azərbaycan Demokratik Respublikasının qurulması, keçən əsrin 90-cı illərində müstəqilliyini bərpa etməsi, bu müstəqilliyin möhkəmləndirilməsində ümummilli lider Heydər Əliyevin, ölkənin müasirləşdirilməsində və xarici siyasətində möhtəşəm uğurların əldə olunmasında Prezident İlham Əliyevin və Birinci vitse-prezident Mehriban Əliyevanın fəaliyyətlərinin əks olunduğunu vurğulayıb.

O, dost Azərbaycan haqqında Mərakeşdə yazılmış ilk kitabın müəllifi olaraq fəxr duyduğunu və kitabın bəzi nüsxələrinin Mərakeşin Milli Kitabxanasına təqdim etdiyini qeyd edib.

Mərakeşli alim Ridvan Himdi hazırkı dövrdə Mərakeş ictimaiyyətinə Azərbaycan, onun dost xalqı və liderləri barədə bilgi çatdırmaq baxımından kitabın müstəsna rol oynayacağını bildirib.

Sonra Azərbaycanın Mərakeşdəki səfiri Oktay Qurbanov çıxış edərək, kitabın müəllifi Ə.Mutçuya gərgin əməyə görə təşəkkürünü ifadə edərək, bunun Mərakeşlə Azərbaycan arasında dostluq münasibətlərinin möhkəmləndirilməsində mühüm töhfə olduğunu bildirib. O qeyd edib ki, bu kitab Azərbaycan Respublikasının təşəkkül və dirçəliş salnaməsidir və bu gün Mərakeş cəmiyyətini dövlətçilik tariximizin şanlı səhifələri, tarixi qələbələrin əldə olunmasında siyasi liderlərinin misilsiz xidmətləri ilə tanış etmək imkanı verən belə bir kitabın olması çox sevindiricidir.

Sonda səfir “Azərbaycan – İslam Şərqinin ilk demokratik respublikası” kitabının təqdimatına həsr olunmuş tədbirin ICESCO mənzil qərargahında keçirilməsinə yaratdığı imkana görə təşkilatın rəhbərliyinə, tədbir iştirakçılarına və yerli ictimaiyyətin nümayəndələrinə minnətdarlığını və kitabın müəllifi Ə.Mutçuya bir daha təşəkkürünü ifadə etdi.

Tədbirin sonunda yerli media nümayəndələrinə müsahibələr verildi.