XƏBƏRLƏR

Martın 2-də Şirvanşahlar Sarayı Kompleksində kompleksin 360 dərəcəli “3D” modelinin və bu model üzrə təşkil olunan virtual turların təqdimat mərasimi keçirilib.

Tədbiri “İçərişəhər” Muzey Mərkəzinin direktoru Əminə Məlikova açaraq layihənin həyata keçirilməsində əsas məqsədin insanların məsafəli şəkildə İçərişəhərdəki muzey və ekspozisiyaları ziyarət edə bilməsi, həmçinin təhsil müəssisələrinin Azərbaycan tarixinin, memarlığının və incəsənətinin öyrənilməsində əyani nümunə kimi muzey təcrübəsindən istifadəsinin olduğunu bildirib.

“İçərişəhər” Dövlət Tarix-Memarlıq Qoruğu İdarəsinin aparat rəhbəri Riad Qasımov qeyd edib ki, idarənin və Almaniyanın “EKM” Global Consulting GmbH şirkəti İçərişəhərin məşhur tarixi-memarlıq abidələrinin 360 dərəcəli "3D" virtual modellərinin hazırlanması istiqamətində əməkdaşlıq edir. Vurğulayıb ki, bu istiqamətdə ötən ilin sentyabrın 11-də tərəflər arasında qarşılıqlı əməkdaşlıq memorandumu imzalanıb.

Sonra “EKM” Global Consulting GMbH şirkətinin rəhbəri Elşən Musayev, mədəni irs üzrə “startaper” Səbinə Zülalova çıxış edərək tədbirin əhəmiyyətindən söz açıblar.

Sonda Şirvanşahlar Sarayı Kompleksinin 360 dərəcəli “3D” modeli və virtual turu təqdim edilib.

“Musulmansenfrance” portalında Fransa Milli Elmi Tədqiqatlar Mərkəzinin (CNRS) alimi, Paris Tədqiqatlar Ali Məktəbinin doktoru, bir çox beynəlxalq tədqiqat qruplarının üzvü Karim İfrakın “Azərbaycan – “Odlar yurdu”ndan “Tolerantlıq diyarı”na” sərlövhəli məqaləsi dərc olunub.

Məqalədə Azərbaycanın tarixindən, onun multietnik, çoxdinli və çoxmədəniyyətli ölkə olmasından söz açılıb. Bildirilib ki, hələ 1918-ci ildə Şərqdə ilk demokratik və dünyəvi respublika olan Azərbaycanın bu gün də tolerantlıq, plüralizm və inklüzivliyə böyük dəyər verir.

Diqqətə çatdırılıb ki, dini tolerantlığın qarantı olan Azərbaycan dözümlülük, dünyəvilik və inklüzivlik dəyərlərinin inkişafına yönəlmiş bütün fəaliyyətləri təşviq edir. Vurğulanıb ki, dövlətin, xüsusilə də Prezident İlham Əliyevin himayəsi ilə Bakıda müntəzəm olaraq beynəlxalq forumlar, konfranslar təşkil edilir. Ümumdünya Mədəniyyətlərarası Dialoq Forumu bunun bariz nümunəsidir. Bu Forum BMT Baş Assambleyası, eləcə də UNESCO tərəfindən mədəniyyətlərarası dialoqun təşviqi sahəsində beynəlxalq platforma kimi tanınır.

Məqalədə mədəniyyətlərarası dialoqun gücləndirilməsi məqsədilə İslam Əməkdaşlıq Təşkilatı və Avropa Şurasına üzv dövlətləri bir araya gətirən nadir “Bakı Prosesi”ndən də söz açılıb. Həmçinin Azərbaycanın ev sahibliyi etdiyi beynəlxalq tədbirlərdən bəhs olunub.

Yazıda Azərbaycan multikulturalizmi haqqında ətraflı məlumat verilir, ölkənin dini tolerantlıq və sosial inklüzivlik dəyərlərini təşviq etdiyi, Bakı Beynəlxalq Multikulturalizm Mərkəzinin fəaliyyət göstərdiyi diqqətə çatdırılır.

Azərbaycan Turizm Agentlikləri Assosiasiyası (ATAA) ilə Azərbaycan Turizm Blogerləri Assosiasiyası (ATBA) arasında post pandemiya dövründə daxili turizmin bərpası və qarşılıqlı əməkdaşlığın genişləndirilməsi məqsədilə işgüzar görüş keçirilib.

ATAA-nın mətbuat xidmətindən bildirilib ki, görüş çərçivəsində paytaxtda və regionlarda mövcud olan turizm istiqamətlərinin və turizm məhsullarının tanıdılması, keyfiyyətli turizm fəaliyyətinin qurulması və ictimai birliklər arasında qarşılıqlı iş birliyinin yaradılmasına dair fikir mübadiləsi aparılıb.

Regionların turizm potensialının üzə çıxarılmasında blogerlərin rolunu yüksək qiymətləndirən Azərbaycan Turizm Agentlikləri Assosiasiyasının sədri Rüfət Hacıyev, turizm şirkətləri ilə blogerlərin birgə fəaliyyətinin ölkə turizminin inkişafı və təbliği, eləcə də yeni məhsulların və istiqamətlərin yaradılması baxımından müsbət dəyişikliklər yarada biləcəyini deyib.

Görüşdə çıxış edən Azərbaycan Turizm Blogerləri Assosiasiyasının sədri Azər Qərib, dünya turizminə böyük zərbə vuran COVID-19 pandemiyası səbəbindən digər turizm subyektləri kimi blogerlərin də uzun müddət fəaliyyət göstərmədiyini diqqətə çatdırıb.

Assosiasiyanın postpandemiya dövründə ATAA ilə birgə əməkdaşlıq edərək ölkə turizminin bərpasında yaxından iştirak etməkdə maraqlı olduğunu deyən Azər Qərib, daxili turizmin təbliği baxımından blogerlərin fəaliyyətinin yenidən bərpa olunmasının vacibliyini bildirib.

Görüş çərçivəsində hər iki assosiasiya arasında qarşılıqlı əməkdaşlığın qurulmasına dair anlaşma sazişi imzalanıb.

Rəssam Nailə Qəndilova Belarusda Xocalı soyqırımına həsr olunmuş rəsm əsərini təqdim edib.

Azərbaycanın Belarusdakı səfirliyindən verilən məlumata görə, rəssam yeni yaradılmış “Fəlakətdən keçib qalib gəlmək” əsərini izah edərkən qeyd edir ki, bu yalnız güclü ruha və iradəyə malik olan xalqlara aiddir və Azərbaycan xalqı da öz timsalında bunu bütün dünyaya sübut etdi.

“Azərbaycan xalqı uzun illərdən sonra ilk dəfə işğal olunmuş əraziləri azad etdikdən sonra Xocalı soyqırımını qeyd edirdi. Ona görə də keçirdiyimiz müsibətləri günbəgün xatırlayır, bir tərəfdən xalqımızın və Xocalının acıları bizi kövrəldir, digər tərəfdən isə şəhidlərimizin qanının yerdə qalmamasından, torpaqlarımızın işğaldan azad olunmasından fərəh hissi keçirirdik. Vətən o zaman var ki, onun torpağını göz yaşları ilə suvaran və qorumağa hazır olan ərləri var. Torpaq uğrunda ölən varsa, Vətəndir”, - deyə Nailə Qəndilova əlavə edib.

Azərbaycan Respublikası Mədəniyyət Nazirliyinin nümayəndə heyətinin Türkiyəyə rəsmi səfəri davam edir. Martın 1-də günün ikinci yarısında mədəniyyət naziri Anar Kərimov və nümayəndə heyətinin üzvləri Türkiyə Cümhuriyyətinin qurucusu Mustafa Kamal Atatürkün məzarını – Anıt qəbri ziyarət ediblər. Anıt qəbrin önünə əklil qoyulub, “Azərbaycanın kədəri bizim kədərimiz, sevinci bizim sevincimizdir” deyən böyük öndər Atatürkün xatirəsi dərin ehtiramla yad edilib. *     *     * Sonra Cümhurbaşqanı Simfonik Orkestri (CSO) binasına gələn nümayəndə heyəti burada yeni konsert salonu ilə tanış olub. Türkiyənin ən böyük musiqi təsisatlarından olan CSO-nun tarixi və fəaliyyəti haqqında məlumat verilib. Cümhurbaşqanı himayəsində fəaliyyət göstərən kollektivə 1932-ci ildə Cumhurbaşqanı Filarmonik Orkestri (Riyaset-i Cumhur Filarmoni Orkestrası) 1957-ci ildə Cümhurbaşqanı Simfonik Orkestri (CSO) adı verilib. 2020-ci ildə CSO-nun yeni, möhtəşəm musiqi salonu istifadəyə verilib. Daha sonra mədəniyyət naziri Anar Kərimov və nümayəndə heyətinin üzvləri Ankara şəhərindəki Heydər Əliyev parkını ziyarət ediblər. Ankaranın Batıkənd rayonundakı park 2004-cü ildə salınıb, 2013-cü ildə parkda əsaslı yenidənqurma işləri aparılıb. 8 hektar sahəni əhatə edən park hazırda Türkiyə paytaxtının ən gözəl istirahət guşələrindən biridir. Parkda ulu öndər Heydər Əliyevin abidəsi ucaldılıb. Nümayəndə heyətinin üzvləri ümummilli lideri Heydər Əliyevin abidəsi önündə gül dəstələri qoyub, xatirəsini dərin ehtiramla yad ediblər. *     *     * Martın 1-də nümayəndə heyəti ölkəmizin Türkiyədəki səfirliyi tərəfindən keçirilən və mərhum səfir Fuad İsmayılovun xatirəsinə həsr olunan Azərbaycan-Türkiyə münasibətlərinə dair məqalə müsabiqəsinin qaliblərinin mükafatlandırılması mərasimində də iştirak edib.

Xəbər verdiyimiz kimi, Azərbaycan Respublikasının mədəniyyət naziri Anar Kərimovun rəhbərliyi ilə nümayəndə heyəti Türkiyədə səfərdədir. Səfər çərçivəsində martın 1-də Ankarada Azərbaycan Respublikasının mədəniyyət naziri Anar Kərimov ilə Türkiyə Respublikasının mədəniyyət və turizm naziri Mehmet Nuri Ersoy arasında görüş keçirilib. Görüşdə mədəni irs, kitab və nəşriyyat, muzey, kino sənayesi, incəsənət və qeyri-maddi mədəni irs sahələrində əməkdaşlığa dair fikir mübadiləsi aparılıb, qeyd olunan istiqamətlərdə birgə fəaliyyət barədə razılığa gəlinib. Nazir Nuri Ersoy 44 günlük Vətən müharibəsindəki qələbə münasibətilə Azərbaycan xalqını təbrik edib. Nazir Anar Kərimov öz növbəsində Vətən müharibəsində ölkəmizə verilən dəstəyə görə Türkiyə dövlətinə və türk xalqına dərin təşəkkürünü ifadə edib. *      *      * Görüşün sonunda ikitərəfli əlaqələrə dair mətbuat konfransı və sənədlərin imzalanması mərasimi keçirilib. Birgə Mədəniyyət Komissiyasının iclasının yekun protokolu imzalanıb. Sənədi Azərbaycan tərəfdən Mədəniyyət Nazirliyi Aparatının rəhbəri Vasif Eyvazzadə və Türkiyə tərəfindən heyət başqanı, Mədəniyyət və Turizm Nazirliyi Kino Müdiriyyətinin rəhbəri Erkin Yılmaz imzalayıb. Protokolda müasir və klassik əsərlərin tərcüməsinin və çapının təşviq edilməsi, teatr, kino, musiqi və digər sahələr üzrə festivallarda qarşılıqlı iştirak, eləcə də birgə festivalların təşkili, qarşılıqlı sərgilər sahəsində əməkdaşlıq məsələləri əksini tapıb. Yaradıcı sənayelər (teatr, musiqi, muzey, kino, nəşriyyat, qeyri-maddi mədəni irs və s.) sahəsində rəqəmsallaşdırma və yeni idarəetmə üzrə əməkdaşlıq və təcrübə mübadiləsi, muzey işi üzrə təhsildə əməkdaşlıq mövzusunun araşdırılması məsələlərinə də sənəddə yer verilib. Protokolda həmçinin mədəni sərvətlərin qorunması, qarşılıqlı elmi-tədqiqat və bərpa-konservasiya işinin aparılması, qeyd olunan sahələrdə təcrübə mübadiləsi, texniki və ekspert dəstəyinin göstərilməsi, həmçinin mədəni sərvətlərin qaçaqmalçılığının qarşısının alınmasında və qanunsuz olaraq xaricə çıxarılmış mədəni sərvətlərin qaytarılması məsələlərində qarşılıqlı dəstək kimi məsələlər əksini tapıb. Bundan əlavə, sənəd hər iki ölkədə təşkil olunan kitab sərgi-yarmarkalarında, seminar və konfranslarda, qarşılıqlı iştirak, müəlliflərin səfərlərinin təşviqi, kitabxanaçılıq sahəsində təcrübə mübadiləsi, habelə ortaq mədəni dəyərlərin və görkəmli şəxsiyyətlərin irsinin təbliği istiqamətində qarşılıqlı fəaliyyəti ehtiva edir. UNESCO-nun “Qeyri-maddi mədəni irsin qorunması haqqında” Konvensiyasının əhatə etdiyi birgə çoxmillətli sənədlərin sayının artırılması və qeyri-maddi mədəni irsin qorunması üçün əməkdaşlığın genişləndirilməsi də iclasın protokolunda əksini tapıb. Həmçinin Azərbaycan və Türkiyə arasında Mədəniyyət üzrə əməkdaşlıq Protokolunun imzalanması üçün zəruri işlərin görülməsi və  Birgə komissiyanın (İşçi qrupunun) növbəti iclasının 2022-ci ildə Azərbaycanda keçirilməsi barədə razılıq əldə olunub. *      *      * Həmçinin Azərbaycan Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti ilə Türk İşbirliği və Koordinasiya Agentliyi Başqanlığı (TİKA) arasında əməkdaşlıq memorandumu imzalanıb. Sənədi Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli və Türk İşbirliği və Koordinasiya Agentliyinin (TİKA) rəhbəri Serkan Kayalar imzalayıb.

Azərbaycan Respublikasının mədəniyyət naziri Anar Kərimovun rəhbərlik etdiyi nümayəndə heyətinin Türkiyəyə səfəri davam edir. Martın 1-də Ankarada Azərbaycan-Türkiyə Mədəniyyət üzrə Birgə Komissiyanın iclası keçirilib. İclasa Azərbaycan Respublikası tərəfdən Mədəniyyət Nazirliyinin Aparat rəhbəri Vasif Eyvazzadə, Türkiyə tərəfdən Mədəniyyət və Turizm Nazirliyi  Kino Müdiriyyətinin rəhbəri Erkin Yılmaz sədrlik edib. İclasda mədəni irs, kitabxana, musiqi, teatr, muzey və mədəni sərvətlər, kino və digər sahələrdə müzakirələr aparılıb və  əməkdaşlıq məsələləri razılaşdırılıb. Qeyd edək ki, martın 3-dək davam edəcək səfər proqramında Azərbaycan Respublikasının mədəniyyət naziri Anar Kərimovun Türkiyə Respublikasının mədəniyyət və turizm naziri Mehmet Nuri Ersoy və digər rəsmi şəxslərlə görüşləri, mədəniyyətin müxtəlif sahələri üzrə  əməkdaşlığa dair müzakirələrin aparılması, müvafiq sənədlərin imzalanması, Nizami Gəncəvinin anadan olmasının 880 illiyi ilə əlaqədar “Dahi Azərbaycan şairi Nizami Gəncəvi” mövzusunda kitab və foto sərgisinin açılış  mərasimi, həmçinin digər tədbirlər nəzərdə tutulur. Səfər martın 3-də İstanbulda davam edəcək. Səfər çərçivəsində nazir Anar Kərimovun Türkiyədə yaşayan azərbaycanlı mədəniyyət və incəsənət xadimləri ilə görüşləri də nəzərdə tutulur.

Azərbaycan Respublikasının mədəniyyət naziri Anar Kərimovun rəhbərlik etdiyi nümayəndə heyəti fevralın 28-də Türkiyə Respublikasına səfərə gedib. Nümayəndə heyətinə Mədəniyyət Nazirliyi Aparatının rəhbəri Vasif Eyvazzadə, nazirlik yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli və nazirliyin müvafiq struktur bölmələrinin rəhbərləri daxildir.  Fevralın 28-də nümayəndə heyətinin ilk görüşü Xaricdə Yaşayan Türklər və Qohum Topluluqlar İdarəsinin sədri Abdullah Ərən ilə baş tutub. Görüşdə xaricdə yaşayan türklərlə azərbaycanlılar arasında mədəni əlaqələrin və bağların gücləndirilməsi ilə bağlı layihələr, mədəniyyət və irs sahəsində təhsil proqramları, mədəni əlaqələrin genişləndirilməsi, kino sənayesinin inkişafı, mədəni irsin qorunması və mədəniyyətin digər sahələrində təcrübə mübadiləsi ilə bağlı fikir mübadiləsi aparılıb. Tərəflər arasında qarşılıqlı kitablar təqdim olunub. Görüşün sonunda nazir Anar Kərimov səmimi qəbula görə təşəkkürünü bildirib və ilk səfərinin Türkiyəyə baş tutmasından məmnunluğunu ifadə edib.

Martın 6-da Abdulla Şaiq adına Azərbaycan Dövlət Kukla Teatrı Fransa yazıçısı Ş.Perronun nağılının motivləri əsasında hazırlanan “Çəkməli pişik” tamaşasını nümayiş etdirəcək.

Tamaşanın quruluşçu rejissoru Anar Məmmədov, quruluşçu rəssamı Rəvanə Yaqubova, bəstəkarı Cahangir Zülfüqarovdur. Xüdbinlik, lovğalıq və yalançılığın komik oyun üslubu ilə tənqid olunduğu tamaşada Qoca dəyirmançının kiçik oğluna miras kimi qalan pişiyi və onun sayəsində sahibinin zəfərləri ön plana çıxarılır.

Qeyd edək ki, tamaşa teatrın “YouTube” kanalında saat 12-də yayımlanacaq.

Daşkənddəki Beynəlxalq Britaniya məktəbində “Xalqların adət-ənənələri və milli mətbəxi” adlı xeyriyyə festivalı keçirilib.

Festivalda ABŞ, Böyük Britaniya, Rusiya, İtaliya, İran, Misir, Səudiyyə Ərəbistanı, Cənubi Koreya, Hindistan, Pakistan, Qazaxıstan, Qırğızıstan, İndoneziya, Tacikistan və digər ölkələrin Özbəkistandakı səfirlikləri və mədəniyyət mərkəzləri iştirak ediblər.

Ölkəmizi Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzi (AMM) təmsil edib.

Açılış mərasimində çıxış edənlər festivalın əhəmiyyətindən danışıb, belə tədbirlərin gənclərin vətənpərvərlik ruhunda tərbiyə edilməsindəki önəmini vurğulayıb.

Ölkəmiz üçün ayrılmış guşədə Azərbaycanın bayrağı, ulu öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, “Qarabağ həqiqətləri” seriyasından Heydər Əliyev Fondu tərəfindən rus və ingilis dillərində çap edilən nəşrlər, Azərbaycanın tarixi və mədəniyyəti ilə bağlı Mədəniyyət Mərkəzinin Daşkənddə özbək dilində çap etdirdiyi kitablar nümayiş etdirilib.

Bu il Azərbaycanda “Nizami Gəncəvi İli” elan edilməsi ilə bağlı guşədə böyük şairin portreti və AMM-in özbək dilində çap etdirdiyi “Xəmsə”yə daxil olan kitabları da yer alıb.

Festivalda Qarabağın milli kişi və qadın geyimləri iştirakçıların böyük marağına səbəb olub. Azərbaycanın və Bakının mənzərələri, milli musiqi və məişət əşyalarımız, eləcə də AMM-in naxıştikmə və rəsm dərnəyi üzvlərinin əl işləri və suvenirlər də maraqla qarşılanıb. Azərbaycan guşəsində ölkəmizin tarixi, mədəniyyəti, turizmi və son illər Prezident İlham Əliyevin rəhbərliyi ilə əldə etdiyi nailiyyətlərə dair videomaterial nümayiş etdirilib.

Festivalın konsert proqramında AMM-in “Azərbaycan qızları” rəqs ansamblı milli rəqslərimizi ifa ediblər. Onların “Şuşanın dağları”, “Qafqaz rəqsi” iştirakçıların maraq və alqışları ilə qarşılanıb.

Digər salonlarda da xalqların milli mədəniyyəti, mətbəxi nümayiş etdirilib və satışı təşkil edilib. Rəsm, əl işlərinə dair müxtəlif guşələrdə usta dərsləri təşkil edilib.

Azərbaycan guşəsində 3 növ plov, dolma, qutab, həmçinin şəkərbura, paxlava və digər şirniyyatlarımızın satışı həyata keçirilib. Milli mətbəximizə dair stendi Daşkənddəki “Yeməli” adlı restoran təşkil edib. Bildirilib ki, satışdan əldə olunan vəsait uşaq evlərinin fonduna köçürüləcək.

AMM-in direktoru Samir Abbasov Özbəkistanda minlərlə şagirdin təhsil aldığı, dünyanın aparıcı ingilisdilli təhsil ocağı olan Britaniya məktəbində xalqımızın milli mədəniyyətinin və mətbəxinin təbliğinin xüsusi əhəmiyyəti olduğunu, festival çərçivəsində bir sıra maraqlı çıxışların təqdim edildiyini qeyd edib.

O belə festivallarda iştirak etməklə Azərbaycan Mədəniyyət Mərkəzinin ölkəmizin tarixi, mədəniyyəti, turizmi və mətbəxini tanıtma layihələrini həyata keçirdiyini söyləyib. S.Abbasov Daşkənddəki bir universitet və məktəblərə Azərbaycana dair nəşrlər hədiyyə olunduğunu və yaxın zamanlarda Britaniya məktəbinə də ölkəmizə dair nəşrlərin hədiyyə ediləcəyini vurğulayıb.