XƏBƏRLƏR

29 dekabr tarixində mədəniyyət nazirinin birinci müavini, nazirin vəzifələrini müvəqqəti icra edən Anar Kərimov “Kreativ Azərbaycan“ portalının (creative.az) təşkil etdiyi “Mədəniyyət və yaradıcılıq sahəsində rəqəmsal həllər” adlı startap müsabiqəsinin qalibləri ilə onlayn görüş keçirdi. Qaliblər qismində “Aydın və Aydan” layihəsinin rəhbəri Rəşid Ağamalıyev, “Kreativmart” layihəsinin rəhbəri Fərrux Rəhimov və “Onlayn rəqəmsal incəsənət arxivi” layihəsinin rəhbəri, “Ta(r)dino” incəsənət platformasının təsisçisi Əsli Səmədova iştirak etdilər. Görüşdə qalib iştirakçılar öz layihələri barədə məlumat verdilər və Azərbaycanda yaradıcı sənayelərin inkişafı və startap hərəkatının genişlənməsinə dair təkliflərini təqdim etdilər. Anar Kərimov müsabiqə qaliblərini təbrik etdi, onlarla yaradıcı sənayelər və startaplara dair fikir mübadiləsi apardı. O bildirdi ki, Mədəniyyət Nazirliyi ölkəmizdə innovativ fəaliyyətin, o cümlədən startapların dəstəklənməsinə böyük önəm verir və Nazirliyin yeni fəaliyyət strategiyasının formalaşdırılmasında bu istiqamətin əsas istiqamətlərdən biri kimi nəzərdə tutulduğunu qeyd etdi. Sonda, Anar Kərimov qaliblərə layihələrin icrasında uğurlar arzuladı. Qeyd edək ki, Azərbaycanda mədəniyyət və yaradıcılıq sahələrində yeni ideyaları və yanaşmaları dəstəkləmək məqsədilə Mədəniyyət Nazirliyinin “Kreativ Azərbaycan“ portalı 10 aprel 2020-ci il tarixində “Mədəniyyət və yaradıcılıq sahəsində rəqəmsal həllər” adlı startap müsabiqəsinə start vermişdir. Layihələrin qəbulu 15 may 2020-ci il tarixinədək davam etmiş və müsabiqəyə 50-ə yaxın layihə təqdim edilmişdir. Bu layihələr sırasından ən uğurlu hesab edilən 7 layihə ikinci, yəni 23 avqust 2020-ci il tarixindən etibarən başlayan video-pitçinq mərhələsinə vəsiqə qazanmışdır. Müsabiqənin qalibləri münsiflər heyətinin səsverməsi əsasında müəyyən olunmuş və 8 dekabr 2020-ci il tarixində elan edilmişdir: Layihənin ümumi mükafat fondu 12000 manat təşkil etmişdir.

Özbəkistandakı Heydər Əliyev adına Azərbaycan Mədəniyyət Mərkəzinin (AMM) təşəbbüsü, Azərbaycanın Özbəkistandakı səfirliyi və Özbəkistan Milli Mətbuat Agentliyinin dəstəyi ilə 2020-ci il üzrə Özbəkistanda Azərbaycan haqqında müxtəlif nominasiyalar üzrə “İlin qalibləri” müsabiqəsinə yekun vurulub.

Müsabiqənin qalibləri xüsusi təşkilat komitəsi tərəfindən müəyyən edilib.

İlin “Ən yaxşı televiziya verilişi” nominasiyası üzrə mükafata Özbəkistanın Dövlət Televiziyasının “Özbəkistan tarixi” telekanalının “Manbalar sozlaganda” adlı verilişinin aparıcısı Dildora Həsənova layiq görülüb.

Azərbaycanın tarixi, haqq işinin təbliği, ölkəmizin mədəniyyəti, ədəbiyyatı, turizmi, habelə iki ölkə arasında dostluq əlaqələrini fəal təbliğ edən Özbəkistan xəbər agentlikləri, saytları da xüsusi mükafata layiq görülüblər. Onların arasında Özbəkistanın “human.uz”, “qalampir.uz”, “interfax.uz”, “fikr.uz”, “islamonline.uz”, “interpress.uz”, “tnews.uz” və “ishonch.uz” saytları var.

İlin “Ən yaxşı tərcümə əsəri” nominasiyası üzrə Şəhla Qasımovanın tərcüməsində tanınmış Azərbaycan şairi Məhsəti Gəncəvinin özbək dilinə tərcümə etdiyi “Rübailər” kitabı seçilib.

“Ən fəal ictimaiyyət nümayəndəsi” nominasiyası üzrə şairə və tərcüməçi Dilbar Xaydarova mükafata layiq görülüb. Azərbaycanlı fəal, Gənclər təşkilatının sədri Əli Sarızadə də xüsusi mükafatla təltif edilib.

“İlin tanınmış ədəbiyyatşünasları, elm xadimləri” mükafatı üzrə Özbəkistanın “Turon” Akademiyasının prezidenti, akademik Haydarbek Bababekov, Özbəkistan Jurnalistlər Birliyinin İctimai Şurasının sədri, şair və tərcüməçi Karim Behriyev və ekspert Şokir Dolimov qalib elan olunub.

Müsabiqədə Azərbaycanın yaxın dostu, Azərbaycanın haqq səsinin dünyaya çatdırılmasında çoxsaylı xidmətləri olan özbək alim, jurnalist Şuxrat Salamov da mükafata layiq görülüb.

Azərbaycan publisisti, tarixçi alim Teymur Atayevin “Əmir Teymur fenomeni” kitabı “İlin ən yaxşı əsəri” seçilib.

Bundan başqa, Özbəkistanda İlin ən yaxşı mədəniyyət layihələri də müəyyənləşdirilib.

Özbəkistan Dövlət Film Fondunun dəstəyi və “First Art Media” şirkətinin layihəsi ilə Azərbaycan-Özbəkistan dostluğuna dair çəkilmiş “Oltin ko'prik: Qızıl körpü” sənədli filmi müsabiqənin qalibi elan olunub.

İlin ən yaxşı musiqi layihəsi mükafatına "Do'stlik madhi" klipi layiq görülüb. Qeyd edək ki, musiqinin sözləri Özbəkistanın tanınmış şairi Arif Toxtaş, ifaçısı isə Özbəkistanın Xalq artisti, tanınmış opera müğənnisi Ramiz Usmanovdur.

AMM-nin direktoru Samir Abbasov pandemiya ilə əlaqədar builki müsabiqənin qaliblərinin mükafatlandırılması mərasiminin keçirilmədiyini söyləyib, mükafatların fərdi olaraq təqdim ediləcəyini bildirib.

Maliyyә-bank sektorunun dәrinliyinin artırılması istiqamәtindә fәaliyyәt güclәndirilәcәk.

Bu barədə Azərbaycan Mərkəzi Bankının (AMB) 2021-ci il üçün pul və maliyyə sabitliyi siyasətinin əsas istiqamətləri barədə bəyanatında bildirilir.

Bankların strategiyalarında biznes kreditlәşmәsinә diqqәtin artırılması 2021-ci ildә dә tәşviq olunacaq. Banklararası pul bazarının aktivlәşdirilmәsi banklar arasında resurs axınının sürәtlәndirilmәsinә vә belәliklә biznesin maliyyә resurslarına tәlәbatının ödәnilmәsinә xidmәt edәcәk.

İnformasiya Texnologiyaları İnstitutunda neft-qaz sənayesində mədən avadanlığında qəzaların proqnozlaşdırılması üçün hibrid dərin neyron şəbəkə arxitektorları və müvafiq təlim alqoritmləri işlənilib.

Bu mühüm elmi nəticə ilə bağlı institutun əməkdaşı, texnika üzrə fəlsəfə doktoru, dosent Fərqanə Abdullayeva onlayn elmi seminarda məlumat verib. O bildirib ki, tədqiqat işində neft mədən avadanlığında (dərinlik dalma nasoslarında) nasazlıqların diaqnostikası üçün dərin hibrid neyron şəbəkə modeli təklif edilib. Belə nasosların quraşdırılması və texniki təmir üçün çıxarılması çox bahalı əməliyyatlardır. Dərinlik dalma nasosları dəniz şəraitində işlədikdə onların işinin real zamanda monitorinqi olduqca çətinləşir. Bu nasoslarda nasazlıqların vaxtında aşkarlanıb aradan qaldırılması neft-qaz sənayesində istismar və texniki xidmət xərclərini əhəmiyyətli dərəcədə azalda bilər.

Xəzər rayon Mərkəzləşdirilmiş Kitabxana Sistemi Qarabağ şəhidi Ağaəmi Heybətov haqqında məlumat saatı hazırlayıb.

Məlumat saatında şəhidin ömür yoluna nəzər salınıb.

Bildirilib ki, Ağaəmi Heybətov 1993-cü il iyunun 6-da Bakı şəhəri, Xəzər rayonu Buzovna qəsəbəsində anadan olub. O, 2000-ci ildə Xəzər rayonu Buzovna qəsəbəsində yerləşən Əfqan Əliyev adına 125 nömrəli tam orta məktəbin I sinfinə qəbul olub və oxuduğu müddət ərzində məktəbin ən fəal şagirdləri sırasında yer alıb. Ağaəmi məktəb tədbirlərində, bilik yarışlarında iştirak edib, müəllimlərinin sevimlisi olmağı bacarıb və sertifikatlara layiq görülüb. Ağaəmi azyaşlarında Buzovna qəsəbəsinin Dini İcmasının nəzdində yerləşən İmam Hüseyn məscidinin mədrəsəsində “Qurani-Kərim”in tədris kursunu bitirib və şəhadətnamə ilə təltif olunub.

Ağaəmi Heybətov 2002-ci ildə Buzovna qəsəbəsində yerləşən 4 nömrəli Uşaq İncəsənət Məktəbinə qəbul olub, 2007-ci ildə qarmon kursunu bitirərək diplom alıb. Heybətov idmanın müxtəlif növləri ilə də məşğul olub. O, 2011-ci ildə 125 nömrəli tam orta məktəbin XI sinfini fəallıqla bitirib və həmin ildə də Azərbaycan Dövlət İqtisad Universitetinin “Turizm və otelçilik” ixtisasına qəbul olub. Tələbəlik illərində də fəallıqlar göstərib, göstərdiyi diqqət və məsuliyyətə görə Qafqaz Resort Hotel tərəfindən sertifikatla təltif olunub. 2015-ci ildə universiteti bitirərək bakalavr dərəcəsi alıb. Universiteti bitirdikdən sonra o, 2015-ci ildə hərbi xidmətdə olub, 2016-ci ildə isə hərbi xidmətini başa vurub. Hərbi xidmətdə olduğu müddətdə Aprel döyüşlərində könüllü iştirak edib. Bu barədə şəhidin ailəsi 4 il sonra şəhid olduqdan sonra xəbər tutub. Hərbi xidmətdən qayıtdıqdan bir müddət sonra Ağaəmi müsabiqədən keçərək “Veysəloğlu” MMC-də işləməyə başlayıb. O, həmçinin Müdafiə Sənayesi Nazirliyi “Şərq” İstehsalat Birliyi “İqlim Elmi-İstehsalat Müəssisəsi” MMC-də də fəaliyyət göstərib. İgid qəhrəman 2020-ci il İkinci Qarağab müharibəsinin başlanması xəbərini eşidən kimi evdən gizlin orduya yazılıb, könüllü şəkildə cəbhəyə gedib, 2020-ci il oktyabrın 16-da torpaqlarımızım azadlığı uğrunda gedən döyüşlərdə könüllü iştirak edərək şəhidlik zirvəsinə ucalıb. Həmin ilin oktyabrın 25-də yaşadığı Buzovna kəndində yerləşən Şəhidlər xiyabanında dəfn olunub. Ölümündən sonra Azərbaycan Respublikası prezidentinin 15 dekabr 2020-ci il tarixli Sərəncamı ilə göstərdiyi şücaətə görə “Vətən uğrunda” medalı ilə təltif olunub.

27 illik ömür yolunda adına layiq yaşamağı bacaran Ağaəmi igidliyi ilə ürəklərdə əbədi yaşayacaq!

Koronavirus (COVID-19) pandemiyasının yaratdığı böhran nəticəsində turizm sektorunda müşahidə olunan tənəzzül digər ölkələrdə olduğu kimi, Azərbaycanda da müşahidə olunmaqda davam edir. Dövlət Sərhəd Xidmətinin məlumatına əsasən 2020-ci ilin yanvar-noyabr aylarında Azərbaycana dünyanın 155 ölkəsindən 756,8 min və ya əvvəlki ilin müvafiq dövrü ilə müqayisədə 3,9 dəfə az əcnəbi və vətəndaşlığı olmayan şəxs gəlib.

Bu barədə Dövlət Statistika Komitəsinin açıqlamasında bildirilir.

Məlumatda deyilir: “Koronavirus infeksiyasının yayılmasının qarşısını almaq məqsədilə Azərbaycan Respublikası ilə qonşu dövlətlər arasında dövlət sərhədində məhdudlaşdırıcı rejimin, eləcə də dünyanın əksər ölkələrində vətəndaşların səfərlərinə müvəqqəti məhdudiyyətlərin tətbiq olunması cari ilin aprel-noyabr aylarında ölkəmizə gələnlərin sayında kəskin azalmaya səbəb olmuş və baş tutmuş səfərlər əsas etibarilə qeyri-turizm məqsədilə həyata keçirilib.

Cari ilin yanvar-noyabr aylarında ölkəmizə gələnlərin 28,2 faizi Rusiya Federasiyası, 23,7 faizi Gürcüstan, 19,5 faizi Türkiyə, 8,9 faizi İran, 2,1 faizi Ukrayna, 1,7 faizi Hindistan, 1,6 faizi Səudiyyə Ərəbistanı, hər birindən 1,1 faiz olmaqla Birləşmiş Ərəb Əmirlikləri və Qazaxıstan, hər birindən 1,0 faiz olmaqla Pakistan və Türkmənistan, hər birindən 0,9 faiz olmaqla Küveyt və Böyük Britaniya, 0,8 faizi Belarus, hər birindən 0,7 faiz olmaqla Özbəkistan və İraq, hər birindən 0,5 faiz olmaqla Almaniya və İsrail, 5,0 faizi digər ölkələrin vətəndaşları, 0,1 faizi isə vətəndaşlığı olmayan şəxslər olub. Gələnlərin 80,3 faizini kişilər, 19,7 faizini qadınlar təşkil edib.

Cari ilin yanvar-noyabr aylarında Çindən gələnlərin sayı 16,4 dəfə, Cənubi Koreyadan - 13,6 dəfə, İsraildən - 10,7 dəfə, Yaponiyadan - 10,0 dəfə, Polşadan - 9,9 dəfə, İraqdan - 9,2 dəfə, Səudiyyə Ərəbistanından - 8,6 dəfə, Macarıstandan - 8,4 dəfə, Birləşmiş Ərəb Əmirliklərindən - 7,2 dəfə, Omandan və Kanadadan - 7,1 dəfə, ABŞ-dan¬ - 7,0 dəfə, Türkmənistandan - 6,1 dəfə, Fransadan - 6,0 dəfə, Almaniyadan və Qətərdən - 5,7 dəfə, Niderlanddan ¬və Qazaxıstandan - 5,3 dəfə, Böyük Britaniyadan - 5,2 dəfə, İtaliyadan - 4,3 dəfə azalıb.

Ümumilikdə Avropa İttifaqına üzv ölkələrdən gələnlərin sayı 5,9 dəfə azalaraq 22,1 min nəfər, körfəz ölkələrindən gələnlərin sayı 4,8 dəfə azalaraq 105,3 min nəfər, MDB ölkələrindən gələnlərin sayı 4,1 dəfə azalaraq 259,3 min nəfər olub.

Ölkəmizə gələn əcnəbilər və vətəndaşlığı olmayan şəxslərin 69,7 faizi dəmir yolu və avtomobil, 27,9 faizi hava, 2,4 faizi isə dəniz nəqliyyatından istifadə edib.

2019-cu ilin yanvar-noyabr ayları ilə müqayisədə xarici ölkələrə gedən Azərbaycan Respublikası vətəndaşlarının sayı 4,5 dəfə azalaraq 1135,0 min nəfər olmuşdur. Ölkə vətəndaşlarının 29,7 faizi İrana, 26,8 faizi Gürcüstana, 18,9 faizi Rusiya Federasiyasına, 15,7 faizi Türkiyəyə, 8,9 faizi digər ölkələrə səfər edib. Gedənlərin 70,2 faizini kişilər, 29,8 faizini qadınlar təşkil edib. Bu dövrdə İrana gedən Azərbaycan vətəndaşlarının sayı 5,5 dəfə, Gürcüstana gedənlərin sayı 4,8 dəfə, Rusiya Federasiyasına gedənlərin sayı 4,2 dəfə, Türkiyəyə gedənlərin sayı isə 3,3 dəfə azalıb.

2020-ci ilin yanvar-noyabr aylarında xarici ölkələrə səfər edən Azərbaycan Respublikası vətəndaşlarının 74,3 faizi dəmir yolu və avtomobil, 22,9 faizi hava, 2,8 faizi isə dəniz nəqliyyatından istifadə edib”.

Beynəlxalq Türk Mədəniyyəti və İrsi Fondunun təşkil etdiyi “Dünyamızı qoruyaq: Türk dünyasının adət-ənənələri” mövzusu üzrə beynəlxalq onlayn rəsm müsabiqəsinin qaliblərinin bir qisminin təltifetmə mərasimi keçirilib.

Fonddan bildirilib ki, münsiflər heyəti tərəfindən, eləcə də onlayn səsvermə yolu ilə Azərbaycandan seçilən qaliblərin bir qisminə Beynəlxalq Türk Mədəniyyəti və İrsi Fondunun prezidenti Günay Əfəndiyeva sertifikat və mükafatları təqdim edib. O, uşaqları təbrik edərək, türk dünyasının zəngin tarixinin, mədəniyyətinin daha da dərindən öyrənilməsinin vacibliyini vurğulayıb. Eyni zamanda Günay Əfəndiyeva rəhbərlik etdiyi təşkilat tərəfindən uşaqların çəkdikləri rəsm əsərləri əsasında türkdilli xalqların adət-ənənələrini əks etdirən kitabın hazırlandığını və gələn il kitabın təqdimat mərasiminin keçirilməsinin planlaşdırıldığını qeyd edib.

İştirakçılardan Məryəm Quluzadə “Gran - Pri “ , Kövsər Qurban “Dostluq”, Aytac Talışinski “Bilgi” nominasiyalarına layiq görülmüşdür. Eyni zamanda, Cəlil Kərimli 6-9 yaş üzrə 1-ci yer, Arif Quliyev 6-9 yaş üzrə 3-cü yer, Surə Dadaşzadə 14-16 yaş üzrə 2-ci yer tutub. Məryəm Quluzadə “Novruz”, Təhminə Kərimova “Səmazənlər”, Səməndər Qurbanzadə “Xalçalar”, Zarina Şıxaliyeva “Musiqi” kateqoriyaları üzrə birincilik qazanmışdır. Ölkədə və dünyada mövcud olan pandemiya səbəbindən Azərbaycanın rayonlarından, eləcə də türkdilli və digər ölkələrdən müsabiqəyə qatılan uşaqların sertifikatları elektron poçt vasitəsilə aidiyyəti üzrə çatdırılacaq.

Qeyd edək ki, müsabiqənin keçirilməsində məqsəd gəncləri türk dünyasının qədim adət-ənənələrinin, milli-mənəvi dəyərlərinin öyrənilməsinə və qorunmasına təşviq etmək, onların bacarıqlarını ictimaiyyətə nümayiş etdirmək idi. Beynəlxalq layihə olan “Dünyamızı qoruyaq: Türk dünyasının adət-ənənələri” adlı rəsm müsabiqəsinə təşkilata üzv və müşahidəçi ölkələrlə, o cümlədən Azərbaycan, Qazaxıstan, Qırğızıstan, Türkiyə, Özbəkistan və Macarıstanla yanaşı, Türkmənistan, Bolqarıstan və Ukraynadan olan 5-17 yaşarası məktəblilər qatılıb. Rəsmlər 12 mövzu üzrə “Dədə Qorqud”, “İrsimiz”, “Adət-ənənələr”, “Səmazənlər”, “Türk dünyasının qadını”, “Novruz”, “Xalçalar”, “Milli Mətbəx”, “Musiqi”, “Oyunlar”, “Dünyamızı qoruyaq” və “Türk birliyi” kateqoriyalarına bölünüb.

İşğaldan azad edilmiş ərazilərdə yerləşən abidələrin qorunması və bərpası ilə bağlı məsələlərin müzakirəsi məqsədilə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti yanında yaradılan İctimai Şuranın videokonfrans formatında görüşü keçirilmişdir. Cari ilin dekabrın 25-də Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəis müavini, rəis vəzifəsi səlahiyyətlərini icra edən Azad Cəfərlinin sədrliyi ilə işğaldan azad edilmiş ərazilərdə yerləşən abidələrin qorunması və bərpası ilə bağlı yaradılan  İctimai Şuranın üzvləri ilə videokonfrans formatında təsis görüşü keçirmişdir. Görüşdə işğaldan azad edilmiş ərazilərdə yerləşən mədəni irs nümunələrinin Ermənistan Respublikası tərəfindən dağıdılması, mənimsənilməsi və vandalizmə məruz qalması, dağıdılmış daşınmaz tarix və mədəniyyət abidələrinin vəziyyətinin qiymətləndirilməsi və bərpası ilə bağlı ətraflı fikir mübadiləsi aparılmışdır. Videokonfrans iştirakçılarını salamlayan Azad Cəfərli  işğaldan azad edilmiş ərazilərimizdə yerləşən daşınmaz tarix və mədəniyyət abidələri, onların əhəmiyyəti və Ermənistan Respublikasının dağıdıcı və vandalizm aktları nəticəsində məhv edilmiş və mənimsənilmiş abidələrimizin hazırkı vəziyyəti barədə tədbir iştirakçılarına məlumat verdi. Bildirildi ki, Azərbaycan Respublikası Prezidentinin 29 oktyabr 2020-ci il tarixli 1170 nömrəli Fərmanına uyğun olaraq, Azərbaycan Respublikasının Mədəniyyət Nazirliyini təmsil edən nümayəndələr abidələrin və mədəniyyət müəssisələrinin ilkin inventarlaşdırılması məqsədilə monitorinqlərə başlamışdır. Aparılan ilkin monitorinqlər zamanı 177 tarix-mədəniyyət abidəsinə, tarixi, memarlıq və arxeoloji əlamət daşıyan obyektə, habelə 368 mədəniyyət müəssisəsinə baxış keçirilmişdir. Monitorinqlər zamanı mədəniyyət müəssislərinin və abidələrin əksəriyyətinin dağıdıldığı, mənimsənildiyi və vandalizm aktlarına məruz qaldığı aşkar edilmişdir. Hazırda monitorinq davam edir. Azad Cəfərli Şuşa şəhərində də ölkə başçısının müvafiq tapşırığına əsasən inventarlaşdırma işləri aparıldığını diqqətə çatdırmış və daha sonra bu məqsədlə Şuşa şəhərinə ezam edilmiş Azərbərpa Elmi-Tədqiqat Layihə İnstitutu MMC-nin direktoru Telman Kərimliyə söz vermişdir. Telman Kərimli Şuşa şəhərində yerləşən abidələrin ümumi vəziyyəti barədə məlumat verərək qeyd etdi ki, şəhər ərazisində yerləşən bir çox abidə tamamilə məhv edilmiş, mənimsənilmiş, bəzi abidələr isə memarlıq quruluşu, bədii estetik görkəmi dəyişdirilərək yararsız hala salınmışdır. Azərbərpa Elmi-Tədqiqat Layihə İnstitutu MMC-nin direktoru abidələrə dəyən zərərin qiymətləndirilməsi, həmçinin onların gələcək bərpası üçün hazırda aparılan işlərin əhəmiyyətindən danışdı. Daha sonra söz “Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı” İctimai Birliyinin sədri, Şuşa şəhərinə ezam olunmuş nümayəndə heyətinin üzvü Faiq İsmayılova verilmişdir. O, çıxışında işğaldan azad edilmiş ərazilərimizdə yerləşən tarix-mədəniyyət abidələrinin qorunması, təbliği və bərpası ilə bağlı işlərin həyata keçirilməsində vətəndaş cəmiyyətinin, elm dairələrinin və bu sahənin fəallarının iştirakının əhəmiyyətindən danışdı.     Sonra söz videokonfrans iştirakçılarına verildi. Memarlıq və İncəsənət İnstitutunun dosenti Rahibə Əliyeva, “Miras” Mədəni İrsin Öyrənilməsinə Kömək İctimai Birliyinin sədri Şəhla Xəlili, Arxeologiya və Etnoqrafiya İnstitutunun əməkdaşı, arxeoloq-alim Səfər Aşurov, Bakı İncəsənət Mərkəzinin rəhbəri Rafael Gülməmmədli, sənətşünaslıq üzrə fəlsəfə doktoru Günel Seyidəhmədli, “İrs” jurnalının baş redaktoru Musa Mərcanlı və digərləri çıxış edərək abidələrin qorunması və bərpası ilə bağlı təkiflərini, ideyalarını diqqətə çatdırdılar. Çıxışlarda belə bir ümumi fikir ifadə olundu ki, Qarabağda tarixi abidələrin bərpasına təcrübəli mütəxəssislərin cəlb olunması, Şuşanın unikal tarixi-mədəni simasının qorunması istiqamətində fəaliyyətə hər kəs töhfə verməyə hazırdır. Bu cür görüşlərin təşkilini yüksək qiymətləndirdiklərini qeyd edən İctimai Şura üzvləri buna görə təşəkkür etdilər. Üzvlər tərəfindən təqdim olunacaq məlumatların vahid bir elektron mühitdə cəmlənməsi təklifi irəli sürüldü. Dövlət Xidmətinin rəis müavini, rəis vəzifəsi səlahiyyətlərini icra edən Azad Cəfərli həmin elektron mərkəzin yaradılmasını vacib hesab etdiyini bildirdi. Bununla əlaqədar saytın yaradılması ilə bağlı işlərin icrasının Dövlət Xidməti tərəfindən həyata keçiriləcəyi bildirildi. Videokonfransa yekun vuran Azad Cəfərli iştirakçılara fəallığa görə təşəkkürünü bildirdi. O, İctimai Şura üzvləri ilə görüşlərin davamlı bir platforma ehtiva etdiyini diqqətə çatdırdı və bununla əlaqədar görüşlərin gələcəkdə də davam etdiriləcəyini qeyd etdi.

Azərbaycan Respublikası Mədəniyyət Nazirliyinin tabeliyində fəaliyyət göstərən Bakı şəhər muzeylərinin rəhbərləri ilə videokonfrans formatında görüş keçirildi.  Görüşdə çıxış edən Muzey işi və mədəni sərvətlərə nəzarət şöbəsinin müdiri vəzifəsini m.i.e. Nərgiz Abdullayeva azad edilmiş rayonlarda geniş quruculuq işlərinin başlanacağı, həmin ərazilərdə mədəniyyət infrastrukturunun yaradılması, tarixi-mədəni abidələrin, o cümlədən muzeylərin bərpası ilə bağlı Nazirlik tərəfindən müvafiq işlərə başlanılması barədə məlumat verdi. Videokonfransda tarixi Zəfərlə başa çatan Vətən müharibəsində ölkəmizin ərazi bütövlüyü, torpaqlarımızın işğaldan azad edilməsi uğrunda döyüşərək qazi olan muzey əməkdaşlarının adları qeyd edilmiş, onların daim diqqət və qayğı altında saxlanılmasının əhəmiyyəti vurğulanmışdır.  Görüşdə iştirak edən muzey rəhbərləri azad edilmiş torpaqlarda bərpa ediləcək muzeylərlə bağlı təkliflərini irəli sürmüş, bərpa prosesində iştirak etməyə hazır olduqlarını bildirmişdir. Belə ki, “Qarabağın musiqi xadimləri muzeyi”nin yaradılması, muzeylərin fondunda saxlanılan Qarabağa aid eksponatların bərpası, işğaldan azad edilmiş ərazilərdə bərpa ediləcək muzeylərin fondlarının formalaşdırılması məqsədilə müvafiq işlərə başlanılması səsləndirilən təkliflər arasında olmuşdur.  Eyni zamanda görüşdə muzeylər tərəfindən 2020-ci il ərzində görülən işlər müzakirə olunmuşdur. Videokonfransda qeyd olunmuşdur ki, muzey müəssisələri pandemiya dövründə onlayn fəaliyyət vasitəsilə çox qısa zamanda öz işlərini karantin dövrünün tələblərinə uyğunlaşdırmış və bu müddət ərzində bir sıra onlayn sərgilər keçirilmiş, uğurlu layihələr reallaşdırılmış, muzeylərin sosial şəbəkələrdəki səhifələrində mütəmadi olaraq məlumatlar paylaşılmışdır.

Azərbaycan Respublikası Mədəniyyət Nazirliyinin tabeliyində fəaliyyət göstərən Bakı şəhər muzeylərinin rəhbərləri ilə videokonfrans formatında görüş keçirildi.  Görüşdə çıxış edən Muzey işi və mədəni sərvətlərə nəzarət şöbəsinin müdiri vəzifəsini m.i.e. Nərgiz Abdullayeva azad edilmiş rayonlarda geniş quruculuq işlərinin başlanacağı, həmin ərazilərdə mədəniyyət infrastrukturunun yaradılması, tarixi-mədəni abidələrin, o cümlədən muzeylərin bərpası ilə bağlı Nazirlik tərəfindən müvafiq işlərə başlanılması barədə məlumat verdi. Videokonfransda tarixi Zəfərlə başa çatan Vətən müharibəsində ölkəmizin ərazi bütövlüyü, torpaqlarımızın işğaldan azad edilməsi uğrunda döyüşərək qazi olan muzey əməkdaşlarının adları qeyd edilmiş, onların daim diqqət və qayğı altında saxlanılmasının əhəmiyyəti vurğulanmışdır.  Görüşdə iştirak edən muzey rəhbərləri azad edilmiş torpaqlarda bərpa ediləcək muzeylərlə bağlı təkliflərini irəli sürmüş, bərpa prosesində iştirak etməyə hazır olduqlarını bildirmişdir. Belə ki, “Qarabağın musiqi xadimləri muzeyi”nin yaradılması, muzeylərin fondunda saxlanılan Qarabağa aid eksponatların bərpası, işğaldan azad edilmiş ərazilərdə bərpa ediləcək muzeylərin fondlarının formalaşdırılması məqsədilə müvafiq işlərə başlanılması səsləndirilən təkliflər arasında olmuşdur.  Eyni zamanda görüşdə muzeylər tərəfindən 2020-ci il ərzində görülən işlər müzakirə olunmuşdur. Videokonfransda qeyd olunmuşdur ki, muzey müəssisələri pandemiya dövründə onlayn fəaliyyət vasitəsilə çox qısa zamanda öz işlərini karantin dövrünün tələblərinə uyğunlaşdırmış və bu müddət ərzində bir sıra onlayn sərgilər keçirilmiş, uğurlu layihələr reallaşdırılmış, muzeylərin sosial şəbəkələrdəki səhifələrində mütəmadi olaraq məlumatlar paylaşılmışdır.