XƏBƏRLƏR

Mayın 8-də biznes mühiti və beynəlxalq reytinqlər üzrə Komissiyanın Katibliyinin və Dövlət Turizm Agentliyinin təşkilatçılığı ilə Komissiyanın “Turizmin inkişafı” işçi qrupunun geniş tərkibdə iclası keçirilib.

AZƏRTAC xəbər verir ki, iclasda çıxış edən Komissiyanın Katibliyinin rəhbəri Vüsal Şıxəliyev turizm sektorunda aparılan mühüm işlərə töhfə verilməsi məqsədinə əsaslanan Dövlət Turizm Agentliyinin təşəbbüsü ilə 2022-ci ilin oktyabrında Komissiyanın tərkibində “Turizmin inkişafı” işçi qrupunun yaradıldığını bildirib.

O qeyd edib ki, Agentliyin rəhbərlik etdiyi işçi qrupun üzvlərinin ümumi sayı 40-a yaxındır və onlardan 12-si bilavasitə turizm sektorunda aparıcı olan özəl şirkətlərin və otellərin təmsilçiləridir.

“İşçi qrupun mandatı və fəaliyyət sahəsinin Dünya İqtisadi Forumu tərəfindən dərc edilən Səyahət və Turizmin İnkişafı İndeksinə fokuslandığını və bu indeksə əsasən həm region ölkələri ilə müqayisədə, həm də ümumi orta göstəricilərə nəzərən təhlükəsizlik, səyahət və turizmin prioritetləşdirilməsi, hava nəqliyyatı infrastrukturu, turistlərə xidmət infrastrukturu və təbii resurslar baxımından ölkəmizin kifayət qədər potensialı var. Ölkəmizin turizm potensialının beynəlxalq indekslər və bençmarklarla müqayisəli təhlilinin aparılması və bu sahədə təşəbbüslərin həyata keçirilməsi olduqca müsbət nəticələr verir. “Turizmin inkişafı” işçi qrupunun tərkibində turizm üzrə aparıcı özəl sektor təmsilçilərinin iştirakı və aidiyyəti dövlət qurumları ilə birlikdə eyni platforma əsasında məqsədyönlü və koordinasiyalı tədbirlərin həyata keçirilməsi vahid sinerjinin yaradılması ilə inklüzivliyi daha da artırır. Məhz çevik institusional çərçivə əsasında konstruktiv əməkdaşlığın nəticəsidir ki, işçi qrupun Fəaliyyət Planı 14 əsas blok üzrə 75 tədbirin icrasını əhatə edib”,- deyə o fikirlərinə əlavə edib.

Dövlət Turizm Agentliyinin Aparat rəhbəri, Komissiyanın “Turizmin inkişafı” işçi qrupunun rəhbəri Kənan Qasımov diqqətə çatdırıb ki, işçi qrupun təşkilati aktivliyi fonunda ötən dövrdəki fəaliyyətinə diqqət yetirsək, xeyli sayda geniş iclasların və tematik görüşlərin keçirildiyini müşahidə edə bilərik. O qeyd edib ki, Fəaliyyət Planının uğurla icrası bu sahəyə dair müsbət və davamlı layihələrin həyata keçirilməsinə geniş imkanlar yaradır.

Tədbirdə turizm sektoruna dair aktual mövzular, o cümlədən Səyahət və Turizmin İnkişafı İndeksinin avtomobil icarəsi üzrə böyük şirkətlərin mövcudluğu, qısamüddətli kirayələrin sayı, rəqabətli turizm xidmətləri və digər alt-indekslərinə dair müzakirələr və fikir mübadiləsi aparılıb, bu sahədə əldə olunan nailiyyətlər, müasir çağırışlar, eləcə də işçi qrupun növbəti dövr üzrə inkişaf prioritetləri və digər təşkilati məsələlər geniş müzakirə olunub.

68-ci “Avroviziya-2024” mahnı müsabiqəsinin birinci yarımfinalı İsveçin Malmö şəhərində keçirilib.

AZƏRTAC xəbər verir ki, yarımfinalda 15 ölkə çıxış edib. Bu ölkələrdən onu növbəti mərhələyə keçib. Bunlar Serbiya, Portuqaliya, Ukrayna, Sloveniya, Litva, Finlandiya, Kipr, Xorvatiya, İrlandiya və Lüksemburqdur.

Cəfər Cabbarlı adına Respublika Gənclər Kitabxanasında Ümummilli Lider Heydər Əliyevin mənalı həyat yolu, zəngin və çoxşaxəli irsindən bəhs edən “Azərbaycana fəda edilmiş şərəfli ömür” adlı geniş videomaterial hazırlanıb.

Kitabxanadan AZƏRTAC-a bildirilib ki, videomaterialda Ulu Öndərin 1969-1982-ci illərdə Azərbaycanın rəhbəri kimi gördüyü tarixi əhəmiyyətli işlər haqqında geniş məlumat verilib.

Materialda, həmçinin Heydər Əliyevin milli neft strategiyasının uğurla reallaşdırılması nəticəsində xalqımızın öz təbii sərvətlərinin tam sahibinə çevrilməsi, qısa müddətdə ölkəmizin inkişafına güclü təkan verən resursları əldə etməsi, Azərbaycan Respublikasının ilk Konstitusiyasının qəbul olunması, təhsil, iqtisadiyyat, səhiyyə, mədəniyyət kimi sahələrdə köklü islahatların həyata keçirilməsi, demokratik, müstəqil, hüquqi dövlət quruculuğu, nizami ordunun yaradılması, ölkəmizin beynəlxalq siyasi müstəvidə tanıdılması istiqamətində olan uğurlu fəaliyyəti haqqında məlumatlar öz əksini tapır. Burada Ulu Öndərin müsahibələrindən fraqmentlər də təqdim edilib.

Materialda bu il 20 illiyini qeyd edən Heydər Əliyev Fondunun fəaliyyət istiqamətləri, həyata keçirdiyi layihələr barəsində ətraflı informasiyalar yer alıb.

Bundan əlavə 2023-cü ildə kitabxanada Ulu Öndərin 100 illiyi ilə əlaqədar həyata keçirilən “Tarix yaradan şəxsiyyət - Heydər Əliyev 100” layihəsi çərçivəsində Ümummilli Liderə həsr edilən elektron məlumat bazasına əlavələr edilərək yeni bölmələr artırılıb. Azərbaycan və xarici dillərdə təsvirləri özündə əks etdirən “Kitablar”, “Dövrü mətbuat nümunələri”, “İzomateriallar”, “Elektron resurslar” kimi bölmələr yeni məlumatlarla zənginləşdirilib.

Silsilə materiallarla kitabxananın rəsmi saytından https://ryl.az/multimedia/azerbaycana-feda-edilmis-serefli-omur https://ryl.az/melumat-bazalari/Ulu_Onder_Heyder_Eliyev_el_melumat_bazasi/index.html tanış olmaq mümkündür.

68-ci “Avroviziya-2024” mahnı müsabiqəsinin birinci yarımfinalı İsveçin Malmö şəhərində keçirilir.

AZƏRTAC xəbər verir ki, yarımfinalda 15 ölkə çıxış edir. Bu ölkələrdən onu növbəti mərhələyə keçəcək.

Müsabiqədə Azərbaycanı Fahree və İlkin Dövlətov “Özünlə apar” mahnısı ilə təmsil edirlər.

Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə Nizami adına Daşkənd Dövlət Pedaqoji Universitetinin Özbək Dili və Ədəbiyyatı fakültəsində təhsil alan yuxarı kurs tələbələri və magistrlər üçün Azərbaycan dili və ədəbiyyatı mövzusunda mühazirələrin dinlənilməsinə başlanılıb.

AZƏRTAC xəbər verir ki, Özbəkistandakı Heydər Əliyev adına Azərbaycan Mədəniyyət Mərkəzinin inspektoru, filologiya üzrə fəlsəfə doktoru Kərimulla Məmmədzadə tərəfindən oxunan mühazirələrdə Azərbaycan ədəbiyyatı tarixi haqqında ətraflı məlumat verilərək mövzu ilə bağlı tələbələrdə ümumi təsəvvür yaradılmağa çalışılıb.

Bundan əlavə mühazirələrdə Azərbaycan şifahi xalq ədəbiyyatı, klassik ədəbiyyat, XX əsrin əvvəlləri və müasir dövr Azərbaycan ədəbiyyatı haqqında məlumatlar verilib. Həmçinin türk xalqlarının ədəbiyyat tarixi, ümumi Şərq ədəbiyyatının və ümumdünya ədəbiyyatından qaynaqlanan ortaq dəyərlər haqqında da söhbət açılaraq Azərbaycan ədəbiyyatının özbək ədəbiyyatı ilə müqayisəli təhlili də aparılıb.

Qeyd edək ki, Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə Azərbaycanın mədəniyyəti, incəsənəti, ədəbiyyatı və tarixinə aid mövzuların Özbəkistan ali məktəblərinin tədris proqramlarına salınması və azərbaycanlı alimlərin Özbəkistan ali məktəblərində mühazirə oxuması layihəsi çərçivəsində işlərin builki tədris ilinin sonuna qədər davam etdirilməsi və növbəti tədris ilində də aparılması planlaşdırılır.

Gürcüstanda fəaliyyət göstərən “Aktual Media” təşkilatı bu ölkədə yaşayan və böyük uğurlar qazanmış soydaşlarımız haqqında filmin çəkilişlərinə başlayıb.

Bu barədə AZƏRTAC-a “Aktual Media” qrupunun rəhbəri, aktual.ge xəbər portalının direktoru İlkin Hüseynov məlumat verib. Onun sözlərinə görə, uzun illərdir bəzi qüvvələr Gürcüstanda yaşayan azərbaycanlılarla bağlı məqsədyönlü şəkildə həqiqəti əks etdirməyən məlumatlar yayır, haqqımızda mənfi rəy yaradırlar. “Haqlı olaraq yeni nəsil azərbaycanlılar bununla razılaşmırlar. Ona görə də “Aktual Media” komandası fəaliyyətlərində bir çox uğur qazanmış, geniş potensiala malik gənclərimiz haqqında film çəkmək qərarına gəldi. Əsas məqsəd məlum stereotipləri dağıtmaq, azərbaycanlıların təkcə Gürcüstanın ictimai-siyasi, iqtisadi, mədəni həyatında deyil, xarici ölkələrdə də müxtəlif sahələrdə qazandıqları uğurları geniş ictimaiyyətə çatdırmaqdır”.

O bildirib ki, müxtəlif sahələrdə uğur qazanmış gənclərimizin həyat hekayələrini əks etdirəcək bədi-sənədli film 45 dəqiqəlik olacaq. “Novella” adlanacaq filmdə ilk olaraq böyük uğurlar qazanmış 7 gənc qəhrəmanın həyat yolundan bəhs olunacaq. Ssenari əsasında artıq çəkilişlərə başlanılıb. Çəkilişlər təkcə Gürcüstanda deyil, Azərbaycanda da aparılacaq.

Bu gün Azərbaycanın görkəmli bəstəkarı, Xalq artisti, Dövlət mükafatı laureatı, professor Soltan Hacıbəyovun anadan olmasının 105-ci ildönümü tamam olur. Bu münasibətlə Milli Kitabxanada “Xalq artisti Soltan Hacıbəyоv – 105” adlı geniş kitab sərgisi hazırlanıb.

Kitabxanadan AZƏRTAC-a bildirilib ki, sərgidə Milli Kitabxananın fondunda mühafizə olunan bəstəkarın əsərlərinin not yazıları, həyat və yaradıcılığına həsr olunmuş Azərbaycan və digər dillərdə kitablar nümayiş olunur.

Sərgi bir həftə davam edəcək.

Azərbaycan Milli Kitabxanasında Mədəniyyət Nazirliyi və kitabxananın birgə təşkilatçılığı ilə Ulu Öndər Heydər Əliyevin anadan olmasının 101 illiyinə həsr olunmuş “Heydər Əliyev Azərbaycanda müasir kitabxana quruculuğunun banisidir” mövzusunda elmi konfrans və “Ümummilli Lider Heydər Əliyev” adlı elektron məlumat bazasının təqdimatı keçirilib.

AZƏRTAC xəbər verir ki, tədbirdə əvvəlcə Dövlət Himni səsləndirilib. Ulu Öndər Heydər Əliyevin xatirəsi bir dəqiqəlik sükutla yad edilib.

Sonra Ümummilli Liderə həsr olunmuş film nümayiş edilib.

Milli Kitabxananın direktoru professor Kərim Tahirov bildirib ki, Azərbaycan dövlətinin bu günə gəlib çıxması, elmin, təhsilin, mədəniyyətin çiçəklənməsi məhz Ulu Öndərin qurduğu müdrik siyasətin nəticəsidir. Qeyd edib ki, Prezident İlham Əliyev Ulu Öndərin siyasi kursunu uğurla davam etdirir.

Tədbirdə çıxış edən Səbail Rayon İcra Hakimiyyəti başçısının müavini Kəmalə Həşimova, AMEA Mərkəzi Elmi Kitabxanasının direktoru, texnika üzrə fəlsəfə doktoru, dosent Hüseyn Hüseynov, Milli Kitabxananın Elmi işlər və kitabxana-informasiya xidməti üzrə direktor müavini, Əməkdar mədəniyyət işçisi, tarix üzrə fəlsəfə doktoru Ədibə İsmayılova Ümummilli lider Heydər Əliyevin zəngin və çoxşaxəli fəaliyyətindən, öz şəxsi kitabxanasından 300 nüsxəyə yaxın kitabı Milli Kitabxanaya bağışlamasından və bütövlükdə Azərbaycanda kitabxana işinin inkişafı istiqamətində atdığı addımlardan bəhs ediblər.

Tədbirin davamında Ulu Öndər Heydər Əliyevin həyat və fəaliyyətini əks etdirən “Ümummilli Lider Heydər Əliyev” adlı elektron məlumat bazasının təqdimatı olub.

Sonda tədbir iştirakçıları və qonaqlar Ulu Öndərə həsr edilmiş geniş kitab sərgisi ilə tanış olublar.

Azərbaycan musiqi mədəniyyəti tarixinə bəstəkar istedadı, pedaqoq məharəti, ictimai xadim nüfuzu ilə daxil olmuş Soltan Hacıbəyov aydın yaradıcılıq siması, saf, şairanə dünya görüşü ilə fərqlənib. O, xalq sənəti xəzinəsindən və dünya musiqi təcrübəsindən faydalanaraq müxtəlif janrlarda özünəməxsus üslubda epik vüsəti, dərin lirizmi və dolğun məzmunu ilə səciyyələnən qiymətli əsərlər yaradıb. Azərbaycan simfonik musiqisinin təşəkkülü və inkişafında onun mühüm xidmətləri var. Geniş diapazonlu yaradıcılığa malik bəstəkar simfoniya, simfonik lövhə və süitaları, həmçinin opera və balet, dram tamaşalarına musiqi, mahnı və romansları ilə Azərbaycanın mədəniyyət xəzinəsini daha da zənginləşdirib.

AZƏRTAC xəbər verir ki, bu gün görkəmli bəstəkar, tanınmış pedaqoq, dirijor və musiqi xadimi, SSRİ Xalq artisti, Dövlət mükafatları laureatı, professor Soltan Hacıbəyovun anadan olmasından 105 il ötür.

Xatırladaq ki, Prezident İlham Əliyevin müvafiq Sərəncam ilə bəstəkarın 100 illik yubileyi ölkəmizin hər yerində silsilə tədbirlərlə qeyd olunub.

Soltan Hacıbəyov 1919-cu ildə ulu mədəniyyət mərkəzimiz Şuşada dünyaya gəlib. Gələcək bəstəkarın yetişməsində, formalaşmasında xalq musiqisinin böyük təsiri olub. Soltan Hacıbəyovun yaradıcılıq yolu ötən əsrin 30-cu illərin axırı, 40-cı illərin əvvəllərinə təsadüf edir. Bu dövr Azərbaycan musiqi mədəniyyətinin inkişafında böyük əhəmiyyətə malik idi. Respublikada gənc, istedadlı bəstəkarların bütöv bir nəsli yetişir. Öz yaradıcılığında onlar Üzeyir Hacıbəylinin mütərəqqi ənənələrini davam etdirir, eyni zamanda, S.Prokofyevin, D.Şostakoviçin nailiyyətlərindən bəhrələnirdilər. 1930-cu ildə S.Hacıbəyov Bakıya köçür, 1936-cı ildən öz əmisi Üzeyir Hacıbəylinin ailəsində yaşayır və tərbiyə alır.

Orta məktəbi bitirdikdən sonra musiqi texnikumuna daxil olan S.Hacıbəyov truba sinfində oxuyur. Eyni zamanda, o, musiqili komediya teatrında dirijor vəzifəsində çalışır. Bəstəkarın yaradıcılıq fəaliyyəti məhz bu dövrdən başlayır. Onun ilk əsəri xor və simfonik orkestr üçün yazılmış “Pioner kantata”sı və “Qızıl gül” musiqili komediyasıdır. “Qızıl gül” əsəri 1940-cı ildə Bakı Musiqili Komediya teatrının səhnəsində böyük müvəffəqiyyətlə tamaşaya qoyulur. 1939-cu ildə bəstəkar Azərbaycan Dövlət Konservatoriyasının bəstəkarlıq şöbəsinə, professor Zeydmanın sinfinə daxil olur. O zaman xalq musiqisinin əsaslarını bilavasitə Ü.Hacıbəyli özü tədris edirdi.

Konservatoriyada oxuduğu illərdə bəstəkar seçdiyi sənətin texnikasına daha dərindən yiyələnmək üçün müxtəlif janrlara müraciət edir. O, iki prelüd və fortepiano üçün sonata, “Çiçəklərin söhbəti”, “Neft haqqında nəğmə” mahnılarını, “Quşcuğaz”, “Tənha yelkən ağarır” romanslarını, simli kvartet, simfonik variasiyalar yazır.

İkinci Dünya müharibəsi illərində S.Hacıbəyov qəlbi vətən məhəbbəti ilə alovlanan mərd, sadə insanların qəhrəmanlığına həsr olunmuş bir sıra əsərlər yazır. “Döyüşçülər nəğməsi”, 416-cı Taqanroq diviziyasına həsr edilmiş xalq çalğı alətləri orkestri üçün marş əsərləri buna misaldır. Ötən əsrin 40-cı illərində milli simfoniya janrı inkişaf etməyə başlayır. Buna həm də xalqın yadelli işğalçılara qarşı mübarizəsi böyük təsir göstərib. Çünki müasir qəhrəman, vətənpərvər insan surətlərinin təsviri geniş əhatəli formalar tələb edirdi. Bu cür formalar yalnız monumental simfoniyalar ola bilərdi.

S.Hacıbəyovun I simfoniyası bu dövrdə yazılmış simfoniyalar arasında mühüm yer tutur.1945-ci ildə Türkmənistan Opera və Balet Teatrı S.Hacıbəyova “Kəminə və Qazı” operasını yazmağı sifariş edib. Həmin əsərin simfonik parçası “Karvan” adlanır. 1955-ci ildən əsər yenidən nəşr olunaraq müstəqil şəkildə repertuarlara daxil olur. Orta Asiya mənzərəsini musiqi dili ilə canlandıran bəstəkar “Karvan”da təsviri lövhələrə meyil edir, ayrı-ayrı parlaq lövhələrlə, cizgilərlə və rəngarəng musiqi vasitələri ilə qızmar cənub təbiətini, hüdudsuz səhranın vüsətini, karvanın həzin, ahəstə hərəkətini böyük ustalıqla dilə gətirir. Əsər üç hissəli quruluşdadır. Bu, onun obraz dairəsi ilə əlaqədardır: karvanın gəlməsi, təbiət hadisələrinin coşması, karvanın uzaqlaşması. Əsər “Şur” muğamı üzərində bəstələnib.

1946-cı ildə II simfoniya meydana çıxır. Burada yeni dramatik situasiyaların, yeni ifadə vasitələrinin axtarışları hiss olunur. Bəstəkarın uşaqlar üçün yazdığı əsərlərinin mövzuları müxtəlifdir. Burada həm pioner həyatı, həm də təbiət təsvirləri vardır. 1953-cü ildə bəstəkar 6 uşaq nəğməsi yazır: “Oynaq topum”, “Lay - lay”, “Bənövşə”, “Bahar gəldi”, “Yolka”, “Pioner marşı”. “İsgəndər və Çoban” uşaq operası Bakı pioner evinin sifarişi ilə yazılıb. Onun əsasını Nizaminin “İsgəndərnamə” əsərinin bir parçası təşkil edir.

1950-ci ildə S.Hacıbəyov “Gülşən” baletini yazıb. Müasir mövzuya həsr olunmuş bu əsərdə insanların qarşılıqlı münasibətlərinə, əxlaqi keyfiyyətlərinə, estetik mövzulara toxunulub. Baletin musiqili səhnə kompozisiyası aydın və lakonikdir. Sevgi və məişət səhnələri ilə əmək mövzuları ayrılmaz vəhdətdə verilir.

Ötən əsrin 50-ci illərində S.Hacıbəyov vokal musiqisi sahəsində çalışır. O, həmin illərdə bir sıra xalq mahnı və muğamlarını xalq çalğı alətləri orkestri üçün işləyib. “Sarı bülbül”, “Leyla”, “Qarabağ şikəstəsi” buna misaldır. Bu illərin ən məşhur əsərlərindən biri simfonik orkestr üçün yazılmış uvertüradır. Bu əsər milli musiqidə janr simfonizmi xəttini davam etdirir. Bəstəkar Azərbaycan, rus musiqi klassiklərinin ənənələrini öz fərdi yaradıcılıq süzgəcindən keçirərək, müasir ruhlu, milli koloritli əsər yaratmağa nail olub. Mövzuların aydın və qabarıq şəkildə inkişaf etməsi əsərdə proqramlılıq cəhətlərini üzə çıxarır.

1950-ci illərdə bəstəkar Bolqarıstan və keçmiş Çexoslovakiyaya gedir və vətənə qayıtdıqdan sonra “Bolqar süitası” və “Çex rəqsi” əsərlərini bəstələyir. 1964-cü ildə S.Hacıbəyov ən parlaq əsərini - orkestr üçün “Konsert”ini yazır. Əsər təzadların kəskinliyi, fəallığı, müasir musiqi dili, qeyri-adi, parlaq koloritli orkestrovkası ilə fərqlənir. Müəllif böyük bir orkestr ustadı kimi öz əsərini mahiranə şəkildə instrumentləşdirib və çalğı alətlərinin ifaçılıq imkanlarından səmərəli şəkildə istifadə edib. S.Hacıbəyovun partiturasında incə, şəffaf tembr rəngləri güclü səs koloriti ilə uyğunlaşır. “Konsert” milli simfonik musiqi mədəniyyətinə gözəl hədiyyədir.

Bəstəkarın tamaşalara yazdığı musiqilər də “Məhəbbət”, “Kəndçi qızı”, “İnsan”, “Eşq və intiqam”, “Əliqulu evlənir” və s. ayrılıqda səsləndirilməyə layiq uzunömürlü əsərlərdəndir.

1947-ci ildən Azərbaycan Dövlət Konservatoriyasında müəllimlik edən, 1947-62-ci illərdə Azərbaycan Dövlət Filarmoniyasının bədii rəhbəri və direktoru, 1969-cu ildən ömrünün sonunadək Azərbaycan Dövlət Konservatoriyasının rektoru vəzifələrində çalışan, 1973-cü ildə SSRİ Xalq artisti adına layiq görülən Soltan Hacıbəyov 1974-cü ildə cismən dünyasını dəyişir, mənən isə ikinci və... əbədi həyat yaşamağa başlayır...

Sabah, 9 May–Faşizm üzərində Qələbə Günündə Bakının Zərifə Əliyeva (Rəsul Rza küçəsi ilə kəsişmədən sonra), Əbdülkərim Əlizadə, Tərlan Əliyarbəyov və Yusif Məmmədəliyev küçələrində avtomobillərin hərəkəti məhdudlaşdırılacaq.

"Report" bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) istinadən xəbər verir.

Məlumata görə, sözügedən küçələrdəki binalarda yaşayan sakinlərin avtomobilləri üçün nömrətanıma sistemi tətbiq edilməklə əraziyə giriş təmin olunacaq.

Bildirilir ki, “AzParking” mobil tətbiqində fərdi parklanma talonu olan sakinlər xidmətdən yararlana bilərlər: "Bu şəxslərin avtomobilləri sistem tərəfindən tanınır və onlar əraziyə buraxılacaq".

AYNA qeyd edir ki, sakinlər üçün nəqliyyat vasitələri ilə əraziyə giriş Neftçilər prospektindən Tərlan Əliyarbəyov, çıxış isə Yusif Məmmədəliyev küçələrindən təmin olunacaq.