XƏBƏRLƏR

İyulun 22-də Azərbaycan Teatr Xadimləri İttifaqının XV konfransında səsvermə keçirilib.

AZƏRTAC xəbər verir ki, Xalq artisti Hacı İsmayılov Azərbaycan Teatr Xadimləri İttifaqının İdarə Heyətinin sədri seçilib.

Cəfər Cabbarlı adına Respublika Gənclər Kitabxanasında 22 İyul-Milli Mətbuat Günü münasibətilə ənənəvi və virtual kitab sərgisi təşkil olunub.

Kitabxanadan AZƏRTAC-a bildirilib ki, materialda Ümummilli Lider Heydər Əliyevin Azərbaycan mətbuatının üzərindən dövlət senzurasının ləğv etməsi ilə ölkəmizdə söz və mətbuat azadlığının əsasının qoyulması, bu islahatların mətbuatın inkişafına ciddi təkan verməsindən bəhs edilib.

Həmçinin müasir dövrdə Prezident İlham Əliyev tərəfindən media nümayəndələrinə göstərilən diqqət və qayğı diqqətə çatdırılıb.

Virtual sərgidə Azərbaycanda müasir jurnalistikanın özəllikləri, Vətən müharibəsi dövründə informasiya məkanında nümayiş etdirilən üstünlüklər, müharibə dövründə şərəfli peşəsinin öhdəsindən layiqincə gələn və müxtəlif medallarla təltif edilən jurnalistlər haqqında məlumat verilib. Sərgidə missiyası əsasən maarifçilik olan, cəmi 56 sayının işıq üzü görməsinə baxmayaraq Azərbaycanda mətbuatın təməlini qoyan, milli mətbuatın inkişafında əvəzsiz xidmətləri olan “Əkinçi” qəzetinin yaranma dönəmi, tarixi, inkişafı, qəzetin ərsəyə gəlməsində əməyi keçən dahi Azərbaycan simaları haqqında geniş məlumat verilir, qəzetinin nüsxələrinin görüntüləri təqdim olunub.

Virtual kitab sərgisində “Heydər Əliyev və mətbuat”, “Əkinçi”də maarifçilik ideyalarının təbliği”, “H.Zərdabinin etnoqrafik görüşləri”, “Azərbaycan mətbuat tarixi antologiyası” kimi kitabların biblioqrafik təsviri yer alıb.

Milli Mətbuat Günü ilə əlaqədar hazırlanan materiallarla kitabxananın rəsmi saytından https://ryl.az/multimedia/milli-metbuat-gunu  tanış olmaq mümkündür.

Dil və tərcümə sahəsinin təkmilləşdirilməsi, peşəkar mütəxəssislərin müəyyən edilməsi istiqamətində keçirilən seçim turlarına qeydiyyat davam edir.

Dövlət Tərcümə Mərkəzindən AZƏRTAC-a bildirilib ki, turlar xarici dillər, ictimai-siyasi, elmi-texniki, maliyyə, iqtisadiyyat, humanitar, media, tibb, hüquq və digər sahələr üzrə ixtisaslaşmış tərcümə mütəxəssislərinin peşə qabiliyyətinin yoxlanılması və sertifikatlaşdırılması əsasında aparılır.

Turlarda iştirak üçün sənədləri (Şəxsiyyət vəsiqəsinin surəti; CV) bu ilin oktyabrın 31-dək Mərkəzin info@aztc.gov.az ünvanına göndərə, yaxud kağız formatında Bakı şəhəri, Nərimanov rayonu, Şahin Mustafayev küç., 27/121A; AZ1033 ünvanına təqdim edə bilərsiniz.

Mərkəzin elektron poçt ünvanına göndərilən sənədlərin “mövzu” bölümündə dil və tərcümə sahəsi qeyd edilməlidir.

Turlarda iştirak ödənişlidir.

Konfransda Azərbaycan Teatr Xadimləri İttifaqı İdarə Heyətinin sədri və üzvləri seçilib

İyulun 22-də Azərbaycan Teatr Xadimləri İttifaqının (ATXİ) XV konfransı keçirilib. Konfransda Teatr Xadimləri İttifaqının üzvləri və respublikanın tanınmış mədəniyyət xadimləri iştirak ediblər.

AZƏRTAC xəbər verir ki, əvvəlcə Azərbaycan Dövlət Himni səsləndirilib.

Teatr Xadimləri İttifaqının hesabat dövründəki fəaliyyətini əks etdirən geniş videoçarx nümayiş olunub və hesabat dövründə dünyasını dəyişmiş sənət adamlarının xatirəsi bir dəqiqəlik sükutla yad edilib.

Konfransda çıxış edən Azərbaycan Teatr Xadimləri İttifaqının sədr vəzifələrini müvəqqəti icra edən, Xalq artisti Hacı İsmayılov bildirib ki, ATXİ-nin İdarə Heyətinin qərarına əsasən konfransa nümayəndəlik norması hər 10 nəfərdən bir nəfər seçilib, konfransın işində 75 nümayəndədən 67-si iştirak edir. Səkkiz nəfər isə üzrlü səbəblərdən iştirak etmir.

Daha sonra Hacı İsmayılovun təklifi ilə üç nəfərdən ibarət mandat komissiyası seçilib.

İclası aparmaq üçün tanınmış aktyor və bədii qiraətçi, Əməkdar artist Azad Şükürov yekdilliklə sədr seçilib.

Konfransda Hacı İsmayılov hesabat məruzəsi ilə çıxış edib. Məruzəçi çıxışının əvvəlində Azərbaycan teatrının son 5 ildə keçdiyi inkişaf yolundan bəhs edib, bu sahəyə dövlət tərəfindən daim diqqət və qayğı göstərildiyini söyləyib. Qeyd edilib ki, Ümummilli Lider Heydər Əliyevin mədəniyyətə qayğısı, diqqəti bu gün Prezident İlham Əliyev tərəfindən uğurla davam etdirilir.

Hacı İsmayılov gənclər üçün yaradılan şəraitdən danışaraq teatrların demək olar ki, hamısında gənc nəslə çox önəm verildiyini deyib. Həmçinin istedadlı gənclərin diqqət mərkəzində saxlanıldığını, onların daim öz üzərilərində çalışması üçün teatrların göstərdikləri dəstəkdən bəhs edib.

Məruzədə hesabat dövründə yaradıcılıq ittifaqının gördüyü işlər barədə də məlumat verilib. Görkəmli teatr xadimlərinin yubileylərinin keçirildiyi, onlarla bağlı xatirə albom-kitablarının hazırlanıb nəşr edildiyi, yaxın və uzaq xarici ölkələrdən gəlmiş teatr xadimlərinin iştirakı ilə ustad dərslərinin, eləcə də yaradıcılıq laboratoriyalarının təşkil olunduğu vurğulanıb. Həmçinin bu tədbirlərin təkcə paytaxt Bakını yox, həm də bölgə teatrlarını da əhatə etdiyi vurğulanıb.

Məruzəçi ATXİ-nin xətti ilə keçirilən festival və müsabiqələr barədə də məlumat verib.

Sonra Azərbaycan Teatr Xadimləri İttifaqı Təftiş Komissiyasının sədri, Əməkdar incəsənət xadimi Hafiz Quliyev hesabat verib. Hesabatda ötən dövrdə görülmüş işlər, gəlirlər və xərclər barədə geniş məlumat yer alıb.

Ardınca mandat komissiyasının məlumatı dinlənilib.

Sonra hesabat məruzəsi ətrafında çıxışlar başlayıb.

Konfransda çıxış edən Əməkdar incəsənət xadimi, professor Məryəm Əlizadə Azərbaycan teatrının müasir inkişaf səviyyəsinə çatmasında görkəmli dramaturqların, aktyor və rejissorların böyük rol oynadığını diqqətə çatdırıb. O, Azərbaycan Teatr Xadimləri İttifaqının təşkilatçılığı ilə keçirilən “Qonaq Teatr” layihəsi barədə danışıb. Bildirib ki, bu layihə çox uğurlu olub, milli mədəniyyət məkanında baş verən yaradıcılıq proseslərini daha da fəallaşdırıb.

Xalq artistləri Mərahim Fərzəlibəyov, Sabir Məmmədov, İlham Namiq Kamal, Əməkdar incəsənət xadimləri Əli Əmirli, Ağalar İdrisoğlu, Əməkdar artistlər İntiqam Soltan, Şövqi Hüseynov, Rəhman Rəhmanov, “Günay" uşaq teatrının bədii rəhbəri Larisa Tarusova hesabat məruzəsi ətrafında çıxış edərək ittifaqın və ATXİ İdarə Heyəti sədrinin fəaliyyətini müsbət, Təftiş Komissiyasının işini məqbul qiymətləndiriblər.

Daha sonra ATXİ İdarə Heyətinin sədri, üzvləri, habelə Təftiş Komissiyası heyəti ilə bağlı səsvermə keçirilib.

Açıq səsvermə yolu ilə Hacı İsmayılov yekdilliklə Azərbaycan Teatr Xadimləri İttifaqı İdarə Heyətinin sədri seçilib. Sonra Təftiş Komissiyasının üzvləri Əməkdar incəsənət xadimi Hafiz Quliyev, Xalq artisti Firudin Məhərrəmov və Əməkdar artist Nadir Xasıyev seçiliblər.

Yeni seçilən sədr ona göstərilən etimada görə konfrans nümayəndələrinə təşəkkürünü bildirib və İttifaqın İdarə Heyətinin yeni tərkibini elan edib. Xalq artistləri Azər Zeynalov, Mərahim Fərzəlibəyov, Siyavuş Kərimi, Cənnət Səlimova və İlham Əsgərov yekdilliklə İdarə Heyətinin üzvləri seçiliblər.

Bundan əlavə, İlham Namiq Kamal və Azad Şükürov ATXİ İdarə Heyəti sədrinin müavinləri vəzifəsinə təsdiq olunublar.

Konfransın növbəti hesabat dövründə görəcəyi işlər barədə qərar layihəsini Xalq artisti Firudin Məhərrəmov oxuyub.

Bununla da Azərbaycan Teatr Xadimləri İttifaqının XV konfransı öz işini başa çatdırıb.

Azərbaycan Teatr Xadimləri İttifaqının məqsədi ölkəmizdə teatr sənətinin inkişafına kömək göstərməkdir. Bu məqsədlə biz bu il bölgələrdəki teatrları “Qonaq teatr” layihəsinə dəvət etdik. Bölgələrdən olan teatr kollektivləri Bakıya çox böyük sevinc və həvəslə gəlirlər. Biz bu istiqamətdə işimizi bundan sonra da davam etdirəcəyik.

Bu sözləri AZƏRTAC-a açıqlamasında Azərbaycan Teatr Xadimləri İttifaqının İdarə Heyətinin sədri, Xalq artisti Hacı İsmayılov söyləyib.

Xalq artisti deyib: “Bundan sonra xarici və türkdilli ölkələrin teatrları ilə təmaslar qurmağa çalışacağıq. Azərbaycan teatrını dünya səviyyəsinə qaldırmaq lazımdır. Mənim üzərimə çox böyük vəzifə düşür. Teatr Xadimləri İttifaqının on sədri olub, hamısı da Xalq artisti. Onların işini davam etdirmək, əlbəttə ki, böyük məsuliyyətdir. Amma şərəfli bir işdir və mən də çalışacağam ki, Teatr Xadimləri İttifaqının gördüyü işlər Azərbaycan teatr sənətinin inkişafına xidmət etsin”.

Mədəniyyət paytaxtımızda növbəti Vaqif Poeziya Günləri başa çatıb

Heydər Əliyev Fondu və Mədəniyyət Nazirliyinin təşkilatçılığı ilə Şuşa şəhərində keçirilən Vaqif Poeziya Günləri başa çatıb.

AZƏRTAC xəbər verir ki, poeziya bayramına iyulun 19-da Xurşidbanu Natəvanın evinin qarşısında təşkil edilən “Vaqiflə səyahət” adlı bədii-musiqili tamaşa ilə yekun vurulub.

İlk dəfə təqdim olunan tamaşa azərbaycanlı səyyah, coğrafiyaçı, tarixçi, etnoqraf, filosof və şair Hacı Zeynalabdin Şirvaniyə həsr olunub. Zeynalabdin Şirvani 1780-ci ildə Şamaxı şəhərində anadan olub. O, ilk təhsilini ailəsi Kərbəla şəhərinə köçdüyündən orada alıb. 1796-cı ildə təhsilini başa vurmaqdan ötrü Bağdad şəhərinə gedib. Zeynalabdin Bağdadda fəlsəfə, tibb, astronomiya və riyaziyyat elmlərini, habelə xarici dilləri öyrənib. Bağdad kitabxanalarında olan səyahətnamələr, bütün Şərq dünyasından buraya axışıb gəlmiş alimlərin, müqəddəs şəhərin ziyarətinə gələn zəvvarların söhbətləri bu gənc oğlanın nəzərlərində yeni bir dünya açıb. Dünyanı görmək və onun möcüzələri ilə həmyerlilərini tanış etmək elə həmin vaxtdan gənc Zeynalabdinin həyat məqsədinə çevrilib və o, tərəddüd etmədən səyahətə çıxmaq qərarına gəlib.

Xalqımızın tərbiyə edib böyütdüyü bu görkəmli alimin adı nəinki vətənimizdə, hətta onun sərhədlərindən çox-çox uzaqlarda geniş şöhrət tapıb. H.Z.Şirvaninin tarixi, fəlsəfi, coğrafi, bioqrafik xarakter daşıyan əsərləri Çin, Hindistan, Koreya Respublikası, İran, Türkiyə, İndoneziya, Bolqarıstan, Polşa, Fransa, İngiltərə və s. ölkələrin mütəxəssisləri və alimləri tərəfindən çox yüksək qiymətləndirilir.

Şuşada təqdim olunan səhnə əsərində də bu görkəmli alimin həyat yolu, ömür kredosu bir daha vəqərlənərək tamaşaçıya çatdırılıb.

Tamaşanın ssenari müəllifi Azərbaycan Yazıçılar Birliyinin katibi İlqar Fəhmi, quruluşçu rejissoru Əməkdar artist Loğman Kərimovdur.

Təqdimatdan əvvəl AZƏRTAC-a müsahibə verən Loğman Kərimov deyib ki, bu, Hacı Zeynalabdin Şirvaninin həyatından bəhs edən musiqili səhnə əsəridir. O, 42 il dünyanı səyyah kimi gəzib.

Tamaşanın iki aydan çox müddətə ərsəyə gəldiyini söyləyən L.Kərimov deyib ki, səhnə əsərində, eyni zamanda, Məhəmməd Füzuli, Nəsimi, Məhsətidən tutmuş Azərbaycan şeirinin, musiqi mədəniyyətinin inkişafında xidmətləri olan və onu dünyada təbliğ edən, yayan, tanıdan söz xiridarlarının ömür yoluna, yaradıcılığına toxunulur, onların keçdiyi yol bir örnək kimi təqdim edilir.

Hacı Zeynalabdin Şirvaninin dünyada geniş tanındığını qeyd edən Loğman Kərimov deyib: “Olduqca qürurvericidir ki, bu gün hətta Zeynalabdin Şirvani adına İndoneziyada böyük kitabxana fəaliyyət göstərir”.

Tamaşanın premyerasının Şuşada Vaqif Poeziya Günləri çərçivəsində keçirilməsini böyük mədəni hadisə adlandıran quruluşçu rejissor deyib: “Mədəniyyət Nazirliyinin xüsusi sifarişi ilə hazırlanan bu səhnə əsəri dünyada Azərbaycan mədəniyyətini yayan azərbaycanlılarımızı tanıtmaq məqsədi ilə ərsəyə gətirilib”.

Sonra səhnə əsəri təqdim olunub.

Tamaşada Şuşa Dövlət Musiqili Dram Teatrı, Azərbaycan Dövlət Pantomima Teatrı və Azərbaycan Dövlət “Yuğ” Teatrının aktyorları ılə yanaşı, Xalq artisti Gülyanaq Məmmədova, Əməkdar artist Nigar Şabanova, xanəndələr Hüseyn Məlikov, Nüşabə Kərimli, Azərbaycan Dövlət Mahnı və Rəqs Ansamblı və Bakı Xoreoqrafiya Akademiyasının tələbələri iştirak ediblər.

Böyük peşəkarlıqla hazırlanmış səhnə əsəri hər bir tamaşaçıya görkəmli söz xiridarlarımızı daha yaxından tanıdıb.

Bununla da mədəniyyət paytaxtımız Şuşa şəhərində keçirilən növbəti Vaqif Poeziya Günləri tarixə qovuşub.

Qeyd edək ki, Ümummilli Lider Heydər Əliyevin iştirakı ilə 1982-ci il yanvarın 14-də Şuşada böyük şair və dövlət xadimi Molla Pənah Vaqifin (1717–1797) məqbərəsinin və Poeziya evinin təntənəli açılışı olub. Məhz həmin tədbirdə Heydər Əliyev ədəbiyyat xadimlərimizin bu yöndə təşəbbüsünü dəstəkləyərək Vaqif Poeziya Günlərinin keçirilməsi ilə bağlı göstəriş verib. Söz-sənət bayramı ilk dəfə 1982-ci ilin iyulunda təşkil edilib.

Qırx iki illik tarixə malik Vaqif Poeziya Günləri işğaldan azad edilmiş Şuşada artıq dördüncü dəfə təşkil olunub.

Son illərdə Azərbaycan Aşıqlar Birliyinin (AAB) həyata keçirdiyi uğurlu layihələrdən biri də aşıqların repertuarında dastançılıq ənənəsinin yaşadılmasına böyük önəm verilməsidir.

Bu barədə AZƏRTAC-a məlumat verən AAB-nin katibi, Əməkdar mədəniyyət işçisi Musa Nəbioğlu bildirib ki, çağdaş aşıqlarımızın söylədikləri dastanlar lentə alınaraq televiziya vasitəsilə geniş ictimaiyyətə təqdim olunur, kitab halında nəşr edilir və nəticədə dastanlarımıza ikinci həyat verilir.

“Bu, aşıqların repertuarının zənginləşməsinə kömək etməklə yanaşı, həm də dastanların unudulmaması, aşıq sənətinə yeni gələn gənclərdə dastançılığa marağın artırılması baxımından böyük əhəmiyyət kəsb edir. Gənc aşıqların dastan ifaçılığına sövq edilməsi də eyni məqsədi daşıyır.

Ustadlarla yanaşı, gənc aşıqlar da AAB-nin sədri, Əməkdar elm xadimi, professor Məhərrəm Qasımlının aparıcılığı ilə hər həftə “Mədəniyyət” kanalında efirə gedən “Saz-söz axşamı” verilişində vaxtaşırı dastan söyləyirlər. Hazırda Elməddin Hacıbayramlı və İlham Məmmədli “Əmrah”, Qəlbinur İbrahimli və Elnur Babayev isə “Mirzə Bilal” dastanları üzərində çalışırlar. Hər iki dastan yekunlaşdıqdan sonra geniş ictimaiyyətə təqdim olunacaq. Bu, həmçinin AAB-nin nəşri olan və artıq birinci cildi işıq üzü görən çoxcildlik “Aşıq dastanları” antologiyasının növbəti cildinə daxil ediləcək”,- deyə M.Nəbioğlu vurğulayıb.

Vaqif Poeziya Günləri çərçivəsində iyulun 19-da Şuşa Otel-Konqres Mərkəzində Mədəniyyət Nazirliyinin dəstəyi ilə çəkilən “Sözün repressiyası” sənədli filminin nümayişi olub.

AZƏRTAC xəbər verir ki, “Bulatfilm Production” şirkətinin istehsalı olan filmin rejissoru Rafiq Həşimov, ssenari müəllifi Səlim Babullaoğlu, operatoru Rüfət Süleymanovdur.

Filmdə repressiya qurbanlarına çevrilmiş 31 yazıçı, şair və digər ədiblərimiz xatırlanır, bəzilərinin faciəvi tarixçəsi danışılır. Eyni zamanda, filmdə Stalin repressiyalarının retrospektiv planda faciəvi və tarixi fəlsəfəsi araşdırılır.

Ekran əsərində Xalq yazıçısı Anar, tarixçi-cavidşünas Həmid Cəfərov, akademik Rafael Hüseynov, Siyasi Repressiya Qurbanları Muzeyinin rəisi Mirabbas Məmmədov, filoloq alimlərdən Firudin Qurbansoy və Bədirxan Əhmədovun Stalin repressiyalarının və kommunist siyasətinin mahiyyəti ilə bağlı fikirləri yer alıb.

Ekran əsəri tamaşaçılar tərəfindən böyük maraqla qarşılanıb.

Opera ifaçılığı sənətinə qəlbən bağlanan, bu yolda fədakarlıq göstərərək musiqi xəzinəmizə töhfələr verən görkəmli sənətkarlarımızdan biri də Xalq artisti Ağababa Bünyadzadədir. Bu gün istedadlı opera ifaçısının anadan olmasının 109-cu ildönümü tamam olur.

AZƏRTAC xəbər verir ki, Xalq artistinin həyat və yaradıcılığına qısa nəzər salır.

1915-ci il iyulun 19-da Bakıda anadan olan Ağababa Bünyadzadə 1934-cü ildə orta məktəbi bitirib və Texniki peşə məktəbində çilingər peşəsinə yiyələnib. Ancaq o, bu sənətin dalınca getməyib. Bariton səsi olan Ağababa bədii özfəaliyyət kollektivlərinə yazılıb. Dram dərnəyində aktyorluq fəaliyyəti göstərməklə yanaşı, müğənnilik də edib.

A.Bünyadzadə Üzeyir Hacıbəylinin məsləhəti ilə 1938-1939-cu illərdə Moskvada Qnesinlər adına Musiqi məktəbində təhsil alaraq 1940-cı ildə vətənə dönüb. Elə həmin il Azərbaycan Dövlət Konservatoriyasının nəzdindəki Opera studiyasında Xalq artisti K.Knijnikovun sinfində səs quruluşundan dərs alıb. Beləliklə, gənc müğənni əmək fəaliyyətinə Opera və Balet Teatrında başlayıb. Əvvəlcə studiyanın xor dəstəsində çıxış edib, bir müddət sonra isə teatrın solistləri arasında yerini tutub.

Ağababa Bünyadzadə Opera və Balet Teatrında çalışdığı illər ərzində 60-dan çox məsul partiya oxuyub. Yaradıcılığı dövründə Azərbaycan, rus və Qərbi Avropa bəstəkarlarının operalarında müxtəlif xarakterli yaddaqalan obrazlar yaradıb.

Araşdırmalarda göstərilir ki, A.Bünyadzadənin Ü.Hacıbəylinin “Leyli və Məcnun”unda Nofəl, “Koroğlu”da Həsən xan və Alı, R.Qlierin “Şahsənəm”ində Xan, F.Qalevinin “Kardinal qızı”nda Rudjiero və digər operalarda ifa etdiyi partiyalar öz dramatik vüsəti, psixoloji tamlığı və səslə hərəkətin üzvi vəhdəti ilə seçilib. O, həmçinin Şahvələd (“Aşıq Qərib” - Z.Hacıbəyov), Hökmdar (“Nizami” - Ə.Bədəlbəyli), Yavər (“Azad” - C.Cahangirov), Atakişi (“Sevil” - F.Əmirov), Ağalar bəy (“Nərgiz” - M.Maqomayev), Şeyx Nəsrullah (“Ölülər” - V.Adıgözəlov), Şapur (“Xosrov və Şirin” - Niyazi), Mərdan (“Vətən” - Q.Qarayev və C.Hacıyev), Fiqaro (“Sevilya bərbəri” - C.Rossini) və digər partiyaların mükəmməl ifası ilə tamaşaçıların rəğbətini qazanıb.

A.Bünyadzadə 1967-ci ildə M.Maqomayevin “Şah İsmayıl” operasını tamaşaya hazırlayıb və səhnə əsərində yaratdığı Aslan şah obrazı ilə ilk böyük uğurlarından birinə imza atıb. Ü.Hacıbəylinin “Koroğlu” operasında Həsən xan partiyası isə sənətkarın ən böyük səhnə uğuru hesab edilir.

O, Üzeyir bəyin şəxsiyyətini və onun zəngin yaradıcılığını yüksək qiymətləndirib, hər zaman minnətdarlıqla yada salıb. 1962-ci ildə mətbuatda dərc olunan “Ölməzlik” adlı məqaləsində A.Bünyadzadə dahi bəstəkar haqqında xatirələrində yazır: “Üzeyir bəy daim yeni axtarışlar, tapıntılar sorağında idi. Belə “tapıntılar” arasında mən də var idim. Mən “Koroğlu” operasında ilk tamaşadan iştirak etmişəm, əvvəlcə xorun tərkibində, daha sonra carçı obrazında. Sonra düşündüm ki, Həsən xanı hazırlayım. Buna görə də yavaş-yavaş obraz üzərində işləməyə başladım. Ariyaları hazırlayıb İsmayıl Hidayətzadəyə nümayiş etdirməyi qərara aldım. İ.Hidayətzadə ifamı dinlədikdən sonra bəyəndiyini dedi. Biz Üzeyir bəyə sürpriz hazırlamaq fikrinə gəldik. Səhnədə gənc və yeni sima olan Həsən xanı Üzeyir bəyə göstərmək məsuliyyət və sevinc idi. Tezliklə bu partiyanı mənə tapşırdılar və yaradıcılığımda ilk uğurlarımdan biri oldu”.

A.Bünyadzadə respublikanın hüdudlarından kənarda - Moskva, Leninqrad (indiki Sankt-Peterburq), Kiyev, Tiflis və keçmiş SSRİ-nin digər şəhərlərində, habelə Bolqarıstan və Rumıniyada qastrol səfərlərində olub, mədəniyyətimizi layiqincə təmsil edib. Sofiya Opera Teatrında J.Bizenin “Karmen” operasında Eskamilyonun partiyasını oxuyub. Teatr sənəti sahəsindəki xidmətləri yüksək qiymətləndirilən sənətkar “Lenin” və “Qırmızı Əmək Bayrağı” ordenləri ilə təltif olunub. 1943-cü ildə “Əməkdar artist”, 1955-ci ildə isə “Xalq artisti” fəxri adlarına layiq görülüb.

Görkəmli səhnə xadimi 1974-cü il dekabrın 17-də Bakıda vəfat edib, İkinci Fəxri xiyabanda dəfn olunub.

Heydər Əliyev Fondu və Mədəniyyət Nazirliyinin təşkilatçılığı ilə keçirilən Vaqif Poeziya Günləri davam edir.

AZƏRTAC xəbər verir ki, iyulun 19-da poeziya günləri çərçivəsində Şuşa Otel-Konqres Mərkəzində “Məhəmməd Füzuli. Zamanın fövqündə” mövzusunda konfrans keçirilib.

Azərbaycan Yazıçılar Birliyinin katibi İlqar Fəhminin moderatorluğu ilə gerçəkləşən konfrans dahi Azərbaycan şairi və mütəfəkkiri Məhəmməd Füzulinin 530 illik yubileyinə ithaf olunub.

Azərbaycan Milli Elmlər Akademiyasının (AMEA) akademik Z.Bünyadov adına Şərqşünaslıq İnstitutunun direktoru akademik Gövhər Baxşəliyeva bu konfransın “Dahi Azərbaycan şairi Məhəmməd Füzulinin 530 illiyinin qeyd edilməsi haqqında” Azərbaycan Respublikası Prezidentinin Sərəncamından irəli gələn vəzifələrin icrası çərçivəsində hazırlanmış tədbirlər planına əsasən təşkil edildiyini söyləyib.

“Beş əsrdən çoxdur ki, Məhəmməd Füzulinin poetik nümunələri, hər biri bir kəşf səviyyəsində olan elmi əsərləri Azərbaycan və dünya oxucuları tərəfindən sevilərək oxunur. Füzulinin yazıb-yaratdığı dövrdən əsrlər ötsə də, əsərlərinin cazibəsi ildən-ilə nəinki zəifləmir, əksinə yeni-yeni nəsillər, dəyişən zamanlar içərisində insanlar öz zəka və idraklarının gücü ilə dahi şairin yaradıcılığını fərqli müstəvilərdə dərk edərək dünyagörüşlərinə uyğun halda yenidən mənalandırırlar”, - deyə akademik vurğulayıb.

G.Baxşəliyeva diqqətə çatdırıb ki, böyük şairin 530 illiyi münasibətilə AMEA-da silsilə tədbirlərlə yanaşı, şairin elmi irsinin də öyrənilməsi istiqamətində mühüm işlər görülür.

Akademik dahi Füzulinin dəyərli əsərlərindən, bənzərsiz ədəbi irsindən söz açaraq, son illər rəhbərlik etdiyi institutda bu istiqamətdə aparılan elmi axtarışlardan da danışıb.

AMEA Məhəmməd Füzuli adına Əlyazmalar İnstitutunun direktoru akademik Teymur Kərimli xatırladıb ki, 1994-cü ildə ölkəmizdə böyük bir tarixi və ədəbi hadisə baş verməkdəydi. Belə ki, Məhəmməd Füzulinin 500 illik yubileyi tamam olurdu. “Ölkəmizin taleyi üçün son dərəcə ağır olan həmin illərdə Azərbaycan xalqının Ümummilli Lideri Heydər Əliyev ozamankı təbəddülatlı vəziyyətə baxmayaraq, dahi şairin yubileyinin keçirilməsini təxirə salmamış, əksinə Füzulinin yubileyinin həm Azərbaycanda, həm də qonşu ölkələrdə silsilə bayramlar şəklində yüksək səviyyədə qeyd olunmasını təmin etmişdir”, - deyə alim vurğulayıb.

Akademik deyib ki, Ulu Öndər Heydər Əliyev Füzuli yubileyinin keçirilməsinin ölkəmiz üçün mənəvi əhəmiyyətini qeyd edərkən “Respublikamızı təkcə müstəqil bir dövlət, zəngin təbii sərvətlərə malik ölkə kimi yox, zəngin tarixi, mədəniyyəti olan ölkə kimi tanıtmalıyıq. Mənə belə gəlir ki, bizdən ötrü bu yubileyin ən böyük nəticəsi bundan ibarətdir” söyləyirdi.

Azərbaycan Yazıçılar Birliyinin üzvi, şair Fərid Hüseyn dahi Füzulinin bənzərsiz söz dünyasından söhbət açıb. Onun yaratdığı ölməz irsin bütün zamanlarda aktuallığını qoruyub saxlayacağını, insanlar tərəfindən sevilərək oxunacağını söyləyib.

Gənc şair bildirib ki, Füzulinin 530 illiyi ilə bağlı müvafiq Sərəncam bütövlükdə ölkəmizdə sözə, şeirə, söz adamlarına verilən ən böyük qiymətin bariz nümunəsidir.

Konfransda mədəniyyət nazirinin müavini Fərid Cəfərov çıxış edərək deyib ki, tarixi Zəfərdən sonra biz artıq dördüncü dəfədir mədəniyyət paytaxtımız Şuşada Vaqif Poeziya Günlərinin keçirilməsi münasibətilə bir araya gəlirik.

“Xoş təsadüfdür ki, bu il Füzulinin 530 illik yubileyi ili də ölkəmizin dünyamiqyaslı tədbirlərə ev sahibliyi etdiyi (COP29) bir dövrə təsadüf edir. Gərək biz bu yubiley ilində də Füzuli ilə bağlı dolğun məlumatları xarici ölkələrin yazar və şairlərinə çatdırmaqla yanaşı, həm də onlara Qarabağ Zəfərimiz, 30 illik işğal dövrünün həqiqətləri barədə bilgilər verək”, - deyə nazir müavini vurğulayıb.

O, Mədəniyyət Nazirliyi tərəfindən Məhəmməd Füzulinin 530 illiyi ilə bağlı keçirilmiş tədbirlərdən danışıb. Diqqətə çatdırıb ki, bu il Milli Kitabxana tərəfindən Məhəmməd Füzuli adlı onlayn məlumat bazası yaradılıb, Xalça Muzeyi tərəfindən Məhəmməd Füzulinin 530 illik yubileyinə həsr olunmuş sərgi açılıb. Özbəkistanda təşkil olunan Azərbaycan Mədəniyyəti Günləri çərçivəsində “Məhəmməd Füzuli və Əlişir Nəvai: ortaq ədəbi-mənəvi dəyərlərimiz” mövzusunda konfrans keçirilib, şairin özbək dilinə tərcümə olunmuş əsərlərinin təqdimatı olub.

Ölkəmizin iştirak etdiyi beynəlxalq kitab sərgilərində - Dohada, Pekində və digər şəhərlərdə dahi şairin irsi təbliğ olunub, ona aid Azərbaycan stendində xüsusi guşələr yaradılıb.

Nazir müavini deyib: “Ölkəmizin ən böyük kütləvi tədbirlərindən biri olan, bu ilin oktyabrında keçirilməsi planlaşdırılan 10-cu Bakı Beynəlxalq Kitab Sərgisi dahi şair Məhəmməd Füzuliyə həsr ediləcək. Eyni zamanda, nazirlik tərəfindən hazırda dahi şairin həyat və yaradıcılığına aid kitablar çapa hazırlanır”.

Sonda Azərbaycan Dövlət Akademik Opera və Balet Teatrının solistləri Əməkdar artist Anar Mikayılov və Roza Zeynalova tərəfindən Məhəmməd Füzulinin “Leyli və Məcnun” əsərindən kompozisiya təqdim edilib.