Night Shyamalan Berlin Film Festivalının (“Berlinale”) münsiflər heyətinin sədri seçilib.
AZƏRTAC xarici KİV-ə istinadla xəbər verir ki, BAFTA (Britaniya Kino və Televiziya Sənəti Akademiyası) “Qızıl qlobus” və “Akademiya Mükafatı”na sahib olan hindistanlı rejissor, kinorejissor, yazıçı və aktyor Night Shyamalan gələn il keçiriləcək 72-ci Berlin Film Festivalında beynəlxalq münsiflər heyətinin rəhbəri vəzifəsini icra edəcək.
“Berlinale”nin bədii rəhbəri Karlo Chatrian deyib: “Night Shyamalanın münsiflər heyətinin rəhbəri vəzifəsinə dəvətimizi qəbul etməsindən məmnunuq. Shyamalan, ABŞ kino sənayesinin bənzərsiz simasıdır və ənənəsinə sadiq qalan bir rejissordur. Seçimimizdə axtardığımız şey, insanın idealına olan bu dürüstlükdür”.
Qeyd edək ki, 2000-ci illərin ən əhəmiyyətli filmlərindən bir neçəsini çəkən və bənzərsiz bir kinematoqrafiya dilinə sahib olan Shyamalan, sonuncu dəfə 2021-ci ildə “Old” filmi ilə geniş izləyici kütləsi tərəfindən müsbət rəy alıb.
Amerikalı tanınmış aktrisa Maggie Gyllenhaanın rejissorluq etdiyi “İtmiş qız” (The Lost Daughter) filminin rəsmi treyleri nümayiş olunub.
AZƏRTAC xarici KİV-ə istinadla xəbər verir ki, filmdə baş rolları amerikalı aktyorlar Dakota Johnson, “Oskar”, Olivia Kolman və Peter Sarsgaard canlandırırlar.
Filmdə İngilis dili müəllimi Leda özünü işinə və uşaqlarına həsr edən tənha bir qadındır. Qızları atalarının yanında olmaq üçün evdən çıxanda Leda özünü son dərəcə tənha hiss edir. Bu hissdən uzaqlaşmaq istəyən Leda İtaliyanın cənubundakı kiçik bir sahil qəsəbəsində yalqız tətil etmək qərarına gəlir. Ancaq sakit və səssiz keçən bir neçə günün ardınca Leda bir qəribə ailə ilə tanış olur. Bu tanışlıq Ledanın keçmişi ilə üzləşməsinə səbəb olur.
İtaliyanın Abruzzo regionunun L’Aquila əyalətinin Sante Marie bələdiyyəsi Carsoli, Tagliacozzo, Magliano de'Marsi bələdiyyələri, eləcə də Latsio regionunun Pescorocchiano bələdiyyəsi ilə həmsərhəddir. Ərazisinin böyük hissəsi Apenin relyefləri ilə - Carseolani dağlarının silsiləsinə aid Bove (1346 metr), Sant'Angelo (1100 metr) və Faito (1455 metr) yüksəklikləri ilə əhatə olunub. Tarixi mərkəz sayılan Casteglio isə dəniz səviyyəsindən 850 metr yüksəklikdə yerləşir.
Ərazi xarakterik şabalıd meşələri, həmçinin San Giovanni, Santo Stefano və Scanzano təpələri əhatə olunub. Castelvecchio qəsəbəsinə gedən yollar isə fərdi və atla gəzinti üçün əlverişlidir. Luppa vadisində eyni adlı bənzərsiz meşə, ərazini xarakterizə edən çuxurlar və müxtəlif mağaraları olan Grotte di Luppa regional təbiət qoruğu yerləşir.
Sante Marie adı dini və tarixi sənədlərdə mövcud olan qədim məzhəbə aiddir. Bəzi tarixi mənbələrdə qəsəbənin 10 əsr əvvəl qurulduğu bildirilir. Lakin qəsəbənin mövcudluğuna dair ən qədim sübut 1187-ci ilə aiddir.
Qəsəbədəki Santa Maria delle Grazie kilsəsi XVI əsrdə inşa edilib, içərisində barok qurbangahı və müxtəlif qurbangahlar var. Əsas qurbangahda XVI əsrə aid polixrom boyalı Madonna heykəli var. Qəsəbədə, həmçinin müxtəlif dövrlərdə tikilmiş kilsələr, tarixi memarlıq nümunələri, muzeylər və mağaralar yerləşir.
Müxtəlif ənənələrə və folklora malik qəsəbədə il ərzində dini bayramlar və ziyafətlər təşkil edilir. Payızda keçirilən şabalıd festivalı zamanı isə qəsəbənin mərkəzində “şabalıd kəndi” qurulur.
Türkiyənin Kahramanmaraş şəhərində II Beynəlxalq Şeir və Ədəbiyyat Festivalı keçirilir. Beş gün davam edəcək festival oktyabrın 18-də başlayıb. Kahramanmaraş Böyük Şəhər Bələdiyyəsi tərəfindən təşkil edilmiş Şeir və Ədəbiyyat Festivalına 15 ölkədən tanınmış şairlər dəvət edilib. Azərbaycanı bu festivalda tanınmış şair, Azərbaycan Yazıçılar Birliyinin Mətbuat xidmətinin rəhbəri, Beynəlxalq Türk Müəllifləri Birliyinin (BeyTüM) sədri Xəyal Rza təmsil edir.
Bu barədə AZƏRTAC-a tanınmış şair özü məlumat verib.
Bildirib ki, Türkiyə də daxil 100-ə yaxın şairin qatıldığı festivalın açılış mərasimi Mehmet Akif Ersoy Kültür Mərkəzində təşkil edilib. Açılış mərasimində dövlət məmurları, tələbə və şagirdlər iştirak ediblər. Şəhidlərin xatirəsinə sayqı duruşundan və dövlət himnindən sonra Türkiyə Prezidenti Rəcəp Tayyip Ərdoğanın festival iştirakçılarına salamlama və təbrik məktubu səsləndirilib. "Çünki söz sağaldır" söyləyən Türkiyə Prezidentinin bu fikri festivalın sloqanı seçilib. Tədbirdə Kahramanmaraş Böyük Şəhər Bələdiyyəsinin sədri Hayrettin Güngör də çıxış edib. Sonra festival çərçivəsində elan edilmiş müsabiqədə müxtəlif nominasiyalar üzrə qalib gəlmiş tələbə və şagirdlərə mükafatlar təqdim edilib.
Festivalın ikinci günü şeir gecəsində ilk söz Xəyal Rzaya verilib. Yerli televiziya kanalında canlı yayımlanan gecədə tanınmış şair 30 illik Qarabağ həsrətindən, 44 günlük Vətən müharibəsindən, şanlı Zəfərimizdən və bu zəfərdə Türkiyə xalqının, Türkiyə dövlətinin mənəvi dəstəyindən söz açıb. Şuşa, Vaqif Poeziya Günləri, onun tarixi haqqında məlumat verən Xəyal Rza orada səsləndirdiyi "Evsiz qapı" şeirini oxuyub.
Festivalın üçüncü günündə müxtəlif təhsil ocaqlarında şairlərlə görüş təşkil edilib. Xəyal Rza tələbələr üçün şeirlərini səsləndirib və imzalı kitablarını hədiyə edib.
Qeyd edək ki, festival çərçivəsində universitetlər və məktəblərdə tədbirlər davam edəcək. Oktyabrın 22-də festivalın təntənəli bağlanış mərasimi təşkil ediləcək.
Özbəkistandakı Heydər Əliyev adına Azərbaycan Mədəniyyət Mərkəzi (AMM) Daşkənddəki “Turan” Kitabxana-İnformasiya Mərkəzi (KİM) ilə birgə “Nizami Gəncəvi: Şərqin böyük şairi” adlı tədbir keçirib.
AZƏRTAC xəbər verir ki, tədbirdə böyük Azərbaycan şairi Nizami Gəncəvinin 880 illiyi ilə bağlı AMM-nin Daşkənddə özbək dilinə tərcümə və çap etdirdiyi “Xəmsə”sinin təqdimatı olub.
Tədbirdə Azərbaycan Milli Məclisinin Mədəniyyət komitəsinin sədri Qənirə Paşayeva, Bakıdan gələn digər qonaqlar, Özbəkistanın elm, mədəniyyət və incəsənət xadimləri, ali məktəblərin professor-müəllim heyəti, tələbələr iştirak ediblər.
KİM-in direktoru Dildora Abduazizova qonaqları salamlayıb və AMM ilə əməkdaşlıqdan danışıb. O, böyük Azərbaycan şairi Nizami Gəncəvinin “Xəmsə”sinin Daşkənddə özbək dilində çap olunmasını ölkənin mədəni həyatında böyük hadisə adlandırıb.
AMM-nin direktoru Samir Abbasov Mədəniyyət Mərkəzinin həyata keçirdiyi layihələrdən danışıb, indiyədək 90-dan çox kitabın özbək dilində çap edildiyini bildirib. O deyib ki, böyük özbək şairi Əlişir Nəvai dahi Azərbaycan şairi Nizami Gəncəvinin “Xəmsə”sindən ilhamlanaraq “Xəmsə” yaradıb və dünya ədəbiyyatı tarixinə türk dilində “Xəmsə” yazan şair kimi düşüb. Özbəkistanda Əlişir Nəvai nə qədər sevilirsə, Nizami Gəncəvi də, Məhəmməd Füzuli də, İmadəddin Nəsimi də o qədər sevilir. Bildirib ki, bu il Azərbaycanda “Nizami Gəncəvi İli” elan olunub. Özbəkistanda Əlişir Nəvainin həyat və yaradıcılığı ilə bağlı müxtəlif tədbirlər keçirilir, əsərləri çap olunur.
Qənirə Paşayeva xalqlarımızın dost, qardaş olduğunu vurğulayıb, şair və yazıçılarımızın dostluğundan söhbət açıb, Səməd Vurğunla Qafur Qulamın dostluğunun bir örnək olduğunu diqqətə çatdırıb. Komitə sədri vurğulayıb ki, Özbəkistan bir il əvvəl sentyabrın 27-də başlayan Vətən müharibəsində Azərbaycanın haqq işini müdafiə edib. Bunun üçün deputat Özbəkistan Prezidenti Şavkat Mirziyoyevə və özbək xalqına minnətdarlığını bildirib.
Qənirə Paşayeva iki ölkə arasında əlaqələrin yüksək səviyyədə olduğuna toxunaraq qardaş Özbəkistanla əməkdaşlığın bundan sonra daha da dərinləşdirilməsi istiqamətində böyük layihələrin həyata keçirilməsindən bəhs edib. O, belə mədəni tədbirlərin həm Özbəkistanda, həm də Azərbaycanda reallaşmasının vacibliyini söyləyib.
Özbəkistan Ali Məclisinin deputatı, şair və tərcüməçi Gülbahar Səidqaniqızı Azərbaycan ədəbiyyatını çox sevdiyini, bu xalqın şairlərini tez-tez mütaliə etdiyini bildirib. O deyib ki, AMM-nin Azərbaycanın şair və yazıçılarının əsərlərini özbək dilində çap etdirməsi təqdirəlayiq haldır. Sonra Gülbahar Səidqaniqızı Azərbaycanın klassik şairlərinin əsərlərindən parçalar söyləyib.
“Özbəkistan-Azərbaycan” Dostluq Cəmiyyətinin icraçı direktoru professor Erkin Nuriddinov qurumun xətti ilə keçirilən tədbirlərdən danışıb deyib ki, Azərbaycanda Nizami Gəncəvi, Özbəkistanda Əlişir Nəvai ilinin keçirilməsi bir daha sübut edir ki, ölkələrimiz milli-mədəni dəyərlərinə sadiqdir.
Alim və tərcüməçi Babaxan Şərif söyləyib ki, Azərbaycan və Özbəkistan nümayəndələri müntəzəm olaraq bu ölkələrdə keçirilən müxtəlif mədəni tədbirlərdə fəal iştirak edir. Bütün sahələrdə əməkdaşlığın genişləndirilməsi hər iki dost ölkənin mənafeyinə uyğundur.
Özbəkistandakı “Turan” Akademiyasının prezidenti Xaydarbek Bababekov AMM ilə əməkdaşlıqdan danışıb, müxtəlif ölkələrin görkəmli simalarına akademik adı verildiyini diqqətə çatdırıb. X.Bababekov Qənirə Paşayevaya akademiyanın tarix elmləri doktoru adının verildiyini bildirib və bununla bağlı vəsiqəni ona təqdim edib.
Qənirə Paşayeva Özbəkistanla Azərbaycan arasında əlaqələrin inkişafı ilə bağlı fəallıq göstərən şəxslərə Milli Məclisin Mədəniyyət Komitəsinin diplomlarını verib.
Sonra qarşılıqlı olaraq hədiyyələr təqdim olunub.
Azərbaycanın Xalq artisti Gülyanaq Məmmədova və özbək müğənniləri Azərbaycan və özbək dillərində mahnılar ifa ediblər.
Q.Paşayevanın rəhbərliyi ilə Azərbaycandan gələn qonaqlar AMM-də də olub, ulu öndər Heydər Əliyevin mərkəzin qarşısındakı abidəsinə əklil və çiçəklər düzüblər. Qonaqlar Mədəniyyət Mərkəzindəki Azərbaycan Dövlətçilik Tarixi Muzeyi, Heydər Əliyev Muzeyi, Azərbaycan-Özbəkistan Dostluq Muzeyi və Xalça Muzeyinə baxıb, mərkəzdəki kurs və dərnəklərin işi ilə tanış olublar.
Vaşinqtondakı səfirliyimizin təşkilatçılığı ilə Azərbaycan Respublikasının müstəqilliyinin bərpasının 30-cu ildönümü və Nizami Gəncəvinin 880 illik yubileyinə həsr edilmiş konsert proqramı təqdim edilib və ziyafət verilib.
AZƏRTAC xəbər verir ki, tədbirə ABŞ dövlət qurumlarının, ictimai dairələrinin təmsilçiləri, diplomatik korpusun üzvləri, düşüncə mərkəzlərinin nümayəndələri, Azərbaycan icmasının üzvləri qatılıblar. Tədbirdə yüksək səviyyəli qonaq qismində ABŞ dövlət katibinin müavini Kerin Donfrid, dövlət katibinin köməkçisinin müavini Erika Olson iştirak ediblər.
Tədbiri giriş sözü ilə açan səfir Xəzər İbrahim 18 oktyabrın ölkəmiz üçün əlamətdar gün olmasını, Prezident İlham Əliyevin müvafiq göstərişi ilə bundan sonra bu tarixin Müstəqilliyin Bərpası Günü kimi qeyd ediləcəyini diqqətə çatdırıb. İlk dəfə 1918-ci ildə Azərbaycan Demokratik Respublikası olaraq əldə edilən müstəqilliyimizin 18 oktyabr 1991-ci ildə bərpa olunduğunu bildirib. Müsəlman Şərqində ilk demokratik respublika olan ADR-in regionda böyük təsiri olduğunu vurğulayıb, ilk parlament, opera, universitetin burada təsis edildiyini, demokratik hüquqlar, qadın hüquqlarının təmin edildiyini qeyd edib.
Tədbirin keçirildiyi məkanın - Qadınların Milli Demokratik Klubunun təsadüfi seçilmədiyini, məhz qadın haqlarına istər ADR dövründə, istərsə də hazırda ölkəmizdə verilən dəyərlə əlaqələndirib. Bildirib ki, Nizami Gəncəvinin 880 illik yubileyinin Azərbaycanın müstəqilliyinin bərpası ilə eyni gündə keçirilməsi xüsusi əhəmiyyət kəsb edir. Azərbaycan və ABŞ 30 illik diplomatik münasibətləri tarixində sülh, sabitlik, enerji təhlükəsizliyi, mədəniyyətlər arasında körpü yaradılmasında çiyin-çiyinə əməkdaşlıq edir. Nizami Gəncəvinin yaradıcılığının böyük bir hissəsini də məhz sülhün aşılanması, insanların sülhə dəvət edilməsi təşkil edir. Azərbaycanın öz ərazi bütövlüyünü bərpa etməsindən sonra regionda sülh və əməkdaşlıq üçün gözəl imkanlar yaranmışdır və ölkəmiz müstəqillik əldə etdikdən sonra hər zaman sülhün və sabitliyin əldə edilməsində qərarlıdır.
Daha sonra ABŞ dövlət katibinin müavini Kerin Donfrid qonaqları Azərbaycan dilində salamlayaraq, Azərbaycanın Müstəqilliyinin Bərpası və Nizami Gəncəvinin 880 illik yubileyinə həsr edilmiş tədbirin onun təmsil etdiyi vəzifədə qatıldığı ilk tədbir olduğunu xüsusi vurğulayıb. O bildirib ki, Cənubi Qafqazda sülhü və tərəqqini təmin etmək üçün gözəl imkanlar var və ABŞ bu yolda Azərbaycanı dəstəkləməyə hazırdır. Azərbaycanın müstəqillik əldə etməsindən keçən 30 il müddətində ABŞ iqtisadiyyat, enerji, təhlükəsizlik, insan hüquqları, korrupsiya ilə mübarizə sahələrində ölkəmizi dəstəkləyib. ABŞ, həmçinin 20 il müddətində Əfqanıstanda NATO missiyasına və terrorizmlə mübarizə sahəsində göstərdiyi dəstəyə görə Azərbaycan tərəfinə minnətdardır. Qeyd edib ki, 2021-ci ilin avqust ayında Azərbaycan Əfqanıstanda olan xarici vətəndaşların təhlükəsiz təxliyəsində vacib rol oynayıb və buna görə də Azərbaycan hökumətinə öz minnətdarlığını bildirib.
Tədbirin digər təşkilatçısı olan Vaşinqton Beynəlxalq Piano İncəsənət Şurasının rəhbəri Şato Qardecki çıxış edərək ölkəmizi Müstəqilliyin Bərpası Günü münasibətilə təbrik edib və Azərbaycan tərəfi ilə mədəniyyət sahəsində əməkdaşlıqdan məmnunluğunu ifadə edib.
Daha sonra Nizami Gəncəvinin 880 illik yubileyinə həsr olunmuş konsert proqramı təqdim olunub. Konsertdə amerikalı musiqiçi, Vaşinqton Beynəlxalq Piano İncəsənət Şurasının üzvü professor Frank Kanlon, hazırda ABŞ-da yaşayan Azərbaycanın Əməkdar artisti, pianoçu Nərgiz Əliyarova və istedadlı skripkaçı Azər Dəmirov dünya və Azərbaycan klassik musiqisindən əsərlər səsləndirib. Nizami Gəncəvinin şeirləri əsasında bəstələnmiş “Sənsiz” romansı və “Yeddi gözəl” musiqi parçası qonaqlar tərəfindən xüsusi olaraq bəyənilib.
Daha sonra keçirilən ziyafət zamanı qonaqlara Azərbaycan mətbəxinin ləziz təamları təqdim edilib.
Azərbaycan Diasporuna Dəstək Fondunun maliyyə yardımı ilə Oman Sultanlığında yaşayan həmvətənimiz, Sultan Qabus Universitetinin dosenti Vüsalə Əmirbəyovanın ifasında şanlı Qələbəmiz münasibətilə “Qarabağ şikəstəsi”nin fortepiano kompozisiyası ictimaiyyətə təqdim edilib.
Fonddan AZƏRTAC-a bildirilib ki, Birləşmiş Ərəb Əmirliklərinin (BƏƏ) Dubay şəhərində bu ölkədə fəaliyyət göstərən azərbaycanlı icması ilə görüş zamanı səsləndirilən əsər böyük rəğbətlə qarşılanıb.
Qeyd edək ki, Oman Sultanlığının paytaxtı Maskatda yaşayan azərbaycanlı musiqiçi, sənətşünaslıq üzrə fəlsəfə doktoru Vüsalə Əmirbəyova Yaponiya, Sinqapur, Tailand, Rusiya, Almaniya, Böyük Britaniya kimi ölkələrdə keçirilən beynəlxalq festivallarda Azərbaycanı təmsil edərək bir çox mükafatlara layiq görülüb. Beynəlxalq konfranslarda görkəmli Azərbaycan bəstəkarları Üzeyir Hacıbəyli, Qara Qarayev, Fikrət Əmirov və Cövdət Hacıyev yaradıcılığı ilə bağlı təqdimatlarla çıxış edib.
“Nankin 2021 Sülh Forumuna yol” subregional dialoqu çərçivəsində “Mədəni irs, mədəni və yaradıcı sənaye: Keçmişin mirasından dinc gələcəyimizi quraq” mövzusunda sessiya keçirilib. UNESCO-nun Almatı klaster bürosunun təşkilatçılığı ilə onlayn formatda baş tutan sessiyada Azərbaycan Milli Xalça Muzeyinin direktoru Şirin Məlikova “Müasir incəsənət sahələri və moda sənayesi kontekstində muzey kolleksiyaları” adlı təqdimatla çıxış edib.
Xalça Muzeyindən AZƏRTAC-a bildirilib ki, Şirin Məlikova rəhbərlik etdiyi muzeyin tarixi, fəaliyyəti və kolleksiyaları haqqında ətraflı məlumat verib. Azərbaycan Milli Xalça Muzeyinin xalçaçılıq sənətini dərindən mənimsəyən, ondan yeni əsərlər yaratmaq üçün ilham alan görkəmli müasir rəssamlarla əməkdaşlıq etdiyini bildirib. Ş.Məlikova belə uğurlu yaradıcılıq əlaqələrinə nümunə kimi Chingiz yaradıcı təxəllüsü ilə fəaliyyət göstərən rəssam Çingiz Babayev və AFFFAIR markasının təsisçisi, məşhur modelyer Rüfət İsmayılovla əməkdaşlıq çərçivəsində həyata keçirilən uğurlu layihələrdən danışıb.
O, bu il “Kazan Kremli” Muzey-Qoruğunda keçirilən “Xalça sənəti – mənaların təkamülü” adlı Azərbaycan xalçaçılığına həsr olunmuş sərgi və burada nümayiş etdirilən, Çingiz Babayevin xalçaçılıq sənətindən ilhamlanaraq yaratdığı müəllif əsərləri haqqında ətraflı məlumat verib.
Ş.Məlikova modelyer Rüfət İsmayılın Paris moda həftəsi çərçivəsində təqdim etdiyi Azərbaycan xalçalarının zəngin motivləri əsasında hazırladığı 21 geyimdən ibarət “Haute Couture Sumakh” kolleksiyası haqqında danışıb.
Qeyd edək ki, sessiyada Azərbaycanla yanaşı, Qazaxıstan, Qırğızıstan, Tacikistan və Özbəkistandan olan müxtəlif sənət sahələri üzrə mütəxəssislər də çıxış ediblər.
Ümumdünya Kulinariya Təşkilatları Birliyi 2004-cü ildə İrlandiyanın Dublin şəhərində keçirdiyi beynəlxalq konfransda hər il oktyabrın 20-nin Beynəlxalq Kulinariya Günü kimi keçirilməsi haqda qərar qəbul edib.
AZƏRTAC xəbər verir ki, Beynəlxalq Kulinariya Günü Azərbaycanda 2007-ci ildən etibarən hər il təntənəli şəkildə qeyd olunur. Bu günün ölkəmizdə keçirilməsi gənc nəslin Azərbaycanın milli kulinariyasının sirlərinə yaxından bələd olması və ölkənin hüdudlarından kənarda milli mətbəx nümunələrimizin təbliği və tanınması baxımından olduqca əhəmiyyətlidir.
Hər xalqın özünəməxsus tarixi, ədəbiyyatı, folkloru, milli adət-ənənəsi olduğu kimi, özünəməxsus mətbəxi də mövcuddur. Xalqımızın milli mətbəx mədəniyyətinin öyrənilməsi və təbliği məqsədilə 1991-ci ildə yaradılan Azərbaycan Milli Kulinariya Mərkəzi tərəfindən son illərdə böyük işlər görülüb. Mərkəz 1992-ci ildən Ümumdünya Kulinariya Təşkilatları Birliyinin üzvüdür. Ölkəmiz MDB məkanında və Türk dünyasında bu quruma qəbul edilən ilk dövlətdir. Milli Kulinariya Mərkəzi yarandığı gündən aparıcı kulinarları, səliqə-sahmanı və bu sahədə yaradıcılıq fantaziyası olan mütəxəssisləri ətrafında birləşdirib. Məhz bunun nəticəsidir ki, 1993-cü ildə Azərbaycanın milli komandası ilk dəfə Maltada keçirilən Dünya Kulinariya Çempionatına qoşulub və qızıl medalla Vətənə dönüb.
Qatıldığı bütün yarışlarda birinciliyi əldən verməyən milli kulinariya ustalarımız dünyanın bir neçə ölkəsində xalqımıza məxsus zəngin mətbəx mədəniyyətini nümayiş etdirib. Hətta Malta Prezidenti Qvide de Marko, İngiltərə şahzadəsi Anna azərbaycanlı kulinarların əl qabiliyyətinə heyran qalaraq onları mükafatlandırıblar.
Ölkəmiz 1998-ci ildən UNESCO-nun Xalq Yaradıcılığı Təşkilatının da üzvüdür. Azərbaycan Milli Kulinariya Mərkəzinin rəhbəri Tahir Əmiraslanov həm də UNESCO-nun Ənənəvi Qida Komitəsinin sədridir.
Oktyabrın 22-də Abdulla Şaiq adına Azərbaycan Dövlət Kukla Teatrı “Cırtdan” tamaşasını nümayiş etdirəcək.
AZƏRTAC xəbər verir ki, teatrın təqdim etdiyi tamaşa uşaq yazıçısı Mirmehdi Seyidzadənin məşhur “Cırtdan” mənzum nağıl-pyesi əsasında hazırlanıb.
Yeni tərtibatda hazırlanan tamaşaya teatrın baş rejissoru Qurban Məsimov quruluş verib. O, səhnələşdirilməsi mərhum dramaturq Rəhman Əlizadəyə məxsus tamaşaya müasir kukla texnikalarının köməyi ilə fərqli səhnə həlli verib. Birhissəli kukla tamaşasının quruluşçu rəssamı Rəvanə Yaqubova, bəstəkarı Oqtay Zülfüqarovdur.