XƏBƏRLƏR

6-10 oktyabr 2021-ci il tarixində Bakı Ekspo Mərkəzində VII Bakı Beynəlxalq Kitab Sərgi-Yarmarkası “Baku International Book Fair 2021” keçiriləcək. Sərginin məqsədi kitab və mütaliəni təbliğ etmək və populyarlaşdırmaq, ziyarətçiləri həm Azərbaycan, həm də xarici nəşriyyatların çap məhsulları ilə tanış etmək, nəşriyyat işinə dəstək vermək, nəşriyyatları potensial əməkdaşlıq üçün kitab mağazaları ilə tanış etmək, eləcə də rəqəmsal dövrdə kitab biznesinin inkişafı ilə bağlı təcrübə və fikir mübadiləsini təmin etməkdir. “Baku International Book Fair 2021” kitab sərgisi dünya ədəbiyyatının görkəmli nümayəndəsi, Azərbaycanın dahi şair və mütəfəkkiri Nizami Gəncəvinin 880 illik yubileyinə həsr olunacaq. Sərgidə nəşriyyatlar, mətbəələr, kitab mağazaları və mədəniyyət mərkəzləri təqdim olunacaq. Həmçinin, sərgidə ayrı-ayrı ölkələrdən 200-ə yaxın şirkətin iştirak edəcəyi gözlənilir. “Baku International Book Fair 2021” kitab sərgisi şirkətlərin çap məhsullarını nümayiş etdirmək və satmaq, habelə yerli və xarici nəşriyyatlar, müəlliflər, eləcə də milli nəşriyyat və poliqrafiya şirkətləri ilə danışıqlar aparmaq və müqavilələr imzalamaq üçün unikal fürsətdir. Sərginin keçiriləcəyi 5 gün ərzində iştirakçıları və ziyarətçiləri əlavə tədbirlərdən ibarət maraqlı proqramlar gözləyir. Sərginin təşkilatçısı Azərbaycan Respublikası Mədəniyyət Nazirliyidir, qızıl sponsoru – “bp” şirkəti, baş TV tərəfdaşı - Azərbaycan İctimai Televiziyası, təşkilati dəstəyi isə “Caspian Event Organisers” (“CEO”) şirkəti həyata keçirir. 6 kvadrat metrə qədər ekspozisiya sahəsi və lazımı avadanlıqlar Sərgi-yarmarka iştirakçılarına sərginin təşkilatçısı tərəfindən təmin ediləcək. Ziyarətçilər üçün sərgiyə “Koroğlu” metro stansiyasından hər yarım saatdan bir, “Elmlər Akademiyası” stansiyasının yanından isə hər saatdan bir avtobuslar hərəkət edəcəklər.  “Baku International Book Fair 2021” sərgisində iştirak etmək və daha ətraflı məlumat almaq üçün sərgi təşkilatçıları ilə əlaqə saxlaya bilərsiniz: +994124041000, bookfair@ceo.az.

XIII  Beynəlxalq Musiqi Festivalının beşinci günü Azərbaycan Dövlət Filarmoniyasında  Polşalı musiqiçilərin iştirakı ilə keçirilən parlaq simfonik musiqi axşamı ilə sona çatdı. Konsertin əsas iştirakçılıarı dirijor Pavel Kotla və soprano səsli müğənni İvona Sobotka idi.   Pavel Kotla orta təhsilini violin sinfi üzrə Poznan şəhərində alıb. F.Şopen adına Varşava Musiqi Akademiyasının simfonik musiqi və opera dirijorluğu sinfini bitirib. Bir sıra beynəlxalq ustad dərslərində iştirak edib. 2008-ci ildən Avropa Birliyinin Polşa Prezidensiyasının rəsmi orkestri olan “I, Cultural Orchestra” heyətinin yaradıcısıdır. Həmçinin, musiqişünaslıq üzrə də diplomu var. İvona Sobotka Polşanın tanınmış opera müğənnisidir. F.Şopen adına Varşava Musiqi Akademiyasının məzunu, Kraliça Yelizaveta Musiqi Müsabiqəsinin Qran-pri mükafatı laureatıdır.  2007-ci ildən etibarən dünyanın bir çox ölkələrində nümayiş olunan opera tamaşalarında  baş rollarda çıxış edir. Repertuarında F.Şopen, Rixard Ştraus, Karl Şimanovski və başqa klassik bəstəkarların əsərləri geniş yer tutur. Konsert Qara  Qarayevin “İldırımlı yollarla” baletindən süita ilə başlandı. Baletin ən parlaq, afro-amerika çalarlı epizodları olan “Ümumi rəqs”, “Qaraların rəqsi”, “Gitaralı qızların rəqsi” ifa edildi.  Daha sonra Karl Şimanovskinin soprano ilə orkestr üçün “Şahzadənin mahnıları” adlı silsiləsinin dünya üzrə ilk ifası baş tutdu. Xatırlatmaq lazımdır ki, bir neçə il öncə əsərin əvvəlki redaktələrindən biri aşkarlanıb ilk ifa üçün hazırlanırdı, lakin pandemiya səbəbindən “Şahzadənin mahnıları” silsiləsinin ilk ümumdünya ifası Bakıda və məhz Ü.Hacıbəyli adına XIII Beynəlxalq Musiqi Festivalı çərçivəsində gerçəkləşdi. Silsilə solist, soprano müğənni İvana Slobodka ilə müşayiət edən orkestrin ifasında səsləndi.  Karl Şimanovski XX əsrin I yarısında yaşayıb yaratmış, impressionizm musiqi ənənələrilə müasir, xüsusən R.Ştrausun və A.Skryabinin  ənənələrini özündə birləşdirən üslubu ilə tanınıb. Onun musiqisi yüksək emosionallığı, ekstatik keyfiyyəti və ekzotik səslənmələrə təmayül ilə fərqlənir.  Konsertin ikinci bölməsində Lüdviq van Bethovenin təntənəli,  bir qədər də matəm ruhlu VII simfoniyası ifa edildi.

XIII Beynəlxalq Musiqi Festivalı çərçivəsində Azərbaycan Bəstəkarlar İttifaqının Ü.Hacıbəyli adına konsert salonunda “Üzeyir Hacıbəyli və Müslüm Maqomayev” mövzusunda elmi konfrans keçirilib. Tədbiri Azərbaycan Bəstəkarlar İttifaqının sədri, AMEA-nın müxbir üzvü, professor Firəngiz Əlizadə ön sözlə açaraq, xalqımızın tarixi ədaləti bərpa edib zəfər çaldığı eyni zamanda ölkəmizdə pandemiyanın hökm sürdüyü dövrdə Üzeyir Hacıbəylinin adını daşıyan festivalın keçirilməsinin önəmindən bəhs etdi. Mövzu çərçivəsində konfransda beş məruzə səsləndi. ABİ-nın məsul katibi, əməkdar müəllim, sənətşünaslıq üzrə elmlər doktoru, professor Cəmilə Həsənovanın  “Üzeyir Hacıbəyli və Müslüm Maqomayevin Azərbaycan etnomusiqişünaslığında rolu” mövzusunda çıxış etdi. Əməkdar incəsənət xadimi, sənətşünaslıq üzrə elmlər doktoru, BMA-nın professoru İmruz Əfəndiyeva  tanınmış teatrşünas  Məmməd Sadıq Əfəndiyevin fəaliyyətindən söz açaraq “M.S.Əfəndiyevin Ü.Hacıbəylinin “Koroğlu” operası haqqında ilk elmi-tədqiqat məqaləsinə dair fikirlər” mövzusunda məruzə etdi. Sənətşünaslıq üzrə fəlsəfə doktoru, dosent Güllü İsmayılova da “Ü.Hacıbəylinin yaradıcılığında milli məfkurə və türkçülük ideyalarının təcəssümü” məsələsi ilə bağlı fikirlərini bölüşdü. Azərbaycan musiqi mədəniyyətinin görkəmli xadimlərindən biri, musiqili teatr mədəniyyətimizin banilərindən olan Müslüm Maqomayevin fəaliyyətinə dair tarixi-faktoloji materiallar əməkdar mədəniyyət işçisi, sənətşünaslıq üzrə fəlsəfə doktoru Alla Bayramovanın məruzəsində açıqlandı. Konfransın son məruzəsi Bakı Musiqi Kollecinin və Bülbül adına Orta ixtisas Musiqi Məktəbinin müəllimi Rəhilə Abbasovaya aid oldu. Üzeyir bəyin vətənpərvərlik ənənələri və humanist prinsiplərinin Əşrəf Abbasovun fəaliyyətində örnək kimi əhəmiyyətindən bəhs olundu. Tədbirin sonunda Nizami Gəncəvi poeziyasına əsaslanan qısa müddətli musiqi proqramı təqdim edildi. Bəstəkarlar Lalə Cəfərovanın “Səbr et” qəzəl-romansı Əməkdar artist, tenor müğənni Fərid Əliyevin, Azər Dadaşovun “Sevgi qanaddır” qəzəl-romansı isə əməkdar artist, pianoçu Nərgiz Əliyeva ilə kamança ifaçısı Azər Hacıbalayevin ifasında səsləndi.

XIII  Beynəlxalq Musiqi Festivalının dördüncü günü Üzeyir Hacıbəylinin “Leyli və Məcnun” operasının tamaşası ilə tamamlandı. Pandemiya şəraitində Azərbaycan opera sənətinin nadir incilərindən olan “Leyli və Məcnun” operasının nümayişi musiqisevərlər və teatr həvəskarları üçün əlamətdar hadisə oldu. 1907-ci ildə Üzeyir bəy tərəfindən dahi Füzulinin eyni adlı lirik-faciəsinin süjeti əsasında yaradılmış “Leyli və Məcnun” əsəri ilə Azərbaycan opera sənətində çox əhəmiyyətli yaradıcı təmayüllərdən biri olan muğam operası ənənəsinin əsası  qoyulub. 21 sentyabr tamaşası baş tutan operanın quruluşçu rejissoru Hafiz Quliyev oldu. Orkestri isə dirijor, əməkdar incəsənət xadimi, Prezident mükafatçısı Sevil Hacıyeva idarə etdi. “Leyli və Məcnun” operasının əsas partiyalarını Respublika muğam müsabiqəsinin laureatı Rəvanə Əmiraslanlı (Leyli) və əməkdar artist Elnur Zeynalov (Məcnun) ifa etdilər. Tamaşanın digər iştirakçıları əməkdar artist Təyyar Bayramov (Məcnunun atası), Cahangir Qurbanov (Nofəl), Taleh Yəhyayev (Leylinin atası), Aytən Məhərrəmova (Leylinin anası), Nurlan Namazov (İbn Səlam), Nəzər Bəylərov (Zeyd) oldu.

XIII  Beynəlxalq Musiqi Festivalının dördüncü gününün növbəti maraqlı konsert proqramı ABŞ-dan təşrif  buyuran tanınmış ifaçıların dueti ilə yadda qaldı. Hazırda ABŞ-da yaşayıb fəaliyyət göstərən həmvətənimiz, respublikanın əməkdar artisti Nərgiz Əliyarova Amerikada yaşayıb-yaradadan rus mənşəli violonçel ifaçısı Sergey Antonovla birgə  kamera musiqisi axşamını təqdim etdilər. Nərgiz Əliyarova Ü.Hacıbəyli adına Azərbaycan Dövlət Konservatoriyasının (1991-ci ildən – Bakı Musiqi Akademiyasının) fortepiano ixtisası üzrə tanınmış pedaqoqlarından olan professor Elmira Səfərovanın tələbəsidir. Repertuarında Friderik Şopen yaradıcılığına xüsusi yer ayıran N.Əliyarova bir çox sanballı beynəlxalq fortepiano müsabiqələrinin qalibi olub. 2010-cu ildə “Şopen musiqisinin təbliğinə görə” Polşa Dövlətinin Fəxri Diplomuna layiq görülüb. Uzun müddət  BMA-da fortepiano üzrə ixtisas sinfi, ansambl ixtisaslarını tədris edib.  Nərgiz Əliyarova  Azərbaycan Dövlət Fortepiano Triosunun solisti, Milli Musiqi və Qlobal Mədəniyyət Cəmiyyətinin yaradıcısıdır. 2017-ci ildən ABŞ-a köçən pianoçu ifaçı fəaliyyətində Azərbaycan klassik və müasir bəstəkar musiqisinin təbliğinə xüsusi yer ayırır. Sergey Antonov  Moskva Dövlət Konservatoriyasında violonçel ixtisası üzrə Natalya Şaxovskayanın sinfini bitirib. İştirak etdiyi beynəlxalq müsabiqələrin sayı çoxdur. 2007-ci ildən etibarən  Moskva Filarmoniyasının solistidir. O, həmçinin “Ermitaj” Triosunun üzvüdür. Dirijor kimi debütü 2014-cü ildə baş tutub. Sergey Antonovun ifaçı kimi formalaşmasında  Mstislav Rostropoviçin rolu böyükdür. Bu səbəbədən repertuarına həm Rostropoviçin ifa etdiyi və müəllifi olduğu  klassik müsiqi nümunələrini daxil edir.    Kamera musiqi axşamının proqramında Friderik Şopenin, Dmitri Şostakoviçin və Mstislav Rostropoviçin əsərləri səsləndi. F.Şopenin fortepiano Balladasının piano-violonçel dueti üçün işləməsinin (bəstəkar Lalə Cəfərova tərəfindən işlənilmişdir) ifası xüsusi maraqla qarşılandı.  

XIII Beynəlxalq Musiqi Festivalının dördüncü gününün növbəti maraqlı konsert proqramı ABŞ-dan təşrif  buyuran tanınmış ifaçıların dueti ilə yadda qaldı. Hazırda ABŞ-da yaşayıb fəaliyyət göstərən həmvətənimiz, respublikanın əməkdar artisti Nərgiz Əliyarova Amerikada yaşayıb-yaradadan rus mənşəli violonçel ifaçısı Sergey Antonovla birgə  kamera musiqisi axşamını təqdim etdilər. Nərgiz Əliyarova Ü.Hacıbəyli adına Azərbaycan Dövlət Konservatoriyasının (1991-ci ildən – Bakı Musiqi Akademiyasının) fortepiano ixtisası üzrə tanınmış pedaqoqlarından olan professor Elmira Səfərovanın tələbəsidir. Repertuarında Friderik Şopen yaradıcılığına xüsusi yer ayıran N.Əliyarova bir çox sanballı beynəlxalq fortepiano müsabiqələrinin qalibi olub. 2010-cu ildə “Şopen musiqisinin təbliğinə görə” Polşa Dövlətinin Fəxri Diplomuna layiq görülüb. Uzun müddət  BMA-da fortepiano üzrə ixtisas sinfi, ansambl ixtisaslarını tədris edib.  Nərgiz Əliyarova  Azərbaycan Dövlət Fortepiano Triosunun solisti, Milli Musiqi və Qlobal Mədəniyyət Cəmiyyətinin yaradıcısıdır. 2017-ci ildən ABŞ-a köçən pianoçu ifaçı fəaliyyətində Azərbaycan klassik və müasir bəstəkar musiqisinin təbliğinə xüsusi yer ayırır. Sergey Antonov  Moskva Dövlət Konservatoriyasında violonçel ixtisası üzrə Natalya Şaxovskayanın sinfini bitirib. İştirak etdiyi beynəlxalq müsabiqələrin sayı çoxdur. 2007-ci ildən etibarən  Moskva Filarmoniyasının solistidir. O, həmçinin “Ermitaj” Triosunun üzvüdür. Dirijor kimi debütü 2014-cü ildə baş tutub. Sergey Antonovun ifaçı kimi formalaşmasında  Mstislav Rostropoviçin rolu böyükdür. Bu səbəbədən repertuarına həm Rostropoviçin ifa etdiyi və müəllifi olduğu  klassik müsiqi nümunələrini daxil edir. Kamera musiqi axşamının proqramında Friderik Şopenin, Dmitri Şostakoviçin və Mstislav Rostropoviçin əsərləri səsləndi. F.Şopenin fortepiano Balladasının piano-violonçel dueti üçün işləməsinin (bəstəkar Lalə Cəfərova tərəfindən işlənilmişdir) ifası xüsusi maraqla qarşılandı.  

Üzeyir Hacıbəyli adına  XIII  Beynəlxalq Musiqi Festivalı çərçivəsində instrumental musiqi də səslənib. Respublikanın Xalq artisti, Bakı Musiqi Akademiyasının professoru  Ülviyyə Hacıbəyova və tanınmış pianoçu  Səidə Tağızadənin iştirakı ilə fortepiano musiqisi axşamı baş tutub. Pianoçular həm solo, həm ansambl repertuarlarına  Azərbaycan, Avropa və rus bəstəkarlarının əsərlərini, eləcə də fərqli musiqi üslublarını daxil etdilər. Jan Ramo və İ.Baxın barokkosu, F.Şopenin və S.Raxmaninovun romantizmi, XX əsr avanqard klassikasının yaradıcılarından biri Olivye Messianın, müasir Azərbaycan peşəkar bəstəkarlığının ən görkəmli nümayəndələri – Q.Qarayevdən başlayaraq, Fərəc Qarayev, Arif Məlikov, İsmayıl Hacıbəyov və Firəngiz Əlizadənin  XX əsrin yeni klassisizm və avanqard ruhlu əsərləri səsləndi. Səidə Tağızadənin incə, romantik və lirik ifasında Ü.Hacıbəylinin cilalanmış, parlaq əsərlərini dinləyicilər alqışla qarşıladılar. Konsert proqramı  Üzeyir Hacıbəylinin “Koroğlu” operasından uvertüranın ifası ilə başa çatdı.

21 sentyabrda Azərbaycan Respublikası Mədəniyyət Nazirliyinin və Bakıdakı Rusiya İnformasiya-Mədəniyyət Mərkəzinin dəstəyi ilə Azərbaycan Dövlət Akademik Musiqili Teatrında Rusiya Teatr Sənəti İnstitutunun (QİTİS) Səhnə hərəkəti və plastika kafedrasının müdiri Aydar Zakirovun rəhbərliyi ilə səhnə hərəkəti və qılıncoynatma fənləri üzrə ustad dərslərinə başlanılıb. Mədəniyyət Nazirliyi tərəfindən teatr peşələri üzrə mütəmadi olaraq, təlim və təcrübə mübadiləsi, ixtisasartırma, xaricdə təhsil imkanları yaradaraq, kadr potensialını inkişaf etdirmək məqsədilə həyata keçirilən tədbirlər silsiləsindən olan ustad dərsləri  24 sentyabr tarixinə qədər davam edəcək. Qeyd edək ki, təlimlərdə ölkənin ayrı-ayrı teatrlarından gənc aktyorlar, xoreoqraflar, eləcə də Azərbaycan Mədəniyyət və İncəsənət Universitetinin bir qrup müəllim və tələbələri də iştirak edirlər.

Norveçdə çıxan “Utrop” qəzeti Azərbaycan əsilli moda dizaynerinin yeni kolleksiyasından yazıb.

AZƏRTAC xəbər verir ki, “Utrop” qəzetində dərc olunmuş “Norveçli geyim dizayneri “Antalya 2021 Moda Həftəsi”ndə modaların rəqəmsal nümayişi zamanı öz yeni kolleksiyasını təqdim edir” sərlövhəli məqalədə Şervin Nəcəfpurun yeni əl işlərindən söhbət açılır.

Məqalədə vurğulanır ki, Oslo sakini Şervin Nəcəfpur yumşaq rəng qammasında geyimlərin yer aldığı yeni kolleksiyası ilə Türkiyə və Azərbaycan tamaşaçılarını yenə də valeh edib. Kolleksiya davam edən pandemiya ilə əlaqədar onlayn formatda keçirilən Rəqəmsal Moda Həftəsində təqdim olunub. Türkiyənin Antalya şəhərində keçirilən moda nümayişi Şervinin əl işlərinin təqdim olunduğu üçüncü tədbirdir.

Şervin Nəcəfpur jurnalistə müsahibəsində özünün moda aləminə gedən yolundan danışıb. Onun sözlərinə görə, əl işlərini yaradarkən güclü qadın modelyerlərdən və türk mədəniyyətindən ilham alır. Koko Şanel Şervin üçün kumirdir, lakin soy-kökü Türkiyə və Azərbaycana bağlı olan rəssam üçün türk mədəniyyəti elementləri ilə Skandinaviya minimalizm üslubunu birləşdirmək tamamilə təbiidir.

Həmçinin diqqətə çatdırılır ki, builki kolleksiyaya daxil olan paltarların əksəriyyətində nadir səhləb çiçəyini - “Xarıbülbül”ü görmək mümkündür. Məqalədə deyilir: “Türkiyə və Azərbaycanın mədəniyyəti və tarixi ilə tanış olmayan insanlar düşünə bilərlər ki, bu güllərin həmin geyimlərə əlavə edilməsi estetik zövqlə bağlıdır. Əslində, “Xarıbülbül” sevgi rəmzidir, bu yaxınlardakı müharibədən sonra isə bu çiçək xilaskarlıq rəmzinə, həmçinin həlak olan dinc sakinlərin və əsgərlərin xatirəsinə çevrilib. 30 il işğal altında qalmış Qarabağın azad olunmasına həsr edilmiş bu əlamətdar kolleksiya doğma ocaqlarını qoyub çıxmaq məcburiyyəti ilə üzləşən insanları birləşdirməyə qadir olan sevginin gücünə ümid rəmzidir”.

Əməkdar mədəniyyət işçisi, sənətşünaslıq üzrə fəlsəfə doktoru İftixar Piriyevin qələmə aldığı dahi Azərbaycan şairi Nizami Gəncəvinin həyatından bəhs edən “Xəmsə və yaxud könüllər mülkünün sultanı” tamaşasının premyerası olub.

AZƏRTAC xəbər verir ki, Dərbənd Azərbaycan Dram Teatrının səhnələşdirdiyi tamaşanın quruluşçu rejissoru Əməkdar artist Sərvər Əliyev, quruluşçu rəssamı Dağıstanın Əməkdar rəssamı Naida Alimetovadır.

Tamaşa barədə fikirlərini bölüşən Sərvər Əliyev deyib: “Prezident İlham Əliyevin müvafiq Sərəncamına əsasən bu il ölkəmizdə “Nizami Gəncəvi İli” elan olub. Bu münasibətlə dahi şairə həsr olunan müxtəlif tədbirlər keçirilir. Biz də bu ilə töhfə olaraq “Xəmsə və yaxud könüllər mülkünün sultanı” tamaşasını hazırladıq. Tamaşanın üzərində 44 gün çalışmışıq, necə ki, Azərbaycan əsgəri 44 gün ərzində ərazi bütövlüyümüzü bərpa etdi. Onu da qeyd etmək istəyirəm ki, Nizaminin ailə həyatının bağı Dərbəndlə də bağlıdır. Belə ki, Dərbənd əmiri tərəfindən şairə kəniz kimi göndərilən Afaqla Nizami ailə həyatı qurur. Dərbəndlilər Nizami yaradıcılığını çox sevirlər”.

Səhnə əsərində dahi Nizaminin obrazını gənc aktyor Sərxan Səmədov canlandırıb.