XƏBƏRLƏR

Bakı Dövlət Sirkinin orkestr heyəti 18 sentyabr Milli Musiqi Günü ilə əlaqədar olaraq Zabitlər bağında çıxış ediblər. Orkestr heyəti repertuarında əsasən Azərbaycanın peşəkar musiqi sənətinin banisi, Şərqdə ilk operanın müəllifi, dahi bəstəkar Üzeyir Hacıbəylinin “O olmasın bu olsun”, “Arşın mal alan” operettalarında yer alan musiqiləri səsləndiriblər. Qeyd edək ki, 18 sentyabr dahi bəstəkar Üzeyir Hacıbəylinin doğum günüdür. Azərbaycan Respublikası Prezidentinin 1995-ci il 18 sentyabr tarixli Fərmanı ilə bu gün ölkə miqyasında qeyd edilir.

Sentyabrın 18-də Milli Musiqi Gününün əsas təntənəli tədbiri Bakı Musiqi Akademiyasının qarşısında – Üzeyir Hacıbəylinin heykəli önündə keçirildi. Tədbirdə mədəniyyət naziri Anar Kərimov, nazirin birinci müavini Elnur Əliyev, nazir müavini Sevda Məmmədəliyeva, Azərbaycan Bəstəkarlar İttifaqının sədri, Xalq artisti Firəngiz Əlizadə, Bakı Musiqi Akademiyasının rektoru, Xalq artisti Fərhad Bədəlbəyli, Azərbaycan Milli Konservatoriyasının rektoru, Xalq artisti Siyavuş Kərimli, Üzeyir Hacıbəylinin Ev-Muzeyinin direktoru, Xalq artisti Sərdar Fərəcov, mədəniyyət və incəsənət xadimləri, musiqisevərlər iştirak edirdilər. Mərasimdə çıxış edən mədəniyyət naziri Anar Kərimov bildirdi ki, ənənəyə sadiq qalaraq Milli Musiqi Gününü Üzeyir Hacıbəyli adına Bakı Musiqi Akademiyasında da qeyd edirik: “Bu il Bakı Musiqi Akademiyasının yaradılmasının 100 ili tamam olur. Mən bu münasibətlə burada çalışan bütün kollektivi təbrik edirəm, onlara işlərində uğurlar arzulayıram”. Nazir vurğuladı ki, ümummilli lider Heydər Əliyevin 1995-ci ildə imzaladığı fərmanla hər il sentyabrın 18-i ölkəmizdə Milli Musiqi Günü kimi qeyd olunur. Builki Milli Musiqi Günü əvvəlki illərdəkindən fərqli keçirilir.44 günlük Vətən müharibəsində torpaqlarımız düşmən tapdağından azad olunub və Üzeyir bəyin əsərləri bu gün doğulduğu doğma Şuşa şəhərində səslənir. Ulu öndər Heydər Əliyevin mədəniyyətimizə, musiqimizə göstərdiyi diqqət və qayğının Prezident İlham Əliyev tərəfindən davam etdirildiyini, eləcə də Birinci vitse-prezident Mehriban xanım Əliyevanın mədəniyyətimizin hamisi kimi müstəsna fəaliyyətini diqqətə çatdıran nazir bildirdi ki, məhz bunun nəticəsi olaraq Üzeyir Hacıbəylinin, onun əsərlərinin yubileyi UNESCO səviyyəsində qeyd edilib. 2009-cu ildən etibarən Heydər Əliyev Fondu Mədəniyyət Nazirliyi ilə birgə Üzeyir Hacıbəyli adına festival keçirir. Üzeyir Hacıbəylinin Azərbaycan mədəniyyətində köklü dönüş yaratmış sənətkar olduğunu vurğulayan Anar Kərimov söylədi ki, dahi bəstəkarın qoyduğu ənənələrə sadiq qalaraq musiqimizi inkişaf etdirməli, onu yad təsirlərdən qorumalıyıq. 2021-ci ilin ölkə başçısı İlham Əliyevin müvafiq sərəncamı ilə “Nizami Gəncəvi İli” elan edildiyini deyən nazir qeyd etdi ki, ənənəvi olaraq 18 sentyabrda – Milli Musiqi Günündə başlanan Üzeyir Hacıbəyli Beynəlxalq Musiqi Festivalında da Nizamiyə, onun irsi ilə bağlı musiqi əsərlərinə xüsusi yer ayrılacaq. Beləliklə, bu festival vasitəsilə iki dahimizi bir araya gətirəcəyik. Bakı Musiqi Akademiyasının rektoru, Xalq artisti Fərhad Bədəlbəyli də təhsil ocağının 100 illik yubileyindən bəhs edərək söylədi ki, istər Azərbaycan musiqisi, istərsə də bu ali təhsil ocağı Üzeyir bəyin adı ilə bağlıdır: “Üzeyir Hacıbəylinin Qara Qarayev, Fikrət Əmirov, Niyazi, Cahangir Cahangirov, Soltan Hacıbəyov kimi tələbələri olub. Heç bir müsəlman ölkəsində belə bəstəkarlar və musiqi mədəniyyəti yoxdur. Ona görə də biz mədəni sərvətimiz olan musiqi irsimizi mütləq saxlamalı, daima inkişaf etdirməliyik”. Daha sonra Müdafiə Nazirliyi Nümunəvi Hərbi Orkestrinin və Azərbaycan Dövlət Xor Kapellasının ifasında musiqi nümunələri təqdim olundu.

18 sentyabr – Milli Musiqi Gününün növbəti ənənəvi tədbiri Azərbaycan Milli Konservatoriyasında keçirildi. Milli Konservatoriyanın həyətində musiqi bayramı münasibətilə konsert proqramı təqdim olundu. Əvvəlcə tədris ocağının rektoru, Xalq artisti Siyavuş Kərimi çıxış edərək Üzeyir Hacıbəylinin adı ilə bağlı olan Milli Musiqi Gününün önəmindən, dahi bəstəkarın yaradıcılığından, Azərbaycan musiqisinin inkişafında xidmətlərindən danışdı. Bildirdi ki, bu il musiqi bayramıölkəmizdə xüsusi ab-havada, qələbə ruhu ilə qeyd olunur, Üzeyir bəyin əsərləri Şuşada səslənir. Mədəniyyət naziri Anar Kərimov hər il ənənəvi olaraq Milli Musiqi Günündə açılışı keçirilən Üzeyir Hacıbəyli Beynəlxalq Musiqi Festivalının ölkəmizin, mədəniyyətimizin dünyada tanıdılmasında əhəmiyyətini vurğuladı. Qeyd etdi ki, Milli Musiqi Günü və Üzeyir bəyin adını daşıyan festivalın ilk konserti bu gün onun doğma şəhərində, azad Şuşada keçirlir. Festivalın konsertləri Ağdamda, Gəncədə də təşkil ediləcək. “Artıq biz Şuşada – mədəniyyətimiz paytaxtında “Xarıbülbül” Musiqi Festivalını və Vaqif Poeziya Günlərini keçirmişik. Gələn ildən Üzeyir Hacıbəyli Beynəlxalq Musiqi Festivalının da böyük bir hissəsini Şuşada keçirəcəyik. Beləliklə, Azərbaycan mədəniyyətini, Üzeyir Hacıbəyli mirasını və ölməz əsərlərini bir daha dünyaya təqdim edəcəyik” – deyə Anar Kərimov vurğuladı. Nazir çıxışının sonunda bir daha bütün musiqisevərləri əlamətdar gün münasibətilə təbrik etdi. Bakı Musiqi Akademiyasının rektoru, Xalq artisti Fərhad Bədəlbəyli çıxışında Üzeyir Hacıbəylinin musiqisinin hər zaman bizimlə olduğunu vurğuladı. Bildirdi ki, Azərbaycan musiqisinin bu səviyyəyə gəlib çatması onun dühasının məhsuludur. Üzeyir bəy hər yerdə var və onun əsərləri hər zaman sevilə-sevilə dinlənilir. Sonra musiqi proqramı təqdim edildi. Azərbaycan Milli Konservatoriyası Xalq çalğı alətləri orkestrinin müşayəti ilə Əməkdar artist Təyyar Bayramov, xanəndələr Rəvanə Əmiraslanova və Aytən Məhərrəmovanın ifasında “Qarabağ şikəstəsi” səsləndirildi.

Azərbaycan professional musiqi sənətinin banisi Üzeyir Hacıbəylinin (1885-1948) dünyaya gəldiyi 18 sentyabr tarixi ölkəmizdə ənənəvi olaraq Milli Musiqi Günü (“Üzeyir musiqi günü”) kimi qeyd edilir. Mədəniyyət tariximizin bu əlamətdar gününün tədbirlər silsiləsi ənənəvi olaraq Fəxri xiyabanda dahi bəstəkarın məzarının ziyarət olunması ilə başlandı. Mərasimdə mədəniyyət naziri Anar Kərimov, Azərbaycan Bəstəkarlar İttifaqının sədri, Xalq artisti Firəngiz Əlizadə, Bakı Musiqi Akademiyasının rektoru, Xalq artisti Fərhad Bədəlbəyli, Azərbaycan Milli Konservatoriyasının rektoru, Xalq artisti Siyavuş Kərimli, Azərbaycan Yazıçılar Birliyinin sədri, Xalq yazıçısı Anar, Azərbaycan Dövlət Mədəniyyət və İncəsənət Universitetinin rektoru Ceyran Mahmudova, mədəniyyət və incəsənət xadimləri, musiqisevərlər iştirak edirdilər. Mədəniyyət naziri Anar Kərimov mərasimə toplaşanları Milli Musiqi Günü münasibətilə təbrik edərək bildirdi ki, bu gün mədəniyyətimizin ən əlamətdar günlərindən biridir: “Yadınızdadırsa keçən il burada çıxış edərkən söylədik ki, ən böyük arzumuz bu günü Şuşamızda keçirməkdir. Şükürlər olsun ki, biz bu günü gördük. Ali Baş Komandanımızın rəhbərliyi ilə Ordumuz Şuşanı düşməndən azad etdi. Bu gün Üzeyir bəyin və Şuşadan olan digər görkəmli mədəniyyət və incəsənət xadimlərinin ruhları şaddır. Mən bir daha Vətən müharibəsində canlarından keçən şəhidlərimizə Allahdan rəhmət, qazilərimizə şəfa diləyirəm. Musiqi bayramınız mübarək olsun”. Azərbaycan Bəstəkarlar İttifaqının sədri, Xalq artisti Firəngiz Əlizadə çıxışında Üzeyir Hacıbəylinin musiqi dahisi kimi mədəniyyət tariximizdə rolunu qeyd edərək onu Şərqin Motsartı adlandırdı. Söylədi ki, nə qədər ki Azərbaycan xalqı var, dahi bəstəkarın ölməz irsi hər zaman yaşayacaq. Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli və Azərbaycan Milli Konservatoriyasının rektoru, Xalq artisti Siyavuş Kərimi də dahi bəstəkarın ölməz irsindən söz açdılar, Milli Musiqi Gününün azad Şuşaya qayıtdığını vurğuladılar. Çıxışlardan sonra Azərbaycan Dövlət Xor Kapellası (bədii rəhbər – Xalq artisti Gülbacı İmanova) heyətinin ifasında Üzeyir Hacıbəylinin “Leyli və Məcnun” operasından “Şəbi-hicran” kompozisiyası səsləndirildi. Daha sonra mərasim iştirakçıları Fəxri xiyabanda uyuyan Azərbaycan musiqisinin korifeylərindən Qara Qarayev, Fikrət Əmirov, Bülbül, Rəşid Behbudov, Niyazi və Müslüm Maqomayevin məzarlarını ziyarət etdilər. Mərasim iştirakçıları ümummilli lider, mədəniyyətimizin böyük hamisi, 1995-ci ildə imzaladığı fərmanla mədəniyyət təqvimimizə Milli Musiqi Gününü bəxş etmiş Heydər Əliyevin və görkəmli oftalmoloq alim, akademik Zərifə xanım Əliyevanın xatirəsini də ehtiramla anaraq məzarları üzərinə tər çiçək dəstələri düzdülər.

Azərbaycan Könüllü Təşkilatları İttifaqı (AKTİ), “ASAN Könüllüləri” Təşkilatının “Mədəniyyət Carçısı” proqramı və Bakı Gənclər Mərkəzinin birgə təşkilatçılığı ilə istedadlı Azərbaycan könüllülərinin təqdimatında Üzeyir Hacıbəylinin doğum günü və Milli Musiqi Gününə həsr olunmuş konsert proqramı baş tutub.

Azərbaycan Könüllü Təşkilatları İttifaqından AZƏRTAC-a bildirilib ki, konsertdə İttifaqın sədri Yusif Vəliyev, “ASAN Könüllüləri” Təşkilatının sədri Emiliya Bayramova, Bakı Gənclər Mərkəzinin direktoru Nərgiz Babayeva, AKTİ katibliyi, eləcə də İttifaqa üzv təşkilatları təmsil edən könüllülər iştirak ediblər.

Könüllülərin ifasında müxtəlif xalq və bəstəkar mahnıları səsləndirilib, milli rəqslər səhnələşdirilib.

Sonda könüllülərə rəsmilər tərəfindən təşəkkürnamələr təqdim edilib.

“Tac”, “Ted Lasso” və “Kraliçanın addımı” serialları “Emmy mükafatları”nın qalibi seçilib.

AZƏRTAC TASS agentliyinə istinadla xəbər verir ki, 73-cü mükafatlandırma mərasimi ötən gün Los-Acelesdə keçirilib.

“Tac” 24 kateqoriya üzrə namizədliyini irəli sürərək ümumi nominasiyalar arasında liderliyini saxlayıb. Bu filmlə bərabər ən yaxşı faciəvi serial adı uğrunda “Mandalorian”, “Qaqalar”, “Bridcerton”, “Qulluqçunun nağılı”, “Lavkraft ölkəsi”, “Duruş”, “Bu bizik” ekran əsərləri mübarizə aparıb.

Azərbaycan Turizm Bürosu aviabiletlər üzrə metaaxtarış mühərriki olan “Aviasales” ilə birgə sosial media istifadəçiləri üçün xüsusi kampaniyaya start verib.

Dövlət Turizm Agentliyindən AZƏRTAC-a bildirilib ki, sentyabrın 17-dən etibarən başlayan kampaniya “Avisales” platformasının instaqram sosial şəbəkəsindəki izləyiciləri üçün nəzərdə tutulub.

Müsabiqənin şərtlərinə tam şəkildə əməl edən izləyicilər arasından xüsusi tətbiq vasitəsilə təsadüfi şəkildə seçiləcək qalib Azərbaycana biletlə mükafatlandırılacaq.

Şərtlərə əsasən, iştirakçılar “Aviasales”in instaqram səhifəsində müsabiqə paylaşımını bəyənərək onu öz hekayələrində yerləşdirməli, “Aviasales” və “Experience Azerbaijan” səhifələrini izləməli, şərhlərdə Azərbaycanda görmək istədikləri yerlər və ya digər turistik fəaliyyətlərlə bağlı fikirlərini bildirməlidirlər.

Müsabiqə sentyabrın 24-nə qədər davam edəcək.

Bundan əlavə, “Aviasales” auditoriyasının ölkəmizdə ilboyu mövcud olan səyahət imkanları ilə bağlı yaxından tanış olmaları məqsədilə platformanın instaqram səhifəsində ətraflı məlumat yayımlanıb. 12 hissədən ibarət olan paylaşım vasitəsilə ilin bütün ayları üzrə ölkəmizin görməli yerləri və turistik fəaliyyətlər cəlbedici görüntülərlə təqdim olunub.

Sosial media istifadəçiləri arasında təbliğatın vacibliyini vurğulayan Azərbaycan Turizm Bürosunun Baş icraçı direktoru Florian Zenqstşmid beynəlxalq təbliğat kampaniyaları çərçivəsində “Aviasales”lə qurulan əməkdaşlığın Azərbaycanın turizm imkanlarının hərtərəfli tanıdılmasına xidmət etdiyini qeyd edib.

O bildirib ki, müsabiqə şərtləri də istifadəçilər üçün Azərbaycanla bağlı maraq doğuran məqamları öyrənməyə imkan verir.

Qeyd edək ki, 2007-ci ildən istifadəyə verilmiş, hədəf bazarları Rusiya və MDB ölkələri olan “Aviasales” platforması aviabilet axtarış sistemdir. Aylıq auditoriyası təqribən 15 milyon təşkil edən “Aviasales” verilən axtarışa əsasən mövcud uçuşları seçimlərə uyğun müqayisə edir, sorğuya əsasən ziyarətçini aviaşirkət və agentliklərin rəsmi saytlarına yönəldir.

Xəzər rayonu Binə qəsəbəsində şəhid leytenant Məmməd Zamanlının xatirəsinə inşa olunan bulağın açılışı olub.

AZƏRTAC xəbər verir ki, açılış mərasimində Binə qəsəbə nümayəndəliyi, qazilər,149 nömrəli tam orta məktəbin müəllim və şagird kollektivi, Xəzər rayon Mərkəzləşdirilmiş Kitabxana Sistemi, şəhidin ailə üzvləri və kənd sakinləri iştirak ediblər.

Həzi Aslanov adına Ordu İdeoloji və Mədəniyyət Mərkəzinin rəisi polkovnik-leytenant İlkin Qayıbov şəhidin qısa, lakin hər bir gənc üçün örnək olan həyat və döyüş yolu barədə ətraflı məlumat verib.

Digər çıxış edənlər şəhidin Vətən müharibəsinin başladığı ilk gündən komandiri olduğu taqımın şəxsi heyəti ilə birlikdə hərbi əməliyyatlarda fəal iştirak etdiyini, şəxsi mərdlik və igidlik nümunələri göstərdiyini qeyd ediblər. Şəhidin yaxınlarına bir daha başsağlığı verilib.

H.Aslanov adına Ordu İdeoloji və Mədəniyyət Mərkəzinin solistlərinin vətənpərvərlik mövzusunda ifaları tədbir iştirakçılarına duyğulu anlar yaşadıb.

Qeyd edək ki, Məmməd Zamanlı 1998-ci il avqustun 3-də Şərur rayonunun Püsyan kəndində anadan olub. Orta təhsilini M.Əsgərov adına Püsyan kənd orta məktəbində alıb, daha sonra isə Naxçıvan şəhər Heydər Əliyev adına Hərbi Liseydə təhsilini davam etdirib. 2015-ci il liseydən məzun olub, Heydər Əliyev adına Ali Hərbi Məktəbə qədəm qoyub. 2019-cu il iyul ayında Beyləqan rayonunda yerləşən "N" saylı hərbi hissədə artilleriya üzrə leytenant rütbəsi ilə Vətənə xidmətə başlayıb.

2020-ci il sentyabrın 27-də Füzuli istiqamətində gedən döyüşlərə əsgərləri ilə birgə qatılan komandir, düşmən tərəfindən atılan mərmi nəticəsində şəhidlik zirvəsinə yüksəlib.

Azərbaycan Milli Xalça Muzeyində “Həyatını ilmələrdə yaşadan sənətkar: Zəhra Əliyeva” adlı mühazirə keçirilib.

Xalça Muzeyindən AZƏRTAC-a bildirilib ki, Əməkdar mədəniyyət işçisi, ölkəmizin tanınmış xalçaçılarından biri, xalça texnologiyalarının mahir bilicisi və tədris ustası Zəhra Əliyevanın doğum gününə həsr olunan mühazirədə sənətkarın fəaliyyəti barəsində ətraflı söhbət açılıb. Toxucu ailəsində böyüyən Zəhra xanımın görkəmli alim Lətif Kərimovun tələbəsi olduğu, onun dəvəti ilə 1969-cu ildə M.A.Əliyev adına Azərbaycan Dövlət İncəsənət İnstitutunda “Dekorativ-tətbiqi sənət” kafedrasının xalça bölməsində tədris ustası kimi fəaliyyətə başladığı bildirilib. Sənətkarın Qarabağın "Balıq" çeşnisi üzrə toxuduğu xalçanın 1968-ci ildə Moskvada Ümumdünya Gənclər sərgisində I yerə layiq görüldüyü söylənib. Qeyd edilib ki, xovlu və xovsuz xalçaların bütün toxunma texnikalarını mükəmməl bilən Zəhra Əliyeva 1997-ci ildən indiyədək Azərbaycan Milli Xalça Muzeyində çalışır. O, muzey toxucularına ənənəvi və unudulmaqda olan xalça texnologiyalarını öyrədir. Zəhra xanım 2001-ci ildən Azərbaycan Dövlət Rəssamlıq Akademiyasında pedaqoji fəaliyyətlə məşğuldur.

Tədbirdə Z.Əliyevanın toxuduğu "Dəvə karvanı" xalçasının 2005-ci ildə Ər-Riyadda “İslam ölkələrində turizm və ənənəvi əl sənətkarlığı” adlı birinci beynəlxalq konfrans çərçivəsində keçirilən sərgidə birinci yeri tutduğu vurğulanıb. Zəhra Əliyevanın toxuduğu xalçaların yerli muzeylərimizlə yanaşı, xarici kolleksiyalarda qorunduğu bildirilib.

Özbəkistanın Qaraqalpaq Respublikasının mərkəzi Nukus şəhərində UNESCO-nun himayəsi ilə “Arxeologiya və turizm: potensialın müəyyənləşdirilməsi və milli irsin idarə olunması” mövzusunda beynəlxalq konfrans keçirilib.

Konfransda Özbəkistandan başqa Azərbaycan, Türkiyə, Qazaxıstan, Qırğızıstan, Pakistan, Rusiya, Fransa, Tacikistan, Böyük Britaniya, Niderland, İtaliya, Monqolustan və digər ölkələrin alimləri, arxeologiya üzrə mütəxəssislər, ekspertlər iştirak ediblər.

Ölkəmizi bu tədbirdə Azərbaycan Milli Elmlər Akademiyasının Ziya Bünyadov adına Şərqşünaslıq İnstitutunun direktor müavini Şahin Mustafayev, institutun şöbə müdiri, professor Fərda Əsədov, Bakı Dövlət Universitetinin dosenti Qənirə Pirquliyeva təmsil edib.

Konfransı Özbəkistan Baş nazirinin müavini, turizm və idman naziri Aziz Abduhakimov açaraq bildirib ki, belə bir konfransın Qaraqalpaqda keçirilməsi Mərkəzi Asiya ölkələri üçün əlamətdar hadisədir və tədbirdə regionun arxeologiya sahəsi, görülən işlər və qarşıda duran vəzifələr diqqət mərkəzində olacaq.

Şahin Mustafayev “Mərkəzi Asiya və Azərbaycanın ortaq geomədəni rəmzi olaraq İpək Yolu”, Fərda Əsədov isə “Tarixçilər və arxeologiya: qarşılıqlı münasibətlər” mövzularında məruzələr ediblər. Konfransın bölmələr üzrə keçirilən iclaslardan birinə Şahin Mustafayev moderatorluq edib. O, məruzəsində bildirib ki, müasir dövrdə müxtəlif ölkələrin öz geomədəni sahələrini tanıtmaq üçün müəyyən dəyərləri özlərinə bir simvol, rəmz olaraq seçdikləri və təbliğ etdikləri şəraitdə ümumi tarixi və etnomədəni irsə sahib olan Azərbaycan və Mərkəzi Asiya ölkələrinin İpək Yolu fenomeninə xüsusi diqqət yetirmələri zərurəti ön plana çıxır. Çünki İpək Yolu bu ölkələrin həm qədim və Orta əsrlər tarixinə təsir edən, həm də müasir dövrdə yeni kommunikasıya sistemini və bu ölkələrin beynəlxalq ticarət əlaqələrinin dünyaya inteqrasiyasını müəyyənləşdirən bir amildir.