XƏBƏRLƏR

Peşəkar və həvəskar fotoqraflar arasında “Memarlıq fotoqrafiyası mükafatları 2021” fotomüsabiqəsi elan olunub.

AZƏRTAC xəbər verir ki, müsabiqə 6 kateqoriya üzrə keçiriləcək.

Bütün işlər “Photocrowd” onlayn platforması üzərindən təqdim edilməlidir. Müsabiqədə iştirak etmək ödənişlidir. İştirakçılar bir şəkil üçün 8, 6 şəkil üçün 30, 36 şəkil üçün 72 funt sterlinq ödəməlidir. Qaliblərə pul mükafatı veriləcək.

Müsabiqə haqqında ətraflı məlumat almaq və müraciət etmək üçün

https://www.photocrowd.com/photo-competitions/photography-awards/apa-2021/#header linkindən istifadə edə bilərsiniz.

 

Həvəskar rejissor və videooperatorlar arasında “Chiayi beynəlxalq üç dəqiqəlik video” müsabiqəsi elan olunub.

AZƏRTAC xəbər verir ki, videolar üçün tələb olunan xronometraj 3 dəqiqədən artıq olmamalıdır.

İştirakçılar mövzu seçimində sərbəstdirlər. Müsabiqə bir neçə nominasiya üzrə keçiriləcək. Birinci yerin qalibinə 10 min ABŞ dolları məbləğində pul mükafatı veriləcək.

Müsabiqə haqqında ətraflı məlumat almaq və müraciət etmək üçün https://filmfreeway.com/2021ThreeMinutesVideoCompetition linkinə daxil ola bilərsiniz.

 

Türkiyənin Anadolu agentliyi Bakı şəhərinin Səbail rayonu ərazisində yerləşən “Alov qüllələri” kompleksindən FOTOSESSİYA yayıb.

AZƏRTAC xəbər verir ki, paytaxt Bakının müxtəlif səmtlərindən çəkilmiş orijinal fotolarda “Alov qüllələri”nin əzəməti, şəhərin füsunkar gözəlliyi, mavi Xəzər sahilinin göz oxşayan gecə mənzərələri tərənnüm olunur.

FOTOSESSİYA-da təqdim olunan fotoların alt yazısını mətni belədir: “Azərbaycanın paytaxtı Bakının məşhur tikililərindən və memarlıq simvollarından olan “Alov qüllələri” işıqlandırıldıqda füsunkar gözəllik yaradır. Bakının demək olar ki, hər yerindən görünən “Alov qüllələri” şəhərə gələn turistlərin də diqqətini çəkir.”

22 iyul - Milli Mətbuat Gününə həsr olunmuş “Dahi ziyalımız Həsən bəy Zərdabi...” adlı virtual sərgi Dövlət Tarix Arxivində mühafizə edilən sənədlər əsasında hazırlanıb.

Milli Arxiv İdarəsindən AZƏRTAC-a bildirilib ki, sərgidə görkəmli ictimai xadim, publisist, Azərbaycan dilində ilk qəzetin yaradıcısı, uzun illər Bakı şəhər Dumasının üzvü olmuş ziyalımız Həsən bəy Zərdabinin ictimai sahədə fəaliyyətinə aid olan sənədlərdən bir qismi nümayiş etdirilir. Sözügedən sənədlərdə Həsən bəy Zərdabinin azərbaycanlılar arasında təhsilin, maarifçiliyin geniş vüsət alması üçün həyata keçirdiyi tədbirlər, ana dilində qəzetin açılmasına icazə verilməsi üçün dövrün hakimiyyət orqanlarına müraciətləri, həmçinin Duma üzvü kimi fəaliyyəti və s. əks olunub.

“Mədəniyyət naminə sülh” (Peace4Culture) qlobal kampaniyası çərçivəsində onlayn görüş keçirilib. Görüşdə Mədəniyyət Naziriliyinin Aparat rəhbəri Vasif Eyvazzadə, Böyük Britaniyanın Koventri Universitetində Sülh, Etimad və Sosial Münasibətlər İnstitutunun qurucusu və rəhbəri professor Mayk Hardi, Avstraliyanın Mədəni İnfuziya və Müxtəliflik Atlasının təsisçisi Peter Musaferaidis, HOPE təşkilatının qurucusu Xavyer Qonzalez, həmçinin digər şəxslər iştirak edib. Görüşdə V. Eyvazzadə “Mədəniyyət naminə sülh” qlobal kampaniyasının əsas hədəfləri, “Bakı Prosesi”, Bakı Beynəlxalq Humanitar Forumu, Ümumdünya Mədəniyyətlərarası Qlobal Forumu mövzusunda danışdı. Qeyd etdi ki, Azərbaycan tərəfinin məqsədi regionda sülh və təhlükəsizliyin möhkəmləndirilməsi, xalqlar və mədəniyyətlər arasında uğurlu dialoq və etimadın qurulması, birgə yaşamaq və bir-birinə hörmət mədəniyyətini daha da inkişaf etdirərək, milli və beynəlxalq səviyyəli davamlı tərəqqiyə nail olmaqdan ibarətdir. Azərbaycanın 44 günlük Vətən müharibəsi nəticəsində işğaldan azad edilən torpaqlara geri dönəcək məcburi köçkünlərin yeni həyat şəraitinə uyğunlaşması, mədəniyyət və yaradıcılıq qabiliyyətlərinin artırılması, yaradıcı peşə və layihələrin inkişaf etdirilməsi yolunda fəaliyyət davam etdiriləcək. Daha sonra HOPE  təşkilatının rəhbəri təşkilatın missiya və vəzifələri barədə təqdimat etdi.   X. Qonzalez miqrant və qaçqınların təhsil, peşə vərdişlərinin formalaşdırılması haqda bir sıra vacib məsələlərdən və layihələrdən  bəhs etdi. Eyni zamanda Maykl Valmsley dini, mədəni və irsi müxtəliflik sahəsində qlobal məsələləri özündə birləşdirən qlobal müxtəliflik atlasının istiqamətləri barədə ətraflı məlumat verdi. Professor Mayk Hardi son 8 ildə Azərbaycan tərəfin məsləhətçisi olduğunu vurğuladı. “Mədəniyyət naminə sülh” qlobal kampaniyasının, “Bakı Prosesi” eyni zamanda yuxarıda sadalanan bütün mühüm layihələrin uğurla davam etdiriləcəyini bildirdi. Görüşün sonunda müzakirə olunan təşəbbüs və layihələr istiqamətində birgə yol xəritəsinin hazırlanması barədə razılığa gəlindi. 

Bakı Dövlət Sirki   Xaçmaz rayonu  İstisu qəsəbəsində çıxış etmək üçün yola düşüb. Xəzər Dəniz Gəmçiliyinin dəvəti ilə mədəniyyət ocağı  Nabranda yerləşən  Dənizçi İstirahət Mərkəzinin  qonaqları üçün   sirk proqramı ilə çıxış edib.  Proqramda alov, lazer, köpük şoularına xüsusi olaraq yer verilib. Eyni zamanda “ Sümüksüz qız”ın nümayiş etdirdiyi tryuklar  ayaq üstə alqışlarla qarşılanıb. Bundan başqa  proqramda illüzonistlərin də çıxışları tamaşaçıları heyrətləndirib. Həmçinin  proqramda  “ Filaminqo”, “Qaraçı qız”  və milli rəqslərə  də yer verilib.  Proqramı Bakı Dövlət Sirkinin orkestr heyəti müşayiət edib.  

İyulun 16-da M.F.Axundzadə adına Azərbaycan Milli Kitabxanasında Qarabağda yaradılacaq kitabxanalara Türkiyə Elm və Ədəbi Əsər Sahibləri Birliyi (İLESAM) tərəfindən hədiyyə olunan 10 min nüsxə kitabın təqdimetmə mərasimi keçirildi. Təqdimat Mədəniyyət Nazirliyinin Milli Kitabxana ilə birgə həyata keçirdiyi işğaldan azad olunmuş ərazilərimizdə fəaliyyəti bərpa olunacaq kitabxanalar üçün “Qarabağa kitabla gedək” adlı kitab toplama kampaniyası çərçivəsində gerçəkləşib. Tədbirdə mədəniyyət naziri Anar Kərimov, Türkiyə Cümhuriyyətinin ölkəmizdəki səfiri Cahid Bağçı, Türkiyənin Mədəniyyət və Turizm Nazirliyinin müvafiq sahə üzrə əməkdaşları, Azərbaycan Mədəniyyət Nazirliyinin aidiyyəti struktur bölmələrinin rəhbərləri, ədəbiyyat və mədəniyyət xadimləri iştirak ediblər. Azərbaycan Milli Kitabxanasının direktoru, professor Kərim Tahirov tədbir iştirakçılarını salamladıqdan sonra tədbirin əhəmiyyətindən bəhs edib. Prezident İlham Əliyevin işğaldan azad olunan Füzuli şəhərinə səfəri zamanı erməni işğalçıları tərəfindən tamamilə dağıdılmış evləri və binaları göstərərək dediyi “Biz bunların hamısını bərpa edəcəyik” çağırışına qoşularaq Mədəniyyət Nazirliyi ilə birlikdə azad olunmuş ərazilərimizdə yaradılan kitabxanalara kitab toplama kampaniyasına başlanıldığını bildirib. Layihəyə ilk qoşulan Xalq yazıçısı Elçinin şəxsi kitabxanasından 500-ə yaxın kitab təqdim etdiyini vurğulayıb. Çox sayda ziyalımız və oxucularımızın, müxtəlif təşkilatların bu layihəyə dəstək verdiyini də xüsusi qeyd edib. K. Tahirov İLESAM təşkilatının 10 min nüsxə kitabı Qarabağda yaradılacaq kitabxanalara bağışladığını, tezliklə həmin kitabların Qarabağda qurulan kitabxanalara təqdim ediləcəyini deyib. Mərasimdə çıxış edən mədəniyyət naziri Anar Kərimov qonaqları salamlayıb. Bildirib ki, Vətən müharibəsindən sonra da qardaş Türkiyə dövləti Azərbaycanın yanındadır. Dağıdılmış şəhərlərin yenidən qurulmasında, tarixi-mədəni abidələrin bərpa edilməsində dəstəyini əsirgəmir: “İşğal dövründə ən çox zərər çəkən mədəniyyət müəssisələrindən biri də kitabxanalar olub. Belə ki, 975 kitabxanamız dağıdılaraq yerlə yeksan olunub, onların 4,6 milyon nüsxədən artıq kitab fondları talan edilərək yandırılıb. Mədəniyyət Nazirliyi olaraq Milli Kitabxana ilə birlikdə həmin kitabxanalar bərpa olunduqdan sonra fondlarının bərpası məqsədilə belə bir layihələyə başladıq. Qərara aldıq ki, Qarabağ kitab fondu yaradılsın və hər bir azərbaycanlı buna dəstək olsun. Eyni zamanda qardaş Türkiyə və İLESAM təşkilatı da bizim çağırışımıza dərhal dəstək verərək 10 min kitabı fondumuza bağışladı. Yaxın zamanlarda həmin kitablar doğma Qarabağda oxunacaq”. Azərbaycan-Türkiyə əməkdaşlığından söz açan Anar Kərimov söyləyib ki, iki ölkə arasında mədəniyyət, kitabxana və nəşriyyat sahəsində əlaqələr bundan sonra da yüksək səviyyədə davam etdiriləcək. Nazir çıxışının sonunda təqdim olunan kitablara görə İLESAM təşkilatına təşəkkürünü bildirib. Azərbaycan Yazıçılar Birliyinin sədri, Xalq yazıçısı Anar ölkəmizdə Türkiyə dövlətinə qarşı hər zaman böyük sevgi oluğunu bildirib. Şuşanın mədəniyyət paytaxtı elan edildiyi bir dövrdə türkiyəli qardaşlarımız tərəfindən bu kitabların hədiyyə olunmasının mühüm əhəmiyyəti var. Gün gələcək həmin kitablar Şuşa, Qarabağ kitabxanalarını bəzəyəcək. Türkiyə Cümhuriyyətinin səfiri Cahid Bağçı Türkiyə və Azərbaycan qardaşlığının bundan sonra da davam edəcəyini deyib. Səfir türk xalqının çox sevdiyi “Kitab ən gözəl hədiyyədir“ şüarını səsləndirib. Bildirib ki, Türkiyə Azərbaycana bütün  sahələrdə olduğu kimi, mədəniyyət sahəsində də əlindən gələn köməkliyi göstərəcək. Beynəlxalq Türk Mədəniyyəti və İrsi Fondunun prezidenti Günay Əfəndiyeva çıxışında  Fondun iki üzv dövləti Azərbaycan və Türkiyə bu gün yenə öz birliklərini nümayiş etdirdiyini söyləyib. Bildirib ki,  44 günlük Vətən müharibəsi ərzində beynəlxalq təşkilat olaraq Qarabağla bağlı türkdilli dövlətlərdən bir çox dəstək məktubu alırdıq. Müharibədə qazanılan Qələbə təkcə Azərbaycanın deyil, bütün Türk dünyasının Zəfəridir. Türkiyə Milli Kitabxanasının direktoru Ali Odabaş tədbir iştirakçılarına Türkiyənin mədəniyyət və turizm naziri Mehmet Nuri Ersoyun salamlarını çatdırıb. Türkiyə Elm və Ədəbi Əsər Sahibləri Birliyinin (İLESAM) rəhbəri Mehmet Nuri Parmaksız vurğulayıb ki, təmsil etdiyi təşkilatı dəstəkləyən qurumlar olmasaydı, belə bir layihəni həyata keçirmək mümkün olmazdı. Daha sonra Mehmet Nuri Parmaksız “Alim, şair, yazıçı və sənətçilər ensiklopediyası” kitabını mədəniyyət naziri Anar Kərimova hədiyyə edib. Sonda tədbir iştirakçıları Türkiyədən Milli Kitabxanaya hədiyyə olunan kitabların sərgisi ilə tanış olublar.

Türkiyənin Mədəniyyət və Turizm Nazirliyinin Kitabxanalar və Yayımlar baş idarəsinin müdiri, Türkiyə Milli Kitabxanasının direktoru Ali Odabaşın rəhbərlik heyəti nümayəndə heyəti ölkəmizə səfəri çərçivəsində İçərişəhəri ziyarət edib.

“İçərişəhər” Dövlət Tarix-Memarlıq Qoruğu İdarəsindən AZƏRTAC-a bildirilib ki, qonaqlar Şirvanşahlar Sarayı Kompleksi və Qız qalası ilə tanış olub, onlara abidələrin tarixi və memarlıq xüsusiyyətləri barədə geniş məlumat verilib. Xüsusən Şirvan şahlarının iqamətgahı ilə maraqlanan ziyarətçilər abidənin hər bir özəlliyinə diqqət yetirib, qədim şəhərdən xoş təəssüratla ayrılıblar.

 

“Qarabağa kitabla gedək” layihəsi çərçivəsində Türkiyənin “İLESAM” təşkilatı tərəfindən toplanmış kitablar arasında Türkiyə Elm və Ədəbi Əsər Sahibləri Birliyinin (İLESAM) rəhbəri Mehmet Nuri Parmaksızın Ankarada nəşr olunmuş “Qaranlıqda bir işıq” (A Light in the Darkness) adlı kitabı da yer alıb.

AZƏRTAC xəbər verir ki, türk və ingilis dillərində çapdan çıxmış kitaba hər iki dildə Azərbaycan yazıçısı, filologiya üzrə fəlsəfə doktoru Kamran Nəzirli “Ön söz” yazıb. Kitab 2000 nüsxə ilə nəşr edilib və toplanan şeirləri də ingiliscəyə K.Nəzirli çevirib.

Bunu M.F.Axundzadə adına Azərbaycan Milli Kitabxanasında İLESAM tərəfindən Azərbaycana gətirilmiş kitabların təqdimetmə mərasimində təşkilatın sədri, türk şairi və filosofu Mehmet Nuri Parmaksız söyləyib.

“Qaranlıqda bir işıq” Mehmet Nurinin fəlsəfi şeirlər toplusudur, məzmun və forma etibarıyla böyük Ruminin coşqu və sevgi dolu şeirlərini, bir qədər də Şəms Təbrizinin ruhunu xatırladır. Kitaba toplanmış “Oyan, ey insan, oyan”, “Sükut quşu”, “Pərdə”, “Ruzgar”, “Gecəni gündüzə boyayıram”, “Açılacam dünyaya”, “Ölümün içindəki ölüm”, “Göz yaşlarıyla yuyulan xəyal” və s. şeirlər qoca Şərqin dahi şairlərindən sayılan Mövlana Cəlaləddin Ruminin məsnəvi, rübai və qəzəllərindəki dərin fəlsəfi fikirlərin və mənəvi-əxlaqi dəyərlərin daha anlaşıqlı başa düşülməsinə kömək edir. “Allaha çatacaq çox yol var, mən bunlardan Eşqi seçdim” deyən Mövlananın ruhuna sadiq qalan Mehmet bəy öz əsərlərində Allaha sevgini anlatmağa çalışır, insanları bu ilahi varlığa yaxınlaşmağa səsləyir. Böyük qüdrət sahibinə olan eşq onun yaratdığı hər şeyə sevgiylə, qayğıyla yanaşmağı tələb edir, kamil insan bunu anlamalıdır. Kitabda toplanan şeirlərin əsas məğzi də bundan ibarətdir”, - deyə kitabın tərcüməçisi və “Ön söz” müəllifi Kamran Nəzirli bildirib.

“Qaranlıqda bir işıq” ofset üsulu ilə Türkiyənin Əfsun Nəşriyyat və Yayın Evində nəşr edilib. Kitabın redaktoru H. Ömer Ünal, naşir və baş redaktoru Arif Dəmirbaş, baş kordinatoru Nelihan Gürsoydur.

Bu il Cəmşid Naxçıvanski adına Hərbi Liseyin yaradılmasından 50 il ötür. Cəmşid Naxçıvanski adına Hərbi Lisey Azərbaycan xalqının ümummilli lideri Heydər Əliyevin şəxsi təşəbbüsü və bilavasitə rəhbərliyi ilə yaradılıb. Ulu Öndərin daim qayğı ilə yanaşdığı və xüsusi diqqət yetirdiyi bu tədris ocağı ötən müddət ərzində respublikamızda milli peşəkar hərbçi kadrların hazırlanması sahəsində müstəsna xidmətlər göstərmiş, cəmiyyətdə hərbi peşənin nüfuzunun yüksəlməsində və taleyini hərb sənətinə həsr edən gənclərin sayının davamlı artmasında əhəmiyyətli rol oynamışdır. Liseyin yetirmələri müstəqil Azərbaycanın Silahlı Qüvvələrinin formalaşdırılması və möhkəmləndirilməsi işinə dəyərli töhfələr verib, ölkəmizin ərazi bütövlüyünün bərpası uğrunda aparılan döyüşlərdə həmişə ön cəbhədə yer alıblar. Onlar böyük rəşadət nümayiş etdirərək “Vətən Müharibəsi Qəhrəmanı” və “Azərbaycanın Milli Qəhrəmanı” adlarına layiq görülüb, orden və medallarla təltif olunublar. Hərbi liseyin məzunları Vətən qarşısında vəzifə borclarını bu gün də şərəflə yerinə yetirirlər. Hazırda Silahlı Qüvvələrimizdəki zabitlərin əksəriyyəti məhz Cəmşid Naxçıvanski adına Hərbi Liseyin məzunlarıdır.

Cəmşid Naxçıvanski adına Hərbi Liseyin yaradılmasının 50 illik yubileyi münasibətilə M.F.Axundzadə adına Azərbaycan Milli Kitabxanasının əməkdaşları tərəfindən eyniadlı elektron virtual sərgi hazırlanıb.

AZƏRTAC xəbər verir ki, virtual sərgidə C.Naxçıvanski adına Hərbi Lisey haqqında rəsmi sənəd, fotolar, kitablar və məqalələr nümayiş olunur.

Virtual sərgi ilə tanış olmaq istəyənlər

http://anl.az/el/vsb/Cemsid_Naxcivanski_adina_Herbi_Lisey_50/index.htm linkindən istifadə edə bilərlər.