XƏBƏRLƏR

British Council (Britaniya Şurası), Böyük Britaniyanın Bakıdakı Səfirliyi və Azərbaycan Respublikası Mədəniyyət Nazirliyinin birgə əməkdaşlığı ilə ölkəmizdə keçirilən ənənəvi Böyük Britaniya Film Festivalı bu il onlayn formatda reallaşır. Yanvarın 22-də başlayan festival 22 fevral tarixinədək “CoolConnections” incəsənət birliyi tərəfindən yaradılmış onlayn platformada keçirilir. “Biz ən həyəcanlı, düşündürücü və tənqidçilər tərəfindən bəyənilmiş yeni filmləri Birləşmiş Krallıqdan Azərbaycana gətiririk. Böyük Britaniya Film festivalının 2021-ci il buraxılışında bütün cəmiyyətlərdə tam və bərabərhüquqlu üzv kimi hər kəsin təkmilləşə biləcəyi bir dünyanı təbliğ edərək, əsrarəngiz qadınların lentə köçürülmüş qeyri-adi hekayələrinə diqqəti çəkir” – deyə British Council-ın məlumatında bildirilir. Qeyd olunur ki, festival filmlər vasitəsilə bərabərlik, müxtəliflik və inklüzivlik kimi başlıca dəyərlərə sadiqliyimizin təməl daşıdır. Bütün filmlər Azərbaycan dilində alt yazılarla i ingilis dilində nümayiş etdirilir. Filmlərə müvafiq qeydiyyatdan keçməklə http://bit.ly/britishfilmfestival linkindən və ya festivalın daimi saytından – www.britishfilmfest.az keçid edərək baxmaq olar. Hər bir film, izlənilməyə başlandığı andan 48 saat ərzində, nümayişə açıq olacaq.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram: Timuçin İlyas oğlu Əfəndiyev Bakı Xoreoqrafiya Akademiyasının rektoru vəzifəsindən azad edilsin.   İlham Əliyev Azərbaycan Respublikasının Prezidenti Bakı şəhəri, 3 fevral 2021-ci il.

Azərbaycan Milli Xalça Muzeyi Xalq rəssamı Kamil Əliyevin 100 illik yubileyinə həsr olunmuş “Rəssam və xalça: bu gün və sabah” mövzusunda beynəlxalq elmi-praktik konfransa ərizə qəbulunu davam etdirir.

Muzeydən bildirilib ki, bu ilin payızında təşkil ediləcək konfransa sənətşünaslar və rəssamlar qatıla bilərlər.

Konfransa material qəbulu üçün son tarix aprelin 30-da başa çatacaq.

Ətraflı məlumatı info.carpetmuseum@gmail.com ünvanına suallar göndərməklə əldə etmək olar.

Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin Mərkəzi Kitabxanası və Antalya Azərbaycan Mədəniyyəti və Həmrəylik Təşkilatı tərəfindən “Şəhidlər ölməz, Vətən bölünməz” layihəsi çərçivəsində “Ürəyi Vətənlə döyünənlər” adlı onlayn tədbir keçirilib.

İdarədən bildirilib ki, layihənin məqsədi gənclərin vətənpərvərlik tərbiyəsinə yönəlmiş tədbirlərin davam etdirilməsi və şəhidlərin tanıdılmasından ibarətdir. Onlayn tədbir “Zoom” proqramı üzərindən izlənilib.

Vətənpərvərlik ruhunda keçirilən tədbirdə Vətən müharibəsi şəhidləri Şahgündüz Cabbarov, Muxtar Qasımlı, Bilal Qənbərov, qardaşlar İman və Bəhram Məmmədzadələr, Məhəmmədəli İbrahimli və Zairli Zahidin ailə üzvləri çıxış edərək xatirələrini bölüşüb və şəhid ailələri adından təşkilatçılara minnətdarlıqlarını bildiriblər.

Parlaq qələbə ilə başa çatan Vətən müharibəsi doğma torpaqlarımızın düşmən tapdağı altından azad olunmasıyla yanaşı, ölkədə milli ruhun oyanışına, qürurlu, mətin bir xalqın, sanki yeni azərbaycanlıların doğuluşuna səbəb oldu. Bir gözümüz hüdudsuz qələbə sevincindən doldusa da, o biri gözümüz haqq və ədalət savaşında canından keçmiş əziz şəhidlərimiz üçün yaş axıtdı və hamımızın qəlbində əbədi məşəltək alovlanacaq qürur və ağrı abidəsi – igid Azərbaycan əsgəri abidəsi ucaldı.

AZƏRTAC tanınmış Azərbaycan şairi Leyla Əliyevanın Azərbaycan əsgərinin ölümsüzlüyü haqqında qələmə aldığı şeirlərini Salam Sarvanın tərcüməsində təqdim edir.

ƏSGƏR

 

Əsgər... Ədalətə tapınan insan.

Qəlbi Qələbənin eşqiylə yanar.

Əsgər... Ürəyində vətən vəfası,

Köksündə bir sükut çığırtısı var.

Güllə qabağında qırpılmaz gözü,

Günəşin önünü dağ kəsə bilməz!

Əsgər gözəl bilir: sevginin üzü

Həqiqət nurundan heç vədə dönməz.

Qorxusuz gözləri yırtar gecəni,

Alnına qırmızı kölgə salar dan...

Zülmətdən qorxmağı anlamaq olar,

Dərd odur, dərd odur Gündən qorxasan.

Eşidər Allahın pıçıltısını,

İlahi nəfəsdən gərilər sinə.

O, yalan içində batan dünyanın

Yükünü qaldırar çiyinlərinə.

Əsgər... Öz yurduna ilahi bir pay:

Doğulub müqəddəs gündə, saatda.

Zalımın bu nankor, bu kor kölgəsi

Əriyər qəlbinin işığı altda.

Gərər sinəsini şərə, şeytana,

Elin hər daşının həyanı olar.

Taleyi yazılmış açıq alnını

Söykər sərhəd boyu uzanan yola.

Sancılar bayraqtək yüksəkliklərə,

Günəşə qoşulub yanan çıraqdı.

Yeriyər, yer titrər ayağı altda,

And yeri vicdandı, and yeri haqdı.

Onun vətənindən müqəddəsi yox,

Onun dağlarından yoxdu ucası.

Düşür sümüyünə torpağın indi

Mətin addımların melodiyası.

Hər insan Allahın səsidir axı:

Nə qorxar qanından, nə can əsirgər.

Gözünün rəngində torpaq qarası,

Kürəyi vətənin hasarı əsgər.

               ***

Bombalar səs-səsə veriblər yenə,

Vətənin bağrından qan axır indi.

Düşmən gülləsinə tuş olan əsgər,

Yaran qəlbin qədər dərin, dərindi.

Ağlayır bir ata itirmiş uşaq,

Ağlayır göylərdə Günəş də bu gün.

Ellikcə savaşa hazırıq, Vətən,

O dərdli uşağın göz yaşı üçün.

Bir gün qayıdacaq yerinə hər şey,

Bir gün sevinəcək bu yurd, bu ocaq...

Ancaq o atanın isti qucağı

Bir də o uşağa açılmayacaq.

Elimiz qələbə sorağı gözlər:

Gözləri yoldadı, qulağı səsdə.

Analar əlini qoyub and içir

Oğul itkisinin ağrısı üstə.

Gün gələr, o zəfər xəbəri gələr,

Öpər igidlərin başdaşlarını.

Ata nisgiliylə qovrulan uşaq

Dəfn elər gözündə göz yaşlarını.

Bu gün Aliniyaz adına Nukus Dövlət Pedaqoji İnstitutunda “Əlişir Nəvainin dünya elm-maarif və mədəniyyətində tutduğu yer” adlı konfrans keçirilib.

Tədbirdə Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunun “Azərbaycan-Türkmənistan-Özbəkistan ədəbi əlaqələri” şöbəsinin müdiri, filologiya elmləri doktoru Almaz Ülvi Binnətova onlayn iştirak edib.

Konfransda Türkiyənin Hacı Bayram Vali Universitetinin professoru Vəli Savaş Yelok, qazax şairi, dosent Sadulla Matyakubov, filologiya elmləri doktoru Karimboy Quramboyev və başqaları Əlişir Nəvainin dünya ədəbiyyatında tutduğu yerdən danışıb, şairin əsərlərinin dünya ədəbiyyatının inciləri sırasına düşdüyünü qeyd ediblər.

Almaz Ülvi Binnətovaın konfransda “Əlişir Nəvainin “Münşəat” əsəri” mövzusundakı məruzəsi maraqla qarşılanıb.

Əlişir Nəvai adına Səmərqənd Dövlət Universitetində bu ali məktəbin filologiya fakultəsi ilə birgə nəvaişünas alim, professor, mərhum Suyima Qəniyevanın yaradıcılığına həsr olunmuş “Nəvaişünas alimin siması” adlı konfrans keçirilib.

Konfransda Səmərqənd Dövlət Universitetinin rektoru, professor Rüstəm Xalmuradov, dosentlər və digərləri öz çıxışlarında Suyima Qəniyevanı nəvaişünas alim və müəllim kimi xararkterizə ediblər.

Almaz Ülvi Binnətova konfransa onlayn qatılıb, “Əlişir Nəvainin yaradıcılığı Suyima Qəniyevanın tədqiqatlarında” adlı geniş məruzə edib.

Hər il 2 fevral – Azərbaycan Gəncləri Günü münasibətilə müxtəlif sahələrdə uğur qazanmış gənclərimiz dövlət başçısı tərəfindən mükafatlandırılır. Gənclərin fəaliyyətinə verilən yüksək qiymət onları daha səylə çalışmağa, yeni uğurlar qazanmağa sövq edir. Bu gün dövlətin diqqət və qayğısı Azərbaycan gəncliyinin inkişafına təkan verir, onların cəmiyyətdə özünü təsdiq etməsinə, tanınmasına münbit şərait yaradır. Hazırda istedadlı gənclərimizin sorağı yaxın-uzaq ölkələrdən gəlir. Onlar ölkəmizi beynəlxalq aləmdə layiqincə təmsil edirlər. Xəbər verdiyimiz kimi, Prezident İlham Əliyev 2 fevral 2021-ci il tarixində “2021-ci il Gənclər üçün Prezident mükafatlarının verilməsi haqqında” sərəncam imzalayıb. Sərəncama əsasən, elm, təhsil, mədəniyyət, gənclər siyasəti və gənclərlə iş, ictimai və sosialyönümlü fəaliyyət, innovasiya və sahibkarlıq sahələrində xüsusi fərqlənən 10 nəfər Gənclər üçün Prezident mükafatlarına layiq görülüb. Mədəniyyət nominasiyası üzrə mükafatçılar sırasında Əhmədov Ramil Bayram oğlu (Ramil Əhməd) və Qarayev Atəş İbrahim oğlu da yer alıb. Mükafatçılarımızı yaxından tanıyaq: Atəş Qarayev 1993-cü ildə Bakı şəhərində anadan olub. Bakı şəhərindəki Süleyman Ələsgərov adına 1 nömrəli Uşaq incəsənət məktəbində və paytaxtda fəaliyyət göstərən Şuşa Musiqi Kollecində təhsil alıb. 2014-cü ildə Üzeyir Hacıbəyli adına Bakı Musiqi Akademiyasına daxil olub. 2017-2019-cu illərdə Azərbaycan Dövlət Akademik Musiqili Teatrının aparıcı solisti olub. 2015-ci ildə Sankt-Peterburqda keçirilən opera ifaçılarının 7-ci beynəlxalq müsabiqəsinin diplomantı adına layiq görülüb. 2017-ci ildə Azərbaycan Mədəniyyət və Turizm Nazirliyi və Musiqili Teatr tərəfindən “Mövsümün debütü” diplomu ilə təltif olunub. Atəş Qarayev Beynəlxalq Muğam Mərkəzi, Bakı Musiqi Akademiyası və Azərbaycan Dövlət Mədəniyyət və İncəsənət Universitetinin tərəfdaşlığı ilə Üzeyir Hacıbəylinin anadan olmasının 132 illiyi və Milli musiqi günü münasibətilə keçirilən “Canlı xatirə” adlı konsertdə uğurlu çıxışına görə təşəkkürnamə ilə təltif edilib. 2018-ci ildə Moskvada Yelena Obraztsova Fondu tərəfindən təşkil olunan “Xose Karreras Qran-pri” tenorlar müsabiqəsində iştirak edib və finalına yüksəlib. 2019-cu ildə Rusiyanın “Bolşoy teatr”ının gənclər truppasının ilk azərbaycanlı solisti olub. Atəş Qarayev xalqımıza şanlı Qələbə sevinci yaşadan 44 günlük Vətən müharibəsində könüllü olaraq iştirak edib. *       *       * Daha bir mükafatçımız Ramil Əhmədov 1994-cü ildə Bərdədə anadan olub. 2011-ci ildə Şuşa rayon 2 saylı orta məktəbini bitirib, Bakı Dövlət Universitetinin Filologiya fakültəsinə daxil olub. Buradan məzun olduqdan sonra 2015-2018-ci illərdə Türkiyənin Memar Sinan Gözəl Sənətlər Universitetinin Türk dili və ədəbiyyatı fakültəsinin magistr pilləsində təhsil alıb. 2018-ci ildə İstanbul Universitetinin yeni türk ədəbiyyatı ixtisası üzrə doktorantura pilləsinə qəbul olunub. Bədii yaradıcılıqla da məşğul olan Ramil Əhməd Azərbaycan Yazıçılar Birliyi (AYB) və Mədəniyyət Nazirliyinin birgə layihəsi olan 2013-2015-ci illərdə fəaliyyət göstərmiş “Gənc ədiblər məktəbi”nin məzunudur. 2015-ci ildə “Zaman tuneli” adlı ilk şeirlər kitabı işıq üzü görüb. Kitab həmçinin 2020-ci ildə Mədəniyyət Nazirliyinin “Azərbaycan kitabının dünyaya tanıdılması” layihəsi çərçivəsində Türkiyədə türk dilində nəşr olunub. 2018-ci ildə müəllifin “İki şəhərin yazıları” adlı esselər kitabı çapdan çıxıb. Gənc yazar həmçinin ötən il Mədəniyyət Nazirliyinin Vətən müharibəsi zamanı elan etdiyi vətənvərpərlik mövzusunda ədəbi yaradıcılıq müsabiqəsində qalib olub. AYB-nin üzvü olan Ramil Əhməd yaradıcılıq uğurlarına görə 2013-cü ildə Azərbaycan Respublikası Prezidentinin təqaüdünə layiq görülüb, 2015-ci ildə Gənclər və İdman Nazirliyi tərəfindən “Gənclər mükafatı” ilə təltif edilib. Bütün mükafatçıları təbrik edir, yeni uğurlar arzulayırıq.

Gənclər üçün Prezident mükafatına namizədlərin seçilməsi üzrə Ekspert Komissiyasının təklifinə əsasən və Azərbaycan Respublikası Konstitusiyasının 109 cu maddəsinin 32-ci bəndini rəhbər tutaraq qərara alıram: Elm, təhsil, mədəniyyət, gənclər siyasəti və gənclərlə iş, ictimai və sosialyönümlü fəaliyyət, innovasiya və sahibkarlıq sahələrində xüsusi fərqlənən aşağıdakı şəxslərə 2021-ci il Gənclər üçün Prezident mükafatları verilsin: Abbaszadə Orucəli Saleh oğlu Abdulova Nərgiz Cövdət qızı Əhmədov Ramil Bayram oğlu İsmayıllı İsmayıl Cəfər oğlu Qarayev Atəş İbrahim oğlu Qasımov Pərvin Alim oğlu Qasımzadə Zəhra İsa qızı Qənbərov Nəcəf Bilal oğlu Mirzəyeva Səmra Tahir qızı Pərdəşünas Fərid Bayram oğlu. İlham Əliyev Azərbaycan Respublikasının Prezidenti Bakı şəhəri, 2 fevral 2021-ci il.

Azərbaycan Milli Xalça Muzeyində “Pişiklər batikada” adlı sərginin açılışı olub.

Muzeydən bildirilib ki, sərgidə Azərbaycanın Əməkdar rəssamı İnna Kostinanın müəllifi olduğu ipək üzərində batika texnikasında hazırlanmış 40 panno nümayiş etdirilir.

Qeyd edək ki, sərgi çərçivəsində uşaqlara muzeyin təhsil şöbəsinin əməkdaşları tərəfindən sərginin mövzusuna uyğun müxtəlif maraqlı ustad dərsləri keçirilir.

Fevralın 18-dək davam edəcək sərgi mövcud qaydalara, sanitariya normalarına və metodiki göstərişlərin tələblərinə uyğun təşkil olunub. Sərgiyə 10 nəfərə qədər qruplar buraxılır.

İctimai Televiziya və Radio Yayımları Şirkəti “Avroviziya-2021” beynəlxalq mahnı müsabiqəsi üçün musiqi qəbulunu başa çatdırıb.

Müsabiqənin Azərbaycandakı nümayəndə heyətinin rəhbəri İsa Məlikovun verdiyi məlumatına görə, seçim mərhələsinə yerli və xarici müəlliflərdən 229 kompozisiya təqdim olunub.

“Komandamız hər bir mahnını layiqincə qiymətləndirmək üçün onların hər birini bir neçə dəfə dinlədi. Onların arasında həqiqətən gözəl kompozisiyalar var idi, onlardan altı ən yaxşısı bizim şort-listimizə düşmüşdü. Hər zaman olduğu kimi, janrdan asılı olmayaraq, gözəl və peşəkar mahnı axtarmağa çalışdıq. Lakin bu il də ilk növbədə, biz onun ifaçı ilə nə dərəcədə uzlaşacağını nəzərə alırdıq”, - deyə bəstəkar və prodüser İsa Məlikov söyləyib.

Nümayəndə heyətinin rəhbəri bildirib ki, Avropa Yayımları Birliyinin (AYB) tələblərinə uyğun olaraq, hər bir mahnının müddəti 3 dəqiqədən çox olmamalıdır. Seçim prosesinə əsasən, mahnı növbəti mərhələdə müxtəlif ölkələrdən olan 50-dən çox “Avroviziya” mütəxəssisindən ibarət beynəlxalq fokus-qrupunun səsverməsi əsasında seçiləcək.

Mahnının rəsmi təqdimatı martın ikinci həftəsində baş tutacaq. Müsabiqədə ölkəmizi müğənni Əfəndi təmsil edəcək.

Bu il “Avroviziya” mahnı müsabiqəsinin yarımfinal mərhələsinin mayın 18-i və 20-də, final mərhələsinin isə mayın 22-də Rotterdam (Niderland) şəhərində keçiriləcəyi planlaşdırılır.