XƏBƏRLƏR

Bu gün Azərbaycanın ilk balerinası, milli balet sənətimizin inkişafında, formalaşmasında və istedadlı gənc kadrların yetişməsində misilsiz xidmətləri olan, dünya şöhrətli görkəmli sənətkar, Xalq artisti Qəmər Almaszadənin doğum günüdür.

Anadan olmasının 105-ci ildönümü tamam olan Şərqin ilk balerinası Qəmər Almaszadə musiqi sənətimizin korifeylərindən biri kimi hər zaman böyük hörmətlə yad edilir.

Bakıda 1915-ci ildə dünyaya göz açan Qəmər Almaszadə Azərbaycan Dövlət Akademik Opera və Balet Teatrı nəzdində fəaliyyət göstərən balet studiyasını bitirib və 1930-cu ildə həmin teatrda işə başlayıb.

Səhnəyə ilk dəfə 1931-ci ildə Reynqold Qlierin “Qırmızı lalə” baletindəki Tao Xoa partiyası ilə çıxıb və müəyyən təcrübə qazanandan sonra Rusiyaya gedərək Leninqradda (indiki Sankt-Peterburq) xoreoqrafiya məktəbində peşəsinin incəliklərini dərindən öyrənib. Təhsilini tamamlayaraq Bakıya qayıdan balerina ömrünün sonunadək həyatını Azərbaycan Dövlət Akademik Opera və Balet Teatrı ilə bağlayıb.

Balerina 1940-cı ildə Əfrasiyab Bədəlbəylinin “Qız qalası” baletində ilk professional çıxışını edib. O dövrdə Gülyanağın ilk ifaçısı Qəmər Almaszadənin çıxışı çox yüksək dəyərləndirilib. Onun ilhamla, şövqlə Gülyanaq surətini rəqslə təfsiri, gənclik təravəti ilə dramatik yaşantıları üzvi birləşdirməsi mütəxəssislər tərəfindən coşqun heyranlıqla qarşılanıb.

“Qız qalası”nın 1959-cu ildə yeni - ikinci quruluşunun baletmeysteri Qəmər Almaszadə olub. Milli balet sənətimizin ulduzu, böyük yaradıcılıq irsinə malik, onlarla istedadlı gəncin formalaşmasında pedaqoq kimi çalışan Qəmər Almaszadə Azərbaycan Dövlət Akademik Opera və Balet Teatrında Reynqold Qlierin “Qırmızı lalə”, Adolf Adanın “Korsar”, Boris Asafyevin “Bağçasaray fəvvarəsi”, Aleksandr Qlazunovun “Raymonda”, Sezar Puninin “Esmeralda”, Pyotr Çaykovskinin “Şelkunçik” və “Sonalar gölü”, Lüdviq Minkusun “Don Kixot”, Əfrasiyab Bədəlbəylinin “Qız qalası”, Qara Qarayevin “Yeddi gözəl”, Niyazinin “Xosrov və Şirin”, Aleksandr Kreynin “Laurensiya” baletlərində əsas partiyaları uğurla ifa edib. Üzeyir Hacıbəylinin “Koroğlu” və Müslüm Maqomayevin “Nərgiz” operalarında rəqqasə qızı oynayıb.

O, səhnə fəaliyyətini başa vurduqdan sonra burada baş baletmeyster, balet truppasının bədii rəhbəri, quruluşçu baletmeyster vəzifələrində işləyib. İlk peşəkar Azərbaycan balerinası olan Qəmər Almaszadə milli balet məktəbinin yaranmasında və inkişafında müstəsna rol oynayıb.

Balerina Azərbaycan qadınlarının XX əsrdə incəsənət sahəsindəki uğurlarının təməlini qoyub, musiqi mədəniyyətimizdə yeni janrın meydana çıxmasına güclü təkan verib. Milli baletimizin təşəkkülündə böyük xidmətlər göstərmiş sənətkarın ifa etdiyi partiyalar təkrarolunmazlığı və yüksək peşəkarlıq səviyyəsinə görə əsl sənət inciləri hesab olunur. Balerinanın Azərbaycan səhnəsində dünya klassiklərinin şah əsərlərində canlandırdığı rəngarəng, dolğun obrazlar ona şöhrət gətirib.

Opera və Balet Teatrının səhnəsində tamaşaya qoyulmuş bir çox əsərin uğuru məhz Qəmər Almaszadənin verdiyi quruluşla bağlı olub. Görkəmli balet ustası klassik xoreoqrafiya ənənələri ilə Azərbaycan xalq rəqs yaradıcılığı nailiyyətlərinin ahəngdar vəhdətini yarada bilib.

Qəmər Almaszadə Azərbaycan Dövlət Filarmoniyasında rəqs ansamblının təşkilatçısı və bədii rəhbəri olub. Görkəmli balet ustası uzun illər Bakı Xoreoqrafiya Akademiyasında milli kadrların hazırlanması üçün böyük əmək sərf edib, Azərbaycan balet sənətinin sirlərini gənc nəslə öyrətmək sahəsində təqdirəlayiq fəaliyyət göstərib. Onun yetirməsi olan bir çox balet artisti sənət aləminin yüksək pillələrinə qalxıb, bu sənətin inkişafına töhfələr verib.

Qəmər Almaszadə ölkəmizin hüdudlarından kənarda da Azərbaycan mədəniyyətini uğurla təmsil edib. O, bir sıra Şərq ölkələrində professional rəqs ansambllarının təşkil edilməsi üçün təcrübə və bacarığını əsirgəməyib.

Qəmər Almaszadə 2006-cı il aprelin 7-də dünyasını dəyişib.

Azərbaycan Respublikası Prezidentinin “Milli Teatr Günü”nün təsis edilməsi haqqında müvafiq Sərəncamına uyğun olaraq hər il martın 10-u respublikamızda Milli Teatr Günü kimi qeyd olunur. Bu münasibətlə Milli Kitabxanada hər il olduğu kimi bu il də “Azərbaycan teatrı bu gün” başlığı altında geniş tərtibatda kitab sərgisi açılıb.

Kitabxanadan bildirilib ki, sərgidə Azərbaycan və xarici dillərdə nəşr olunmuş Azərbaycan teatrı, teatr tarixi, teatrşünaslar, ölkəmizin teatr səhnəsinin məşhur simaları, teatr tarixində mühüm yer tutmuş görkəmli aktyorlar, ümumilikdə teatr sənətimizin inkişafında xüsusi xidmətləri olmuş şəxsiyyətlər haqqında ədəbiyyat nümayiş olunur.

Sərgi bir həftə davam edəcək.

Azərbaycanın Pakistandakı səfirliyində Novruz bayramı ilə əlaqədar tədbir keçirilib.

Tədbirdə Azərbaycanın mədəniyyəti, milli və mənəvi dəyərləri, habelə mətbəxi təqdim olunub.

Ölkəmizin Pakistandakı səfiri Əli Əlizadə Azərbaycanın və Novruz bayramını qeyd edən digər dövlətlərin təşəbbüsü ilə 2010-cu ildə 21 Mart tarixinin BMT Baş Məclisi tərəfindən "Beynəlxalq Novruz Günü" elan edildiyini diqqətə çatdırıb. Səfir bu bayramın uzun əsrlərdən bəri Azərbaycanda hər il təntənəli sürətdə qeyd olunduğunu, qədim tarixi köklərə və mədəni dəyərlərə bağlandığını bildirib və qarşıdan gələn Novruz bayramı münasibətilə tədbir iştirakçılarını təbrik edib.

Ə.Əlizadə Azərbaycanda Novruzla bağlı formalaşan milli adət- ənənələr haqqında məlumat verib, baharın gəlişi və təbiətin yenilənməsi ilə səciyyələnən bu bayramın ölkəmizdə bir ay öncədən su, od, külək və torpaq çərşənbələrinin qeyd olunması ilə başlandığını, xalqımızın öz tarixi-mədəni keçmişinə yüksək ehtiramını, milli-mənəvi dəyərlərə dərin bağlılığını diqqətə çatdırıb.

Tədbirdə Novruz adət- ənənələri ilə bağlı videoçarxlar nümayiş olunub, Azərbaycan milli musiqiləri səslənib, milli mətbəx nümunələrindən şəkərbura, paxlava, qoğal, dolma, ləvəngi, plov və digər təamlar qonaqlara təklif edilib.

Azərbaycan paytaxtı Bakıda turistlərin diqqətini cəlb edən vacib tarixi məkanlardan biri də Şirvanşahlar sarayıdır.

Bu fikir İranın İSNA xəbər agentliyinin saytında Bakı haqqında dərc edilən məqalədə yer alıb. Qeyd olunub ki, Şirvanşahlar sarayı Bakının XV əsrə aid ən möhtəşəm tarixi abidələrindəndir. Azərbaycanda mədəni irsin qorunmasına məsul olan dövlət qurumları bu tarixi abidənin qorunub saxlanması üçün böyük işlər görür.

Bu gün Bakıda Heydər Əliyev Mərkəzi, “Alov qüllələri”, Xalça Muzeyi kimi çoxsaylı müasir tikililərə rast gəlmək mümkündür. Bununla yanaşı, şəhər öz qədimiliyini də qoruyub saxlayır. Bu da onu daha möhtəşəm, özünəməxsus, turistlərin maraq göstərdiyi istiqamətlərdən birinə çevirir.

Təxminən 500 illik tarixi olan Şirvanşahlar sarayı 1538-ci ilə aiddir. O, dövrünün mühüm abidələrindəndir. Əslində, bu saray Şamaxı bölgəsində baş vermiş zəlzələdən sonra buradakı dövlətin paytaxtının Bakıya köçürülməsilə, hökumət binası kimi tikilib. Üstəlik, əvvəlcə o, elə də böyük olmayıb. Zaman keçdikcə, Şirvanşahlar sülaləsinin burada tam yerləşməsilə saray genişləndirilib və böyüyüb.

Bu gün Şirvanşahlar sarayı Bakının İçərişəhər adlanan ərazisində yerləşir. O, ziyarətçilərin üzünə açıqdır. Yeri gəlmişkən, Bakıya səyahət edən hər kəs İçərişəhərə baş çəkməyi turun ayrılmaz hissəsi sayır. Bu məkan hər bir turistdə unudulmaz, dərin təəssürat yaradır. Məsələ ondadır ki, saysız-hesabsız müasir tikilisi olan Bakıda İçərişəhər insanlar üçün tam fərqli mənzərə açır.

Materialda bildirilib ki, saraya təxminən 50 otaq, 2 məscid və 1 hamam daxildir. Padşah ailəsinin məzarları da buradadır. İki mərtəbəli saray kifayət qədər böyükdür. Onun ikinci mərtəbəsi tamamilə padşahın ailəsinin məxsus olub. Alt mərtəbədə qulluqçular yaşayıb.

Tarix boyu baş vermiş müharibələr Şirvanşahlar sarayına da zərərsiz ötüşməyib. Saray xəzinəsinin çox hissəsi Bakının Rusiya ilə, osmanlılarla apardığı müharibələr zamanı talan edilib. İndi burada çox az sayda əşya var. Sarayın bəzi hissələri isə sonradan bərpa edilib. Məsələn, padşahın şəxsi otağında restavrasiya işləri aparılıb. Lakin Şirvanşahlar padşahının məhz burada yaşadığı bu gün də hiss olunur.

Bu gün qüdrətli gülüş ustası, səhnəmizin “qaynana”sı, Akademik Musiqili Teatrın inkişafında müstəsna rol oynayan, qırx ildən çox işlədiyi sənət ocağının repertuar ağırlığını ləyaqətlə çiyinlərində daşıyan Xalq artisti, Dövlət mükafatı laureatı Nəsibə Zeynalovanın vəfatından 16 il ötür.

Geniş diapazona, əlvan xarakter xüsusiyyətlərinə, təbii yumor gücünə malik Nəsibə Zeynalovaya tale əsl səhnə ustası üçün lazım olan bütün keyfiyyətləri bəxş etmişdi. Demək olar ki, Nəsibə Zeynalova, anadan artist doğulmuşdu. Onun barəsində danışmaq, musiqili teatrımızdan söhbət açmaq deməkdir.

Nəsibə xanım 1916-cı il aprelin 2-də Bakıda doğulub. Atası Kərbəlayı Cahangir tanınmış tacir və sevimli aktyor idi. Azərbaycan milli realist aktyor məktəbinin banisi məhz Cahangir Zeynalov olub. İlk və yeganə övladı olanda arzu edib ki, qızı onun sənətini davam etdirsin. Ancaq bu arzusunun gerçəkliyini görmək ataya nəsib olmayıb.1918-ci ilin mart ayında erməni daşnakları Bakıda kütləvi qırğınlar törədəndə Cahangir Zeynalov ailəsi ilə İrana gedib. Sentyabrda Bakıya qayıdanda gəmidə xəstəliyə tutulan Cahangir Zeynalov qısa müddətdə rəhmətə gedib. Onda balaca Nəsibənin iki yaşı vardı. Buna baxmayaraq o, atasının arzusunu inamla həqiqətə çevirib. Nəsibə Zeynalova Azərbaycan realist aktyor məktəbinin ən layiqli nümayəndələrindən biri kimi formalaşıb və şöhrətlənib.

Ömrünü Musiqili Komediya Teatrı ilə bağlayan aktrisa sənət ocağının müəyyən fasilələrlə truppa, Filarmoniyanın nəzdində dəstə-ansambl şəklində fəaliyyət göstərdiyi illərdə də kollektivdən ayrılmayıb. Aktrisa Azərbaycan klassik operettalarının tamaşalarında Gülpəri, Cahan xala, Sənəm (“Ər və arvad”, “Arşın mal alan” və “Məşədi İbad”, Üzeyir bəy Hacıbəyli), Mələk xanım və Kələk xanım (“Əlli yaşında cavan”, Zülfüqar bəy Hacıbəyov) kimi xarakterik səhnə obrazlarında çıxış edib.

Aktrisanın zəngin rollar qalereyasında tərcümə əsərlərində ifa etdiyi Kabato və Barbale (“Keto və Kote”), Ziraldina (“İki ağanın bir nökəri”), Zivər xanım (“Məhəbbət gülü”), Qesiya (“Tiflis nəğməsi”), Gülbadam (“Qız anası”) rollarının xüsusi yeri var.

Nəsibə Zeynalovanın yaradıcılığının ən parlaq dövrü isə çağdaş bəstəkarların müasir mövzusu musiqili komediya əsərlərinin tamaşalarındakı bir-birindən fərqlənən komik personajların ifası ilə bağlıdır.

Uzun illər gənclik ilhamı ilə canlandırdığı bir-birinə bənzəməyən parlaq obrazlar səhnəmizin qiymətli inciləridir. Böyük sənətkarın yaratdığı obrazlar hər dəfə ekranda canlanarkən bütün tamaşaçılar kimi aktyor dostları da dərin sevinc içərisində olurlar, çünki onunla nə vaxtsa bir səhnədə çıxış etdiklərini böyük bir səadət hesab edirlər.

Xüsusilə, Cənnət xala, Nargilə, Züleyxa rolları zəngin ifadə vasitələri, yumorun milliliyi, təbii reallığı ilə səhnəmizin nadir inciləri sırasında durur. Azərbaycan televiziyasında onlarla yumoristik səhnəciklərdə, teletamaşalarda, intermediyalarda çıxış etmiş Nəsibə Zeynalova, həmçinin Cəfər Cabbarlı adına “Azərbaycanfilm”in çoxlu ekran əsərlərinə çəkilib. Kino obrazları içərisində Fatmanisə (“Ögey ana”), Telli (“Böyük dayaq”), Züleyxa (“Ulduz”), Cənnət xala (“Qayınana”), Gülsüm (“Molla Fətəlinin sərgüzəşti”), Əsli xala (“Bəyin oğurlanması”) rolları daha canlı və daha şöhrətlidir.

Bədii filmlərdə yaratdığı bir sıra obraz “Azərbaycanfilm” kinostudiyasının qızıl fonduna daxil edilib.

Azərbaycanın Xalq Artisti, müxtəlif dövlət mükafatlarına layiq görülmüş Nəsibə Zeynalova üçün ən böyük mükafat – tamaşaçı sevinci, tamaşaçı alqışı idi. Onun qazandığı bu alqış və sevgi əbədidir, tükənməzdir.

Nəsibə Zeynalova 2004-cü il martın 10-da Bakıda vəfat edib və Fəxri xiyabanda dəfn olunub.

İstanbulda yerləşən dünyanın ən iri İslam mədəniyyəti nümunələrinin saxlandığı Türk və İslam Əsərləri Muzeyində martın 13-də qədim və nadir Azərbaycan xalçalarının sərgisi və kitab-kataloqun təqdimat mərasimi keçiriləcək.

Azərbaycan Milli Xalça Muzeyindən bildirilib ki, “Türk və İslam Əsərləri Muzeyi kolleksiyasından Azərbaycan xalçaları” layihəsi iki ölkə muzeyləri arasında həyata keçirilən ilk layihədir. Layihənin əsas məqsədi Türk və İslam Əsərləri Muzeyinin kolleksiyasında qorunub saxlanılan Azərbaycan xalçalarının elmi atribusiyası sahəsində tədqiqatın aparılmasıdır.

Layihə Azərbaycan Milli Xalça Muzeyinin təşəbbüsü ilə həyata keçirilir. Təşkilatçılar Türkiyənin Mədəniyyət və Turizm Nazirliyi, Azərbaycanın Mədəniyyət Nazirliyi, Türk və İslam Əsərləri Muzeyi və Azərbaycan Milli Xalça Muzeyidir.

Sərgidə Türk və İslam Əsərləri Muzeyinin kolleksiyasındakı XVII-XIX əsrlərə aid on iki ədəd nadir Azərbaycan xalçası nümayiş olunacaq. Onların arasında Azərbaycan xalçaçılığının unikal qoluna aid “Xətai” (“Əjdahalı”) və “Çələbi”, özünün mükəmməl bədii ornamentlərində Qarabağın gözəlliyini əks etdirən “Qoca” və qədim türk tayfalarının simvolları olan damğalarla bəzədilmiş “Dağkəsəmən” xalçaları da var. Sərgidə Türk və İslam Əsərləri Muzeyinin kolleksiyasındakı Azərbaycan xalçaları yenilənmiş atribusiya mətnləri ilə təqdim olunacaq.

Qeyd edək ki, sərgi iyunun 13-dək davam edəcək.

Niderlandın Brabant əyalətinin “Valuwe TV” televiziya kanalında azərbaycanlıların 8 mart –Beynəlxalq Qadınlar Günü münasibətilə Nijmegen şəhərində təşkil etdiyi tədbir yayımlanıb.

Verilişdə ölkəmizdə Beynəlxalq Qadınlar Gününün bayram edilməsindən danışılıb.

Avropa Azərbaycanlıları Konqresinin Nəzarət Təftiş Komissiyasının üzvü, Brabant Azərbaycanlılar Mərkəzinin sədri Ofelya Babayeva azərbaycanlı qadınların cəmiyyətdə yerindən, rolundan, qadın hüquqlarından söz açıb.

XX əsrin əvvəllərində bir çox Avropa ölkələrindən də əvvəl Azərbaycan qadınına səsvermə hüququ verildiyini diqqətə çatdıraraq Azərbaycan qadınlarının Avropaya inteqrasiyasından, uğurlarından söz açıb. O. Babayeva özünün artıq 15 ildən çoxdur Niderland şirkətində çalışmasından və uğurlarından danışıb.

Brabant Azərbaycanlılar Mərkəzi yerli əhaliyə ölkəmizin həqiqətlərini tanıtmaq istiqamətində fəal iş aparır. Mərkəzin sədr müavini Cəmilə Məmmədova Azərbaycan musiqisi, rəqsi və mətbəxinin təşviqi ilə bağlı yerli bələdiyyələrlə əməkdaşlıq edir. Ölkəmizin mədəniyyətini əks etdirən sərgilər təşkil olunur. Soydaşlarımız ölkəmizi Brabant əyalətində layiqincə təmsil edirlər.

Akademik Milli Dram Teatrında “Filumena Marturano” adlı yeni tamaşanın məşqləri davam edir. Tamaşa məşhur italyan dramaturqu Eduardo de Filipponun eyniadlı əsəri əsasında hazırlanır.

Səhnə əsərinin bədii rəhbəri Xalq artisti Azər Paşa Nemətov, quruluşçu rejissoru Əməkdar artist Nicat Kazımov, rejissoru Mehman Fətullayev, quruluşçu rəssamı Əməkdar mədəniyyət işçisi İlham Elxanoğlu, işıq üzrə rəssamı Rafael Həsənov, musiqi tərtibatçısı Kamil İsmayılov, rəqslərin quruluşçusu Lalə Hacıyeva, rejissor assistentləri Dilbər İsmayılova və Könül Kərimovadır.

Əsəri Azərbaycan dilinə yazıçı Ülviyyə Heydərova tərcümə edib.

Tamaşada Xalq artistləri Bəsti Cəfərova, Ramiz Novruz, Cəfər Namiq Kamal, Əməkdar artist Sevinc Əliyeva, aktyorlar Cümşüd Zeynalov, Ləman İmanova, Fəridə Şahbazova, Güney Əkbərova, Firuzə Balayeva, Elnur Qədirov, Corc Qafarov), Vüsal Mustafayev, Cavidan Novruz və Xədicə Novruzlu çıxış edirlər.

Qeyd edək ki, Eduardo de Filippo bu məşhur əsəri 1946-cı ildə qələmə alıb. Elə həmin il Neapoldakı Politeama teatrında tamaşanın dünya premyerası keçirilib. Tamaşa Filumena Marturano adlı qadının zəngin kişi Domeniko Soriano ilə mübarizəsindən bəhs edir. Əsərdəki əsas motiv insanlar arasında sosial ziddiyyətlər, qadın hüquqları və cəmiyyətdəki təbəqələşmənin törətdiyi fəsadlardır.

Martın 10-da Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 1 nömrəli filialında Milli Teatr Günü münasibətilə “Səhnəmizin parlaq ulduzları” adlı sərgi keçirilib.

İdarədən bildirilib ki, sərgidə Azərbaycan teatr tarixində əvəzsiz xidmətləri olan incəsənət xadimləri, aktyor və aktrisalar haqqında kitablar nümayiş edilib.

Sərgi kitabxanaya gələn qonaqların böyük marağına səbəb olub.

İctimai Televiziya və Radio Yayımları Şirkəti “Avroviziya-2020" beynəlxalq mahnı müsabiqəsində Azərbaycan təmsilçisinin mahnı və klipini təqdim edib.

Şirkətdən bildirilib ki, Samira Əfəndi “Kleopatra” mahnısı ilə Rotterdamda (Niderland) səhnəyə çıxacaq.

Təqdim olunan mahnının müəllifləri niderlandlı Allan Roy Skott, Sara Leyk və Lyuk Van Birsdir. Bu kompozisiyanın prodüserləri isə müəlliflərdən biri olan Lyuk Van Birs, digəri isə Toni Kornelissendir. Mahnıda etnik motivlər müasir səslə ahəngdar şəkildə uzlaşır. Kompozisiyada UNESCO-nun Qeyri-Maddi Mədəni İrs Siyahısına daxil edilmiş Azərbaycan milli aləti tar, həmçinin balaban və ud səslənir.

Mahnının müəlliflərinin qeyd etdiyi kimi, “Kleopatra” azadlığı, daxildən gələn səsə güvəni, hər şeyin çətinləşdiyi, xüsusilə də kiminsə sizə xəyanət etdiyi və ya zərər verdiyi məqamlarda belə "şahzadə” olaraq qalmağı bacarmağı, bunun üçün güc tapmağı təlqin edən kompozisiyadır. Mahnı mürəkkəb sevgi tarixçəsi, dərdi və xəyanəti yaşamış, lakin öz gücünü göstərmiş və tarixdə qadın müstəqilliyinin rəmzi kimi yadda qalmış Kleopatranın timsalında insanlara olduqları kimi qalmağı, ruh yüksəkliyini və özləri ilə fəxr etməyi bacarmağı aşılayır.

Mahnının klipi Qobustan Milli Tarix-Bədii Qoruğunda quruluşçu rejissor və operator Aleks Lamax tərəfindən çəkilib. Klipin prodüseri İsa Məlikovdur. Qeyd edək ki, bu, uzun müddət ərzində ilk dəfə "Avroviziya" mahnı müsabiqəsi üçün Azərbaycanda çəkilən klipdir.

Daha öncədən də "Avroviziya" müsabiqəsinin seçim mərhələsində iştirak edən Samira Əfəndi "Yeni ulduz", “Böyük səhnə” (3-cü yer) və "Səs Azərbaycan" (3-cü yer) kimi məşhur musiqi layihələrində iştirak edərək güclü vokal səsi ilə yaddaşlarda qalıb. Samira Əfəndi 2017-ci ildə Almatıda "Silk Way Star" (3-cü yer) beynəlxalq vokal televiziya layihəsinə, 2019-cu ildə isə Qazaxıstan Respublikasında keçirilən "Voice of Nur-Sultan" beynəlxalq festivalına qatılıb.

Qeyd edək ki, Niderlandın Rotterdam şəhərində keçiriləcək və şüarı “Open up!” ("Açıl!") olan “Avroviziya -2020” mahnı müsabiqəsinin yarımfinal mərhələləri mayın 12 və 14-də, final mərhələsi isə mayın 16-da "Ahoy Arena"da reallaşacaq. Azərbaycan təmsilçisi "Avroviziya-2020" müsabiqəsinin birinci yarımfinalının ikinci hissəsində çıxış edəcək.

Xatırladaq ki, ötən il sentyabrın 16-da Azərbaycanın "Avroviziya-2020" mahnı müsabiqəsində iştirakı rəsmən təsdiqlənib.