XƏBƏRLƏR

Aprelin 8-də Müslüm Maqomayev adına Azərbaycan Dövlət Akademik Filarmoniyasının səhnəsində Üzeyir Hacıbəyli adına Azərbaycan Dövlət Simfonik Orkestrinin konserti olacaq.

Filarmoniyadan AZƏRTAC-a bildirilib ki, musiqili gecədə orkestr dirijor Murtuza Bülbülün rəhbərliyi altında çıxış edəcək.

Proqramda Lüdviq Van Bethoven “Eqmont” uvertürası, Edvard Qriqin “Per Günt” süitası No. 1, Ferents Listin “Prelüdlər” simfonik poeması, Modest Musorqskinin “Keçəl dağda gecə” simfonik lövhəsi (işləyəni Nikolay Rimski-Korsakov), Pyotr İliç Çaykovskinin “Qu gölü” baletindən süita səslənəcək.

76 –cı “Kann” Beynəlxalq Film Festivalı çərçivəsində Hollivud ulduzu Harrison Fordun baş rol ifaçısı olduğu rejissor Ceyms Menqoldun “İndiana Cons və taleyin çarxı” filminin dünya premyerası olacaq.

AZƏRTAC xarici KİV-lərə istinadla xəbər verir ki, on beş ildən sonra rejissor Ceyms Menqoldun çəkdiyi ekran əsərinin ilk təqdimatı mayın 18 –də Kann şəhərində gerçəkləşəcək. Film daha sonra iyunun 28-də Fransa kinoteatrlarında, iyunun 30-da isə ABŞ-da nümayiş olunacaq.

Film müsabiqədənkənar nümayiş ediləcək və ekran əsərinin süjet xətti barəsində hələ heç bir açıqlama verilməyib.

Xatırladaq ki, əfsanəvi macəraçı İndiana Cons haqqında təqdim olunmuş sonuncu film rejissor Stiven Spilberqin 2008-ci ildə çəkdiyi "İndiana Cons və Kristal kəllə krallığı" adlı ekran əsəri olub.

Aprelin 18-də saat 19.00-da Beynəlxalq Muğam Mərkəzində “BakuOperArt” layihəsi çərçivəsində dahi rus bəstəkarı Sergey Raxmaninovun kamera-vokal lirikası axşamı keçiriləcək. Qeyd edək ki, bu il bəstəkarın anadan olmasının 150 illiyi geniş qeyd olunur.

Rusiya İnformasiya-Mədəniyyət Mərkəzinin mətbuat xidmətindən AZƏRTAC-a bildiriblər ki, proqramı “Mən peyğəmbər deyiləm...” adlandıran layihənin rəhbəri pianoçu Yuliya Kərimova digər tanınmış sənətçilər - Azərbaycan Respublikasının Əməkdar artistləri Fəridə Məmmədova (soprano), İlham Nəzərov (kontratenor) və Mahir Tağızadə ilə (bariton) bərabər Sergey Raxmaninovun poeziya və musiqinin ahəng təşkil edərək ruhun səmimiliyinə çevrilən böyük bədii dünyası barədə öz təsəvvürlərini dinləyicilərə təqdim edəcəklər.

Bu gün unudulmaz bəstəkar Asəf Zeynallının anadan olmasından 114 il ötür

Onun musiqisinə heç kəs biganə qala bilmir. Çünki bu musiqi xalq musiqisi qədər qəlbə yaxındır. Təkcə “Ölkəm” romansı Asəf Zeynallının insanlar tərəfindən sevilməsi və daim xatırlanması üçün kifayət edir. Cəmi 23 il ömür sürməsinə baxmayaraq, o, Azərbaycan musiqi xəzinəsinə dəyərli incilər bəxş edə bilib.

AZƏRTAC xəbər verir ki, bu gün görkəmli bəstəkar, novator romans ustası, pedaqoq Asəf Zeynallının anadan olmasından 114 il ötür.

Asəf Zeynallı 1909-cu il aprelin 5-də Dərbənddə kasıb bağban ailəsində dünyaya göz açıb. Ailədə üçüncü övlad və sonbeşik olan Asəf atasını hələ bir yaşı olanda itirir. Ailənin bütün ağırlığı ananın üzərinə düşür. O, işdən yorğun qayıtsa da, uşaqlarını başına yığar və qarmon çalardı. Beləliklə, musiqi Asəfin həyatına və ürəyinə daxil olurdu.

Asəfin 7 yaşı olanda anası onu Dərbənd Realnı məktəbinə qoyur. O, burada uşaq xorunda oxumağa başlayır, klarnet çalmağı öyrənir. Həmin illərdə Dərbənddəki nəfəsli orkestr yay axşamlarında şəhər parkında konsert verirdi. Asəf də hərdənbir orkestrin tərkibində klarnet çalmağa dəvət edilirdi.

Onun 11 yaşı olanda ailəsi Bakıya köçür. O, əvvəlcə hərbi məktəbin nəzdində nəfəsli orkestrdə truba çalmağı öyrənir, sonra Bakı Musiqi Texnikumunun truba, violonçel, fortepiano siniflərində təhsil alır. “Truba üçün pyes”ini 14 yaşında texnikumda özü ifa edir. O vaxtadək trubanı hərbi marş aləti hesab edənlər Asəfin “Rast” muğamı əsasında bəstələdiyi pyesdən vəcdə gəlirlər.

Asəf Zeynallı Azərbaycan Dövlət Konservatoriyasında professional bəstəkarlıq təhsili almış ilk bəstəkardır. O, konservatoriyada oxuyarkən Üzeyir Hacıbəylinin məşğələlərini hər dəfə böyük səbirsizliklə gözləyirdi. A.Zeynallının yaradıcılığında dahi bəstəkarın böyük rolu olub. Üzeyir bəydən xalq musiqisinin əsaslarını öyrənən Asəf sonralar Azərbaycanın ən uzaq guşələrinə gedərək xalq mahnılarını toplayır. Gənc bəstəkar konservatoriyada Qərbi Avropa və rus klassik musiqisi dərnəyini yaradır. Onun məruzələri maraqla dinlənilir.

Asəf təhsil almaqla yanaşı, Türk işçi teatrında və konservatoriyanın nəzdindəki musiqi məktəbində işləyib. Qara Qarayev, Tofiq Quliyev, Cövdət Hacıyev kimi görkəmli bəstəkarlar onun şagirdləri olub.

A.Zeynallı Səid Rüstəmov, Əşrəf Həsənov və Fuad Əfəndiyevlə birgə “İbtidai not savadı” dərsliyini tərtib edib. İlk milli romansların, fortepiano və skripka üçün miniatür pyeslərin, ilk simfonik nümunələrin müəllifi kimi Azərbaycan musiqi mədəniyyəti tarixinə daxil olub. Avropa musiqisinin nəzəri əsaslarını dərindən mənimsəyən bəstəkar onları xalq musiqisi ilə sintez edərək orijinal əsərlər yaradıb. Onun “Ölkəm”, “Sərhədçi”, “Sual”, “Çadra”, “Seyran” və digər romansları sənətsevərlərin rəğbətini qazanıb və bu gün də sevilir. Özünün “Uşaq süitası” ilə Azərbaycan uşaq musiqisinin başlanğıcını qoyub.

İstedadlı bəstəkar “Sarı gəlin”, “Səndən mənə yar olmaz”, “O qara qaşlar” və digər xalq mahnıları üzərində işləyib, çoxlu sayda xalq mahnılarını nota salıb. Onun “Lay-lay”, “Günlər” pyesi, “Çahargah”, “Durna”, “Muğamsayağı” əsərləri kamera musiqisi üçün yeni üfüqlər açıb. Gənc bəstəkarın “Fraqmentlər” süitası Azərbaycan musiqisində ilk simfonik əsərdir. “Bakı” simfoniyasının ərsəyə gəlməsinə isə vaxtsız ölüm mane olub.

Xalq mahnılarını toplamaq üçün Qarabağ ekspedisiyasında iştirak edən Asəf Zeynallı Şuşada Xan Şuşinski ilə tanış olur, onun oxuduğu “Alma almaya bənzər” mahnısını çox bəyənir. Ekspedisiyadan qayıdarkən yolda yatalaq xəstəliyinə tutulur.

Asəf Zeynallı 1932-ci il oktyabrın 27-də vəfat edib. Hazırda Bakıda musiqi kolleci və paytaxt küçələrindən biri onun adını daşıyır.

Aprelin 8-də Azərbaycan Milli Xalça Muzeyində “Azərbaycanın qədim incəsənət nümunələrində və XIX-XX əsrlərə aid xalçalarında quş təsvirləri” adlı mühazirə keçiriləcək.

Muzeydən AZƏRTAC-a bildirilib ki, mühazirədə sənətşünaslıq üzrə fəlsəfə doktoru Səltənət Rzayeva mühazirədə tunc və dəmir dövrlərinə aid metal, keramika məmulatlarının, həmçinin xalçalarımızın üzərindəki quş təsvirləri, onların daşıdığı mənalar barədə ətraflı məlumat verəcək.

İştirak etmək istəyənlər əvvəlcə https://forms.gle/qiYwPwpUc6r43Dm49 linkindən qeydiyyatdan keçməlidirlər.

Xalq artisti, professor, Dövlət mükafatı laureatı, tarzən Ramiz Quliyevin 75 illiyinə həsr olunmuş “Ramiz Quliyev. Səslən tarım” adlı kitab işıq üzü görüb.

AZƏRTAC xəbər verir ki, “Elm və təhsil” nəşriyyatında çap olunan kitabın redaktoru və tərtibatçısı tanınmış jurnalist Tahir Aydınoğludur. “Yaradıcılıq xatirələrimin palitrası” adlanan məcmuədə dünyaşöhrətli tarzənin şəxsi xatirələri ilə bərabər, Azərbaycan və digər ölkələrin tanınmış sənət xadimləri və musiqiçilərinin məqalələri yer alıb. Professor Ramiz Quliyevin 65 illik yaradıcılıq fəaliyyəti və bu tarix zamanı baş vermiş əlamətdar hadisələr sənətkarın həmkarları və tələbələrinin yazılarında daha da canlanır və maraqlı məqamları ilə diqqət cəlb edir.

Məcmuə 6 hissədən ibarətdir - ilk iki bölümdə tarzənin uşaqlıq və gənclik illəri bağlı xatirələri əks olunub. Həmçinin, burada Ramiz Quliyevin yerli və xarici mətbu orqanlarda işıq üzü görmüş məqalə və yazılarına yer ayrılıb. Kitabın xüsusi bölümü Azərbaycanın İkinci Qarabağ müharibəsində mübarizəsi və möhtəşəm qələbəsinə həsr edilib. Növbəti iki bölüm isə sənətkarın sinfində müxtəlif illərdə təhsil almış tanınmış sənət adamlarının xatirələrindən ibarətdir - Milli Konservatoriyanın rektoru, professor Siyaviş Kərimi, Abdulla Qurbani, Serhat Turunc, Elxan Mənsurov, Malik Quliyev, Ramiz Əzizov, Sahib Paşazadə, Vüsal İsgəndərzadə, Ümid İbrahimov, Şahin Verdiyev, Polina Desyatniçenko, Muhammad Aman və digər tarzənlərin məqalələrində professor Ramiz Quliyevin pedaqoji yanaşması və yeni tar məktəbinin özəllikləri geniş təhlil olunub. Məcmuənin son iki bölümündə Milli Məclisin Mədəniyyət komitəsinin sədri, deputat Qənirə Paşayeva, professor Elmira Axundova, professor Nizami Cəfərov, Elmlər Akademiyasının vitse-prezidenti Dilqəm Tağıyev, professor Qəzənfər Paşayev, tanınmış yazıçı Natiq Rəsulzadə və Azərbaycanın digər tanınmış siyasi, mədəni və ictimai xadimlərinin yazılarına xüsusi yer ayrılıb. İndiyədək heç bir yerdə çap olunmamış və professor Ramiz Quliyevin şəxsi arxivindən olan fotolar kitaba xüsusi rəng qatıb.

Molla Pənah Vaqif ömrünün son illərini Qarabağ xanının vəziri olaraq Şuşada yaşamışdı. Vaqifin yaradıcılığının məhsuldar illəri məhz bu dövrə təsadüf edir.

1797-ci ildə İbrahimxəlil xanın qardaşı oğlu Məhəmməd bəy hakimiyyətə gəldikdən sonra şairi oğlu Əli bəylə birlikdə edam etdirir. Camaat Vaqifi Şuşada böyük şərəflə dəfn edir. Məzarının üstündə kiçik bir məqbərə də tikilir ki, bura da sonradan ziyarətgaha çevrilir.

Bu fikirləri AZƏRTAC-a açıqlamasında Milli Məclisin deputatı Səbinə Xasayeva söyləyib.

Deputat bildirib ki, Ulu Öndər, böyük tarixi şəxsiyyət Heydər Əliyev Azərbaycan KP MK-nın birinci katibi olanda həm poetik, həm də siyasi təfəkkürünə rəğbəti olan Molla Pənah Vaqifə 1982-ci ildə Qarabağın həmaili olan Şuşada heykəl qoydurdu. Şairin məzarı üstündə məqbərə-kompleks ucaldıldı. Məqbərə-kompleks Cıdır düzünə yaxın bir ərazidə inşa olunmuşdu. Dördkünc quruluşa malik idi. Türbə inşa edilərkən türbə relyef, arxitektura baxımından dağlıq massivə uyğunlaşdırılmışdı. Türbədə Vaqifin heykəltəraş Albert Mustafayevin hazırladığı büstü qoyulmuşdu.

“Vaqifin məqbərə-kompleksinin açılış mərasimində çıxış edən Ümummilli Lider Heydər Əliyev Şuşanı Azərbaycanın tarix və memarlıq abidəsi kimi dəyərləndirmişdi. 1982-ci il yanvarın 14-də keçirilən tədbirdə iştirak edən gənc şairlər Şuşada Vaqif Poeziya Günlərinin keçirilməsini təklif etmişdilər. Böyük tarixi şəxsiyyət təklifi müsbət qarşılamış, hətta "Mən özüm də gəlib iştirak edəcəyəm", – demişdi. Məhz Ulu Öndərimizin dəstəyi ilə Vaqif Poeziya Günləri Şuşanın işğalına qədər davam etdi.

Şuşa işğal olunanda ermənilər digər tikililər kimi türbəni də dağıtmışdılar. Vətən müharibəsində Zəfərimizdən dərhal sonra Prezident İlham Əliyevin tapşırığı əsasında işğaldan azad edilmiş ərazilərdə, o cümlədən Şuşada nəhəng bərpa və quruculuq işlərinə start verildi. Təsadüfi deyildir ki, Şuşada quruculuq işləri böyük Azərbaycan şairi və ictimai xadimi Molla Pənah Vaqifin türbəsinin yenidən qurulması ilə başladı. 2021-ci il yanvarın 14-də Azərbaycan Prezidenti İlham Əliyev Şuşaya səfərində abidə-kompleksin yenidən qurulması barədə tapşırıq verdi. Ulu Öndər Heydər Əliyevin 1982-ci ildə inşa etdirdiyi məqbərənin eynisini İkinci Qarabağ müharibəsində qazanılan Zəfərimizdən sonra Prezident İlham Əliyev yenidən inşa etdirdi. Bu, dövlətimizin başçısının Azərbaycan mədəniyyətinə, incəsənətinə verdiyi dəyəri nümayiş etdirir”, - deyə S.Xasayeva qeyd edib.

Deputat vurğulayıb ki, 2021-ci il avqustun 29-da Vaqifin məqbərəsinin açılışında iştirak edən Prezident İlham Əliyevin çıxışında xüsusi məqamlara toxunaraq bildirdi ki, təxminən 40 il bundan əvvəl, şaxtalı-qarlı havada, o da atası ilə birgə Vaqifin məqbərəsinin açılışı günündə iştirak edib. İkinci dəfə isə Şuşaya 1982-ci ilin iyul ayında Vaqif Poeziya Günləri keçiriləndə gəlmişdim. Prezident İlham Əliyev dedi ki, biz ikinci dəfə Vaqifin məqbərəsinin açılışını qeyd edirik: Vaqif Poeziya Günləri keçirilərkən atamın 59 yaşı var idi. Bu gün mənim 59 yaşım var. Bəziləri hesab edə bilər ki, bu, təsadüfdür. Ancaq mən hesab edirəm ki, burada böyük rəmzi məna var, tarix təkrarlanır. Azərbaycan tarixinin qara səhifəsi artıq arxada qaldı”.

S.Xasayevanın sözlərinə görə, Vaqifin adını daşıyan və tarixin müxtəlif dönəmlərində yaradılan məqbərə 306 yaşlı şairin xatirəsinə Azərbaycan xalqının əbədi sevgisini özündə təcəssüm etdirir.

“Molla Pənah Vaqif təxminən 1717-ci il aprelin 6-da Qazax mahalının Yuxarı Salahlı kəndində doğulub. Əsl adı Pənah, atasının adı Mehdi ağa, təxəllüsü Vaqifdir. Ziyalı bir şəxs olduğuna görə ona xalq arasında "Molla" titulu verilib. Vaqif yüksək təhsil görmüş, doğma dilindən əlavə ərəb-fars dillərini bilir, bir sıra dini və dünyəvi elmləri kifayət qədər mənimsəmişdi. Vaqif lirika, qoşma və qəzəl janrında mükəmməl əsərlərin müəllifidir.

Aprelin 6-sı Molla Pənah Vaqifin anım günüdür. Ruhu şad olsun”, - deyə Səbinə Xasayeva bildirib.

Pandemiyadan əvvəlki dövrə uyğun olaraq Azərbaycan Respublikası Nazirlər Kabinetinin qərarı ilə ölkə ərazisində xüsusi karantin rejiminin davam etdiyi dövrdə Bakı metropolitenində qatarların Qırmızı və Yaşıl xətlər üzrə (mǝkik hərəkət təşkil edilən "Cəfər Cabbarlı-Xətai" mənzili istisna olmaqla) hərəkət qrafikində növbəti optimallaşdırma aparılıb.

Bu barədə Reporta "Bakı Metropoliteni" QSC-dən bildirilib.

Məlumata görə, bu məqsədlə 2022-ci il sentyabr ayının 14-dən tətbiq edilmiş sıx qrafik dövründəki monitorinqlərin nəticəsi xüsusi araşdırılaraq təhlil olunub. Qeyd edək ki, monitorinqlər tətbiq edilən məhdudiyyətlərin aradan qaldırılması və digər sərnişindaşıma parametrləri üzrə aparılıb. Bunun nəticəsi olaraq, metropolitendə sərnişin sıxlığı, hərəkət istiqamətləri, gediş-gəliş vaxtı nəzərə alınıb.

Nəticə etibarilə, Bakı metropolitenində sərnişin axını, cüzi istisnalar qalmaqla, pandemiyadan əvvəlki sonuncu ən çox sərnişin daşınmış 2019-cu ilin templərinə yaxınlaşmaqdadır. 2022-ci ilin payızından başlayaraq müxtəlif müəssisələrin, ələlxüsus təhsil ocaqlarının fəaliyyətində ənənəvi sabit tədris rejimi tətbiq edilir. Bu isə metropolitendǝ pandemiya dövründə tez-tez dəyişən sərnişin axını templərinin sabitləşməsinə təsir edib. 2023-cü ilin noyabr ayından başlayaraq fevral-mart aylarında sərnişin sayı və axının dövrü müntəzəmliyi günün saatlarına görə tam olaraq sabitləşib. Bu səbəbdən səhər və axşam gur saatlar da daxil olmaqla, qrafikə müvafiq düzəlişlərin edilməsi qərara alınıb.

Bunun nəticəsində əvvəllər sərnişin sıxlığının tənzimlənməsi məqsədilə ehtiyat qismində "Nərimanov-Memar Əcəmi-Neftçilər-Memar Əcəmi” marşrutu üzrə xəttə buraxılan qatarlar artıq qrafik üzrə təyin olunmuş vaxtda müntəzəm marşrutla hərəkət edir. İş günləri ərzində gur saatlar səhər saat 07:00-10:00, axşam isə saat 17:00-20:00 müəyyən olunmaqla, iş günlərində qatarların "Həzi Aslanov-28 May" sahəsində intervalı, müntəzəm qaydada olmaqla, 2 dəqiqə müəyyənləşdirilib. Bu, Bakı metropoliteni xətlərinin texniki minimal intervallardır. xüsusiyyətlərinə görə mümkün ən optimal hərəkət qrafiki və müntəzəm tətbiq oluna biləcək.

Qeyd edək ki, iş günlərində qalan vaxt ərzində sərnişin axını templərinə uyğun olaraq, qeyd edilən sahədə qatarların hərəkəti, əsasən, 2,5 dəqiqə, səhər erkən və gecə saatlarına doğru böyük intervallarla tənzimlənəcək. Xüsusi olaraq diqqətə çatdırılır ki, iki xətt "28 May" stansiyasında birləşdiyindən buradan "İçərişəhər" və "Dərnəgül” istiqamətində qatarların hərəkət intervalı 2 dəfə çox olacaq.
Bununla belə, gün ərzində qrafikin dəqiq icrasını təmin etmək və xüsusi hallarda xəttə buraxılmaq üçün əlavə ehtiyat qatarların nəzərdə tutulması da diqqətdə saxlanılır.

Qrafikdə edilmiş dəyişikliklərlə əlaqədar "Bakmil" stansiyası istiqamətində iş günlərinin hərəkət cədvəli də dəyişdirilib və Bakı metropoliteninin rəsmi internet saytına yerləşdirilib (http://metro.gov.az/az/page/muddealar/depo-qatarlarinin-hereket-cedveli).

"Bakı Metropoliteni" QSC sərnişinlərinə müraciət edərək, istifadə qaydalarına riayət etməyi, xüsusən platformalarda qatarları gözləyərkən ehtiyatlı və diqqətli olmağı, qatarlardan minib-düşənlərə yol verməyi, vaqona minərkən qapı zonasında yubanmamağı və dayanmamağı xahiş edir. Çünki qatarların stansiyada yubanması intervalların pozulmasının səbəb olur. İntervalların norma həddini aşması isə qatarların hərəkət intensivliyini azaltmaqla, qatarların stansiyalara daxil olmadan tunellərdə dayanıb gözləməsinə, platformalarda, xüsusən sərnişin axını daha çox olan stansiyalarda qatar gözləyənlərin sayının daha da artmasına gətirib çıxarır.

Aprelin 5-də Azərbaycan Hərb Tarixi Muzeyində Aprel zəfərinin 7-ci ildönümünə həsr olunmuş “Aprel döyüşləri - Zəfərə gedən yolun başlanğıcı” adlı musiqili gecə təşkil edilib.

AZƏRTAC xəbər verir ki, tədbirdə muzey rəisi, polkovnik Əzizağa Qənizadənin, muzeyin tədqiqatçı-baş elmi işçisi Vahid İsmayılovun məruzələri və iştirak edən qonaqların çıxışları dinlənilib.

Çıxışlar zamanı Aprel döyüşlərinin Azərbaycan Ordusunun qələbəsi ilə nəticələndiyi vurğulanıb. Qeyd olunub ki, Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi, həmçinin Tərtər rayonunun Madagiz kəndi istiqamətində bəzi mövqelər düşməndən azad olunaraq, cinayətkar erməni rəhbərlərinin keçilməz erməni səngərləri haqqında uydurduqları mifi alt-üst edildi.

Daha sonra, erməni silahlı qüvvələrinin bu döyüşlərdə böyük itkilərə məruz qaldığı vurğulanıb: “Bizdə olan məlumatlara görə, 320-dən artıq düşmən məhv edildi və 500-dən artıq erməni hərbi qulluqçusu yaralandı. Qarşı tərəfin 30-dək tankı və digər zirehli texnikası, 25-dən artıq artilleriya qurğusu sıradan çıxarıldı, eyni zamanda Madagiz yaşayış məntəqəsində yerləşən qərargah və əsas hərbi hissələri məhv edildi. Ağdərə-Madagiz, Cəbrayıl istiqamətindəki yolların nəzarətdə saxlanılması imkanı əldə edildi. Aprel döyüşləri bütün dünyaya Azərbaycan Ordusunun gücünü, qələbə əzmini göstərdi. Tarixə “Dördgünlük müharibə” adı ilə düşən Aprel döyüşləri hər bir Azərbaycan vətəndaşının hərbi vətənpərvərlik ruhunu daha da yüksəltdi”.

Bədii hissədə Həzi Aslanov adına Ordu İdeoloji iş və Mədəniyyət Mərkəzinin solistlərinin ifasında hərbi-vətənpərvərlik mahnıları səsləndirilib.

Sonra 2016-cı ilin Aprel döyüşlərinə həsr olunmuş sənədli film nümayiş olunub.

Aprelin 4-də Bakı Ekspo Mərkəzində 19-cu Azərbaycan Beynəlxalq “Turizm və Səyahətlər” (“AITF 2023”) sərgisi qapılarını ziyarətçilərin üzünə açıb.

AZƏRTAC xəbər verir ki, “AITF” sərgisinin təşkilatçısı Caspian Event Organisers şirkətidir. Sərginin ənənəvi iştirakçısı olan Bolqarıstan “AITF 2023”ün baş sponsoru qismində çıxış edir, Özbəkistan isə tərəfdaş ölkədir.

“Caspian Event Organisers” şirkətinin baş direktoru Fərid Məmmədov 3 illik fasilədən sonra 19-cu Azərbaycan Beynəlxalq “Turizm və Səyahətlər” (“AITF 2023”) sərgisində yenidən bir araya gəlməkdən məmnunluğunu bildirib. O deyib: "Turizm sərgisi artıq ənənə halını alıb və Bakıda 19-cu dəfədir ki, keçirilir. Builki sərgidə 15 ölkəni təmsil edən 50-dən çox şirkət, qurum öz məhsul və xidmətlərini ziyarətçilərə təqdim edəcək. Ənənəvi olaraq, sərgi müxtəlif ölkələrdən turizm sənayesinin nümayəndələrini, milli və regional turizm təşkilatlarını və dövlət qurumlarını bir araya gətirir. Bu tədbir maraqlı tərəflərlə yeni əlaqələr qurmaq, satış coğrafiyasını əhəmiyyətli dərəcədə genişləndirmək, sənayedəki ən son yeniliklər və tendensiyalar haqqında məlumat əldə etmək, həmçinin yeni tərəfdaşlar və müştərilər tapmaq imkanı verən əsas platformalardan biridir. Bundan əlavə, sərgi Azərbaycanın cəlbedici səyahət məkanı kimi əhəmiyyətini vurğulamış olur və xalqımızın qonaqpərvərliyini xarici iştirakçılar və ziyarətçilərə nümayiş etdirir. “AITF 2023” sərgisinə Azərbaycanla yanaşı, Belarus, Bolqarıstan, Çexiya, Gürcüstan, İsveçrə, Kuba, Polşa, Özbəkistan, Rusiya, Sloveniya, Tunis və bir çox başqa ölkələrdən olan şirkətlər qatılıb. “AITF” sərgisində ənənəvi olaraq xarici ölkələr milli stendlərlə təmsil olunur. Budəfəki sərgidə də Belarus, Çexiya, Polşa və Özbəkistan öz milli stendləri ilə iştirak edirlər".

Dövlət Turizm Agentliyinin sədri Fuad Nağıyev beynəlxalq sərginin təşkilinin təqdirəlayiq olduğunu vurğulayaraq son illərdə ölkəmizdə turizm sahəsinin inkişaf etdirilməsi istiqamətində geniş işlərin görüldüyünü və bu sahəyə məxsusi diqqətin ayrıldığını bildirib: "AITF 2023” sərgisi pandemiya ilə bağlı yaranmış 3 illik fasilədən sonra yenidən turizm sektorunu diqqət mərkəzinə gətirir. Xarici və daxili turizmin inkişafı bizim üçün eyni dərəcədə əhəmiyyətlidir. Bu səbəbdən də istər xarici turistlərin ölkəmizə cəlb edilməsi, istərsə də daxili turizm xidmətlərinin təkmilləşdirilməsi istiqamətində aktiv və səmərəli fəaliyyəti dəstəkləyirik. Hazırda əsas məqsədimiz pandemiyadan əvvəlki rəqəmləri ən qısa zamanda bərpa edərək əvvəlkindən də çevik inkişafa və artıma nail olmaqdır. Yaxın 3 il üçün hədəfimiz 2026-cı ildə Azərbaycana səfər edən xarici vətəndaşların sayını 4 milyon nəfərə, ölkədaxili turizm səfərlərinin sayını isə 6 milyon nəfərə çatdırmaqdır. İşğaldan azad olunmuş torpaqlarımızda da turizmi inkişaf etdirmək əsas və prioritet hədəflərimizdəndir. Fəal istirahətin ən geniş yayılmış və kütləvi növü olan turizmə aid tədbirlər nəinki bu sənayenin nümayəndələrini, həm də yerli və xarici səyahətçiləri cəlb edir. Hər il minlərlə insan səyahət həvəskarları sırasına qoşulur və beləliklə, turizm daha geniş vüsət alır. “AITF 2023” sərgisi səyahət etməyi sevən Azərbaycan səyahətçiləri üçün də yeni turistik məkanları kəşf etmək baxımından olduqca əhəmiyyətli platformadır”.

Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov sərginin əhəmiyyətini vurğulayaraq burada olan iştirakından məmnunluğunu dilə gətirib: "Çox sevindirici haldır ki, artıq 3 illik fasilədən sonra yenidən bir araya gəlmişik. Bu sərgi sahibkarların öz xidmətlərini geniş kütləyə təqdim etmələri üçün geniş imkandır. İnanırıq ki, sərgini geniş kütlə ziyarət edəcək və buraya maraq böyük olacaq. Ənənəvi olaraq keçirilən bu sərgi turizm sənayesində mövcud çağırışların öyrənilməsi baxımından əlverişli platforma rolunu oynayır. İqtisadiyyatın bütün sektorlarında rəqabət qaydaları əvvəlki dövrlərə nisbətən fərqlənir. Pandemiyadan sonra ölkələr turist axını cəlb edilməsi uğrunda ciddi mübarizə aparır. Bu baxımdan ölkəmizdə turizm sektoruna mühüm diqqət ayrılır. Prezident İlham Əliyevin rəhbərliyi ilə əldə olunmuş sosial-iqtisadi tərəqqi bu sahənin hərtərəfli inkişafına yeni imkanlar açır".

Özbəkistanın Azərbaycandakı səfiri Bahrom Aşrafxanov ölkəsinin bu sərgidə ilk dəfə tərəfdaş ölkə kimi iştirak etdiyini qeyd edərək sərginin təşkilatçılarına minnətdarlığını bildirib: “Qardaş Azərbaycan və Özbəkistan xalqlarını türk xalqlarının etnosuna əsaslanan ortaq milli adət-ənənələr, din və mədəniyyət birləşdirir. Azərbaycan ilə Özbəkistan arasında ikitərəfli dostluq əlaqələrinin böyük tarixi və dərin kökləri var. Həmçinin iki ölkə arasında olan ticarət dövriyyəsini və turizm sahəsində olan əməkdaşlığı da xüsusi qeyd etmək olar. Qeyd edək ki, 2022-ci ildə Özbəkistana səfər edən turistlərin sayına görə Azərbaycan ilk 15-liyə daxil olub. Əminəm ki, növbəti illərdə də turizm sahəsi üzrə ölkələrimiz arasında əməkdaşlıq daha da inkişaf edərək ən yüksək pillələrdə qərarlaşacaq".

Bolqarıstanın ölkəmizdəki səfiri Ruslan Stoyanov ölkələrimiz arasındakı tarixi dostluq əlaqələrindən danışıb: “Bolqarıstan Azərbaycanla olan dostluq münasibətlərinə böyük əhəmiyyət verir. Bolqarıstanın Turizm Nazirliyi Azərbaycan Dövlət Turizm Agentliyi ilə ikitərəfli əməkdaşlığın gücləndirilməsinə və intensivləşdirilməsinə qətiyyətlə sadiqdir. Beləliklə xalqlarımız arasında çoxillik dostluq münasibətlərini daha da dərinləşdirəcəyik. 2022-ci ildə Azərbaycandan Bolqarıstana gələn turistlərin sayı 5 min 40 nəfər olub, bu da 2021-ci il göstəriciləri ilə müqayisədə 114 faiz daha çoxdur".

Azərbaycan Turizm Agentlikləri Assosiasiyasının İdarə Heyətinin sədri Göydəniz Qəhrəmanov bildirib ki, “AITF 2023”ün yenidən açılması turizm sahəsinin inkişafı baxımından böyük hadisədir. Bu sərgi turizm sənayesinin peşəkarları üçün çoxdan gözlənilən hadisədir.

Sonra isə ənənəvi lent kəsilərək Azərbaycan Beynəlxalq “Turizm və Səyahətlər” (“AITF 2023”) sərgisi açıq elan edilib.

Qeyd edək ki, aprelin 6-dək davam edəcək sərginin keçirildiyi günlər ərzində müxtəlif görüşlər, seminarlar və təqdimatlar təşkil olunacaq.