XƏBƏRLƏR

İyunun 24-də Azərbaycan Milli Xalça Muzeyində Silahlı Qüvvələri Günü münasibətilə tədbir keçiriləcək.

Xalça Muzeyindən bildirilib ki, tədbirdə Kanadada yaşayıb fəaliyyət göstərsə də, Azərbaycan silahsazlıq sənəti ənənələrini yaşadan, bu sənətkarlıq nümunələrinin hazırlanması, tədqiqatı və təbliğatı ilə məşğul olan məşhur silah ustası Emin Məmmədovun muzeyə bağışladığı iki xəncərin təqdimatı olacaq.

İyunun 23-də Beynəlxalq Muğam Mərkəzində Mədəniyyət Nazirliyi tərəfindən “Mədəniyyət naminə sülh” (Peace4Culture) adlı qlobal kampaniyanın təqdimat mərasimi keçirilib.

Tədbirdə mədəniyyət naziri Anar Kərimov, BMT-nin Sivilizasiyalar Alyansının ali nümayəndəsi Migel Anxel Moratinos və tanınmış ictimaiyyət nümayəndələri iştirak ediblər.

Mədəniyyət Nazirliyinin aparat rəhbəri Vasif Eyvazzadənin moderatorluğu ilə keçən tədbirdə əvvəlcə “Mədəniyyət naminə sülh” adlı qlobal kampaniyanın məqsədi, hədəfləri, fəaliyyət istiqamətləri barədə məlumat verib.

Bildirilib ki, kampaniyanın əsas məqsədi Azərbaycanın işğaldan azad olunmuş ərazilərində mövcud vəziyyətin, dağıdılmış infrastrukturun və mədəniyyətə qarşı törədilmiş soyqırımın dünyaya çatdırılmasına nail olmaqdır. Həmçinin dünyanın müxtəlif münaqişə regionlarında mədəni irsin qorunmasının orada sülh yaradılması vasitəsilə mümkün ola biləcəyinin, mədəni həyatın canlanmasında sülhün mühüm rol oynadığının, habelə ölkəmizin işğaldan azad olunmuş ərazilərində sülhün bərqərar olması ilə mədəniyyətin və həyatın dirçəlməsinin başqa regionlara da nümunə ola biləcəyini dünyaya çatdırmaqdır.

Sonra Böyük Britaniyanın Sülh, Etimad və Sosial Münasibətlər İnstitutunun İdarə Heyətinin sədri, professor Maykl Hardi və ICESCO-nun baş direktoru Salim bin Məhəmməd əl-Malikin videomüraciətləri olub.

Mədəniyyət naziri Anar Kərimov bildirib ki, bu qlobal kampaniya sülh vasitəsilə mədəni irsin qorunmasının, dinc və dayanıqlı sülhsevər cəmiyyətlərin qurulmasının və beynəlxalq sülh sistemlərinin gücləndirilməsinin, eləcə də sülhün əldə olunmasında mədəniyyətin rolu ilə yanaşı, mədəniyyətin inkişafında sülhün rolunun öyrənilməsini nəzərdə tutur. Kampaniya çərçivəsində dünyanın müxtəlif ölkələrindən və beynəlxalq təşkilatlarından diplomatların, ictimai-siyasi xadimlərin, görkəmli mədəniyyət və incəsənət adamlarının, media nümayəndələrinin, elm xadimlərinin işğaldan azad edilmiş ərazilərə dəvət edilməsi və sülh çağırışlarının bu ərazilərin fonunda səsləndirilməsi nəzərdə tutulur.

Dünyəvi və multikultural ölkə kimi Azərbaycanın mövqeyinin və sadiq olduğu dəyərlərin dünyaya düzgün çatdırılması olduqca vacibdir. Bu kampaniya, eyni zamanda, Azərbaycan Respublikasının Prezidenti İlham Əliyev tərəfindən 2008-ci ildə irəli sürülmüş “Bakı Prosesi” təşəbbüsü və 2010-cu ildə BMT Baş Assambleyası çərçivəsində irəli sürülmüş Ümumdünya Mədəniyyətlərarası Dialoq Forumu təşəbbüsünün qlobal miqyasda davamını və onun əsas ideyalarına sadiqliyini nümayiş etdirir. Təsadüfi deyil ki, Birləşmiş Millətlər Təşkilatının Baş katibi 2017, 2018 və 2019-cu illərdə BMT Baş Assambleyasına təqdim etdiyi məruzələrində “Bakı Prosesi”ni xüsusi vurğulayaraq Ümumdünya Mədəniyyətlərarası Dialoq Forumunu mədəniyyətlərarası və dinlərarası dialoq sahəsində BMT-nin əsas qlobal platformalarından biri elan etmişdir. Bununla əlaqədar “Mədəniyyət naminə sülh” kampaniyası mədəniyyəti qorumaq naminə sülhü təşviq etməyin əhəmiyyətini bir daha bəyan edərək dünyanı malik olduğu mədəni müxtəlifliyə sahib çıxmağa və onun təhlükəsizliyini vaxtında təmin etməyə çağırır.

“Mədəniyyət naminə sülh” qlobal kampaniyası beynəlxalq qurumların və xarici ölkələrin, yerli və beynəlxalq qeyri-hökumət təşkilatlarının, biznes qurumlarının qoşulması üçün açıqdır. Bu qlobal layihə çərçivəsində mədəni irsin vəziyyətinə dair sərgilər, sülhə çağırış aksiyaları, elmi və ədəbi müsabiqələr, sosial media, foto və video, film, musiqi və digər audiovizual layihələrin həyata keçirilməsi nəzərdə tutulur.

BMT-nin Sivilizasiyalar Alyansı üzrə Ali nümayəndəsi Migel Anhel Moratinosun tədbirin əhəmiyyətindən danışaraq bildirib ki, dünyada sülhün, təhlükəsizliyin qorunması naminə birgə çalışmaq lazımdır: “Dünya pandemiya böhranı və onun iqtisadi nəticələri ilə üzləşdi. Biz gələcək üçün yeni yol tapmalı, birgə yaşamalıyıq. Azərbaycan bu yeni təşəbbüslə müraciət etdi və mən buna dərhal reaksiya verdim. Biz bu günün reallığına və problemlərinə cavab vermək üçün yeni mexanizm və alətlər tapmalıyıq. Biz daha yaxşı cəmiyyət qura, birgə sülh içində yaşaya bilərik”.

Prezident İlham Əliyevin rəhbərliyi altında Azərbaycanın inkişafının şahidi olduğunu söyləyən Migel Anhel Moratinos deyib: “Bu gün mənim üçün həm də xüsusi gündür, Azərbaycan öz torpaqlarını azad etdikdən sonra Prezident İlham Əliyevlə görüşdüm. Mən ümid, ləyaqət, sevinc hisslərinin şahidi oldum. Azərbaycanın dövlət başçısı ilə konstruktiv müzakirəmiz, dialoqumuz oldu. O, ölkənin tarixində yeni səhifənin açıldığını dedi. İnanıram ki, xalqınız üçün yeni səhifə, gələcək qarşıdadır”.

Sonda diplomatik korpus və KİV nümayəndələrini, habelə digər tədbir iştirakçılarını maraqlandıran suallar cavablandırılıb.

“YARAT” Müasir İncəsənət Məkanının təşkilatçılığı ilə Azərbaycan Rəngkarlıq Muzeyində açılan sərgilər artıq yay rejimində fəaliyyət göstərirlər.

“YARAT”dan bildirilib ki, sərgi ilə tanış olmaq istəyənlər çərşənbə axşamı və bazar günü olmaqla saat 12:00 –dan 20:00-dək bələdçi ilə sərgiyə baxış keçirə bilərlər. Eyni zamanda saat 21:00 – dan 22:00-dək sərgiyə sərbəst (bələdçisiz) baxmaq mümkündür.

Qeyd edək ki, hazırda muzeydə rəssam Rəşad Ələkbərovun "Özünsən!" solo sərgisi və "XX əsrin son çiçəkləri: Y nəsli" qrup sərgisi, eləcə də "Öz adanı kəşf et" adlı sərgi ziyarətçilər üçün açıqdır.

Bu günlərdə Azərbaycan Yazıçılar Birliyinin üzvü, şair İsa Sevərin “Gedir xərəkdə dünyam...” adlı yeni kitabı işıq üzü görüb.

Kitabda müəllifin eyni adda poeması yer alıb. “Borçalı” nəşriyyatında çap olunan kitabın naşiri və redaktoru Müşfiq Borçalıdır.

Kitaba “İsa Sevər poeziyasında ana obrazı” adlı “Ön söz” yazan şair Rizvan Nəsiboğlu şairin ilhamını aşıb-daşan dağ çayına bənzədərək müəllif haqqında deyir: “İsanın bütün kitablarında elə bir atəşin ana sevgisi var ki, bu sevginin işığında əriməmək, xəyalında bir qüdrətli ana obrazı yaratmamaq mümkün deyil. ... İsa Sevər poeziyasında ananın dilində xeyir-dua var, ananın nisgili hiss olunur. Onlar İsanın özü boyda, öz mənəvi əzabları, dərdləri boydadır. Bunları hiss etmək, duymaq üçün təkcə yazıçı, filoloq olmaq yox, həm də fəhmli oxucu olmaq yetərlidir”.

Azərbaycan Respublikasının Prezidenti İlham Əliyev iyunun 23-də BMT-nin Sivilizasiyalar Alyansının ali nümayəndəsi Migel Anxel Moratinosu qəbul edib. Migel Anxel Moratinos dedi: -Siz mənim nə qədər şad olduğumu, yenidən burada olmaqdan necə məmnun olduğumu və Sizin ən böyük uğurlarınızdan birini dünən görməkdən nə dərəcədə şad olduğumu təsəvvürünüzə belə gətirə bilməzsiniz. Düşünürəm ki, günüm çox təsirli keçdi. Prezident İlham Əliyev: Bəli, siz hər şeyin şahidi oldunuz. Migel Anxel Moratinos: Ağdamda bəyanatımda, yekun bəyanatımda dedim ki, mən bir növ qarışıq hisslər keçirirəm. Birincisi, siyasi və peşəkar həyatımda heç vaxt görmədiklərimin şahidi oldum. Heç nə yoxdur, tamamilə dağıntıdır. İnsan kədərlənir ki, XXI əsrdə belə bir halın necə şahidi olmaq olar? İkincisi, düşünürəm ki, Ağdama səfərim yaxşı keçdi, çünki Sizin xüsusi nümayəndəniz mənə gələcək üçün planı göstərdi. Bu, böyük baxışdır, cənab Prezident. Yolları, insanların məşğul olduğunu, dinamikanı görmək imkanı böyük qürur hissi verir. Azərbaycan hər zaman inkişaf edib və bu inkişaf daha da güclənəcək. Mən özümü hər zaman Azərbaycanın dostu hesab etmişəm, bu dəfə də Sizinlə olmaqdan və BMT Sivilizasiyalar Alyansının ali nümayəndəsi qismində yeni missiyamda Sizin səylərinizi, Xarici İşlər Nazirliyini və Mədəniyyət Nazirliyinizi dəstəkləməyə çalışmaqdan qürur duyuram. Məni qəbul etdiyinizə və birlikdə görə biləcəyimiz işləri nəzərdən keçirmək imkanına görə təşəkkür edirəm. Prezident İlham Əliyev dedi: -Ölkəmizə, həmçinin işğaldan azad edilmiş ərazilərə səfər etdiyinizə görə təşəkkür edirəm. Siz öz hissləriniz barədə danışdınız. Düşünürəm ki, hər kəs eyni hissləri keçirir. Mən müharibədən sonra ilk dəfə Ağdama səfər edəndə qəmginlik hissi, kədər hissi, eyni zamanda, şəhərin yenidən qurulması ilə bağlı qətiyyət hissi keçirirdim. Yəqin sizə məlumat verilib ki, bir aydan da az vaxtda biz artıq yenidənqurma prosesinə başladıq. Siz gördünüz, hər şey dağılıb. Eyni zamanda, təkcə Ağdam rayonunda 97 min mina basdırılıb. Biz Ermənistandan yalnız Ağdam rayonu üzrə mina xəritələrini ala bilmişik, digər rayonlarda yüz minlərlə mina var. Onlar xəritələri bizə verməkdən imtina edirlər və bizdə artıq 100-dən çox ölən və yaralanan oldu. Müharibə başa çatandan sonra minalardan, piyada əleyhinə və tank əleyhinə minalardan 30-a yaxın adam həlak oldu, 100-dən çox mülki şəxs yaralandı, o cümlədən bu ayın əvvəlində 2 jurnalist həlak oldu. Bilirsiniz ki, onlar şəhərləri müharibə zamanı, Birinci Qarabağ müharibəsi zamanı deyiI, ondan sonra dağıdıblar. Onlar bunu Birinci Qarabağ müharibəsi dayanandan sonra demək olar ki, 30 il ərzində sistematik şəkildə bir neçə səbəbdən dağıdıblar. Birincisi, bütün tikinti materiallarını götürmək üçün. Çünki evlər sökülmüş, daşlar aparılmışdır. Bu, oğurluq idi. İkinci səbəb azərbaycanlılara geri qayıtmağa imkan verməmək idi. Çünki onlar düşünürdülər ki, total dağıntıdan sonra heç kim qayıtmayacaq. Təkcə şəhərlərdə deyil, kəndlərdə də, - siz digər istiqamətlərə gedəndə, məsələn Cəbrayıla, siz Füzulidə də olmusunuz, - Zəngilanda, Qubadlıda vəziyyət eynidir. Bütün kəndlər, bütün şəhərlər dağıdılıb. İndi biz onları minalardan təmizləməli, həmçinin paralel olaraq yenidənqurmaya başlamalıyıq. Biz artıq bütün səylərimizi toplamışıq, bütün resurslarımızı səfərbər etmişik. Böyük infrastruktur layihələrinə artıq başlanıb. Sizə bəlkə də bununla bağlı məlumat verilib. Biz onları yenidən quracağıq və düşünürəm ki, bu miqyasda dağıntıdan inkişafa, insanlar üçün layiqli yaşayış standartlarına doğru dünyada nadir təcrübə nümayiş etdirəcəyik. Həmin ərazilərə səfər etdiyinizə görə təşəkkür edirəm. Bu, həqiqətən də sizin müharibədən, uzun müddət davam edən işğaldan əziyyət çəkmiş insanlara rəğbətinizin, dəstəyin göstəricisidir.

İyunun 22-də BMT-nin Sivilizasiyalar Alyansının ali nümayəndəsi Füzuli rayonundan sonra Ağdama səfər edib. Qonağı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli müşayiət edib. BMT-nin ali nümayəndəsi Ağdamın indiki vəziyyəti, burada işğalçı Ermənistan Respublikasının törətdiyi vəhşiliklər, eləcə də tarixi, dini və mədəni abidələrimizin vandalizmə məruz qalması barədə ətraflı məlumatlandırılıb. Azərbaycan Respublikası Prezidentinin xüsusi nümayəndəsi Emin Hüseynov Ağdam şəhərinin Baş planı ilə tanış olan Migel Angel Moratinosa həyata keçiriləcək quruculuq işləri barədə də ətraflı məlumat verib. Diqqətə çatdırıb ki, Azərbaycan Prezidenti İlham Əliyev mayın 28-də Ağdama səfəri zamanı şəhərin yenidən qurulmasının təməli qoyulub. BMT-nin ali nümayəndəsi Ağdamda Qarabağ xanlığının banisi Pənahəli xanın sarayının yerləşdiyi İmarət kompleksində olub. İşğal edilən ərazilərdəki digər tarixi tikili və abidələr kimi Pənahəli xanın imarəti də ermənilər tərəfindən təhqir edilib, vandalizmə məruz qalıb, saray tövlə kimi istifadə edilib. Qonaq daha sonra Ağdam şəhər Cümə məscidində ermənilərin törətdikləri barbarlıqla da tanış olub. Bildirilib ki, Ermənistan tərəfi məscidi sırf hərbi məqsədlər üçün istifadə etdiklərinə görə tam dağıtmayıblar. Məscidin minarələri daxildən sökülüb, tavanı bir neçə yerdən uçurulub, dizayn və yazıları tanınmaz vəziyyətə salınıb. İşğalçılar  Ağdam Cümə məscidində də mal-heyvan saxlamaqla azərbaycanlılara, müsəlman aləminə qarşı öz nifrətlərini nümayiş etdiriblər.   Dövlət Xidmətinin rəisi Azad Cəfərli jurnalistlərə müsahibəsində işğaldan azad olunmuş ərazilərdə inventarlaşdırma və mühafizə məqsədilə aparılan monitorinqlər barədə məlumat verib. Diqqətə çatdırıb ki, işğaldan azad olunmuş ərazilərdə indiyədək 1500-dək abidənin monitorinqi başa çatdırılıb və bu fəaliyyət davam edir. Qeyd edib ki, monitorinqin nəticələrinə uyğun olaraq növbəti strateji bərpa prosesi dəqiqləşdirilir və bu işdə aidiyyəti dövlət orqanları ilə sıx əlaqələr qurulub: “Artıq Şuşa şəhəri üzrə inventarlaşdırma tam başa çatdırılıb. Həmin abidələrin elektron xəritəsi də mövcuddur. Bu xəritə “Google earth” proqramı əsasında qurulub. Tezliklə onun da təqdimatı keçiriləcək. Gələcəkdə isə bu proqramın ictimaiyyətə açıq versiyasını da hazırlamağı düşünürük”. BMT-nin Sivilizasiyalar Alyansı üzrə ali nümayəndəsinin işğaldan azad olunmuş rayonlarımıza səfərinə də toxunan Dövlət Xidmətinin rəisi bildirib ki, bu səfər Azərbaycan həqiqətlərini, eləcə də erməni vandalizmini, dağıntıları, mənimsəmə faktlarını dünya ictimaiyyətinə, beynəlxalq təşkilatlara çatdırmaq baxımından xüsusi önəm daşıyır. Migel Angel Moratinos Ağdama səfəri ilə bağlı mətbuata açıqlama verib: “İşğaldan azad olunmuş Azərbaycan ərazilərindəki vəziyyəti gəlib gözümüzlə gördük. Ermənilər tərəfindən bu yerlərdə olan məscidlərin, teatr və hotel binalarının dağıdılması bizi çox kədərləndirir və hər birimizdə çox ağır təəssüratlar yaratdı. Biz gələcəyi düşünürük və ümid edirik ki, Azərbaycanın gözəl və zəngin tarixi abidələri olan bu ərazilər bərpa olunacaq, buralara həyat qayıdacaq”.

BMT-nin Sivilizasiyalar Alyansının ali nümayəndəsi Migel Anhel Moratinos ölkəmizdə səfərdədir. İyunun 22-də ali nümayəndənin Ermənistan Respublikası silahlı qüvvələri tərəfindən tarix-mədəniyət abidələrimizə, mədəni və dini irsimizə qarşı həyata keçirdiyi vandalizm aktları ilə tanış olmaq məqsədi ilə Füzuli və Ağdam rayonlarına səfəri təşkil olunub. BMT-nin Sivilizasiyalar Alyansının ali nümayəndəsini Füzuli rayonuna səfərində mədəniyyət naziri Anar Kərimov müşayiət edib. Səfər iştirakçılarına əvvəlcə rayonun Qaraxanbəyli və Merdinli kəndlərində yerləşən məscidlərdə və qəbiristanlıqda törədilmiş erməni barbarlığı haqqında məlumat verilib. Sonra Füzuli şəhərində “Araz” qəzetinin redaksiyasının, rayon Mədəniyyət evinin, Məhəmməd Füzulinin heykəlinin dağıntı və qalıqlarına, 1879-cu ildə inşa edilmiş məscidin olduğu əraziyə baxış olub. Migel Anhel Moratinos Qarğabazarı kəndində qədim karvansaraya, hamam və XVII əsrə aid məscidin qalıqlarına da baxıb. BMT-nin ali nümayəndəsi Migel Anhel Moratinos jurnalistlərə açıqlamasında burda gördüyü mənzərədən danışıb: “Füzuli rayonunda gördüyüm mənzərə məni dəhşətə gətirdi. Bu yerlərin dağıntılara məruz qalması, ərazilərin tarixi-mədəni, dini irsinin yerlə yeksan edilməsi, müqəddəs məkanların təhqir olunması qəbuledilməzdir”. Ali nümayəndə qeyd edib ki, insanlar fərqli olsalar da, bu, bizi bir-birimizdən ayırmamalı, əksinə, bizi birləşdirən dəyər olmalıdır: “Bütün xalqlar bu müxtəliflikləri qəbul edərək bir-birilərinə hörmət və anlayışla yanaşmalıdırlar. Çünki sülh və beynəlxalq hüquq prinsipləri və normalarının riayət edildiyi mühit bizim iradəmizi ifadə etməyə şərait yaradır və bütün bəşəriyyətə sülh və rifah gətirir”. Mədəniyyət naziri Anar Kərimov Migel Anhel Moratinosun işğaldan azad olunan ərazilərə səfər edən ilk yüksək vəzifəli BMT təmsilçisi olduğunu vurğulayıb: “BMT-nin Sivilizasiyalar Alyansının ali nümayəndəsinin işğaldan azad olunmuş Azərbaycan torpaqlarına səfəri bizim Zəfərimizdən sonra bu qurumun ölkəmizə ilk yüksəksəviyyəli nümayəndəsinin tarixi səfəri kimi də əlamətdardır. Bu, eyni zamanda, Azərbaycana göstərilən dəstəkdir”. Qeyd edib ki, Migel Anhel Moratinos Füzulidə bir neçə yerə baxış keçirib və erməni vandallığının şahidi olub: “BMT-nin ali nümayəndəsi gördü ki, bizim torpaqlarımız, bizim irsimiz hansı vəziyyətdədir. Əsasən də dini məbədlərimiz, məscidlərimiz dağıdılıb, ya da ki, vandalizmə məruz qalıb”. Mədəniyyət Nazirliyinin Füzuli rayonu ilə bağlı gələcək planlarından danışan Anar Kərimov qeyd edib ki, Prezident İlham Əliyevin tapşırığı ilə Füzuli və Cəbrayıl rayonlarının baş planları hazırlanır: “Aidiyyəti qurumların rəhbərləri ilə bu istiqamətdə müzakirələr aparacağıq ki, Füzulinin yenidən qurulması hansı formada olacaq. Prezidentin tapşırığı var ki, hər bir dağıdılmış şəhərimizdə İşğal və Zəfər muzeyləri inşa edilsin. Bu yaxınlarda Ağdamda dövlətimizin başçısının iştirakı ilə təməlqoyma mərasimi də keçirildi. Füzulidə də belə muzeylərin yaradılması planlarımız var”.

Yeni truppası və orkestri ilə bu günlərdə yaranmasının 75 illiyini qeyd edən Bakı Dövlət Sirkinin (BDS) rəsmi veb-saytı (circus.az) istifadəyə verilib.

Müasir dizaynda təqdim edilən yeni saytda altı əsas bölmə yer alır. Yeni loqo ilə təqdim edilən saytda “haqqımızda”, “afişa”, “qalereya”, “xəbərlər”, “korifeylər” və “əlaqə” bölmələrində sirkin fəaliyyəti ilə maraqlanan hər kəs özünə aid olan məlumatı əldə edə bilər.

Saytda xəbərlərlə yanaşı, reportaj, müsahibə və araşdırma məqalələri də yayımlanır.

Fərqli formatda hazırlanan sayt vasitəsilə sirkin tamaşaları üçün onlayn bilet satışı da nəzərdə tutulub.

Bakı Müasir İncəsənət Muzeyində Bakı Höte mərkəzi, Latviya Respublikasının səfirliyi, İsveç Krallığının səfirliyi və “Platform Art” təşkilatının birgə dəstəyi ilə Əməkdar rəssam Səbinə Şıxlinskayanın “Yaxından” adlı fərdi sərgisinin açılışı olub.

Müasir İncəsənət Muzeyinin direktoru Xəyyam Abdinov tədbirdə iştirak edənlərə minnətdarlığını bildirib və Səbinə Şıxlinskayanın yaradıcılığından söhbət açıb: “Səbinə rəssamlıqda öz üslubu ilə seçilən biridir. Biz şadlıq ki, bu gün Səbinə Şıxlinskayanın burada sərgisi açılır”.

Səbinə Şixlinskaya Müasir İncəsənət Muzeyinin direktoru Xəyyam Abdinova, muzeyin əməkdaşlarına və sərginin təşkilinə kömək göstərənlərə təşəkkür edib: “Bu gün mən şadam ki, siz bu sərgidə iştirak edirsiniz. Mən bugünkü sərgini tək Azərbaycan deyil, bütün dünya neftçilərinə həsr etmişəm”.

İsveçrə səfiri Müriel Peneveyre bildirib ki, pandemiya şəraitində belə bir sərginin açılışı heç də asan deyil. Neft həyatımızın mühüm hissəsini təşkil etdiyindən bu sərgiyə maraq olduqca böyükdür.

Tədbirdə çıxış edən Latviyanın ölkəmizdəki səfiri Daynis Qarançs, İsveçin ölkəmizdəki səfiri Kristian Kamill Səbinə Şıxlınskayanın peşəkarlığını və sərginin möhtəşəmliyini qeyd ediblər.

Sonra qonaqlar sərgi ilə tanış olublar.

“Yaxindan” layihəsi müasir incəsənət əsərlərinin multimedia sərgisidir. Sərginin əsas mövzusu neft sahəsinə və “qəhrəmanlıq” aspektindən çıxış edən neftçilərin həyatına həsr olunub. Sərgidə monumental rəsm əsərləri, video və səs instalyasiyaları təqdim olunub.

Qeyd edək ki, sərgi iyulun 27-dək davam edəcək.

Azərbaycan dünyanın ən böyük və ən qədim animasiya festivalı olan Fransanın Annecy Beynəlxalq Animasiya Film Festivalında təmsil olunub. Festivalın 45-ci buraxılışı 5 gün davam edib.

Animasiya kinosunun “Oskar”ı sayılan Annecy festivalında Azərbaycanı “Animafilm”in direktoru Rəşid Ağamalıyev, 3-cü “Animafilm” festivalının qalibi Fidan Axundova və rejissor Durna Səfərova təmsil ediblər.

Fidan Axundovanın Fransaya səfəri və MIFA akkreditasiyası onun ötənilki “Anımafılm” festivalının "Ən yaxşı Azərbaycan qısametrajlı animasiya filmi" mükafatını qazanması sayəsində mümkün olub. Xatırladaq ki, həmin mükafatın sponsorları məhz Azərbaycandakı Fransız İnstitutu (IFA), Fransanın Azərbaycandakı səfirliyi və Annecy Beynəlxalq Animasiya Film Festivalı olmuşdur.

“Bu tarixi hadisədir. Azərbaycan kinosunun tarixində ilk dəfə animasiya filmimiz Annecy Festivalında müsabiqə proqramında iştirak etdi. Durna Səvərovanın "Fainanın sirri" ANNECY-in "Perspectives" müsabiqə proqramında yarışdı. Onu da qeyd edim ki, “Animafilm” Festivalı artıq ikinci dəfədir ki, Annecy-nin MIFA animasiya bazarında təmsil olunur. Biz Azərbaycan və Fransa arasında çox önəmli animasiya proqramları hazırlamışıq. Bu barədə tezliklə geniş məlumat veriləcək”, - deyə “Animafilm” Beynəlxalq Animasiya Festivalının direktoru Rəşid Ağamalıyev deyib.

Xatırladaq ki, 2021-ci ildə “Animafilm” Festivalı Fransanın Azərbaycandakı səfirliyi və Fransız İnstitutunun (IFA) tərəfdaşlığı və Annecy Beynəlxalq Animasiya Film Festivalının dəstəyi ilə "Ən yaxşı Azərbaycan qısametrajlı animasiya filmi" kateqoriyası üzrə mükafat təqdim edir. Bu kateqoriyada “Animafilm” festivalının qalibi 2022-ci ildə Fransada keçiriləcək Annecy Festivalına səyahət edəcək və MIFA adlı peşəkar akkreditasiya əldə edəcək. Qalibin bütün səyahət və yaşayış xərcləri IFA tərəfindən ödəniləcək.

IV “Anı̇mafı̇lm” Beynəlxalq Animasiya Festivalı oktyabrın 20-dən 24-dək Bakıda keçiriləcək. Festival beş gün ərzində uşaqlar və böyüklər üçün çəkilmiş onlarla yerli və xarici animasiya filmlərini təqdim edəcək. Builki festivalın mövzusu “Əlillik” olacaq.