XƏBƏRLƏR

Müdafiə Nazirliyi və Bakı Şəhər Mədəniyyət Baş İdarəsinin birgə təşkilatçılığı ilə qazi və hərbçi övladları üçün növbəti xeyriyyə aksiyası keçirilib.

Baş İdarədən AZƏRTAC-a bildirilib ki, aparıcı Ayaz Məmmədov aksiya iştirakçılarını salamlayaraq, davamlı şəkildə bu səmtdə görülən işlərdən söz açıb, aksiyada həkim, plastik cərrah Dilqəm Məhərrəmovun artıq bir ilə yaxındır təmənnasız iştirak etdiyini vurğulayıb. Sonra Müdafiə Nazirliyinin Şəxsi Heyət Baş İdarəsinin Qadınlar və hərbi qulluqçu qazilərlə iş üzrə şöbəsinin rəisi Zümrüd Səmədova çıxış edərək, təşkil olunan tədbirin cəmiyyət üçün əhəmiyyətindən danışıb.

Tədbirə, həmçinin iş xanımı Ruhi Əliyeva, "Natiq" ritm qrupunun rəhbəri Xalq artist Natiq Şirinov dəstək veriblər.

Övladları sünnət olunmuş qazi və hərbçi ailələrinin üzvləri onları daim diqqətdə saxlayan aksiya təşkilatçılarına göstərdikləri qayğıya görə təşəkkürlərini bildiriblər.

Bakı Şəhər Mədəniyyət Baş İdarəsinin Sabunçu rayon Mərkəzləşdirilmiş Kitabxana Sisteminin 2 nömrəli filialı 10 nömrəli peşə məktəbinin şagirdləri ilə birlikdə Xəlil Rza Ulutürkün 90 illiyi ilə əlaqədar tədbir keçirib.

Baş İdarədən AZƏRTAC-a bildirilib ki, şöbə müdiri Sevinc Əliyeva şagirdlərə şairin həyat və yaradıcılığı haqqında məlumat verib.

“Azərbaycan poeziyasının orijinal ədəbi siması olan Xəlil Rza Ulutürk ədəbiyyatımızın görkəmli nümayəndəsi, filosof və mütəfəkkir şair, milli-demokratik hərəkatımızın yorulmaz mücahididir. O, Azərbaycan ədəbiyyatında türkçülük, azərbaycançılıq və istiqlalçılıq ideologiyasının ən yaxşı davamçılarından biridir. Xəlil Rza Ulutürk çoxlarından fərqli olaraq, poeziyada şəxsiyyətini, şəxsiyyətində isə poeziyasındakı amallarını gerçəkləşdirmiş şairlərdəndir. Xəlil Rza Ulutürkün yaradıcılığında azərbaycançıllıq ideası böyük yer verilib. Onun poeziyalarının kökü vətən eşqi, torpaq ilə bağlıdır. Şair xalqın milli mübarizəsində göstərdiyi xüsusi xidmətlərinə görə “İstiqlal” ordeni ilə mükafatlandırılıb. Xəlil Rza Ulutürk 1994-cü ildə vəfat edib və Fəxri xiyabanda dəfn edilib”, - deyə şöbə müdiri bildirib.

Prezident İlham Əliyev oktyabrın 21-də “Şuşa Şəhəri Dövlət Qoruğu İdarəsi” publik hüquqi şəxsin Müşahidə Şurasının tərkibinin təsdiqlənməsi haqında Sərəncam imzalayıb.

AZƏRTAC xəbər verir ki, Sərəncama əsəsən, Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov Müşahidə Şurasının sədri təsdiq edilib.

Həmçinin iqtisadiyyat nazirinin birinci müavini Elnur Əliyev, mədəniyyət nazirinin birinci müavini Elnur Əliyev, Dövlət Şəhərsalma və Arxitektura Komitəsi sədrinin birinci müavini Namiq Hümmətov və Dövlət Turizm Agentliyi sədrinin müavini Azadə Hüseynova Müşahidə Şurasının üzvü təsdiqləniblər.

Azərbaycan Turizm Agentlikləri Assosiasiyasının (ATAA) nəzdində yaradılan Turizm Ekspertlər Klubunun regionların turizm imkanlarının qiymətləndirilməsi və bölgələrin daxili turizm potensialının artırılması məqsədilə görüşü keçirilib.

ATAA-dan AZƏRTAC-a bildirilib ki, görüşdə ilkin mərhələdə İsmayıllı və Şamaxı rayonlarının mövcud turizm infrastrukturu ilə yaxından tanış olmaq məqsədilə infoturun təşkil olunması təklif olunub.

İnfoturun məqsədi qeyd edilən bölgələrdə mövcud turizm marşurutları, turizm məhsulları, istirahət və əyləncə mərkəzləri, hotellər ilə yaxından tanış olmaq, toplanılan məlumatları assosiasiyaya təqdim etməkdir.

Assosiasiya bu marşurutların və məhsulların daha da təkmilləşdirilməsi üçün təkliflər hazırlayaraq Dövlət Turizm Agentliyinə müraciət edəcək.

Növbəti səfərin Gəncə şəhərinə təşkili nəzərdə tutulub.

Bu gün görkəmli müğənni, Xalq artisti Şövkət Ələkbərovanın doğum günüdür

Bu gün görkəmli müğənni, Xalq artisti Şövkət Ələkbərovanın anadan olmasının 100-cü ili tamam olur.

AZƏRTAC xəbər verir ki, Şövkət Ələkbərovanın sənəti daim dövlətimiz tərəfindən yüksək qiymətləndirilib. Prezident İlham Əliyevin müvafiq Sərəncamı ilə sənətkarın 90 illik yubileyi ölkəmizdə geniş şəkildə qeyd edilib.

Müğənninin ifa etdiyi mahnılar ilk gündən dinləyicilərin ürəklərinə yol taparaq yaddaşlarda həkk olunub. Şövkət Ələkbərova o nadir şəxsiyyətlərdəndir ki, sağlığında özü haqqında xoş təəssürat, dünyasını dəyişəndən sonra isə xoş xatirələr qoyub. Bu isə insanın fəxr etdiyi ən yüksək zirvədir.

Bu gün bənzərsiz ifaları ilə könülləri fəth edən Şövkət Ələkbərovanın möhürünü qoyduğu mahnılar tələbələrinin, tanınmış və gənc sənətçilərin ifasında yenidən səslənir. Onun ifasında dinlədiyimiz hər bir nəğmə harada səslənməsindən asılı olmayaraq bu böyük sənətkarı xatırladır.

1922-ci il oktyabrın 20-də Bakıda dünyaya gələn unudulmaz sənətkar Asəf Zeynallı adına Musiqi Məktəbində Hüseynqulu Sarabskinin sinfini bitirdikdən sonra səhnə yaradıcılığına başlayıb.

1938-1945-ci illərdə Azərbaycan Dövlət Mahnı və Rəqs Ansamblında solist kimi çalışan sənətkar, sonralar M.Maqomayev adına Azərbaycan Dövlət Filarmoniyasının solisti olub. Şövkət Ələkbərovanın ifaçılığı üçün yüksək vokal mədəniyyəti, emosionallıq və lirizm, muğam yaradıcılığı üçün isə məharətli improvizasiya bacarığı səciyyəvi idi.

Nəsillər arasında körpü yaradan müğənni

Üzeyir Hacıbəyli, Səid Rüstəmov, Bülbül kimi sənətkarların diqqətini çəkərək onların xeyir-duasını alan Ş.Ələkbərova ömrünün sonunadək ifası ilə özünü sübut etməklə yanaşı, sənətə əsl sənətkar kimi xidmət göstərib. Onun “Qarabağ şikəstəsi”ni məlahətli səsi ilə mükəmməl səviyyədə ifa etməsi peşəkar musiqi sənətinə gəlişinin əsasını qoydu. Şövkət Ələkbərovanın ifasında səslənən xalq mahnıları, muğamlar, bəstəkar mahnıları Azərbaycanda çox böyük məşhurluq qazandı.

Dünyanın bir çox şəhərlərində uğurla çıxış edən Şövkət Ələkbərovanın repertuarına “Segah”, “Qatar”, “Şahnaz” kimi muğamlar, Azərbaycan bəstəkarlarının və Orta Şərq xalqlarının mahnıları daxil idi. Şövkət xanım haqqında bir çox bəstəkarlarımız, o cümlədən Tofiq Quliyev, Arif Məlikov, Cahangir Cahangirov, Ramiz Mirişli və başqaları öz xatirələrini bölüşüblər. Bu sənət adamlarının dediklərində bir ümumi xətt var. O da Şövkət xanımı əsl professional kimi xarakterizə etməkdir. Burada ümumi bir fikirlə də rastlaşırıq: “Şövkət Ələkbərova istər xalq lirik mahnılarının, istərsə də bəstəkarlarımızın yaratdıqları lirik mahnıların bənzərsiz ifaçısıdır”.

Nəğmələri məşhurlaşdıran ifaçı

“Dərələr”, “Ağ çiçəyim”, “Bir könül sındırmışam”, “Gedək üzü küləyə”, “Ağlaya-ağlaya”, “Haradasan”, “Məhəbbət”, “Tez gəl”, “Süsən sünbül”, “Dəli Ceyran”, “Ay qadası”, “Yar gəldi”, “Kürdün gözəli”, “Ceyran” və digər onlarla mahnı böyük sənətkarın ifasında möhürlənib. Şövkət xanımın repertuarında olan mahnılarda söz, musiqi və ifa bir-birini tamamlayaraq vəhdət təşkil edib. Elə buna görə də, müğənninin ifa etdiyi mahnılar ilk ifadan dinləyicilərin ürəklərinə yol taparaq yaddaşlarda dərin iz buraxıb. Onun konsertlərində iştirak edən insanlar etiraf edirlər ki, Şövkət Ələkbərovanın mahnıları dillər əzbəri olduğundan tamaşaçıların dodaqlarının tərpənməsini müşahidə etməmək mümkünsüz idi.

Musiqidə belə bir məqam var ki, xalq tərəfindən sevilən mahnılar zaman keçdikcə xalq mahnıları kimi qəbul olunur. Sözsüz ki, belə mahnıları yaradan sənətkarlar üçün bu, böyük xoşbəxtlikdir. Şövkət xanımın ifa etdiyi mahnılar məhz bu qəbildən idi. Onun mahnıları səsləndikcə Şövkət xanımı da yaşadacaq.

Bu il görkəmli psixoloq-alim, professor, Əməkdar elm xadimi, “Şöhrət” ordenli Əbdül Əlizadənin anadan olmasının 90 illiyi tamam olur.

Görkəmli alimin 90 illiyi münasibətilə M.F.Axundzadə adına Azərbaycan Milli Kitabxanasının əməkdaşları tərəfindən “Psixoloq-alim Əbdül Əlizadə” adlı virtual sərgi hazırlanıb. Virtual sərgidə fotolar, Ə.Əlizadənin müəllifi olduğu kitablar və haqqında yazılan məqalələr nümayiş olunur.

Virtual sərgi ilə tanış olmaq istəyənlər http://anl.az/el/vsb/Ebdul_Elizade/index.htm linkindən istifadə edə bilərlər.

Eyni zamanda Milli Kitabxanada Əbdül Əlizadənin həyat və yaradıcılığını əhatə edən ənənəvi kitab sərgisi də açılacaq.

Qeyd edək ki, Əbdül Əlizadə pedaqoji fəaliyyətə 1955-ci ildə Ə.Əzimzadə adına Azərbaycan Dövlət Rəssamlıq Məktəbində başlayıb. Daha sonra Azərbaycan Dövlət Pedaqoji İnstitutunun psixologiya kafedrasında müəllim, baş müəllim və dosent vəzifələrində çalışıb. O, 1963-cü ildə Azərbaycan Dövlət Pedaqoji İnstitutunun aspiranturasını bitirib. İstedadlı psixoloq “Şagirdlərin yaradıcı təxəyyül fəaliyyətində analiz və sintez proseslərinin xüsusiyyətləri” mövzusunda namizədlik, 1976-cı ildə isə “Cinsi dimerfizm və şəxsi qarşılıqlı münasibətlərin psixoloji problemləri” doktorluq dissertasiyalarını müdafiə edib. Bir psixoloq kimi onun elmi yaradıcılığında şagirdlərin yaradıcı təxəyyül mövzusu xüsusi yer tutub. Gənc alim bu mövzunu müxtəlif aspektlərdən tədqiq edərək orijinal elmi-praktik nəticələrə gəlib. Təhsil psixologiyası sahəsində apardığı tədqiqatları təkmilləşdirməklə yanaşı, o, etnopsixoloji məsələlərin öyrənilməsinə diqqəti artırıb, təhsildə şəxsiyyətin etnopsixoloji zəmində formalaşdırılması ideyasını irəli sürüb.

Ə.Əlizadə məktəbi fərdiyyət psixologiyası ilə daha yaxından bağlı olmuş, onun etnopsixoloji, cinsi, mənəvi, yaradıcılıq aspektlərindən öyrənilməsini əsas vəzifə kimi qarşıya qoymuşdur.

O, elmi fəaliyyətinə görə bir sıra orden və medallarla, o cümlədən “Şöhrət” ordeni ilə təltif olunub, “Əməkdar elm xadimi” fəxri adına layiq görülüb.

Təhsilin nəzəriyyə və praktikası ilə məşğul olan görkəmli pedaqoq, Əməkdar elm xadimi, psixoloq-alim, professor Əbdül Əlizadə 2015-ci il fevralın 22-də dünyasını dəyişib.

Oktyabrın 19-da Azərbaycan Milli Xalça Muzeyində (AMXM) “Gənc tamaşaçılar üçün muzey” adlı beynəlxalq konfransın açılışı olub.

AZƏRTAC xəbər verir ki, mədəniyyət nazirinin müavini Sevda Məmmədəliyeva konfransın beynəlxalq təcrübənin öyrənilməsi, paylaşılması baxımından geniş imkanlar yaratdığını, dünya muzey mütəxəssislərinin mədəni əməkdaşlıq əlaqələrini daha da möhkəmləndirdiyini bildirib.

Azərbaycan Milli Xalça Muzeyinin direktoru Şirin Məlikova uşaqların muzeylərə cəlb edilməsi, burada onların maraqlarına uyğun mühitin formalaşdırılması məsələlərinin aktuallığını diqqətə çatdırıb, konfransın məqsəd və əhəmiyyətindən danışıb.

Sessiyalar bitdikdən sonra konfrans iştirakçıları muzeyin ekspozisiyası ilə, həmçinin Zərgərlik fondu ilə yaxından tanış olublar. Daha sonra onlar muzeyin Ənənəvi texnologiya şöbəsində yeni toxunmuş “Zəfər” xalçasının ənənələrə uyğun kəsimi mərasimində iştirak ediblər.

Qeyd edək ki, oktyabrın 21-dək davam edəcək konfransda Azərbaycan, Almaniya, Bolqarıstan, Çexiya, Hollandiya, Latviya, Qırğızıstan, Özbəkistan, Rusiya, Serbiya, Türkmənistan kimi ölkələrdən 24 muzey işçisinin çıxışları dinləniləcək. “Muzeylər və məktəblər: muzey pedaqogikasının üfüqləri”, “Muzeylərdə uşaqlar üçün rəqəmsal materiallar”, “Uşaqlar, yeniyetmələr və valideynlər üçün muzey proqramları”, “Uşaqlar və muzey: muzey mühitində dayanıqlı inkişafın perspektivləri”, “Uşaq auditoriyasının genişlənməsi və dinamikası: inklüziv layihələr” mövzuları üzrə müzakirələr aparılacaq.

Konfrans AMXM və Mədəniyyət Nazirliyinin təşkilatçılığı, MDB ölkələrinin Dövlətlərarası Humanitar Əməkdaşlığı Fondunun dəstəyi ilə keçirilir.

"Azərbaycan Turizm Agentlikləri Assosiasiyası" İctimai Birliyi Şamaxı və İsmayıllı rayonlarının turizm potensialının reallaşdırılması məqsədi ilə təkliflər hazırlayaraq Dövlət Turizm Agentliyinə təqdim edəcək.

Report bu barədə Assosiasiyaya istinadən xəbər verir.

Məlumata görə, ötən gün qurumun nəzdindəki Turizm Ekspertlər Klubunun regionların turizm imkanlarının qiymətləndirilməsi və bölgələrin daxili turizm potensialının artırılması məqsədilə görüşü keçirilib. Görüşdə ilkin mərhələdə adları çəkilən rayonların turizm infrastrukturu ilə yaxından tanış olmaq üçün infoturun təşkil olunması təklif olunub. İnfoturun məqsədi qeyd edilən bölgələrdə mövcud turizm marşrutları, turizm məhsulları, istirahət və əyləncə mərkəzləri və hotellər ilə yaxından tanış olmaq, toplanılan məlumatları Assosiasiyaya təqdim etməkdir.

Daha sonra bu marşurutların və məhsulların daha da təkmilləşdirilməsi üçün təkliflər hazırlanacaq.

Növbəti səfər Gəncə şəhərinə təşkil oluna bilər.

BP şirkətinin Cəbrayıl rayonunda inşasını planlaşdırdığı “Şəfəq” günəş elektrik stansiyasının (GES) 2024-cü ildə istismara verilməsi gözlənilir.

Report xəbər verir ki, bunu energetika naziri Pərviz Şahbazov 20 oktyabr - Energetiklər Günü münasibətilə rəsmi mətbuatda dərc edilmiş məqaləsində bildirib.

Onun sözlərinə görə, hazırda illik təxminən, 500 milyon kVt/saat elektrik enerjisinin istehsalı proqnozlaşdırılan 240 MVt gücündə GES-in inşası üzrə danışıqlar gedir: "Mühəndislik, dizayn və maliyyə məsələlərinin bu ilin sonuna qədər yekunlaşdırılması, 2023-cü ildə stansiyanın inşasına başlanması, 2024-cü ildə isə istismara verilməsi gözlənilir”.

Nazir bildirib ki, bu layihədə elektrik enerjisinin virtual transferini nəzərdə tutan biznes modelinin tətbiqi planlaşdırılır: “Bu model elektrik enerjisinin istehsalı və istehlakı üzrə “Şəfəq Layihəsi” və Səngəçal terminalı arasında bütün tərəflər üçün mənfəətli, eyni zamanda dekarbonizasiyaya töhfə verəcək mexanizmi özündə əks etdirir. Başqa sözlə, Qarabağda istehsal ediləcək “yaşıl enerji” Abşerona ötürüləcək, nəticədə Səngəçalda elektrik enerjisi üçün istifadə edilən təbii qaza qənaət ediləcək”.

Bakı Şəhər Mədəniyyət Baş İdarəsinin Nizami rayon Mərkəzləşdirilmiş Kitabxana Sistemin 2 saylı filialı 251 nömrəli tam orta məktəbin şagirdləri ilə birlikdə azadlıq şairi Əhməd Cavadın anadan olmasının 130 illiyi ilə əlaqədar "İstiqlal şairi" adlı tədbir keçirib.

Baş İdarədən AZƏRTAC-a bildirilib ki, filialın müdiri R.Şirinova, kitabxananın böyük metodisti İ.İmanova, məktəbin müəllimi R.Sarıyeva şair Əhməd Cavadın həyat və yaradıcılığı haqqında ətraflı məlumat veriblər.

“Ədəbi mühitdə və geniş ictimaiyyətdə həm də cümhuriyyət dövrünün ən parlaq şairi kimi tanınan Ə.Cavadın bədii, siyasi ideya dünyası təbiət və sevgi lirikası qədər zəngindir. Onun Azərbaycanın müstəqilliyi, dövlət quruculuğu sahəsindəki fəaliyyəti, həmçinin mövqeyi yeni romantik və vətəndaşlıq poeziyamızın parlaq nümunələrini yaratması ilə xarakterizə olunur. Əhməd Cavad şeir-sənət aləminə qatıldığı ilk günlərdən Azərbaycan türklərinin və türk dünyasının milli şairi kimi sevilib”.

Tədbirin bədii hissəsində şagirdlər tərəfindən Əhməd Cavadın şeirləri səsləndirilib.